1, 2. Ka mtaver u nyi Yefeta man wan na yange ve tagher a mini?

GUMKWASE ugen kar ayem za kegh ter na gbenda. Saan un iyol kpishi er ter na hide ityav uma, a zayol shio yô. Er ter na hemba ityav gburu gburu yô, kwagh la na wankwase la wa icam shi vine amar a iember. Kpa alaghga kwagh u ter na ôr shi er la kpiligh un iyol. Ter na ande akondo a na, maa kaa ér: “Kpe ahii, wan wam! U sombom anu vughô vughô.” Tsô Yefeta kaa a wan na u kwase la ér un er ityendezwa a Yehova i ia gema uma na gbem sha won yô. Lu u ityendezwa i ter na la ia na yô, una fatyô u eren nom maren ônov ga. Kpa fese je maa, a ôr kwagh u doon tsung sha u taver ter na ishima ér a kure ityendezwa na a Yehova. Kwagh u wankwase la ôr la tese ér, yange na jighjigh ér nyityôkwagh i Yehova a kaa ér una er cii yô, ka kwagh u dedoo. (Mbaajiriv 11:34-37) Er ter na nenge er lu a jighjigh u nan yô, doo un a na sha ci u fa je ér, a saan Yehova iyol a wan na, er a kegh iyol u eren kwagh la yô.

² Yefeta man wan na yange ve na Yehova jighjigh a vangertiôr shi ve lumun a gbenda u a eren akaa la. Yange ve tile sha  jighjigh shin er ve tagher a ikyaa i taver tsung nahan kpaa. Yange ve soo ér Yehova a lumun ve, nahan gba u vea na un nyityôkwagh cii.

3. Ikyav i Yefeta man wan na la, ia fatyô u wasen se nyian sha ci u nyi?

³ Ashighe agen ka i lu ican u civir Yehova sha mimi. Gba u se “nôngon nen ityav tsung sha kwagh u jighjigh u nan.” (Yuda 3) De se nenge er Yefeta man wan na yange ve wa ishima a mbamtaver yô. Nahan ikyav ve la ia wase se u wan ishima a mbamtaver. Yange ve za hemen u civir Yehova sha mimi nena?

4, 5. (a) Shighe u Mbaiserael nyôr ken Tar u Ityendezwa la, Yehova kaa a ve ér nyi? (b) Er i tese ken Pasalmi 106 nahan, ka nyi yange i er Mbaiserael sha ci u ve hemba Aôndo ato?

⁴ Hanma iyange yô, a shi nan kpa Yefeta man wan na u kwase ve umbur kwagh u due ken ato a Mbaiserael hemba Yehova la. Anyom a kuman er 300 nahan ken ijime, cii man shighe u Yefeta man wan nan u kwase la, Yehova kaa a Mbaiserael ér ve tim atôatyev a a civir Aôndo sha mimi ga, ken Tar u Ityendezwa la cii kera, kpa ve er nahan ga. (Duteronomi 7:1-4) Shighe kar yô, Mbaiserael kpishi gema eren kwagh er Mbakanaan nahan, ve lu civir mbaaôndo mba aiev shi eren idya kpoghuloo.—Ôr Pasalmi 106:34-39.

⁵ Er Mbaiserael hemba ato yô, Yehova kura ve sha ikyev i mbaihyomov vev ga. (Mbaajiriv 2:1-3, 11-15; Pasalmi 106:40-43) A shi nan kpa, yange a lu icombor i kwagh u Yehova doo i ishima la ican kpishi u zan hemen u civir Yehova sha mimi shighe u Mbaiserael lu hemban ato la. Nahan cii kpa, Bibilo ter kwagh u ior mbagenev mba ve tile sha mimi yô, er Yefeta vea wan na u kwase, man Elkana vea Hana kua Samuel nahan. Yange ve kange ishima u eren kwagh u una na a saan Yehova iyol yô.—1 Samuel 1:20-28; 2:26.

6. Tar ne ngu kighir se ér se er nyi nyiana, man ka nyi i gbe kpee u se eree?

⁶ Hen shighe wase ne kpa, mhen man ieren i ior kaha a i Mbakanaan la ga. Ve na ishima ve cii sha kwagh u yaven a or man ipila kua inyaregh. Kpa Yehova ta se icin sha akaa ne wang. Yange soo ér Mbaiserael ve palegh u eren akaabo ne, man ka kwagh u a soo ér se kpa se er vough je la. Se fatyô u henen kwagh ken asorabo ve la kpa? (1 Mbakorinte 10:6-11) Yô, se nôngo nen sha afatyô wase cii se palegh nen gbenda u tar ne u eren kwagh la. (Mbaromanu 12:2) Se nôngo sha afatyô wase cii se er nahan kpa?

7. (a) Ka nyi kwagh yange ior mba Yefeta er a naa? (b) Yefeta yange er nena?

⁷ Sha ayange a Yefeta la, Mbaiserael hemba Yehova ato nahan ve hingir u yan ican kpoghuloo sha ikyev i Mbafiliti man Mbaamon. (Mbaajiriv 10:7, 8) Shi kwagh ugen yô, Yefeta shi ya ican sha ikyev i anngôôv nav man mbahemenev mba Iserael. Yange anngôôv nav zenda un hen tar na kera, sha ci u ve kôr un ihyom shi ve lu gban un iyuhe. (Mbaajiriv 11:1-3) Kpa Yefeta lumun ér ieren ve i vihin tsung la i tsar un ga. Er nan ve se fe nahana? Se fa nahan sha ci u shighe u mbatamen mba ikyurior i Iserael va zamber a na ér a za  na ve iwasen la, a kar a kar. (Mbaajiriv 11:4-11) Lu nyi alaghga i mgbegha Yefeta ve er nahana?

8, 9. (a) Ka atindiakaa a ken Tindi u Mose a nyi adooga yange wase Yefeta? (b) Lu nyi i hemba gban Yefeta kwagha?

⁸ Yefeta yange lu or u fa ityav mbi nôngon tsembelee yô, shi fa yiase i Mbaiserael kua Tindi u Mose la kpa kôr inya. Gbenda u Yehova er kwagh a ior Nav la wase Yefeta u fan atindi a Aôndo wa sha kwagh u ieren i shami man i shami ga la. (Mbaajiriv 11:12-27) Yefeta maa er tom a mfe ne shighe u lu tsuan akaa a una er ken uma na la. Yange fa mnenge u Yehova sha kwagh u ishimanyoon man iyevoron, kua er Aôndo a soo ér ior Nav ve soo ayol a ve yô vindi vindi. Heela tseegh ga, Tindi la yange tese un er una eren a mbagenev, kua mba ve kôr un ihyom la je kpaa yô.—Ôr Ekesodu 23:5; Levitiku 19:17, 18.

⁹ A shi nan kpa, ikyav i Yosev la yange i wase Yefeta. Alaghga tsô yange fa er Yosev zungwe anmgbianev nav mba ve kôr un ihyom la mhôônom yô. (Genese 37:4; 45:4, 5) Er Yefeta gbidye kwar sha ikyav i Yosev la yô, adooga lu kwagh u wase un u eren kwagh sha gbenda u Yehova lumun a mi je la. Kwagh u anmgbianev mba Yefeta er a na la vihi un tsung. Kpa u nôngon kwagh sha ci u iti i Yehova la hemba lun Yefeta kwagh u vesen, a u eren kwagh ér i kpe un iyol la. (Mbaajiriv 11:9) Yange kange ishima ér una civir Yehova sha mimi. Nahan ieren na la na yô, Yehova na un man ior i Iserael cii iveren na.—Mbaheberu 11:32, 33.

10. Ka atindi a Aôndo a nyi aa wase se nyian u eren kwagh sha gbenda u Mbakristu?

¹⁰ Se fatyô u henen kwagh ken ikyav i Yefeta la. Aluer se nenge ser, anmgbian wase ken Kristu nan er kwagh a vese sha inja ga shin nan nzughul a vese yô, se er nena? Doo u se de ser, ishimavihin yase la i na se se de u civir Yehova ga. Mayange se de nen u zan mbamkombo mba Mbakristu shin se de u lun vea tiônnongo wase ga. Yô, se dondon nen ikyav i Yefeta la shi se ungwan nen imo i Yehova. Aluer se er nahan yô, kwagh ne una wase se u hemban mbamtaver mba se tagher a mi la, nahan se kpa se hingir u veren mbagenev ikyav i dedoo.—Mbaromanu 12:20, 21; Mbakolose 3:13.

11, 12. Lu ityendezwa i nyi Yefeta ere, man ityendezwa na la yange i wa nyi kere?

¹¹ Yefeta yange fa je ér gba u Aôndo una wase un ve una fatyô u yiman Mbaiserael sha ikyev i Mbaamon ye. Yange er ityendezwa a Yehova ér aluer a wase un, un hemba ityav yô, una na un “naagh ku nanden” sha or u hiihii u nana due hen ya na nana va keghen un gbenda, shighe u una hide ken utya la. (Mbaajiriv 11:30, 31) Inja i kwagh la ér nyi?

¹² Kwagh u tôôn orumace nan naagh a mi la, vihi Yehova ishima tsung. Nahan se  fa je ér lu u Yefeta una nande wan na sha atse una na Yehova naagh a mi ga. (Duteronomi 18:9, 10) Tindi u Mose la kaa ér, naagh ku nanden lu iyua i doon tsung i or yange nan na Yehova a ishima i môm yô. Sha nahan yô, Yefeta lu kaan ér or shin kwase u una na Yehova la nana er Aôndo tom ken tabernakel gbem sha won. Yehova yange ungwa msen na la, nahan wase un hemba ityav gburu gburu. (Mbaajiriv 11:32, 33) Lu u Yefeta una na Yehova naagh a ana?

13, 14. Mkaanem ma Yefeta ma i nger ken Mbaajiriv 11:35 la tese ér yange lu a jighjigh u nan nena?

¹³ Gbidye ase kwar sha kwagh u se er sha mhii u ngeren ne la. Shighe u Yefeta hide ken utya la, or u hiihii u nan due nan va kegh un gbenda yô, lu wan na u kwase u môm môm, u doo un ishima tsung la! Yefeta una er kwagh u tôndo zwa ér una er la kpa? Una na wan na u kwase u môm môm ne ér a za er Yehova tom ken tabernakel gbem sha won kpa?

¹⁴ Shi kwagh ugen yô, a shi nan kpa atindiakaa a ken Tindi u Aôndo na Mose la, wase Yefeta u eren kwagh u vough. Alaghga tsô yange umbur mkaanem ma i nger ken Ekesodu 23:19, ma ma kaa a ior mba Aôndo ér ve kegh iyol u nan Yehova kwagh u hemba lun a inja la. Shi Tindi la kaa ér aluer or tôndo zwa a Yehova yô, “nana̱ de bundu kwaghôron u nan la ga, nana̱ er sha kwagh u a dugh ken zwa u nan la cii.” (Numeri 30:2) Yange gba u Yefeta una kure ityendezwa na la keng, shin er fa ér kwagh la una bende a na man wan na nahan je kpaa. Yange er kwagh vough er kwase u nan jighjigh Hana u alaghga lu uma sha shighe na la kpa er nahan. Er lu u wan na ne una za er tom ken tabernakel yô, gba u una er nom ga shi mbayev kpa una mar ga. Nahan lu u Yefeta una fatyô u veren tse ga shi or nan lu u nana va ya  un dyako kpaa ga. (Mbaajiriv 11:34) Er kwagh lu nahan je kpa, Yefeta ôr kwagh sha mimi kaa ér: “M vande bughun zwa a TER, nahan m kera fatyô u hiden ijime ga.” (Mbaajiriv 11:35) Yehova lumun naagh ku vesen ku Yefeta na un la shi haa un iveren kpaa. I lu we nahan, yange ma u er kwagh sha mimi er Yefeta nahan kpa?

15. Ka ityendezwa i nyi se kpishi nyian se ere, man se kure ityendezwa la nena?

¹⁵ Ka sea tsegha ayol ase sha ci u Yehova yô, se mba kaan a na ser se er ishima na, a lu nyi je ia er kpaa. Se fa je ser, ka hanma shighe cii a lu se zange u kuren ityendezwa yase a Yehova ga. Kpa aluer i kaa a vese ér se er kwagh u se soo ga nahan, se er nena? Aluer se hide ijime ga shi se kegh iyol u ungwan imo i Aôndo yô, a tese wang je ér se mba eren kwagh u se tende zwa a na la. Alaghga a lu ican kpishi u eren sha ityendezwa yase la, kpa averen a Yehova una na se la aa hemba kwagh u se ne un la. (Malaki 3:10) Kpa wan u Yefeta la di ye? Yange er nyi sha ityendezwa i ter na er a Yehova laa?

16. Ka nyi kwagh wan u Yefeta u kwase la er sha iceghzwa i ter na laa? (Nenge foto u a lu sha mhii u ngeren ne la.)

¹⁶ Ityendezwa i Yefeta er la kaha kposo a i Hana la. Yange Hana er ityendezwa ér una na wan na u nomso Samuel a za er tom u Ornasari la ken tabernakel. (1 Samuel 1:11) Yange i na Ornasari ian i eren kwase maren ônov. Kpa wan u Yefeta u kwase la yô, yange i na un lu er “naagh ku nanden” nahan. Sha nahan yô, lu u una er nom ga shi una mar ônov kpaa ga. (Mbaajiriv 11:37-40) Hen ase sha kwagh ne! A shi nan kpa, yange wankwase la ma vôso or u hemban lun a inja i dedoo ken tar la sha ci u ter na lu tor u Iserael. Kpa lu u una hingir u eren tom ken tabernakel a iyolhiden a mi ijime. Nahan gumkwase ne kaa ér nyi? Yange tese ér tom u Yehova ngu un kwagh u hiihii sha u kaan a ter na ér: “Er a mo sha kwagh u a dugh ken zwa wou yô.” (Mbaajiriv 11:36) Er sar un u eren nom maren ônov nahan kpa, yange de akaa ne kar un sha er una er Yehova tom yô. Se dondo ikyav na i tangen iyol ga la nena?

17. (a) Se fatyô u dondon ikyav i jighjigh u nan u Yefeta man wan na la nena? (b) Mbaheberu 6:10-12 taver we ishima u eren akaa sha ci u Aôndo a iyoltangen shio nena?

 ¹⁷ Agumaior udubu imôngo a a lu Mbakristu la kegh iyol u vôson kwase shin nom ga. Kpa mbagenev yô, er kasev shin noov kpa tsua u maren mbayev hegen ga. Sha ci u nyi? Sha ci u ve soo u hemban veren ishima u eren Yehova tom. Shi mbagenev kpishi mba ve bee iyol yô, ka ve tôô shighe u ma ve lu vea mbayev vev shin ônov mba ônov vev la, ve eren Yehova tom a mi sha afatyô ve cii. Mbagenev ken a ve mba eren tom u maan kwagh, kpa mbagenev di za Makeranta u Mbapasen Ivangeli i Tartor, nahan ve mough ve yem sha ajiir a kwagh a hembe gban sha mbapasenkwagh la. Mbagenev di yô, ka ve wa agoyol ve va seer eren Yehova tom sha shighe u M-umbur la. Mayange Yehova una hungur a akaa a dedoo a mbajighjigh mban cii ve eren la ga. (Ôr Mbaheberu 6:10-12.) We di ye? U fatyô u den akaa agen sha er u hemba eren Yehova tom kpa?

18, 19. Ka nyi se hen ken Bibilo sha kwagh u Yefeta man wan na u kwase la, man se fatyô u dondon ikyav ve la nena?

¹⁸ Ka nyi yange i wase Yefeta ve hemba mbamtaver kpishi mba tagher a mi laa? Yange de ér Yehova a hemen un sha hanma kwagh u tsua u eren ken uma na cii. Shi de ér ieren i mbawanndor a na la i tsar un ga. Yefeta yange za hemen u civir Yehova sha mimi shin er mbagenev va un ahenge nahan kpaa. Yehova yange haa Yefeta man wan na iveren sha ci u akaa a yange ve er la, shi er tom a ve u wasen mbagenev u zan hemen u civir un. Yefeta man wan na za hemen u civir Yehova sha mimi shin er mbagenev de u eren kwagh sha inja nahan kpaa.

¹⁹ Bibilo kaa ér: “Hingir mbakaven mba ve ya dyako u uityendezwa sha jighjigh u nan man sha ishima i wan” la. (Mbaheberu 6:12) Yô, se dondo nen ikyav i Yefeta man wan na la sha u zan hemen u civir Yehova sha mimi. Aluer se er nahan yô, Yehova una ver se doo doo.