Bibilo pase wang ér Yehova ngu a tahav mbu tsengan pasen kwagh u ken hemen. (Yes. 45:21) Kpa i kera ôr se hanma kwagh sha kwagh u tahav nav mbun ga. Sha nahan yô, ka hanma kwagh se fe sha tahav mbu Yehova a lu a mi u tsengan pasen kwagh u ken hemen la ga. Kpa akaa nga kpuaa a se fe yô.

Yehova una fatyô u eren nyityôkwagh i a soo cii, kpa ashighe agen ka a tsua u gban den tsô. Una fatyô u eren tom a kwaghfan na u a lu a ikighir ga la, u tsengan pasen nyityôkwagh i ken hemen i a soo cii. (Rom. 11:33) Kpa er Yehova a kôron iyol na tsaha yô, una fatyô u tsuan ér una fa akaa agen a aa va er ken hemen ga.—Nenge Yesaia 42:14.

Yehova ka a na i er ishima na. Kwagh ne wase se u kaven tahav mbu a lu a mi u tsengan pasen kwagh u ken hemen la nena? Yesaia 46:10 kaa ér: “U M pasen hii sha mhii zan zan mkur, man hii sha ayange a tsuaa la je, akaa a a lu a vande eren ga la; M kaa Mer: Awashima Wam una lu je, Me er kwagh u a doom ken ishima u eren la cii.”

Ityôkyaa i môm i Yehova a tsengan pasen kwagh u ken hemen yô, ngu a tahav mbu eren akaa. Ashighe agen uumace ka vea nengen fiim shin vea ôron takeda yô, ve yem ken mkur u fiim shin takeda u ve lu ôron la sha er vea fa mkur u kwagh shon yô. Yehova yô saa una er nahan ve una fa kwagh u ken hemen ga. Kpa una fatyô u tsuan shighe jighilii u a soo u eren ma kwagh yô, nahan shighe la una kuman yô, una na kwagh shon una er nahala vough.—Eks. 9:5, 6; Mat. 24:36; Aer. 17:31.

Ka nahan ve Bibilo i er tom a asember er “ver” kua “M vande veren ishima sha kwagh” u pasen kwagh u Yehova ka a er sha akaa a ken hemen agen ye. (2 Utor 19:25; Yes. 46:11) I zua a inja i asember ne ken ishember igen ken zwa u yange i hii ngeren Bibilo ker la, man inja i ishember shon ér “ormaantyegh.” (Yer. 18:4) Er ormaantyegh u nan fe tom tsembelee ka nan er inyatyuu i hingir ityegh ki doon kenger nahan, kape Yehova kpa ka a sôr shin a gema akaa sha er una kure awashima na je la.—Ef. 1:11.

Yehova na uumace ian i tsuan kwagh u ve soo yô. Tsough kwagh u kper or a lu ken hemen la ga. Shin nan ér ior mba dedoo ve tsua akaa a aa nyôr a ve ken mtim ga. A na hanma or ian i tsuan kwagh u nan soo u eren a uma u nan yô. Nahan kpa ka a tese ve akaa a vea eren ve a kpe ve iyol yô.

De se tese ikyav sha akaa ahar. Hiihii yô se nenge ikyav sha kwagh u ior i Nineve. Yehova yange tsenga pasen ér a tim gar u Nineve, sha ci u afer a ve. Kpa zum u ior i Nineve gema ishima yô, Yehova “de kwagh u bo u A wa ishima u eren ve la; A kera er un ga.” (Yona 3:1-10) Yehova yange gema awashima u lu a mi sha ior i Nineve la, sha ci u yange ve ungwa icintan na la nahan ve gema asema.

Ikyav i sha uhar yô, ka kwaghôron u profeti u yange pase er Shirushi una hemba gar u Babilon, nahan una due a Mbayuda uikyangen shi una na ve ian i hiden za maan tempel u Yehova yô. (Yes. 44:26–45:4) Tor Shirushi u Pershia yange kure kwaghôron u profeti ne. (Esera 1:1-4) Shirushi yange civir Aôndo u mimi la ga. Kpa Yehova er tom a na u kuren kwaghôron u profeti ne, kpa gema kighir Shirushi ér a civir un ga.—Anz. 21:1.

Jighilii yô, ka di akaa kpuaa a Yehova ka a hen sha mi shighe u a lu pasen kwagh u ken hemen je la. Orumace môm nana fatyô u fan hanma kwagh u Yehova a henen shin a eren ga. (Yes. 55:8, 9) Kpa akaa a se fe sha kwagh u Yehova la, ka a seer taver jighjigh u se ne ser hanma kwagh u a eren cii ka sha inja, kua akaa a a tsenga pasen sha kwagh u ken hemen la kpaa.