NGEREN U TIMEN SHA MI 5
ICAM 108 Dooshima u Mimi u Aôndo La
Er Dooshima u Yehova A Tese Se la a Wase Se Yô
“Kristu Yesu yange va shin tar u va yiman mbaasorabo.” —1 TIM. 1:15.
KWAGH U SE LU HENEN YÔ
Ken ngeren ne, se lu nengen er nagh ku ipaan kura ku wase se, man er se tese Yehova iwuese yase yô.
1. Ka nyi se er ve a saan Yehova iyolo?
TÔÔ ase wer, u na or wou iyua i injaa kpishi, iyua la dooashe shi ka kwagh u una wase nan kpaa. Kpa aluer or la nan gema iyua la nan ver mape, kwagh kera gba nan sha mi ga, shi nan ngu henen kwagh u i ken ishima i nan kpaa ga, nahan a vihi u kpen kpen. Shin ka nahan ga? Kpa aluer nan tese ér iyua la gba nan kwagh shi nan ngu eren kwagh a mi yô, a doo u je a zua ga. Ikyav ne zua sha kwagh u iyua i ipaan i Yehova a ne se la nena? Yehova na Wan na va kpe sha ci wase. Nahan Yehova ka una nenge sea tesen ser se wuese iyua i injaa i a ne se la, kua dooshima u yange mgbegha un ve na nagh ku ipaan sha ci wase la yô, i saan un iyol je ka u henen a hen ga!—Yoh. 3:16; Rom. 5:7, 8.
2. Ka nyi se lu timen sha mi ken ngeren nee?
2 Kpa alaghga shighe a karen yô, se hii u nengen iyua i ipaan la ser ka beerkwagh. Nahan maa a hingir inja er se gema iyua i injaa i Aôndo a ne se la, se nôngor ken kpekpe nahan. Saan se iyol er i ne se iyua la yô, kpa se gema i se ver kera. Nahan se palegh kwagh ne nena? Hanma shighe yô, a gba u se henen sha kwagh u Aôndo man Kristu ve er sha ci wase la. Ngeren ne una wase se u eren kwagh la. Nahan se lu timen sha gbenda u nagh ku ipaan kura ku lu wasen se hegen, man er kua va wase se ken hemen yô. Shi se time sha gbenda u se fatyô u tesen ser se wuese dooshima u Yehova a tese se la, hemban cii je yô, hen shighe u Umbur Ku u Yesu ne.
ER NAGH KU IPAAN KURA KU LU WASEN SE HEGEN LA
3. Ka sha gbenda môm u nyi nahan nagh ku ipaan kura ku lu wasen se hegene?
3 Hegen je kpa, nagh ku ipaan kura ku wasen se. Ikyav i tesen yô, ka sha ci u nagh ku ipaan kura Yehova a den se a asorabo ye. Yehova den se a asorabo ka sha ci u gba u una er nahan keng keng ga. Kpa ka sha ci u a soo u eren nahan. Orpasalmi yange wa icam i wuese Yehova sha kwagh ne kaa ér: “Gadia We, Tere, U doo, U kegh iyol u den kwaghbo, erdoo Wou ngee a mba ve yer sha iti You cii.”—Ps. 86:5; 103:3, 10-13.
4. Ka sha ci u unô Yehova yange na nagh ku ipaana? (Luka 5:32; 1 Timoteu 1:15)
4 Alaghga mbagenev vea nenge ér ve kuma u Yehova una de ve a asorabo ga. Jighilii yô, se cii se kuma u a de se a asorabo ga. Kape apostoli Paulu kpa yange nenge je la, a kaa ér un ‘kuma u a yila un ér apostoli ga.’ Kpa shi a kaa ér: “Aôndo tesem erdoo u sha mhôôn ve m lu kwagh u m lu ne ye.” (1 Kor. 15:9, 10) Ka sea gema ishima sha asorabo a ase sha mimi yô, Yehova a de se a asorabo la. Sha ci u nyi? Ka i lu sha ci u se kuma u una de se a asorabo a ase ve a de se ga, kpa ka i lu sha ci u se doo un ishima. Nahan aluer u ngu nengen wer u kuma u Yehova una de u a asorabo ou ga man ishima ngi zan we iyol sha kwagh shon yô, umbur wer Yehova na ipaan ka sha ci u ior mba ve lu a isholibo iyol shio ga, kpa ka sha ci u uumace mba ve yen mba ve lu vaan afanyô sha ci u asorabo a ve shi nôngon ér vea gema ishima la.—Ôr Luka 5:32; 1 Timoteu 1:15.
5. Gba u or wase môm nana nenge ér nan kuma u Yehova a zungwe nan mhôônomoo? Ta iwanger.
5 Se cii, aluer sea civir Yehova anyom imôngo kpa, or wase môm nana de nengen ér nan kuma u Yehova una zungwe nan mhôônom sha ityôkyaa la ga. Yehova umbur akaa a se eren sha ci na la cii. (Heb. 6:10) Kpa a na se Wan na gbilin, ka sha u kimbin se injar sha akaa a se er sha ci na la ga. Nahan aluer se mba henen ser se kuma u Yehova una zungwe se mhôônom sha ci u se er akaa sha ci na kpishi yô, ka shami ga. Aluer se na jighjigh nahan yô, ka inja er se mba kaan ser yange ityôkyaa lu i nan nagh ku ipaan sha ci wase ga nahan.—Nenge Mbagalatia 2:21.
6. Lu nyi i na ve Paulu er Yehova tom kpoghuloo?
6 Paulu yange fa ér aluer un er nyityôkwagh sha ci u Yehova kpa, Yehova una de un kwaghbo a lu sha ci u tom u un er Un kpishi la ga. Nahan lu nyi i na ve Paulu er Yehova tom kpoghuloo nahana? Lu sha ci u tesen ér un kuma u Yehova a zungwe un mhôônom ga, kpa lu u tesen ér un wuese erdoo u sha mhôôn u Yehova a tese un la. (Ef. 3:7) Nahan yô, se kpa se za nen hemen u eren tom kpoghuloo i de lu sha ci u Yehova a zungwe se mhôônom ga, kpa i lu sha ci u tesen ser se wuese un er a tese se erdoo sha gbenda u hemban cii yô, er Paulu nahan.
7. Ka sha gbenda ugen u nyi nahan, nagh ku ipaan kura ku lu wasen se hegene? (Mbaroma 5:1; Yakobu 2:23)
7 Shi gbenda ugen u nagh ku ipaan kura ku lu wasen se hegen yô, se mba a ian i yan ijende a Yehova shi lun vea na kangenaa. a Er yange se hen ken ngeren u timen sha mi u ken kasua u a kar la nahan, shighe u i mar se la, se lu a ya ijende a Aôndo ga. Kpa sha ci u nagh ku ipaan kura yô, se fatyô u ‘lun ken bem vea Aôndo,’ shi sha ityôkyaa la yô, se fatyô u kporom hen a na.—Ôr Mbaroma 5:1; Yakobu 2:23.
8. Ian i icivirigh i se lu a mi i eren msen hen Yehova la doo se sha ci u nyi?
8 Nenge ase gbenda môm u se fatyô u lun vea Yehova kôôsôô yô. Gbenda shon yô, ka msen u eren. Yehova ongo mbamsen mba ior nav ka ve er ken igbar shighe u ve kohol imôngo la tseegh ga, ongo mbamsen mba ka se er shighe u se lu tswen la kpaa. Ka sea er msen yô, i pever se iyol, nahan ishima i kera nyian se kpishi ga. Kpa ka cii iwasen i ka se zua a mi sha u eren msen la ga. Ka sea eren msen yô kwagh la a wase se se hemba yan ijende a Aôndo kangenaa. (Ps. 65:2; Yak. 4:8; 1 Yoh. 5:14) Shighe u Yesu lu shin tar la, yange eren msen nduuluu sha ci u fa je ér Ter na u sha la ngu keghen ato a na, shi kwagh la una wase un una hemba lun vea Ter na kôôsôô. (Luka 5:16) Doo se kpishi er nagh ku Yesu kura ku ne i lu u se fatyô u yan ijende a Yehova shi lamen a na sha u eren msen hen a na je kpaa yô!
ER NAGH KU IPAAN KURA KU A VA WASE SE KEN HEMEN YÔ
9. Nagh ku ipaan kura ku a va wase mbacivir Yehova sha mimi ken hemen nena?
9 Nagh ku ipaan kura ku a va wase mbacivir Yehova sha mimi ken hemen nena? A na ve uma u tsôron. Ior kpishi hen ér kwagh a fatyô u lun nahan ga, sha ci u ior ndera kpen anyom udubu imôngo hegen. Kpa Yehova yange gba uumace ér ve kpeen ga, kpa ve lu uma gbem sha won. Adam yange una er isholibo ga yô, or môm kpa ma i taver nan u nan jighjigh a kwagh u lun uma gbem sha won la ga. Er hegen i taver u kaan ér se fatyô u lun uma gbem sha won nahan kpa, se fatyô u nan jighjigh ser se va lu uma gbem sha won, sha ci u se fa ser Yehova kimbi injar i hemban cii sha Wan na iyol na ér kwagh a lu nahan.—Rom. 8:32.
10. Ka nyi mba i shigh ve mkurem kua mba ve lu iyôngo igen la ve lu veren ashe a mini?
10 Er uma u tsôron a lu mtsera u se va zua a mi ken hemen nahan kpa, Yehova soo ér se veren ashe a mi hegen je. Mba i shigh ve mkurem la, mba veren ashe a uma u doon tsung u vea za zua a mi sha, shighe u vea lu hemen vea Kristu imôngo la. (Mpa. 20:6) Mba ve lu iyôngo igen la di mba veren ashe u va lun uma ken paradiso shin tar, shighe u mnyoon man ijungwen a lu ga la. (Mpa. 21:3, 4) U ngu ken mba ve lu iyôngo igen la, shi u ngu a ishimaverenkeghen i va lun uma gbem sha won shin taraa? Injar i zuan a uma u tsôron shin tar la i hemba ndahar a injar i za zuan a uma u tsôron sha la ga! Jighilii yô, Yehova yange gba uumace ér ve lu uma shin tar. Sha nahan yô, se va lu uma shin tar gbem sha won, shi a saan se iyol vough er Yehova yange gba se ér se lu nahan.
11-12. Ka averen a ken Paradiso a nyi nahan se fatyô u veren ashe a mini? (Shi nenge ufoto kpaa.)
11 Hen ase er u va lu uma shin tar ken Paradiso ve a lu u yô. U lu a ishimanyian sha kwagh u ange shin ku ga. (Yes. 25:8; 33:24) Hanma kwagh u dedoo u a sar u cii yô, Yehova una na u. Ka nyi nahan a sar u u henene? A sar u u henen kwagh u annyamevee? Shin a sar u u henen ityogholough ki kuhwana? Shin a sar u u henen kwaghkperana? Ka keng kwagh a gba sha mbakperan ayou man mbamaan kwagh kua mbasulev. Shi ka keng kwagh a gba sha mba suen ityom ne, er mba lôôn iyiav man mba yôron iwer kua mba varen ikyav mbi tomov nahan. Shi mba lôôn ikyon kua ufaluwa shi nengen sha mi kpa, kwagh a gba sha a ve. (Yes. 35:1; 65:21) Er u va lu uma gbem sha won yô, u zua a shighe u eren akaa ne cii kua akaa agen kpaa kpishi.
12 A saan we iyol u nengen a ior ou mba a nder ve shin ku la je a zua ga! (Aer. 24:15) Shi hen er a saan we iyol u seer henen kwagh u Yehova sha u timen sha akaa kpishi a a gbe la yô. (Ps. 104:24; Yes. 11:9) Man kwagh u hemban akaa ne cii yô, u lu civir Yehova shi mayange u er kwaghbo ga, nahan ityôkyaa ia lu i sônon un wer a de u kwaghbo ga! Nahan u tsua uma u “msaanyol u ken isholibo, u a lun gbem ga” ne wer averen a ken Paradiso la a kar u-wee? (Heb. 11:25) Mayange ga cii! Uma u doon tsung u se va lu ker la hemba nyityôkwagh i se fatyô u zuan a mi hegen ken tar ne cii. Umbur wer, ka u se saa veren ashe u va lun ken Paradiso shin tar ga, a ar her keng! Ica a gba ga tsô, tar ua hingir paradiso, nahan se gema lun ker ayange ayange. Luun er se doo Yehova ishima kuma u una na Wan na sha ci wase ga yô, kwagh môm ken akaa ne ma a fetyô u eren ga!
Ka akaa a dedoo a nyi nahan u lu hemban veren ashe u va nengen a mi shin eren ken Paradiso? (Nenge ikyumhiange i sha 11-12)
KWAGH U U ER U WUESE DOOSHIMA U YEHOVA A TESE U LA YÔ
13. Ka nyi se er u wuese dooshima u Yehova a tese se laa? (2 Mbakorinte 6:1)
13 Ka nyi se er u wuese Yehova sha nagh ku ipaan ku a ne sha ci wase laa? Kwagh u se er yô, ka u hemban veren ishima sha tom na a akaa agen cii. (Mat. 6:33) Kera ga je kpa, Yesu yange kpe “sha er mba ve lu uma kpaa, vea kera lu uma sha ci ve ayol a ve ga, kpa a lu sha ci u un u yange kpe sha ci ve, shi i nder un shin ku la yô.” (2 Kor. 5:15) Yehova tese se erdoo sha gbenda u hemban cii, nahan aluer se mba eren un tom sha afatyô wase cii yô, se lu tesen ser se kav erdoo u a tese se kpishi la shi se wuese un sha mimi.—Ôr 2 Mbakorinte 6:1.
14. Se na Yehova jighjigh shi se dondo kwaghwan na nena?
14 Kwagh ugen u se er u wuese Yehova sha dooshima u a tese se la yô, ka u nan un jighjigh shi dondon kwaghwan na. Se er kwagh ne nena? Se er kwagh ne shighe u se lu tsuan kwagh u se er yô. Ikyav i tesen yô, shighe u u lu henen sha kwagh u zan makeranta u vesen shin lumun u eren ma tom yô, hen sha kwagh u Yehova una soo ér we u er la. (1 Kor. 10:31; 2 Kor. 5:7) Ka sea tesen jighjigh u nan wase sha ieren yô, kwagh u injaa a due ker kpishi. Man kwagh shon yô ka se seer nan Yehova jighjigh, shi se hemba yan ijende a na kangenaa. Nahan ishimaverenkeghen yase i va lun uma gbem sha won la i seer taver.—Rom. 5:3-5; Yak. 2:21, 22.
15. Se tese ser se wuese Yehova hen shighe u Umbur Ku u Yesu nena?
15 Kwagh ugen kpa ngu u se er u wuese Yehova sha dooshima u a tese se la yô. Kwagh shon yô, ka u tesen Yehova ser se wuese un sha nagh ku ipaan ku a ne la hen shighe u Umbur Ku u Yesu ne. Dugh u wan iyol i va zan Mkombo u Umbur Ku u Yesu la sha yô, se fatyô u lôhôn mbagenev kpaa mkombo shon. (1 Tim. 2:4) Pase mba u lu lôhôn ve la kwagh u una za hemen hen Mkombo u Umbur Ku u Yesu la yô. Kwagh u una wase u yô, u fatyô u tesen ve uvidio mba sha jw.org/tiv mba ve er kwagh u ku u Yesu la. Er vidio i i lu a itinekwagh ér Er Nan Ve Yesu Yange Kpe? la nahan, man vidio i Umbur Ku u Yesu la. Mbatamen ve nôngo sha afatyô ve cii ve lôhô mba iyol i kpe ve u civir Yehova la. Hen ase er aluer i wase iyôngo i Yehova i i saa la igen cin hide ken ikyumile ve a saan Yehova kua Yesu man mbatyomov cii iyol, shi shin tar kpa a ember yô! (Luka 15:4-7) Shighe u se ze Mkombo u Umbur Ku u Yesu la kpa, doo u se sugh anmgbianev mba ve lu ken tiônnongo la tseegh ga, gba u se sugh mbahev kua mba ve kera ve mkombo ga ica i gbe la kpaa. Doo u se ngohol ve sar sar!—Rom. 12:13.
16. Er nan ve i doo u se seer eren tom u pasen kwagh la hen shighe u Umbur Ku u Yesu?
16 U fatyô u seer eren akaa sha ci u Yehova hen shighe u Umbur Ku u Yesu kpa? U eren nahan la ka gbenda ugen u tesen ser se wuese Aôndo man Kristu sha kwagh u ve er sha ci wase la cii. Aluer se seer shighe wase u eren Yehova tom la yô, un kpa una seer suen se, nahan kwagh ne una wase se u seer lun a vangertiôr. (1 Kor. 3:9) Shi nôngo sha afatyô wou cii, ôr avur a Bibilo a i tese ken antakeda u U Timen ken Ruamabera Ayange Ayange, shin ken caate i ken antakeda u mkombo u ken atô u kasua ér i ôr hen shighe u Umbur Ku u Yesu la. Gayô u fatyô u ôron avur a Bibilo la, nahan seer timen sha mi ken kwaghhenen wou u sha tseeneke hen shighe shon.
17. Ka nyi ka i doo Yehova? (Shi nenge ngeren u kiriki u a lu a itinekwagh ér “ Igbenda i Se Fatyô u Wuese Yehova sha Dooshima u A Tese Se La Yô.”)
17 Alaghga mlu wou una yange u u eren akaa agen a i ter ken ngeren ne yô. Nahan kpa umbur wer, Yehova tôôn kwagh u u fetyô u eren la karen sha u mbagenev ve er ga. A fa er un doo u ishima yô. Nahan ka i doo un u nengen er u lu wuese un a ishima you i môm sha ci u iyua i doon tsung i a ne sha u paan se la yô.—1 Sam. 16:7; Mar. 12:41-44.
18. Se mba wuese Yehova Aôndo man Yesu Kristu sha ci u nyi?
18 Ka nagh ku ipaan kura ku ne i lu u a fatyô u den se asorabo, shi se ye ijende a Yehova, shi se lu a ishimaverenkeghen i va zuan a uma u tsôron ye. Yô, hanma shighe cii se wuese nen Yehova sha dooshima u a mgbegha un ve a ne se akaa a dedoo ne la. (1 Yoh. 4:19) Shi se tese nen ser se wuese Yesu u se doo un ishima je a ne uma na sha u paan se la!—Yoh. 15:13.
ICAM 154 Dooshima u Been Ga
