1. Gumor ugen yange ungwa kwaghôron u i na sha mkohol u vesen ken inyom i 1935 la nahan, kwagh la gema mnenge na nena?

GUMOR ugen yange er batisema ken inyom i 1926, shighe u lu anyom 18 la. Mbamaren nav lu Mbahenen Bibilo. Lu iti i i yilan Mbashiada mba Yehova shighe la je la. Yange i mar ve mba nomso utar, mba kasev uhar. Mbamaren vev yese ve, tese ve u civir Yehova Aôndo shi dondon ikyav i Yesu Kristu. Nahan gumor ne yange a ya bredi shi a ma wain hanma inyom, shighe u i lu Umbur Ku u Yesu yô, er Mbahenen Bibilo cii eren sha shighe la nahan. Nahan kpa, va ongo kwaghôron u lu a itinekwagh ér “Zegeipelaior” la yô, ishimaveren na la kôr gema kwa môm. Yange Anmgbian J. F. Rutherford na kwaghôron ne sha mkohol u vesen u i er ken geri u Washington, D.C., ken tar u Amerika ken inyom i 1935 la. Lu nyi Mbahenen Bibilo hen sha mkohol u vesen laa?

2. Lu mimi u sagher iyol u nyi Anmgbian Rutherford pase ken kwaghôron na laa?

² Anmgbian Rutherford yange pase ior mba ve lu “zegeikpelaior” i i er kwagh u i ken Mpase 7:9 la. Cii man shighe la yô, Mbahenen Bibilo hen ér zegeikpelaior la ka nongo u sha uhar u i lu uumace mba ve kpa vea yem sha, kpa ve di ve kera til sha mimi vindi vindi er mba i shigh ve mkurem la nahan ga yô. Anmgbian Rutherford yange pase ken Bibilo er mba ve lu zegeikpelaior la, i tsough ve ér ve yem sha ga, kpa ve lu iyôngo i  Kristu igen * mba vea war “zegecan” vea lu uma gbem shin tar la yô. (Mpa. 7:14) Yesu yange kaa ér: “M ngu a iyôngo igen kpaa, i ngila ngi ken ityôr ne ga; i kpa me va a i, ia ungwan imo yam, i cii ia hingir ikyum i môm, sha ikyev i orkuran môm.” (Yoh. 10:16) Mba ve lu iyôngo igen ne, ka Mbashiada mba Yehova mba ve til sha mimi, mba ve lu a ishimaverenkeghen i va lun uma gbem sha won ken Paradiso shin tar yô. (Mat. 25:31-33, 46) De se nenge er mkav u he u mimi u Bibilo la yange gema uma u anmgbian u lu anyom 18 la kua u mbacivir Yehova mbagen kpishi yô.—Ps. 97:11; Anz. 4:18.

3-4. Ka nyi ior udubu imôngo mase kaven sha kwagh u ishimaverenkeghen ve sha mkohol u vesen u i er ken inyom i 1935 laa, man lu sha ci u nyi?

³ Kwagh u yange hemba saan iyol hen mkohol u vesen ne cii je yô, lu shighe u ornankwaghôron la ôr kwagh ugen a ior mba ve lu hen mkohol la yô. A kaa a ve ér: “Mbara mba ve lu a ishimaverenkeghen i lun uma gbem sha won shin tar la cii vea lumun yô, ve mough ve tile sha.” Anmgbian ugen u yange lu hen mkohol la yô, kaa wenér, yange ior mba hemban iyenge ken ior mba kuman er 20,000 nahan mba ve lu hen mkohol ne la mough tile sha. Maa Anmgbian Rutherford kaa ér: “Nenge! Zegeikpelaior ne!” Ôron mkaanem mara yô, ior ger kyuu. Mba ve mough ve tile sha la kav wang nahan ér Yehova tsua ve u yemen sha ga. Yange ve fa je ér icighan jijingi u Aôndo tsegha ve ga. Kpernan yô, iorov 840 nahan er batisema. Ve kpishi lu mba ken iyôngo igen la.

⁴ Yange mba ne kwaghôron la kera yô, gumor u i vande ôron kwagh na la kua mbagenev udubu imôngo de u yan beredi shi man wain sha shighe u Mkombo u Kwaghyan u Ter u Aikighe la. Anmgbian ugen u hiden a iyol na ijime tsung yô, kaa wener: “Mkombo u Umbur Ku u Yesu u i er ken inyom i 1935 la, lu kwa masetyô u m ya beredi shi m ma wain je la. M nenge yô, m ngu a ishimaverenkeghen i yemen sha ga, mea lu a i yô, Yehova ma a pasen sha ikyev i icighan jijingi na; kpa m gema m ngu a ishimaverenkeghen i va lun uma gbem sha won shin tar shi eren tom u geman u hingir paradiso kpaa, man kape mbagenev udubu imôngo kpa lu ve je la.” (Rom. 8:16, 17; 2 Kor. 1:21, 22) Hii shighe la je, zegeikpelaior la i seer iyenge shi mba eren tom imôngo vea mba i shigh ve mkurem mba ve shi shin tar her la.

5. Yehova nengen mba ve de u yan beredi shi man wain sha iyange i M-Umbur la nena?

⁵ Yehova yange nenge ior mba ve de u yan beredi shi man wain sha shighe u M-Umbur zum u inyom i 1935 la kar kera la nena? Nyian ne, Orshiada u Yehova ka nana yaan beredi shi nana maan wain sha shighe u Kwaghyan u Ter u Aikighe la, kpa nana va kav er i tsegha nan sha icighan jijingi ga, nana de nahan Yehova ngu a nenge nan nena? (1 Kor. 11:28) Mbagen ka ve ya beredi shi ve ma wain la sha ci u ve fa ishimaverenkeghen ve la jighilii ga. Kpa aluer ve va kav er kwagh u yange ve lu eren la lu shami ga, nahan ve de u yan shi man, shi ve za hemen u civir Yehova sha mimi yô, una lumun ve u lun ken mba ve lu iyôngo igen la. Er ve ye beredi shi ve me wain shighe u ve ze Mkombo u Umbur Ku u Yesu la ga nahan kpa, ka ve za mkombo ne, sha ci u mba a iwuese sha kwagh u Yehova man Yesu ve er sha ci ve la.

6. Yesu na mbatyomov wada ér ve er nyi?

⁶ Er i kera shi ica ga tsô zegecan una hii yô, a doo u se time sha kwagh u Mpase ityough 7 a er sha kwagh u Mbakristu mba i shigh ve mkurem kua zegeikpelaior i iyôngo igen la sha ci u kwagh la una taver se ishima kpen kpen. Yesu yange kaa a mbatyomov ér ve kôr ahumbe a ken avegher a tar a anyiin a vihin tar la gbang gbang. Gba u vea pase a sha tar ga zan zan saa a kar veren Mbakristu mba i shigh ve mkurem la ikyav been; inja na yô, Yehova kure kwagh ve ér ve tile sha mimi. (Mpa. 7:1-4) Er anmgbianev mba Kristu mban ve tile sha mimi yô, Yehova una na ve injar vea hingir ator kua upristi vea Kristu sha. (Mpa. 20:6) Yehova man Yesu kua mbatyomov cii a saan ve iyol u nengen er mba 144,000 mbara ve za ngohol injar ve i lun sha la yô.

7. Er i ôr ken Mpase 7:9, 10 nahan, ka unô Yohane yange nenge a ve ken mpase u sha mnengee, man ve lu eren nyi? (Nenge foto u sha igbende la.)

⁷ Yohane yange ôron kwagh u mba 144,000 mba ve lu ator man upristi la been yô, a ôr kwagh ugen sha gbenda u sagher iyol. Lu kwagh u “zegeikpelaior” i i war Armagedon yô. Iniongo i ihiar i Yohane ôr kwagh u i ne ngi kwagh môm ga, sha ci u zegeikpelaior la hemba ngeen a mba 144,000 mbara, shi or fa iyenge i zegeikpelaior la ga. (Ôr Mpase 7:9, 10.) Kwagh u i kaa ér ve “hua akondo a pupuu a lun elemeen” la, inja na yô, ve “lu wang sha u palegh akaa” a tar u Satan ne shi ve za hemen u eren kwagh sha mimi sha ishigh ki Aôndo man Kristu. (Yak. 1:27) Zegeikpelaior la ger amo ér ve war sha ci u kwagh u Yehova man Yesu, Waniyôngo u Aôndo la ve er sha ci ve la. Shi ve kôr andar a avilegh sha ave u tesen ér ve lumun saan saan ér Yesu ngu Tor u Yehova a tsough un yô.—Nenge Yohane 12:12, 13.

8. Mpase 7:11, 12 ôr se nyi sha kwagh u Yehova man tsombor na u sha u i lu un man Yesu man mbatyomov kua mba 144,000 mba i nder ve, ve za lu sha laa?

⁸ Ôr Mpase 7:11, 12. Shighe u Yehova man tsombor na u sha la nenge a zegeikpelaior la, lu ve nena? Ken mpase u sha mnenge u i tese Yohane la, Yohane nenge er saan tsombor u Yehova u sha la iyol tsung zum u ve nenge a zegeikpelaior la yô, nahan ve wuese Aôndo. Shighe u mpase u sha mnenge u i tese Yohane la una va kure sha mi vough la, a saan Yehova vea tsombor na u sha la cii iyol u nengen er zegeikpelaior la i war zegecan yô.

9. Mpase 7:13-15 tese ér ka nyi zegeikpelaior la i lu eren hegene?

⁹ Ôr Mpase 7:13-15. Yohane nger ér, zegeikpelaior la “ôô akondo a ve sha awambe a Waniyôngo la, a hingir pupuu.” Kwagh ne tese ér ve mba a imoshima i wang shi Yehova lumun ve. (Yes. 1:18) Ka Mbakristu mba ve tsegh ayol a ve, ve er batisema shi ve ne nagh ku ipaan ku Yesu kura jighjigh, ve lu azende a Yehova yô. (Yoh. 3:36; 1 Pet. 3:21) Sha nahan yô, ve kuma u tilen sha ishigh ki ikyônough ki torough ki Aôndo sha u “eren un icighantom ken tempel na atetan man tugh” shin tar. Mba eren vegher u hemban kehen u tom u pasen kwagh u Tartor shi geman ior hingir mbahenen la sha gbashima, sha ci u kwagh u Tartor u Aôndo la hemba gban ve ishima a hanma kwagh ugen cii.—Mat. 6:33; 24:14; 28:19, 20.

10. Ka vangertiôr u nyi zegeikpelaior la i lu a mini, man ka ityendezwa i nyi ia va kure sha mi sha ashe a ve?

¹⁰ Zegeikpelaior i i war zegecan la ngi a vangertiôr ér Aôndo una za hemen u nengen sha a ve, sha ci u “Un u a tem sha ikyônough ki torough la una samber tenti na sha a ve.” Ityendezwa i mba ve lu iyôngo igen la, ve ndera veren ashe keghen ne maa ia kure sha mi vough, ér: “[Aôndo] una ese ve mliam cii sha ashe kera, ku ua kera lu ga, ijungwen kpa  ia kera lu ga, mliam kpa ma a kera lu ga, shi mnyoon kpa una kera lu ga.”—Mpa. 21:3, 4.

11-12. (a) Ka averen a doon tsung a nyi Mpase 7:16, 17 a kaa ér zegeikpelaior la ia va zua a mini? (b) Ka nyi mba ve lu iyôngo igen la vea fatyô u eren shighe u ve ze Mkombo u Umbur Ku u Yesu laa, man ka sha ci u nyi?

¹¹ Ôr Mpase 7:16, 17. Nyian ne ior mba Yehova mbagen mba tsan ijen sha ci u mba a inyaregh ki vea yam kwaghyan vea ya ga; gayô sha ci u ityav shin ayôôso na yô, ve nyôr ken ican. Mbagenev i wuhe ve ken purusu sha ci u jighjigh ve. Nahan cii kpa, doo mba ve lu zegeikpelaior la u fan ér vea waren mtim u botar ne yô, kwaghyan u iyolough man u ken jijingi una dumbur. Shighe u Yehova una timin botar u Satan ne la, una kura zegeikpelaior la. Una kura ve, a “tsee” ve iyol ga, sha ci u iyugh na ia lu sha a ve ga. Zegecan la una been kera yô, Yesu una hemen mba vea war la, una za a ve hen “mngerem ma uma” u tsôron. Hen ase tsô u nenge er zegeikpelaior la i lu a ishimaverenkeghen i doon tsung yô. Ken atô u uumace ubiliôn imôngo mba i gbe sha won cii, ka ve vea lu a ian i kpen mayange ga ye!—Yoh. 11:26.

¹² Mba ve lu iyôngo igen la wuese Yehova man Yesu kpishi er ve ne ve lu a ishimaverenkeghen i doon tsung yô! I tsua ve ér ve yem sha ga, nahan kpa, ve doo Yehova ishima tsung shi ve gba un kwagh kpaa. Mba i shigh ve mkurem kua mba ve lu iyôngo igen la cii vea fatyô u wuese Aôndo man Kristu. Gbenda môm u vea fatyô u eren kwagh ne yô, ka u zan mkombo u Kwaghyan u Ter u Aikighe la.

13-14. Er nan ve i gbe u mba i shigh ve mkurem mba ve shi her la kua mba ve lu iyôngo igen la cii vea zaan Mkombo u Umbur Ku u Kristu laa?

¹³ Ken anyom a karen ne, ka i lu or 1 ken atô u iorov 1,000 mba ve ze Mkombo u Umbur Ku u Yesu la, nan ya beredi shi nan ma wain ye. Kwagh la tese ér ken atôônanongo kpishi or môm ka nan ya beredi shi nan ma wain la ga. Ior kpishi mba ve ze Mkombo u Umbur Ku u Yesu la ka u i lu mba ve lu a ishimaverenkeghen i va lun uma shin tar yô. Nahan kpa, ka ve za mkombo u Kwaghyan u Ter u Aikighe ne sha ci u nyi? Mze ve hen mkombo ne ngu a lu er ior mba ve ze ivese i ma ijende ve nahan. Ka ve za ivese la sha ci u mba ve lu eren ivese la doo ve ishima shi ve soo u suen ve kpaa. Nahan mba ve lu iyôngo igen la kpa ka ve za Mkombo u Umbur Ku u Yesu la sha ci u Kristu man mba i shigh ve mkurem la doo ve ishima  shi mba suen ve kpaa. Shi mba ve lu iyôngo igen la ka ve za mkombo ne u tesen ér ve wuese nagh ku Yesu ku ku ne ve i lu u vea fatyô u va lun uma gbem sha won shin tar la.

¹⁴ Ityôkyaa injaa igen i mba ve lu iyôngo igen la ka ve za Mkombo u Umbur Ku u Yesu ne yô, ka sha u kuran tindi u Yesu yange wa yô. Kwa hiihii u Yesu er mkombo ne vea mbaapostoli nav mbajighjigh mbara la, a kaa a ve ér: “Eren nen kwagh ne sha u umbur mo.” (1 Kor. 11:23-26) Nahan mba ve lu iyôngo igen ne vea za hemen u eren mkombo u Kwaghyan u Ter u Aikighe ne sha ayange a mba i shigh ve mkurem mbara ve shi shin tar her la cii. Jighilii je yô, ka ve lôhô hanma or ér nana va kohol ve vea er mkombo ne imôngo.

15. Ka nyi se fatyô u eren u wuese Aôndo man Kristu sha iyange i M-Umbur laa?

¹⁵ Zum u se ze mkombo u M-Umbur yô, ka se lu a ian i wuese Aôndo shi tesen ser Aôndo man Kristu doo se ishima sha u wan icam shi eren msen. Kwaghôron u a lu nan ken inyom ne la ngu a itinekwagh ér, “Wuese Kwagh u Aôndo man Kristu Ve Er sha Ci Wou La!” Kwaghôron la una wase se, se seer lun a iwuese sha kwagh u Yehova man Kristu ve er a vese la. Iyange la a nguren karen a beredi man wain la yô, akaa la aa umbur mba ve ze mkombo la cii kwagh u a til sha mi la, ka iyol i Yesu man awambe a na je la. Shi kwagh ne una umbur se er se doo Yehova ishima, nahan a de Wan na a va kpe sha er se zua a uma yô. (Mat. 20:28) Hanma or u Ter wase u sha la man Wan na ve doo nan ishima cii a sar nan u zan mkombo ne.

16. Ka sha igbenda i nyi nahan mba i shigh ve mkurem kua mba ve lu iyôngo igen la ve lu kwaghmômô?

¹⁶ Mba i shigh ve mkurem mbara kua mba ve lu iyôngo igen la cii ve gba Aôndo kwagh. Mba ve lu ken iniongo i ihiar ne cii ve doo un ishima. Se fa nahan sha ci u yange tôô uma u Wan na u ishima ishima la yam mba i shigh ve mkurem kua mba ve lu iyôngo igen la cii. Mkposo u mba ve lu ken iniongo i ihiar ne yô, mba a ishimaverenkeghen kposo kposo. Gba u mba ve lu ken iniongo i ihiar ne cii vea za hemen u eren kwagh sha mimi sha ishigh ki Aôndo man Kristu. (Ps. 31:23) Umbur wer Yehova ka a na hanma or icighan jijingi na sha iwasen i kwagh a gbe nan a mi la vough, aluer ka or u i shigh nan mkurem shin ka u nan lu ken iyôngo igen la kpaa.

17. Ka nyi mba i shigh ve mkurem mba ve shi shin tar la ve lu veren ashe a mini?

¹⁷ Ka maren Mbakristu mba i shigh ve mkurem la a ishimaverenkeghen i yemen sha la ga. Ka Aôndo ngu a na ve ishimaverenkeghen la ye. Ka ve henen sha ishimaverenkeghen ve la shi ve eren msen sha kwagh u i, shi ve kegh a kegh iyol u za ngohol injar ve sha. Ve fa er iyol i ken jijingi i a za na ve la ia lu ga. (Fil. 3: 20, 21; 1 Yoh. 3:2) Nahan cii kpa ka i sar ve u za kohol Yehova man Yesu man mbatyomov kua mba i shigh ve mkurem mbagen mbara shi lun vea ve imôngo ken Tartor u sha.

18. Ka nyi mba ve lu iyôngo igen la ve lu veren ashe keghene?

¹⁸ Mba ve lu iyôngo igen la mba veren ashe u va lun uma gbem sha won shin tar, man kape uumace mbagen kpa i sar ve je la. (Orpa. 3:11) Mba veren ashe keghen shighe u vea wase u geman tar ne cii hingir Paradiso la. Mba keghen shighe u vea mar uya vev shi vea kaha ishule ve shi vea mar ônov mba lun gbang gbang la. (Yes. 65:21-23) Mba veren ashe keghen shighe u vea fatyô u zenden zan hanma ijiir sha tar a zayol shio, vea lu nengen a iwo man akô kua utyeku shi henen kwagh ken akaa a Yehova a gbe a la yô. Kpa u hemban cii je yô, ijende ve vea Yehova ia hemba taver seer a seer.

19. Ka nyi hanma wase nana fatyô u eren sha shighe u M-Umbur laa, man ka hanma iyange a lu eren M-Umbur shon ken inyom nee?

¹⁹ Yehova na mba ve tsegh ayol a ve u civir un la cii ishimaverenkeghen i dedoo. (Yer. 29:11) Mkombo u Umbur Ku u Kristu la na hanma wase ian i icivirigh i wuese Aôndo man Kristu sha kwagh u ve er sha ci wase sha u se zua a uma u tsôron la. Mkombo u M-umbur la, ka mkombo u vesen u Mbakristu mba mimi ve eren hanma inyom cii yô. A lu eren un shighe u iyange i mir yô, sha iyange i Sati, Maaci 27, 2021 ne. Mbagenev mba hen ajiir a vea fatyô u zan mkombo ne a kwagh u tagher ve shio yô. Mbagenev yô, ka hendan a ve kpoghuloo, nahan kpa vea nôngo a za mkombo ne. Shi mbagenev di vea er mkombo ne ken purusu. Er Yehova man Yesu man mbatyomov kua mba i shigh ve mkurem mba i nder ve, ve yem sha la, vea lu veren ashe u nengen nahan, se mba kaan a hanma tiônnongo man hanma annongo kua hanma or cii ser, mkombo u Umbur Ku u Yesu a doo!