1-2. Ka nyi ia wase se u kaven er ka i lu Yehova ken ishima sha mbaaie mba i we un iyol laa?

 TÔÔ ase wer: Or u u soo kwagh u nan kpishi yô, nan lam sha a we dang. U fa er kwagh u nan ôr la i lu aie yô, kpa mbagenev gema na nan jighjigh. Man u hemban vihin je yô, ve ôr mbagenev kwagh u ve ungwa sha iyol you la, nahan mbagenev kpishi na ve jighjigh. Nahan a lu u ken ishima nena? Aluer kwagh u ior gba u ishima, shi iti you gba u kwagh yô, ka keng a vihi u.—Anz. 22:1.

² Ikyav ne wase se u fan er yange lu Yehova ken ishima shighe u i vihi un iti la yô. Ortyom ugen yange ôr Ifa, u lu kwase u hiihii la akaa a mimi ga sha iyol i Yehova. Nahan Ifa lumun a akaa a i ôr un la. Kwagh la yange na yô, mbamaren asev mba hiihii mbara hemba Yehova ato. Nahan isholibo man ku hingir u nyôron ken tsombor u orumace. (Gen. 3:1-6; Rom. 5:12) Mbamzeyol mba se lu tagher a mi nyian, er ku man ityav, kua ican ne cii, ka sha ci u mbaaie mba Satan hii u eren ken sule u Eden la. Mbaaie mba Satan wa Yehova iyol, kua mbamzeyol mba ve dugh ken ieren na la vihi Yehova je ka u henen a hen ga. Nahan kpa, ishima vihi un saa her ga. Kpa ngu “Aôndo u sar sar” her.—1 Tim. 1:11.

3. Ka ian i icivirigh i nyi se lu a mini?

³ Se fatyô u tesen ser akaa a Satan ôr sha iyol i Yehova la ka aie. Ka se er kwagh ne sha u dondon tindi u a kaa ér: “Wuese nen iti i TER” la. (Ps. 113:1) Ka sea ôron mbagenev akaa a dedoo sha iyol i Yehova yô, se tese ser se mba wuese iti na. We u wuese iti i Yehova kpa? De se nenge  atôakyaa a vesen a aa wase se u wuese iti i Aôndo a ishima yase cii yô.

KA SEA WUESE ITI I YEHOVA YÔ, I SAAN UN IYOL

4. Ka sea wuese Yehova nahan i doo un sha ci u nyi? Tese ikyav. (Shi nenge foto kpaa.)

⁴ Ka sea wuese iti i Ter wase u sha la yô, i saan un iyol. (Ps. 119:108) Kwagh ne tese ér Aôndo u hemban agee la, ngu er u uumace mba yinan mba ka ve soo ér i wuese ve sha u taver ve ishima laa? Ei. De se tese ikyav. Tôô wer wanyekwase u kiriki yevese va kuve ter na maa kaa ér, “Dadi u ngu ter u hemban fan kwagh sha tar cii!” Nahan ter na la se, sha ci u kwagh u wan na a er la doo un. Er nan i doo un yumu? Ka sha ci u a soo ér wan na a taver un ishima, shin a wuese un shinii? Ei. Kpa ka sha ci u wan na la doo un ishima, shi saan un iyol er wan shon a tese ér un doo un ishima shi a wuese un yô. Shi a fa er ieren i wan na la ia na a saan un iyol er a lu vesen la yô. Ka atôakyaa a a ne ve Yehova u a lu Ter wase u hemban cii la kpa, ka sea wuese un ve i doo un je la.

5. Ka sea wuese iti i Aôndo yô, ka aie u han ka se pon?

⁵ Ka sea wuese Ter wase u sha la yô, se tesen ser aie ugen u Satan a we se asange asange iyol la ka mimi ga. Satan yange kaa ér or môm nana fatyô u paase iti i Aôndo sha mimi ga. A kaa ér orumace môm nana fatyô u tilen sha mimi shighe u nan tagher a ameen ga. Shi a kaa ér aluer se cii se fa ser se de u civir Aôndo kpa se tema a kpe se iyol yô, se de u civir un. (Yobu 1:9-11; 2:4) Kpa Yobu yange tile sha mimi, nahan a tese ér Satan ka oraie. We kpa u fatyô u tilen sha mimi er Yobu nahan kpa? Hanma wase nan ngu a ian i icivirigh i tan ikyaa a Ter wase u sha la, shi nan ér i saan un iyol sha u civir un sha mimi. (Anz. 27:11) Ka ian i icivirigh i numben a mi ga cii.

6. Se dondo ikyav i Tor Davidi kua i Mbalevi la nena? (Nehemia 9:5)

⁶ Mba Yehova a doo ve ishima ka ve soo ér vea wuese iti na a ishima ve cii. Tor Davidi yange nger ér: “Wuese TER, we uma wam; kwagh u a lu ken mo cii kpaa, á wuese icighanti Na.” (Ps. 103:1) Davidi yange fa ér u wuese iti i Yehova la, ka kwagh môm a u wuese Yehova. Ka sea ungwa iti i Yehova la yô, se henen sha or i a lu yô, shi se hen sha aeren a na a doon tsung kua akaa a kpilighyol a a er la kpaa. Davidi yange soo ér una tsegha iti i Ter na shi una wuese i. Yange soo ér hanma ‘kwagh u a lu ken na cii’ a wuese iti i Yehova. Inja na yô, yange soo ér una wuese Yehova a ishima na cii.  Mbalevi kpa yange ve hemen sha u wuese iti i Yehova. Yange ve hide a iyol ijime ve kaa ér mkaanem vem ma a fatyô u wuese icighanti u Yehova la er ma i wuese un la ga. (Ôr Nehemia 9:5.) Mkaanem ma yange ve ôr a iyol hiden a mi ijime sha u wuese Yehova la yange ma a na a saan Yehova iyol je ka u henen a hen ga.

7. Se wuese Yehova ken tom wase u pasen kwagh kua ken akaa a se eren ayange ayange la nena?

⁷ Nyian kpa, se fatyô u nan ser i saan Yehova iyol, sha u ôron kwagh na sha gbenda u tesen ér se wuese un shi a doo se ishima. Awashima wase u pasen ior kwagh yô, ka i lu u wasen ve ve kporom ikyua a Yehova shi nengen Ter wase u sha u se doo un ishima la, er se kpa se nengen un la. (Yak. 4:8) Ka i doo se u tesen ve kwagh u Bibilo i ôr sha kwagh u aeren a Yehova; er dooshima na man ieren na i mimi, kua kwaghfan na man tahav nav, kua aeren a na agen a doon tsung la. Shi ka se wuese Yehova shi se er kwagh u doon un sha u kaven un. (Ef. 5:1) Ka sea eren nahan yô, alaghga mbagenev ve nenge ér se mba kposo a ior i tar u ifer ne, nahan ve soo u fan er i hii ve se lu kposo yô. (Mat. 5:14-16) Nahan shighe u kwagh a zough se a ve yô, se fatyô u pasen ve er i hii ve se eren kwagh er se eren la yô. Man kwagh ne ka a na mba asema a mimi ve soo u kporom ikyua a Aôndo wase. Aluer se mba wuese Yehova, Ter wase u sha la, sha igbenda ne yô, se na a saan un iyol.—1 Tim. 2:3, 4.

KA SEA WUESE ITI I YEHOVA YÔ, SE NA I SAAN YESU IYOL

8. Er nan ve i lu Yesu a hemba veren ikyav i dedoo i wuese iti i Yehova?

⁸ Or môm sha, shin shin tar nan hemba fan Yehova a Yesu ga. (Mat. 11:27) Ter u Yesu doo un ishima. Nahan a ver ikyav i dedoo i wuese iti i Yehova. (Yoh. 14:31) Ken msen ugen u er hen Ter na hen tugh mbu kpernan i wua un la, a ôr kwagh u vesen u un er ken tom na u pasen kwagh shin tar la, a kaa ér: “M pase ve iti you.” (Yoh. 17:26) Yesu yange er kwagh ne nena?

9. Ka injakwagh i nyi Yesu yange tese u pasen kwagh u Ter na wang-na?

⁹ Yesu yange er kwagh hemba di u kaan a ior ér iti i Aôndo ér Yehova. Mbayuda mba Yesu tesen ve la, yange ve vande fan iti i Aôndo. Kpa lu Yesu hii ‘pasen ve kwagh Na ye.’ (Yoh. 1:17, 18) Ikyav i tesen yô, Ruamabera u ken Zwa Heberu tese ér Yehova ka Aôndo u mgboughon a mhôônom ma zungwen kua mrumun u sha mhôôn. (Eks. 34:5-7) Yesu yange pase mimi ne wang shighe u tese ikyav sha kwagh u wan u undu ter na, vea ter na la. Ka sea ôr kwagh u ter la, shighe u ta ashe nenge a wan na u kav ibo na la “lu van ken ica” ve yevese za kuv un shi den un a kwaghbo a ishima i môm la nahan, kwagh la a wase se u kaven er Yehova a zungwen mhôônom kpishi yô. (Luka 15:11-32) Yesu yange wase ior u fan or i Yehova a lu jim jim yô.

10. (a) Er nan ve se fe ser Yesu yange yilan Ter na sha iti na kpôô kpôô, shi soo ér mbagenev ve dondo ikyav na laa? (Marku 5:19) ( Shi nenge foto kpaa.) (b) Ka nyi Yesu a soo ér se er nyiana?

¹⁰ Yesu yange soo ér mbagenev kpa ve yilan Ter na sha iti na la? Een. Alaghga mbahemenev mba kwaghaôndo mbagenev yange vea nenge ér u yilan Aôndo sha iti na la ka ilyahan. Kpa Yesu de ér mbamnenge mba iorov ve yange un u nan iti i Ter na icivir ga. Nenge kwagh u yange za hemen shighe u Yesu bee orgen u azôv lu nzughul a na angev hen haregh u Mbagerasene ne. Yange cier ior mbara iyol nahan ve zamber a Yesu ér a due hen haregh ve kera. (Mar. 5: 16, 17) Kpa Yesu yange soo ér i fa iti i Yehova hen ijiir la. Nahan a kaa a or u a bee un angev la ér a ôr ior kwagh u Yehova a er a na la, i de lu kwagh u un Yesu un er ga. (Ôr Marku 5:19.) a Nyian ne kpa, Yesu soo ér se wase ior ve fa iti i Ter na sha tar jimin cii! (Mat. 24:14; 28:19, 20) Aluer se mba eren nahan yô, a doo Tor wase Yesu.

11. Yesu yange tese mbadondon un ér ve eren msen ér nyi, man er nan ve kwagh ne a lu kwagh u vesene? (Esekiel 36:23)

¹¹ Yesu yange fa er awashima u Yehova i lu u tseghan iti na shi karen a ilyahan sha i kera yô. Ka nahan ve Orvesen wase ne yange kaa a mbadondon un ér ve eren msen ér: “Ter wase u sha, i tsegha iti you” ye. (Mat. 6:9) Yesu fa er kwagh ne a lu ikyaa i vesen i i bende a hanma kwagh u Aôndo a gbe cii yô. (Ôr Esekiel 36:23.) Or môm sha, shin shin tar u nan er tom u tseghan iti i Yehova er Yesu nahan kpa nan ngu ga. Nahan kpa, shighe u mbahyomov mba Yesu kôr un la, ve wa un kwagh iyol ér ngu or u lahan Ter na. Yesu yange fa wang ér u hôngor shin lahan iti i Ter na la, ka isholibo i hemban vihin sha won cii. Yange vihi un kpishi er lu u a va wa un kwagh iyol, shi a kôr un ér un er kwagh nahan yô. Alaghga tsô lu ityôkyaa i i na ve “ishima za un iyol tsung” shighe u zurum u a va kôr un la je la.—Luka 22:41-44.

12. Ka sha gbenda u vesen u han Yesu yange tsegha iti i Ter naa?

¹² Yesu yange wa ishima a atsan a nyoon, man ilyahan kua mbaaie mba i wa un iyol la, sha er una tsegha iti i Ter na yô. Er i wa un akaa iyol nahan cii kpa, kunya kôr un ga, sha ci u yange fa er un er hanma kwagh u Ter na kaa ér una er cii yô. (Heb. 12:2) Shi yange fa er lu Satan jighilii lu tan num sha a na hen shighe u taver la yô. (Luka 22:2-4; 23:33, 34) Satan yange soo ér Yesu a de tilen sha mimi ga. Kpa Satan fatyô u kuren awashima na la ga! Yesu yange tese ér Satan ka oraie. Shi tese ér Yehova ngu a mba ve civir un sha mimi, mba ka vea tagher a atsan a vihin tsung je kpaa ve tile her dông yô!

13. Ka nyi u er ve a doo Tor wou u a lu hemen laa?

 ¹³ U soo wer u er kwagh u doon Tor wou u a lu hemen laa? Yô za hemen u wuese iti i Yehova, shi wase mbagenev ve fa aeren a Aôndo wase a doon tsung la. Aluer u er nahan yô, u lu dondon sha angahar a Yesu. (1 Pet. 2:21) We kpa u na a saan Yehova iyol shi u tese wer orhyom na Satan, ka icôr oraie!

KA SEA WUESE ITI I YEHOVA YÔ, SE WAR UUMA MBA IOROV

14-15. Aluer se mba tesen mbagenev kwagh u Yehova yô, ka akaa a doon a nyi aa fatyô u duen kere?

¹⁴ Ka sea wuese iti i Yehova yô, se war uuma mba iorov. Nena yô? Satan ‘pir mbanan jighjigh ga ashe a ishima.’ (2 Kor. 4:4) Sha nahan yô, ve hingir u nan jighjigh a mbaaie amba er: Aôndo ngu ga, shin Aôndo ngu, kpa ngu ica a vese, kwagh u uumace gba Aôndo ishima ga, Aôndo wa ifer, ka a tsaha mbaasorabo gbem sha won. Satan wa Yehova a kaa ne iyol sha ci u, a soo ér una vihi un iti, shi una yange ior mba ve soo u kporom ikyua a Yehova cii, u van hen a na. Ka sea pasen kwagh yô, se yange Satan u kuren awashima na ne. Ka se tese ior mimi sha kwagh u Ter wase u sha la, sha u wuese icighanti u Aôndo wase. Nahan ka nyi ka i due kere?

¹⁵ Mimi u a lu ken Mkaanem ma Aôndo la ngu a tahav kpishi. Aluer se mba tesen ior kwagh u Yehova, kua or u a lu jim jim la yô, kwagh u dedoo una due ker. Satan kera fetyô u bumen ve ga. Kwagh la ka a na yô, ve hii u nengen a aeren a dedoo a Ter wase u sha la. Tahav nav mbu mbu lu a ikighir ga la ka mbu kpiligh ve iyol. (Yes. 40:26) Ieren na i mimi la ka i na ve hen u suur sha a na. (Dut. 32:4) Shi ve hen akaa kpishi ken kwaghfan na u a gande ave la. (Yes. 55:9; Rom. 11:33) Shi ka vea fa er a lu dooshima nahan, ve zua a ishimasurun. (1 Yoh. 4:8) Ka vea kporom ikyua a Yehova yô, ishimaverenkeghen ve i va lun uma gbem sha won sha ci u mba ônov nav la, i seer taver. Ian i se lu a mi i wasen mbagenev u kporom ikyua a Ter ve u sha la, ka i icivirigh kpen kpen! Aluer se mba eren nahan yô, Yehova una nenge se ér se mba “mbaeren tom” a na imôngo.—1 Kor. 3:5, 9.

16. Mbagenev ka vea va fa iti i Aôndo yô, kwagh la a wase ve nena? Tese ikyav.

 ¹⁶ Sha hiihii la, alaghga se gba tesen ior tsô ser iti i Aôndo ér Yehova. Kwagh ne tseegh kpa, una fatyô u benden a or u nan lu a ishima i mimi yô. Ikyav i tesen yô, kwase ugen iti na ér Aaliyah. b Yange mbamaren nav yese un ken kwaghaôndo u i tesen Bibilo ker ga yô. Kpa akaa a a lu henen ken kwaghaôndo na la kuma un ga, shi a wase un u lun kôôsôô a Aôndo ga. Nahan kpa, va hiin u henen Bibilo vea Mbashiada yô, mnenge na sha kwagh u Aôndo kôr gema. Yange hii u nengen Aôndo ér ngu Ijende na kpôô kpôô. Shi kpiligh un iyol u fan er i dugh iti i Aôndo ken Ubibilo kpishi kera, i gema i we atiatom er, Ter nahan yô. Er va fa iti i Yehova yô, kwagh la gema uma na. A kaa ér: “Ijende yam i ishima ishima ngu a iti!” Nahan kwagh la wase un nena? A kaa ér: “Ishima gbam shimi hegen kpishi. Doom kpishi er m fe iti i Yehova yô.” Orgen iti na ér Steve. Yange lu or u wan atsam u due hen tsombor u i eren kwaghaôndo u Mbayuda her kpoghuloo yô. Yange kera soo u lun ken ma nongo u kwaghaôndo ga, sha ci u ukwaghaôndo wa atseregh kpishi yum. Kpa ngô na va kpen yô, a lumun ér Orshiada u Yehova ugen a hen Bibilo a na. Yange kpiligh un iyol u fan ér Aôndo ngu a iti. A kaa ér: “Lu hiin yam u fan iti i Aôndo je la.” Shi a kaa ér: “Ka hen shighe la m fa mer Aôndo ngu jim jim ye! Maa m hii u nengen mer ka Or kpôô kpôô, shi m zua a Ijende.”

17. Er nan ve u kange ishima wer u za hemen u wuese iti i Yehova? (Shi nenge foto kpaa.)

¹⁷ U ôron ior kwagh u icighanti u Yehova la ken tom wou u pasen kwagh shi tesen ior la kpa? U wasen ve u fan or u Aôndo wase a lu jim jim la kpa? Aluer u ngu eren nahan yô, u ngu wuese iti i Aôndo. Sha nahan yô, za hemen u wuese icighanti u Yehova la, sha u wasen ior u fan Or u a lu jim jim la. Aluer u ngu eren nahan yô, u war uuma mba iorov. Shi u lu dondon hemen u Tor wou, Kristu Yesu. Man u hemban cii je yô, a doo Yehova, Teru u sha u u doo un ishima la. Yô, “wuese iti [na] gbem sha won”!—Ps. 145:2.