YANGE i marem ken inyom i 1926 la, hen geri u Crooksville, kpentar u Ohio, ken tar u Amerika. Terem man Ngôm zaan adua ga, kpa ve kaa a vese, se mbayev vev mba anigheni mbara ér se zaan adua. Maa m gema zan adua u i yer ér Methodist la. Shighe u m lu anyom 14 la, pasetô u adua la nam iyua sha ci u ken inyom jimin cii m bunde adua sha iyange i Lahadi ga.

Hen shighe ne, Kwaseshiada ugen u dondo ya a vese, i yilan un ér Margaret Walker yô, hii u va teman imôngo a ngôm shi ôron un kwagh u Bibilo. Iyange igen yô, m za tema vea ve. Ngôm hen ér me va dan un kwaghhenen, nahan a zendam ér m due ken won. Kpa hanma shighe m nôngo m kegh ato sha kwagh u ve lu ôron la. Margaret tem vea vese kwa gen yô, a pinem ér, “U fa iti i Aôndo kpa?” Maa m kaa mer, “Ngula hanma or fa, ka Aôndo.” Maa a kaa ér, “Za tôô Bibilo you, bugh Pasalmi 83:18.” M bughun m ôron yô, m kav er iti i Aôndo i lu Yehova yô. Maa m yevese m due m za kohol azende a am, m kaa a ve mer, “Nea yem ken ya nyian yô, za bugh nen Bibilo ôr nen Pasalmi 83:18, tsô ne fa iti i Aôndo.” U fatyô u kaan wer yange m hii u pasen kwagh her je.

M hen Bibilo zan zan i kar eren mo batisema ken inyom i 1941 la. Shighe kar kpuaa yô, i nam ian i hemen Takerada u Henen ken Tiônnongo. M taver ngôm vea anmgbianev av ishima mer ve kpa ve zaan mkombo u henen takerada u m hemen ne, nahan ve cii ve hii u zan. Kpa Baba yô, kwagh gba un sha mi ga.

Yange i seer nan mo ityom ken tiônnongo, shi m ngohol ityakerada i Mbashiada mba Yehova kpishi m lu a mi. Iyange igen yô, Baba tese uwegh sha ityakerada yam, maa kaa ér, “U nenge akaa la ga, m kera soo u nengen a mi hen ya ne ga, shi we kpa u fatyô u duen hen ya wam kera.” Yange m undu ya m za lu hen geri u Zanesville ikyua a ya wase, ken kpentar u Ohio, kpa m zaan tsombor wam inya fele fele sha u me za taver ve ishima yô.

Baba nôngo ér una yange Ngôm u zan mbamkombo. Ashighe agen una yemen sha gbenda kpa, a zenda a za kôr un a hide a mi hen ya. Kpa vea va nyôron  tsô, ngôm a due hunda ugen, a yem mkombo. M kaa a ngôm mer: “De we ikyo ga. Yange una vôr tsô, una de u zendan we.” Shighe kar yô, Baba vôr u nôngon ér Ngôm a de mbamkombo mba zan, nahan gema zan sha ishima na.

Shighe u i hii u eren Makeranta u Henen Tom u Hemen u Aôndo ken inyom i 1943 la, m hii u nan akaaôron ken tiônnongo wam. Akaa i waan mo shighe u mea na kwaghôron a bee la, wasem m seer fan kwaghôron.

Shighe u i lu nôngon Ityav mbi Tar Cii Mbi sha Uhar, ken inyom i 1944 la, i nam wada ér m nyôr shoja. Yange m za hen ijiir i shojaa, i hen Fort Hayes, gar u Columbus, kpentar u Ohio la, m za kar iyol shi m fiir foom. Kpa m kaa a mbahemenev mba ken shoja mer m ngu hingir orshoja ga. Maa ve dem m hide ken ya. Kpa ayange nga kar kpuaa yô, orshoja ugen va hen ya wam, va kaa a mo ér, “Corwin Robison, i nam zwa ér m va kôr u.”

Ukasua uhar mba kar yô, i yem a mo ken koti, maa jôôji la kaa ér: “Mo tseegh yô, m soo mer i wuhe u gbem kpe ker. U ngu a kwagh u ôrono?” Maa m kaa mer: “Orcivirigh jôôji, ma i kaa ér mo m ngu or u eren tom u Aôndo. M veren a ver hunda u me pase kwagh her ga, shi m pase ior kpishi loho u dedoo u Tartor.” Jôôji la kaa a ujôôji mbagenev mbara ér: “Ka sha u va ôron gumor ne ijir ner ngu or u eren tom u Aôndo ne ve heen ga, kpa ne va sha u va ôron un ijir ner yange venda u nyôron shoja.” Ve ôrom ijir ve kure, ve nam ibo, nyôr miniti 30 ga. Jôôji kaa ér i za wuhem ken purusu anyom ataan hen gar u Ashland, kpentar u Kentucky.

Sha hiihii la, m tsa ken purusu kasua uhar, hen gar u Columbus, kpentar u Ohio. Iyange i hiihii la, m lu tswen. M er msen hen Yehova m kaa mer: “Me fatyô u tsan ken sev anyom ataan ga. M fa kwagh u me er ga.”

Kpernan yô, mbakuran purusu dughum ken sev sha. M za kohol orkwar ugen, u tav shi lu a igya-vanger yô. Se tile hen windou, se lu kenger ken won. A pinem ér, “We Antiônor ne, ka nyi i ve a we heene?” M kaa mer, “Mo m ngu Orshiada u Yehova.” A kaa ér, “Wer u ngu Orshiada? Nahan, u ngu heen sha ci u nyi?” M kaa mer, “Mbashiada mba Yehova mba ze ityav, mba za woo ior ga.” A kaa ér, “Ve wuhe u ken purusu sha ci u u venda u wuan ior. Kpa ve wuhe ior mbagenev ken purusu sha ci u ve wua ior. Ngun nahan, ka ibumegh la gaa?” M kaa mer, “Een, ka ibumegh yumu.”

Maa a kaa ér, “Shighe u m tsa ken purusu ugen anyom 15 la, m ôr ityakerada yen igen.” M ongo nahan yô, m er msen mer, “Yehova, wasem m kôr ijende a or ne.” M been msen nahan maa orkwar u i yilan un ér Paul ne, kaa a mo ér: “Aluer môm ken ior mban  bende u uwegh iyol yô, kaam m tese ve kwagh.” Nahan shighe u m lu ken purusu ne la cii, or môm ken mbakwarev mba 50 mbara zam iyol ga.

Shighe u mbakuran purusu mough a mo heen, yem a mi ken purusu u ken Ashland la, m za zua a anmgbianev mbagenev mba vian ken mimi, mba i wuhe ve her yô. Ve wasem kua mbagenev se za hemen u lun kôôsôô a Yehova. Yange ve na se Bibilo i ôron ken hanma kasua, shi se wa agoyol sha mbampin man mbamlumun sha ci u mbamkombo mba se yilan ser Bible Bees la. Se lu ken zege sev, u i tar ugambe ken akpekpe yô. Anmgbian lu u tesen se haregh u se pasen kwagh her ken sev ne yô. Yange a kaa a mo ér: “Robison, ka we u pasen kwagh, hii hen gambe ne za kighir hen ngula ye. Hanma or u i ne nan gambe hen haregh la cii, pase nan kwagh. Nenge wer u pase nan kwagh cii ve nana yem ye.” Kape yange se er ve se pasen kwagh sha inja sha inja je la.

Er Ityav mbi Tar Cii Mbi sha Uhar mbira bee ken inyom i 1945 la nahan kpa, m lu ken purusu her shighe wa karen. Kwagh u tsombor wam zam iyol sha ci u Baba yange kaa a mo ér, “Aluer m fatyô u been a we sha ga kpa, m fa kwagh u me er a mbagenev mbara yô.” Kpa mba pasen mo, m hidi yô, m nenge a kwagh u doon tsung. Iorov utaankaruhar hen tsombor wam lu zan mbamkombo, shi anngôm u kwase er batisema, shin er Baba lu hendan a ve nahan kpaa.

Shighe u Ityav pev ken tar u Korea ken inyom 1950 la, i nam wada sha kwagh har ér m za shoja. I kaa a mo ér m za hen ijiir i tôôn ior shoja i hen Fort Hayes la. Mba karen mo cii mba been yô, orshoja u vesen ugen kaa a mo ér, “U ngu môm ken ior mba ve hembe zuan a akundu cii yô.” M kaa mer, “Doo tsôô, kpa m ngu zan shoja ga.” M ter kwagh u i er ken 2 Timoteu 2:3 la, maa m kaa mer, “M vande ngun orshoja u Kristu.” A huan ving ica gba, tsô a kaa, “U fatyô u yemen.”

Shighe kar kpuaa yô, m za mkombo u mba sar ve u zan Betel, u i er hen mkohol u vesen ugen u i kumba hen gar u Cincinnati, kpentar u Ohio la. Anmgbian Milton Henschel kaa a vese ér, kwagh gba sha anmgbianev mba nomso mba ve soo u eren tom kpoghuloo sha ci u Tartor yô. M nger apelekeshen u zan Betel, maa i lôhôm. Hii ken uwer u Agusutu 1954 la je, m ngu eren tom shin Betel u ken Brooklyn la zan zan nyian.

Hanma shighe cii, ka m lu a tom kpishi u eren shin Betel. M bughun umashin mba jiidi mngerem shi nan usu ken iyou i gberen ityakerada man afishi, shi m eren tom u varen akaa shi sôron uishindan. Shi m er tom sha Ayou a Mkohol hen gar u New York.

Ka i doom u eren akaa a ken jijingi, a i eren shin Betel, er mcivir u pepe man Iyoukura i Henen i tsombor  u Betel la nahan, shi duen kwaghpasen vea tiônnongo wam. Aluer u hen sha kwagh ne yô, ka akaa a icombor i i lu Mbashiada mba Yehova cii ma i eren hanma shighe je ne. Mbamaren man mbayev ka vea timen sha ivur i sha hanma iyange la imôngo shi vea eren Mcivir u hen Tsombor shi vea waan zwa sha kwagh u i henen ken mbamkombo mba tiônnongo la, shi vea pasen loho u dedoo sha gbashima yô, mba hen tsombor cii ve nôngo u lun kôôsôô a Yehova.

M kôr azende vea ior kpishi shin Betel man ken tiônnongo. Mbagen ken ve lu mba i shighe ve mkurem, kpa hegen ve yem sha yô. Mbagen i shighe ve ga. Kpa mbacivir Yehova cii yina, kua mba shin Betel kpaa. Hanma shighe u anyiman a gbe hen atô wam a ma anmgbian yô, ka m ker bem. Ka m gbidye kwar sha Mateu 5:23, 24 kua er se sôr zayol la kpaa. Ka i lu ican u kaan a or ér “Yam anyi,” kpa ashighe kpishi ka gbenda u ka i sôr ayôôso je ne.

Hegen ka i taver mo kpishi u zenden pasen kwagh sha uya uya sha ci u iyolbeen, kpa m gbe uwer ga. M hen zwa China, shi ka i doom u pasen ior mba lamen zwa ne kwagh sha godobi. Ashighe agen pepe, ka m na ior mba lun a isharen magazin 30 shin 40.

M hide m za sôr or ken China je kpaa! Iyange igen la, gumkwase u fan kwagh ugen u lu karen ior ikyatakerada i yôôn kasua u teen atamaikyon yô, va kar ape m lu la, maa se. Mo kpa m se, maa m na un Iyoukura man Awake! u ken zwa China. A ngohol ve shi a kaa a mo ér iti na ér Katie. Hii shighe la je, Katie una nenge a mo yô, a va lam a mo. M tese un ati a atamaikyon man ikyayue ken zwa Buter, m ôron un a kimbir. Shi m tese un avur a Bibilo, shi a ngohol takerada u Bibilo Tese la kpaa. Kpa ukasua mba kar kpuaa yô, m kera nenge a na ga.

Iwer ngi kar yô, shi m na wankwase ugen u lu karen ior ikyatakerada i yôôn kasua yô umagazin, un kpa ngohol. Mba ker ken kasua u dondon la yô, a va nam hanseeti, maa a kaa ér, “Lam a or ken China.” M kaa mer, “M fa or môm ken China ga.” Kpa a zer a mo gbem, nahan m ngohol hanseeti shon, m kaa mer, “Heloo, ka Robison.” Or la maa nan kaa ér, “Robby, ka mo Katie. M hide m yem ken China.” M pine mer, “Chinaa?” Katie kaa ér, “Een. Robby, u fa wankwase u a ne u hanseeti la kpa? Ka anngôm u kwase. Yange u tesem akaa a dedoo gbing. Wea lumun yô, tese un er yange u tesem nahan.” M kaa mer, “Katie, me nôngo sha afatyô wam cii. M sugh u er u ôrom ape u lu nahan.” Shighe kar yô, anmgbian u Katie u kwase la kpa m kera nenge a na ga. Ape mbayevkasev mba uhar mban ve lu hegen la cii, m hen mer vea seer henen kwagh u Yehova.

M civir Yehova kuma anyom 73, shi saan mo iyol er yange wasem m tile sha mimi shighe u m lu ken purusu la yô. Shi anngôôv av ka ve kaa a mo ér, yange ve zua a ishimataver kpen kpen, shighe u Baba hendan a mo, kpa m yina ishima ga la. Shighe kar yô, Ngôm man anngôôv av ataratar er batisema. Baba je kpa va wa geman inja, shi za mbamkombo mbagenev cii ve mase saan ku ye.

Aluer ka ishima i Aôndo yô, anngôôv av man azende a am a saa ku la, a va nder ve ken tar u he la. Nenge ase er a va saan se iyol kpishi u civir Yehova imôngo vea mba ve doo se ishima la gbem sha won yô! *—Nenge ngeren u shin kpe la.