NGEREN U TIMEN SHA MI 4
Ityôkyaa i Ka Se Za Mkombo u Umbur Ku u Yesu Yô
“Eren nen kwagh ne sha u umbur mo.”—LUKA 22:19.
ICAM 20 U Na Wan Wou u Ishima Ishima La
KWAGH U I TIM SHA MI KEN NGEREN NE YÔ *
1-2. (a) Ka hanma shighe ka se hemba umbur kwagh u or wase u nan kpe laa? (b) Ka nyi Yesu yange er hen tugh mbu kpernan i wua un laa?
OR WASE ka nana kpe ica ia gba nan nan kpa, se umbur nan her. Ka a lu sha iyange i yange nan kpe la je yô, se hemba umbur kwagh u nan cii.
2 Hanma inyom yô, ka se kohol vea ior umiliôn imôngo sha tar, sha u umbur ku u orgen u a doo se ishima kpishi yô, ka Yesu Kristu je la. (1 Pet. 1:8) Ka se kohol imôngo sha u umbur un sha ci u yange paa se sha ikyev i isholibo man ku kera. (Mat. 20:28) Jighilii yô, Yesu yange soo ér mbadondon un ve umbur ku na. Hen tugh mbu kpernan i wua Yesu la, a tema kwaghyan ugen vea mbaapostoli nav, maa a kaa ér: “Eren nen kwagh ne sha u umbur mo.”—Luka 22:19.
3. Ka nyi se lu timen sha mi ken ngeren nee?
3 Ior umiliôn imôngo mba ka ve za Mkombo u Umbur Ku u Yesu la cii, ka ior kpuaa ken a ve tseegh ve lu a ishimaverenkeghen i yemen sha ye. Mba hemban iyenge mba ka ve za la cii, mba a ishimaverenkeghen i va lun uma gbem sha won shin tar. Ken ngeren ne, se lu timen sha atôakyaa a ikweior i ihiar ne cii ka i veren ashe u zan Mkombo u Umbur Ku u Yesu la hanma inyom yô. Shi se hen se fa mtsera u ka sea za mkombo ne ve se zua a mi la. De se hii timen sha atôakyaa a mba i shighe ve mkurem la ka ve za mkombo ne yô.
ER I HII VE MBA I SHIGHE VE MKUREM LA KA VE ZA MKOMBO NE YÔ
4. Mba i shighe ve mkurem mbara ka ve ya beredi shi ve ma wain hen Mkombo u Umbur Ku u Yesu sha ci u nyi?
4 Hanma inyom yô, mba i shighe ve mkurem la ka ve za Mkombo u Umbur Ku u Yesu ve za ya beredi shi ve ma wain. Ka i gba u vea ya beredi la shi vea ma wain la sha ci u nyi? De se time sha kwagh u yange er hen tugh mbu kpernan i wua Yesu la, tsô se zua a mlumun sha mpin ne. Yesu yange ya Paseka vea mbaapostoli nav mba been kera yô, hide tema kwaghyan ugen vea ve, u i va hingir u yilan ér Kwaghyan u Ter u Aikighe la. Yange tôô beredi man wain na mbaapostoli nav mba 11 mba jighjigh mbara, kaa a ve ér, ve ya shi ve ma. Yesu ôr ve kwagh u uikyurmbayan shin uiceghzwa uhar, lu ikyuryan i he man ikyuryan i Tartor. * (Luka 22:19, 20, 28-30) Ka sha ci u uikyurmbayan mban mbaapostoli kua Mbakristu mbagenev kpuaa, ve zua a ian i yemen sha za lun ator kua upristi ye. (Mpa. 5:10; 14:1) Ka mba i shighe ve mkurem mba ve shi her, * mba i er uikyurmbayan mba uhar mban a ve la tseegh, vea fatyô u yan beredi shi man wain hen Mkombo u Umbur Ku u Yesu ye.
5. Ka nyi mba i shighe ve mkurem mbara ve fe sha kwagh u ishimaverenkeghen i i ne ve laa?
5 Ityôkyaa igen i mba i shighe ve mkurem la ka ve veren ashe u zan Mkombo u Umbur Ku u Yesu yô, ka i je ne: Ka vea za mkombo ne yô, ve hen sha kwagh u ishimaverenkeghen ve i yemen sha la. Yehova na ve ishimaverenkeghen i doon kpishi. Ka u vea yem sha, vea za zua a uma u kpen ga man u hôôn ga la, shi vea tema tor vea Yesu Kristu imôngo kua mbagenev cii, ken ve mba 144,000 mbara. Man kwagh u hemban cii je yô, vea lu sha ishigh ki Yehova Aôndo iyol na. (1 Kor. 15:51-53; 1 Yoh. 3:2) Mba i shighe ve mkurem la fa er i tsua ve u yemen sha, za lun sha ian i icivirigh ne yô. Kpa saa vea civir Yehova sha mimi zan zan ku ve, man a lumun ve u nyôron sha ye. (2 Tim. 4:7, 8) Mba i shighe ve mkurem mbara ka vea henen sha ishimaverenkeghen i ve lu a mi i yemen sha la nahan, i saan ve iyol kpen kpen. (Titu 2:13) Nahan mba ve lu “iyôngo igen” la di ye? (Yoh. 10:16) Ka ve za Mkombo u Umbur Ku u Yesu sha ci u nyi?
ER I HII VE MBA VE LU IYÔNGO IGEN LA KA VE ZA MKOMBO NE YÔ
6. Mba ve lu iyôngo igen la ka ve za Mkombo u Umbur Ku u Yesu hanma inyom sha ci u nyi?
6 Mba ve lu iyôngo igen la ka vea za Mkombo u Umbur Ku u Yesu yô, mba ye beredi la ga shi mba me wain la kpaa ga, kpa ka i gema i saan ve iyol u lun her. Lu ken inyom i 1938 la i hii lôhôn mba ve lu a ishimaverenkeghen i va lun uma gbem sha won shin tar la ér ve za Mkombo u Umbur Ku u Yesu ye. Iyoukura i Maaci 1, 1938 la yange i kaa ér: “Doo u mba ve lu iyôngo igen la vea za mkombo ne vea za nenge er ka i er un yô. . . . Gba u a lu nahan, shi ka shighe u saan ve iyol kpaa.” Er ka a lôhô ior vea za iniongo i ivesegh vea za nenge ve i saan ve iyol nahan, kape mba ve lu iyôngo igen la kpa ka vea za Mkombo u Umbur Ku u Yesu la vea za nenge ve i saan ve iyol je la.
7. Ka i lu mba ve lu iyôngo igen la toon toon u ungwan kwaghôron u Umbur Ku u Yesu la sha ci u nyi?
7 Mba ve lu iyôngo igen la kpa ka ve henen sha ishimaverenkeghen ve la. Ka i lu ve toon toon u ungwan kwaghôron u Umbur Ku u Yesu la, sha ci u kwaghôron la ka a hemba ôron kwagh u Kristu kua mba 144,000 mba vea tema tor vea na, kua kwagh u vea er sha ci u uumace mba jighjigh ken anyom dubu a Kristu una hemen la. Tor Yesu Kristu una hemen mba vea za tema tor a na imôngo sha la, vea gema tar ua hingir paradiso, shi vea wase uumace mba ungwan imo i Aôndo vea kera lu a mshi ken a ve ga. Ior umiliôn imôngo mba ka ve za Mkombo u Umbur Ku u Yesu ve za nenge la, ka vea hen er akaaôron a profeti a Bibilo i ôr ken takeda u Yesaia man Mpase la aa va kure sha mi nahan, i doo ve kpen kpen, er akaaôron a profeti a i nger ken Yesaia 35:5, 6; 65:21-23; man Mpase 21:3, 4 la nahan. Ka vea nenge er ve kua ior vev vea va lu ken tar u he la nahan, ishimaverenkeghen ve la i seer taver, shi ve seer kangen ishima ér mayange vea de u civir Yehova ga.—Mat. 24:13; Gal. 6:9.
8. Ityôkyaa igen i mba ve lu iyôngo igen la ka ve za Mkombo u Umbur Ku u Yesu yô, ka sha ci u nyi?
8 Shi nenge ityôkyaa igen i mba ve lu iyôngo igen la ka ve za Mkombo u Umbur Ku u Yesu yô. Ka ve er nahan sha u suen mba i shighe ve mkurem la shi tesen ér ve doo ve ishima. Mkaanem ma Aôndo tsenga ôron ér, mba i shighe ve mkurem mbara kua mba ve lu a ishimaverenkeghen i va lun uma gbem sha won shin tar la cii, vea er tom imôngo ken mzough. Vea er kwagh ne nena? De se tese akav kpuaa.
9. Kwaghôron u profeti u i nger ken Sekaria 8:23 la tese ér mba ve lu iyôngo igen la mba nengen mba i shighe ve mkurem la nena?
9 Ôr Sekaria 8:23. Kwaghôron u profeti ne pase sha gbenda u doon tsung er mba ve lu iyôngo igen la ve nengen anmgbianev vev mba nomso man mba kasev mba i shighe ve mkurem la yô. Asember a ahar a i nger ér, “Oryuda” man “a ven” la, nga ôron kwagh u kweior môm, ka mba i shighe ve mkurem mba ve shi her la. (Rom. 2:28, 29) “Iorov pue ken akuraior a hanma zwa cii” la di ka mba ve lu iyôngo igen la. Vea “kôr” shin vea var a mba i shighe ve mkurem la, vea eren kwagh a ve imôngo ken mcivir u mimi. Sha nahan yô, mba ve lu iyôngo igen la ka ve tese ér ve var a mba i shighe ve mkurem la sha u lun hen Mkombo u Umbur Ku u Yesu la a ve imôngo.
10. Ka nyi Yehova a er sha u kuren kwaghôron u profeti u ken Esekiel 37:15-19, 24, 25 laa?
10 Ôr Esekiel 37:15-19, 24, 25. Yehova kure kwaghôron u profeti ne, sha u zuan mba i shighe ve mkurem la vea mba ve lu iyôngo igen la ér ve eren un tom imôngo ken mzough. Kwaghôron u profeti la ôr kwagh u mbaaga uhar. Mba ve lu a ishimaverenkeghen i yemen sha la mba er ka aga u “sha ci u Yuda” (kwe u yange i tsuan ator a Mbaiserael ker) la nahan. Mba ve lu a ishimaverenkeghen i van lun uma gbem sha won shin tar la di mba er “aga u Eferaim” la nahan. * Yange lu u Yehova una zua ikwe i ihiar ne sha er ia hingir “aga môm” yô. Inja na yô, ve mba civir Yehova ken mzough sha ikyev i tor ve Kristu Yesu. Hanma inyom yô, mba i shighe ve mkurem la ka ve za Mkombo u Umbur Ku u Yesu vea mba ve lu iyôngo igen la imôngo, sha ci u mba ikyum i môm, sha ikyev i orkuran môm.—Yoh. 10:16.
11. “Iyôngo” i i er kwagh u i ken Mateu 25:31-36, 40 la ngi wasen anmgbianev mba Kristu tom nena?
11 Ôr Mateu 25:31-36, 40. “Iyôngo” i Yesu a ôr kwagh u i ken injakwagh ne la, ka mbaperapera mba sha shighe u mkur ne, mba ve lu a ishimaverenkeghen i va lun uma gbem sha won shin tar la. Mba wasen anmgbianev mba Kristu mba i tsegha ve sha jijingi, mba ve shi shin tar her la, u eren zegetom ugen, ka tom u pasen kwagh shin geman ior hingir mbahenen, u i lu eren sha tar cii la je la.—Mat. 24:14; 28:19, 20.
12-13. Shi ka sha igbenda igen i nyi nahan, mba ve lu iyôngo igen la ve wasen anmgbianev mba Kristu?
12 Hanma inyom cii, ka a va shiin ukasua kpuaa u a za Mkombo u Umbur Ku u Yesu yô, mba ve lu iyôngo igen la ve wase anmgbianev mba Kristu u lôhôn ior Mkombo u Umbur Ku u Yesu la sha tar cii, (Nenge ngeren u kiriki u a lu a itinekwagh ér, “ U Ngu Wan Iyol sha Akaa a A Va Er sha Shighe u Umbur Ku u Yesu la Kpa?” la.) Shi ka ve wase u eren hanma kwagh u i gbe u a er sha er a fatyô u eren Mkombo u Umbur Ku u Yesu la hen hanma tiônnongo sha tar cii yô, shin er atôônanongo agen ka a lu a mbayan beredi la shi man wain la ga nahan kpaa. Ka i doo mba ve lu iyôngo igen la kpishi u wasen anmgbianev mba Kristu sha igbenda ne. Iyôngo ne fa er Yesu ka a nenge kwagh u ve eren sha ci u anmgbianev nav mba i shighe ve mkurem la ér ka sha ci na je ve lu eren yô.—Mat. 25:37-40.
13 Sea lu a ishimaverenkeghen i va lun uma gbem sha won shin tar shin yemen sha kpa, ka atôakyaa agen a nyi a ne ve se cii ka se za Mkombo u Umbur Ku u Yesu laa?
ER I HII VE SE CII KA SE ZA MKOMBO NE YÔ
14. Yehova man Yesu ve tese se dooshima sha gbenda u hemban cii nena?
14Se wuese dooshima u Yehova man Yesu ve tese se la. Yehova tese se dooshima na sha igbenda kpishi. Kpa gbenda u a hembe tese se dooshima na cii yô, a tindi wan na u ishima ishima la va ya ican shi kpe sha ci u wase. (Yoh. 3:16) Yesu kpa tese dooshima sha gbenda u hemban cii sha u nan uma na sha ci wase. (Yoh. 15:13) Kwagh u se na Yehova man Yesu ve a kuma sha dooshima u ve tese se la môm kpa ngu ga. Kpa se fatyô u tesen ser se wuese kwagh u ve er a vese ne sha gbenda u se eren kwagh ken uma wase ayange ayange la. (Kol. 3:15) Nahan ka se soo u zan Mkombo u Umbur Ku u Yesu la sha er se hen sha dooshima u ve tese se la, shi se tese er ve doo se ishima yô.
15. Mba i shighe ve mkurem mbara kua mba ve lu iyôngo igen la cii, nagh ku ipaan kura ku ve a inja kpishi sha ci u nyi?
15Nagh ku ipaan kura ku se a inja kpishi. (Mat. 20:28) Nagh ku ipaan kura gba mba i shighe ve mkurem mbara kwagh kpishi, sha ci u ka ku ku ne ve lu a ishimaverenkeghen ve i doon tsung la ye. Er ve ne nagh ku Kristu kura jighjigh yô, Yehova nenge ve ér mba mbaperapera, shi a ngohol ve ve hingir ônov nav. (Rom. 5:1; 8:15-17, 23) Mba ve lu iyôngo igen la kpa ka ve tese ér ve wuese nagh ku ipaan kura kpishi. Er ve kpa ve ne nagh ku ipaan ku Kristu kura jighjigh yô, mba wang sha ishigh ki Aôndo, shi mba eren un icighan tom, shi mba a ishimaverenkeghen ér vea va “due ken zegecan kera.” (Mpa. 7:13-15) Gbenda môm u mba i shighe ve mkurem mbara kua mba ve lu iyôngo igen la ka ve tese ér ve wuese nagh ku ipaan kura yô, ka sha u zan Mkombo u Umbur Ku u Yesu la hanma inyom.
16. Ityôkyaa igen i ka se za Mkombo u Umbur Ku u Yesu la yô, ka sha ci u nyi?
16 Ityôkyaa igen i ka se za Mkombo u Umbur Ku u Yesu la yô, ka sha ci u se soo u ungwan imo i Yesu. Sea lu a ishimaverenkeghen i yemen sha shin va lu uma gbem sha won shin tar kpa, gba u hanma wase cii nana dondo tindi u Yesu yange wa hen tugh mbu hii kwagh u Mkombo U Umbur Ku na la. A kaa ér: “Eren nen kwagh ne sha u umbur mo.”—1 Kor. 11:23, 24.
ER MKOMBO NE KA A WASE MBA VE ZE LA CII YÔ
17. Mkombo u Umbur Ku u Yesu la ka a wase se u seer kporom hen Yehova nena?
17Ka se seer kporom hen Yehova. (Yak. 4:8) Er se hen ken ngeren ne nahan, ka sea za Mkombo u Umbur Ku u Yesu yô, kwagh la a wase se u henen sha ishimaverenkeghen i Yehova a ne se la, kua dooshima u a tese se sha gbenda u hemban cii la. (Yer. 29:11; 1 Yoh. 4:8-10) Ka sea henen sha ishimaverenkeghen yase i bunden ga, i sha kwagh u mlu wase u ken hemen la, man sha kwagh u dooshima u been ga u Yehova a tese se la yô, kwagh la a na Yehova a hemba doon se ishima, shi se hemba yan ijende a na kangenaa cii.—Rom. 8:38, 39.
18. Ka sea hen sha dooshima u Yesu a tese se la yô, ishima i taver se u eren nyi?
18Ishima ka i taver se u dondon ikyav i Yesu. (1 Pet. 2:21) Ka a va shiin ayange kpuaa u a er Mkombo u Umbur Ku u Yesu yô, se hemban ôron Bibilo sha ajiir a i ôr akaa a yange er shighe u shi kasua môm u a wua Yesu la, man kwagh u ku na, kua akaa a yange er shighe u i nder un shin ku la kpaa. Hen aikighe u Umbur Ku u Yesu la di, kwaghôron u umbur ku na la ka a umbur se dooshima u Yesu a tese se la. (Ef. 5:2; 1 Yoh. 3:16) Ka sea ôr kwagh u dooshima u tangen iyol ga u Yesu tese se la shi sea hen sha mi yô, se nenge ser gba u se “za hemen u zenden vough er un shon la yange zenden nahan.”—1 Yoh. 2:6.
19. Se za hemen u lun ken dooshima u Aôndo nena?
19Ka se hemba kangen ishima u lun ken dooshima u Aôndo. (Yuda 20, 21) Ka se za hemen u lun ken dooshima u Aôndo sha u nôngon sha afatyô wase cii ungwan imo na, man sha u tseghan iti na, kua sha u eren kwagh u una na a saan un iyol yô. (Anz. 27:11; Mat. 6:9; 1 Yoh. 5:3) Ka sea za Mkombo u Umbur Ku u Yesu la sea za nenge yô, kwagh la a na se hemba kangen ishima u eren kwagh ken uma wase sha gbenda u tesen ser se mba kaan a Yehova ser, ‘M soo u lun ken dooshima wou gbem sha won!’
20. Ka atôakyaa a injaa a nyi a ne ve ka se za Mkombo u Umbur Ku u Yesu laa?
20 Sea lu a ishimaverenkeghen i yemen sha shin va lun uma gbem sha won shin tar kpa, se cii se mba a atôakyaa a injaa a ka se za Mkombo U Umbur Ku u Yesu yô. Hanma inyom cii, ka sea za kohol sha iyange la yô, se umbur ku u Yesu Kristu, un u a doo se ishima kpishi la. Ityôkyaa i hemban cii yô, ka se umbur gbenda u hemban cii u i tese se dooshima la, ka dooshima u Yehova a tese se sha u nan se wan na ér a va paa se la je la. Ken inyom ne, a lu eren Mkombo u Umbur Ku u Yesu sha iyange i Tomataan, Aipor 15, 2022, shighe u iyange ia mire yô. Yehova kua Wan na cii ve doo se ishima. Nahan, kwagh u ka a hemba gban se ishima sha iyange i Umbur Ku u Yesu la yô, ka u lun hen mkombo shon.
ICAM 16 Wuese Yehova Er A Ver Wan Na Tor Yô
^ Ikyum. 5 Sea lu a ishimaverenkeghen i yemen sha shin va lun ken paradiso shin tar kpa, hanma inyom yô, se cii ka se ver ashe a shighe u zan Mkombo u Umbur Ku u Yesu. Ngeren ne time sha atôakyaa a injaa a ken Bibilo, a ka se za mkombo ne yô, man er ka sea za mkombo ne ve, kwagh la a wase se yô.
^ Ikyum. 4 Wea soo u seer fan kwagh u ikyuryan i he man ikyuryan i Tartor la yô, nenge ngeren u a lu a itinekwagh ér, “Ka Ne Né Lu ‘Tartor u Upristi’ Ye” la, ken Iyoukura i Oktoba 15, 2014, peeji 15-17.
^ Ikyum. 4 ISHEMBER I I TE IWANGER SHA MI YÔ: Ishember i mba i shighe ve mkurem mba ve shi her la ngi ôron kwagh u Mbakristu mba i shighe ve mkurem mba ve shi uma shin tar nyian la.
^ Ikyum. 10 Wea soo u seer timen sha kwaghôron u profeti u sha kwagh u mbaaga uhar u i ôr ken Esekiel ityough 37 la yô, nenge ngeren u a lu a itinekwagh ér, “Mbampin Mba Mbaôron Takerada Ne Ve Pin La,” ken Iyoukura i Julai 2016, peeji 31.
