SHA iyange i Tomatar, Janawari 18, 2023 la, i yôô sha ijiir yase i jw.org la ér i tsua Anmgbian Gage Fleegle kua Jeffrey Winder ér ve lu Mbahemenev mba Shin Itine mba Mbashiada mba Yehova. Anmgbianev mba uhar mban cii civir Yehova sha mimi anyom imôngo.

Anmgbian Fleegle vese hen kpentar u Pennsylvania ken tar u Amerika. Mbamaren nav yange ve tese un kwagh u Yehova. Shighe u lu gumor la, tsombor na mough yem hen an-jiir ugen ape kwagh hemba gban sha mbapasenkwagh yô. Shighe karen yô, a er batisema ken uwer u Novemba ayange 20, ken inyom i 1988 la.

Hanma shighe yô, mbamaren mba Anmgbian Fleegle yange ve taver un ishima ér a hii u eren Yehova tom hanma shighe. Ashighe kpishi yange ve lôhô mbatamen mba sôron atôônanongo kua anmgbianev mba shin Betel hen ya ve. Nahan Anmgbian Fleegle a nenge er i saan anmgbianev mban iyol yô. Yange er batisema ica gba ga je maa hii u eren pania ken uwer u Setemba 1, ken inyom i 1989 la. Anyom nga karen ahar yô, Anmgbian Fleegle kure awashima u lu a mi u za eren tom shin Betel shighe u lu anyom 12 la. Yange hii u eren tom shin Betel u ken Brooklyn la ken uwer u Oktoba, inyom i 1991.

Anmgbian Fleegle yange er tom shin Betel ken gbaatom u wan ityakeda agbende la anyom anigheni, maa i va yem a na ken Gbaatom u Nengen sha Tomshiren la. Yange lu ken tiônnongo u i eren mkombo ken zwa Russia yô anyom kpuaa. Ken inyom i 2006 la, a vôso kwase na Nadia, nahan kwase na kpa hii u eren tom shin Betel vea na. Yange ve er tom u pasen kwagh ken tar u Portugal shi ve va er tom ne ken tar u Spain anyom pue. Anmgbian Fleegle yange eren tom ken Gbaatom u Nengen sha Tomshiren la anyom nga kar kpishi yô, i kaa ér a za er tom vea Afishi a Kômatii u Tesen Kômatii u Nengen sha Ityesen la. Maa ken uwer u Maaci inyom i 2022 la, i tsua un ér a za er tom u wasen Kômatii u Nengen sha Tomshiren, u Mbahemenev mba Shin Itine.

 Anmgbian Winder di yange vese hen geri u Murrieta, hen kpentar u California ken tar u Amerika. Mbamaren nav yange ve tese un mimi, nahan va er batisema sha iyange i Maaci 29, inyom i 1986 la. Uwer ugen ngu ker yô, maa a tôô ishuen pania. Yange pania u lu eren ne doo un kpishi je yô, a soo ér una za hemen. Eren ishuen pania ne iwer ngi karen kpishi yô, a hii u eren pania u keke ken uwer u Oktoba 1, inyom i 1986 la.

Shighe u Anmgbian Winder lu gumor la, yange a za nenge a anmgbianev nav mba vesen uhar mba ve lu eren tom shin Betel hen shighe la yô. Kwagh la yange na yô, un kpa lu a isharen i za eren tom shin Betel shighe u va hingir organden la. Nahan ken uwer u Mei inyom i 1990 la, i yila un ér a za er tom shin Betel u ken Wallkill la.

Anmgbian Winder yange er tom vea Gbaatom u Nengen Ér Iyaagh Ki Betel Ki Tsembelee kua Gbaatom u Nengen sha Sule u Betel shi er tom vea Afishi a Nengen sha Anmgbianev mba Shin Betel man ajiir agen kpishi. Yange vôso kwase na Angela ken inyom i 1997 la, hii shighe la je, mba eren tom shin Betel zan zan nyian. Ken inyom i 2014 la, i tindi ve shin Betel u ken Warwick la, mba ze yô, Anmgbian Winder za wase tom u maan afishi a shin itine la. Ken inyom i 2016 la ve yem hen Ijiir i Nyôron Imakeranta i Watchtower la, ken geri u Patterson. Nahan Anmgbian Winder za er tom vea gbaatom u eren icer i ungwan a ungwa man uvidio la. Anyom nga kar er anyiin nahan yô maa shi ve hide ve yem ken Warwick, nahan i kar ér Anmgbian Winder a er tom vea Kômatii u Nengen sha Tsombor u Betel. Ka ker ken uwer u Maaci inyom i 2022 la yô, i tsua un ér a er tom u wasen Kômatii u Nengen sha Tsombor u Betel, u Mbahemenev mba Shin Itine la.

Se sôn ser Yehova a ver nomsombaiorov mba ve lu uiyua mban doo doo, er ve lu eren tom u Tartor kpoghuloo yô.—Ef. 4:8.