TOM wase u pasen kwagh la ngu a inja kpishi. Kpa ka hanma or ka sea pase nan kwagh ve nan kav nahan ga. Ior ka vea lu a isharen sha kwagh u Bibilo i er la je kpa, ka hanma shighe cii ka ve nenge ér gba hange hange u se hen Mkaanem ma Aôndo vea ve ga.

Ikyav i tesen yô, nenge ase kwagh u Gavin ne. Yange lu zan mbamkombo ken Iyou i Tartor, kpa gema soo ér i hen Bibilo a na ga. Gavin pase ér yange un fa kwagh u Bibilo cuku tseegh tsô, nahan un soo ér mbagenev ve fa kwagh sha kwagh ne ga. Lu cian ér a va kaa ér una zaan adua, kpa un gema soo ér or a tsugh un ga. U nenge nena? Lu u a fatyô u wasen Gavin je he? Nenge ase er ka a tese or Bibilo ve i wase nan kpishi yô. Yehova yange kaa a Mbaiserael ér: “Kwaghôron wam a̱ gba er avure nahan, er ura u hamber sha agumatoho nahan.” (Duteronomi 31:19, 30; 32:2) De se hen akaa agen sha kwagh u avure, maa se tôô tom kwaghpasen wase la se kar sha mi, sha er se hemba fan er se pase “ior cii” kwagh yô.—1 Timoteu 2:3, 4.

Avure ka a gba kure kure. Avure ka a gba kure kure, shighe u mdôhôrom ma ken ahumbe ma gem ma hingir aber a ura a kiriki la. Mkaanem ma Yehova yange ma “gba er avure nahan” nena? Yange lamen a ior nav kundu kundu man kure kure, kua sha gbenda u tesen ér un wa ve ikyo. Se fatyô u dondon ikyav na la sha u tesen icivir sha kwagh u mbagenev ve ne jighjigh a mi la. Se taver ve ishima ve hen sha kwagh u se lu tesen ve la ayol a ve, nahan ve tsua kwagh u ve soo u eren yô. Ka sea tese ser kwagh u ior gba se ishima nahan yô, ve hemba keghen iyol u lumun kwagh u se lu ôron la, nahan tom wase u pasen kwagh la u hemba zan doon.

Avure ka a kundu iyol. Kwaghpasen wase una kundu mbagenev iyol, aluer se ker igbenda kposo kposo i wasen ve u seer henen kwagh u mimi yô. Anmgbian ugen u i yer un ér Chris la yange za u za henen Bibilo a Gavin sha kwa u hiihii, kpa kighir un ér a lumun keng ga. Kpa gema ker igbenda kposo kposo i una na ishima ia gba Gavin shimi, nahan una hen kwagh u Bibilo yô. Chris yange kaa a Gavin ér loho u hange hange ugen ngu, u i pase ken Bibilo jimin cii yô, nahan aluer a hen kwagh u loho ne yô, kwagh la una wase un una hemba kaven kwagh u mbamkombo asev. Maa Chris pase ér kwaghôron u profeti u ken Bibilo la yange wasen un u nan jighjigh ér kwagh u i er ken Bibilo la ka u mimi. Kwagh ne na yô, ve lam acin imôngo sha kwagh u akaaôron a uprofeti a a kur sha mi vough la. Acin imôngo a ve lam ne kundu Gavin iyol, nahan ken masejime yô, lumun ér i hen Bibilo a na.

Avure ka kwagh u hange hange ken uma. Yange a lu inyom sha ayange a Mbaiserael yô, alaghga ura u nôôr ga iwer imôngo. Nahan aluer avure gba ga yô, imendenev mbia uma, a kpe kera. Yehova yange tsengaôron ér, sha ayange a ase ne, a lu injaa er icegh za nahan. Inja na yô, imura i “ungwan kwaghôron u TER” ia kôr ior. (Amoshi 8:11) Yange tôndo zwa ér mba i shigh ve mkurem la vea va lu er “avure a a dugh hen TER nahan,” shighe u mba ve lu “iyôngo igen” la vea lu suen ve u pasen loho u dedoo u Tartor la. (Mika 5:7; Yohane 10:16) Loho u se pasen ne ka môm ken akaa a Yehova a lu eren sha u nan mba imura i ker ve sha kwagh u mimi la uma yô. Loho ne gba se kwagh kpa?

Avure ka iveren i Yehova. (Duteronomi 33:13) Ka sea pase ior kwagh man vea ungwa yô, kwagh la a hingir ve iveren shin iyua. Gavin yange zua a iveren sha Bibilo i i hen a na la, sha ci u kwagh la wase un zua a mbamlumun sha mbampin nav cica cii. Kwagh ne na yô, a vese ken jijingi fele, shi i er un batisema, nahan hegen ka i doo un u pasen ior loho u dedoo u Tartor la, vea kwase na Joyce.

Shi aluer se tôô tom wase u pasen kwagh la se kar sha avure yô, a wase se u kaven er tom u pasen kwagh u se asange asange se eren ne u gbe kwagh yô. Nena yô? Aluer ura haa aber cuku tseegh yô, inya ia ndôhôr ga, kpa aluer aber haa umiliôn imôngo yô, ia ndôhôr. Kape tom u pasen kwagh la kpa u lu je la. Alaghga kwagh u se eren asange asange la una gba ikyev ga. Kpa er mbacivir Yehova umiliôn ve lu eren tom ne imôngo yô, se mba pasen ‘akuraior cii’ kwagh. (Mateu 24:14) Tom wase u pasen kwagh la, ua fatyô u lun iveren hen mbagenev kpa? Mimi yô, loho wase ua fatyô u lun vough er avure nahan, inja na yô, se wase or kure kure shi se na a kundu nan iyol, shi se wase nan nana kav er loho la u lu kwagh u hange hange u nan uma yô!