Ashighe agen mba ngeren Bibilo ka ve kimbir ôron kwagh u orngeren Bibilo ugen nan vande ngeren yô. Nenge atôakyaa atar a a alaghga yange na ve ve er kwagh nahan yô:

Ka hanma shighe yange i nger kwagh shono? Ior kpishi yange ve lu a ukôpi mba Atindi a Mose sha ayange a Mbaiserael la ga. Yange ve hemban ungwan er i ôron Atindi ne shighe u ve za kohol imôngo ken tabernakel yô. (Dut. 31:10-12) Yange ve tile sha ahwa imôngo ken atô u ikpelaior, nahan alaghga akaa a danen ve yange aa lu shighe u i lu ôron Atindi ne yô. (Neh. 8:2, 3, 7) Nahan yange i gba u a ôr akaa a vesen a i soo ér ve fa la kwa kimbir kimbir, sha er a lu ve ican ga u umbur avur a ruamabera, shi dondon kwagh u ve hen ken a la yô. Er i ôron akaa a vesen la kwa kimbir kimbir yô, kwagh ne wase ve u umbur akaa vighe vighe ken Atindi a Yehova na ve la.—Lev. 18:4-22; Dut. 5:1.

Yange i nger kwagh shon nena? Avegher a Bibilo agen ka atsam. Ikyav i tesen yô, takeda u Upasalmi man Icam i Hemban kua takeda u Ukwelegh cii ka atsam. Ashighe agen ka i ter asember kwa kimbir kimbir ken icam. Kwagh ne ka a na yô, itinekwagh i icam la i due tser tser, shi a wase mba ve lu ungwan la, u kôron asember a icam shon ken ityou. Ikyav i tesen yô, nenge asember a a lu ken Pasalmi 115:9-11 la. I kaa ér: “We, Iserael, suur sha TER; ka Un A lu iwasen ve man perutya ve kpaa ye. We, ya u Aron, suur sha TER; ka Un A lu iwasen ve, man perutya ve kpaa ye. Ne mba ne cie TER yô, suur nen sha TER; ka Un A lu iwasen ve, man perutya ve kpaa ye.” Er i ter asember la kwa kimbir kimbir yô, kwagh la una wase mba ve lu wan icam ne la u lun a akaainjaa a i ôr ker la ken ishima.

Yange i nger kwagh shon sha ci u nyi? Ashighe agen mba ngeren Bibilo yange ve ôr kwagh kwa kimbir kimbir u tesen er a lu kwagh u hange hange yô. Ikyav i tesen yô, shighe u Yehova kaa a Mbaiserael ér ve de ye awambe ga la, yange ôr a Mose ér a ôr Mbaiserael tindi ne acin imôngo. Yange soo ér ve fa ér uma u kwagh ngu ken awambe a na. Inja na yô, awambe ka uma. (Lev. 17:11, 14) Shighe kar yô, mbaapostoli kua mbatamen mba ken Yerusalem gbe va teren akaa a i gbe u Mbakristu vea palegh, sha er vea er kwagh sha ishima i Aôndo yô, ve kimbir ôron er i lu u vea nyagh awambe yô.—Aer. 15:20, 29.

Er Bibilo i ôr akaa agen kwa kimbir kimbir nahan kpa, kwagh la maa tese ér Yehova soo ér i hingir ieren yase u eren nahan ga. Ikyav i tesen yô, Yesu kaa ér: “Shighe u ne lu eren msen yô, de kimbir nen kwagh môm gbem. . . ga.” (Mat. 6:7) Been yô maa a ter akaa a se fatyô u eren msen sha mi ve a lu sha ishima i Aôndo yô. (Mat. 6:9-13) Er se kimbir asember ken mbamsen asev ga nahan kpa, se fatyô u eren msen sha kwagh môm acin imôngo.—Mat. 7:7-11.

Mkaanem ma Aôndo ôr akaa agen kwa kimbir kimbir nahan ka sha inja je. Ka gbenda ugen u Ortesen wase u hemban cii la a lu tesen se sha u se zua a iwasen yô.—Yes. 48:17, 18.