I VER iwen igen i i nger kwagh sha mi yô, ken ijiir i veren akaa a yiase a ityar i i er kwagh u i ken Bibilo la ken Yerusalem. Ikyav tese ér yange i nger kwagh la anyom kar hegen zurum 2700 nahan. Yange i dugh iwen ne ken bar ugen u i iin ior ker yô, ikyua a Heberon ken tar u Iserael. I nger sha iwen la ér “Yahweh Sabaot a er ifan i kôr Hagaf wan u Hagav.” Ngeren ne sue kwagh Bibilo i ôr nena? A tese ér iti i Aôndo i Yehova i yange i nger sha asangaabaacaa a ken zwa Heberu ér YHWH la, yange i fa i wuee shi ior yilan i sha ayange a i ngeren Bibilo la. Ngeren mbagen mba i nenge a mi ken ubar mba i iin ior ker mban tese ér ior mba ashighe agen yange ve va zua ken ubar mban shin ve yer ker la ashighe kpishi yange ve nger iti i Aôndo shin ve nger ati ve kpôô kpôô aa a lu a iti i Aôndo ker yô, sha kpekpe.

Kwase ugen u a tesen ken yunivasiti i Georgia u i yer iti na ér Dr. Rachel Nabulsi yô, ôr kwagh sha kwagh u ngeren mban kaa ér: “Iti i ken zwa Heberu i YHWH la ngi ken ungeren mban kpishi man kwagh ne tese se akaa ngee. . . . Ngeren mban tese er or u i yer nan sha iti i YHWH la lu or u numben a mi hen Mbaiserael man Mbayuda ga yô.” Kwagh ne sue kwagh u nger iti i Aôndo sha asangaabaacaa a ken zwa Heberu aa YHWH la kwa dubu imôngo ken Bibilo la. Ashighe kpishi ati a ior ka a lu a iti i Aôndo ker.

Asember a yange i nger sha iwen la ér “Yahweh Sabaot,” la inja na ér “Yehova u akum a sha.” Nahan kwagh ne tese ér ior mba sha ayange a i ngeren Bibilo la ashighe agen yange ve yila iti i Aôndo tseegh ga, shighe gen ve seer kwagh er “Yehova u akum a sha” nahan. Kwagh ne kpa sue kwagh u Bibilo i ôr yô, sha ci u i ter ishember i “Yehova u akum a sha” la kuma kwa 283 ken ngeren u ken zwa Heberu kpôô kpôô la man ajiir aa i hembe teren ishember ne yô, ka ken Yesaia man Yeremia kua Sekaria.