1. Ka sea za Mkombo u Umbur Ku u Kristu u i eren hanma inyom la nahan kwagh la a wase se nena?

 NAGH ku ipaan kura, ka iyua injaa je ka kwagh u henen a hen ga! (2 Kor. 9:15) Er Yesu a kpe sha ci wase yô, u fatyô u yan ijende vea Yehova Aôndo kangenaa. Shi u fatyô u veren ashe u va lun uma gbem sha won. Sha nahan yô, doo u se tesen ser se wuese nagh ku ipaan ku Yehova, un u dooshima yange mgbegha un na nagh ku ipaan la! (Rom. 5:8) Yesu yange kaa ér se eren Mkombo u Umbur Ku na, sha er se za hemen u tesen se nagh ku ipaan kura ku se a inja, shi mayange se tôô se ka beerkwagh ga yô.—Luka 22:19, 20.

2. Ka nyi se lu timen sha mi ken ngeren nee?

² Ken inyom ne, a lu eren Mkombo u Umbur Ku u Yesu sha iyange i Sati Aipor 12, 2025. Se cii se mba wan iyol i zan mkombo ne je ka ashe tugh ga. Aluer se tôô shighe u Umbur Ku u Yesu ne, se hen sha akaa a Yehova man Wan na ve er sha ci wase la yô, kwagh la una wase se kpishi je. Ken ngeren ne, se lu timen sha akaa a nagh ku ipaan ku tese se sha kwagh u Yehova man Wan na yô. Ngeren u a dondo la di una wase se u kaven kwagh u se er ve nagh ku ipaan kura ku a wase se, man kwagh u se er u tesen ser se wuese ku yô.

KWAGH U NAGH KU IPAAN KU TESE SE SHA KWAGH U YEHOVA YÔ

3. Ku u or môm ua na a fatyô u yiman ior umiliôn imôngo nena? (Shi nenge foto kpaa.)

³ Kwagh u nagh ku ipaan la tese se er Yehova a ôron ijir sha mimi yô. (Dut. 32:4) Yehova tese ér un ôron ijir sha mimi nena? Hen ase sha kwagh ne: Yange Adam hembe Aôndo ato yô a hingir orsholibo, nahan a kpe kera. Se kpa, er se dugh ken Adam  yô, se mba mbaasorabo nahan ka se kpe. (Rom. 5:12) Kpa Yehova tindi Wan na Yesu va na nagh ku paan se, sha er se fatyô u duen ken mlu u isholibo man ku la kera yô. Nahan kpa, nagh ku yange i na sha orumace môm u lu a myen ga la tseegh nahan, kua fatyô u yiman ior umiliôn imôngo nena? Apostoli Paulu pase ér: “Er lu sha ihyembeato i or môm [Adam] la ior kpishi hingir mbaasorabo yô, ieren i ungwan kwagh i or môm [Yesu] la kpa i na ka u ior kpishi vea hingir mbaperapera.” (Rom. 5:19; 1 Tim. 2:6) Inja na yô, Paulu lu kaan ér uumace cii mba mbaasorabo nahan gba u vea kpeen, sha ci u orumace u hiihii u yange lu a myen ga la hemba Aôndo ato. Sha nahan yô, gba u orumace ugen u lun a myen ga, nana ungwa imo i Aôndo ve se fatyô u duen ken mlu u isholibo man ku la kera ye.

4. Er nan ve Yehova yange gba den tsô ér mbaasemaamimi mba ken tsombor u Adam ve lu uma gbem sha won ga?

⁴ Kpa mimi je, yange gba u sar Yesu una kpe keng ve a yima se yee? Yehova yange ma gba den tsô ér mbaasemaamimi mba ken tsombor u Adam ve lu uma gbem sha won gaa? Uumace yô, vea nenge ér ka kwagh u i doo u yange ma i er je la. Kpa Yehova yô, yange nenge ér una er nahan a lu shami ga. Sha ci u una er nahan yô, a lu inja er mayange je Adam er ma isholibo i vesen ga, shi ônov nav kpa mba mbaasorabo ga nahan. Kpa lu nahan ga, Adam yange er isholibo jighilii shi ônov nav kpa hingir mbaasorabo.

5. Se fatyô u lun a vangertiôr ser Yehova una er kwagh u vough hanma shighe cii sha ci u nyi?

⁵ Shi kwagh ugen yô, luun er Yehova na nagh ku ipaan kura ga, nahan venda u ôron ijir sha mimi sha u den ér ônov mba Adam mba nomso man mba kasev mba ve yen la ve lu uma gbem sha won di ye? Yehova yange una er nahan yô, ma tese ér un iyol na a hide a per atindi a na a perapera la, nahan ior ma hingir u nengen ér una fatyô u peren atindi a na sha akaa agen kpaa. Shi akaa a a tende zwa u va eren ken hemen la je kpa, ma ve hen ér adooga una va kera er a ga. Ikyav i tesen yô, adooga ma i taver ior u nan jighjigh ér Yehova una va kure uityendezwa nav cii. Kpa ityôkyaa ngi i ishima ia nyian se ér akaa a a ôr la aa bunde ga. Sha ci u nyi? Sha ci u Yehova yange ôr ijir sha mimi shin er lu u saa una na nagh sha Wan na keng ve una er nahan kpaa. Nahan se fatyô u lun a vangertiôr ser Yehova una er kwagh u vough hanma shighe cii.

6. Ka sha gbenda môm u nyi nagh ku ipaan kura ku tese ér se doo Yehova ishima? (1 Yohane 4:9, 10)

⁶ Nagh ku ipaan kura wase se u kaven er Yehova a ôron ijir sha mimi yô. Kpa u hemban cii yô, ku wase se u kaven ieren igen i yange i mgbegha Yehova ve tindi Yesu ér a va kpe sha  ci wase yô, ieren shon yô ka dooshima. Ka er se doo un ishima yum ve yange er nahan ye. (Yoh. 3:16; ôr 1 Yohane 4:9, 10.) Kwagh u nagh ku ipaan ne tese se ér Yehova soo ér se lu uma gbem sha won di tseegh tsô ga, kpa se lu ken tsombor na. Hen ase sha kwagh ne: Yange Adam eren isholibo yô, Yehova dugh un ken tsombor Na u u lu mbacivir un tseegh la kera. Sha nahan yô, se cii i mar se ken tsombor u Aôndo la ga. Kpa Yehova den se asorabo a ase sha ci u nagh ku ipaan kura, shi ken hemen yô uumace mba ve ne un jighjigh, shi ve ungwan imo na la cii una va a ve vea hingir mba ken tsombor na. Hegen je kpa, Yehova una fatyô u den se a asorabo, shi se fatyô u lun vea na kôôsôô kua anmgbianev asev mba nomso man mba kasev. Sha kpôô yô, se doo Yehova ishima!—Rom. 5:10, 11.

7. Ican i Yesu ya la wase se u kaven er se doo Yehova ishima kpishi la nena?

⁷ Aluer se time sha gbenda u nagh ku ipaan kura yange ku bende a Yehova la yô, se hemba kaven er se doo un ishima kpishi yô. Satan kaa ér or u civir Yehova môm u nana tagher a mbamtaver ve nana za hemen u civir un sha mimi je kpa nan ngu ga. Yehova yange de Yesu ya ican cii mase kpen ye. Yange de ér kwagh la a er Wan na u tesen ér Satan ka oraie. (Yobu 2:1-5; 1 Pet. 2:21) Yehova yange nenge er mbaahendanev naha Yesu tar, shi ushoja gbidye un maa ve mande un sha kon yô. Yehova yange lu a tahav mbu yangen hanma kwagh u i er a Yesu la cii. (Mat. 27:28-31, 39) Ikyav i tesen yô, shighe u mbahendan a Yesu kaa a na ér: “De ase [Aôndo] a yima un, aluer A soo un yô” la, Yehova yange una soo kpa man yima un. (Mat. 27:42, 43) Nahan kpa, yange una er nahan yô, ma i kera kimbi injar i paan se ga, nahan ma se kera lu a ishimaverenkeghen ga. Sha nahan yô, Yehova de ér Wan na a wa ishima a ican zan zan a kar kpen.

8. Yehova yange nenge Wan na lu yan ican nahan kwagh shon nyoon unu? Ta iwanger. (Shi nenge foto kpaa.)

⁸ Mayange je doo u se tôô ser er Yehova a lu Aôndo u hemban agee yô, kwagh u vihin una er un kpa a nyoon un ga ze! A gba se sha inja i mlu na. A gba se sha gbenda u kwagh u vihin shin u doon una fatyô u benden a vese yô. Sha nahan yô, se fatyô u kaan ser kwagh u vihin ka una er Yehova yô, i nyoon un. Bibilo pase ér kwagh u vihin ka una er Yehova yô, i vihi Un ken ishima kpishi. (Ps. 78:40, 41) Shi hen sha kwagh u Aberaham vea Isaka kpaa. Yange i kaa a Aberaham ér a na nagh sha wan na Isaka, man lu cii wan na je la. (Gen. 22:9-12; Heb. 11:17-19) Hen ase er yange Aberaham una zungwe shi a lu un ken ishima dang shighe u wa iyol i wuan wan na bee, tôô ihô u sôngon un la yô. Nahan hide hen ase er yange a lu Yehova ken ishima, shighe u nenge mbaaferev na Wan na ican zan zan kar wuan un la. Kwagh la yange nyoon Yehova je ka  u henen a hen ga!—Nenge vidio i sha jw.org/tiv i i lu a itinekwagh ér Kav Jighjigh Ve u Nan—Aberaham, Vegher 2 la.

9. Mbaroma 8:32, 38, 39 tese ér we kua mba u civir Yehova a ve imôngo la ne doo Yehova ishima nan je?

⁹ Nagh ku ipaan kura tese ér or môm kpa se doo nan ishima er se doo Yehova ishima kpishi la nahan ga. Se doo Yehova ishima hemba er se doo ior asev, shin azende a ase a sôngo sôngo ishima la ica je. (Ôr Mbaroma 8:32, 38, 39.) Se doo Yehova ishima hemba er iyol yase i doo se ishima la je kpaa. U soo u lun uma gbem sha wono? Er u soo nahan, fa wer Yehova hemba soon cii. U soo wer Yehova a de u asorabo ou-wee? Er u soo nahan, fa wer Yehova hemba soon u den we asorabo ou la cii. Kwagh u Yehova a gem a soo ér se er yô, ka u se tese ser se wuese iyua i nagh ku ipaan ku a ne la, shi se na un jighjigh, shi se ungwan imo na, ka cii je la. Nagh ku ipaan kura ka iyua injaa i Aôndo a ne se u tesen ér se doo un ishima kpishi yô. Ken tar u he la, se va seer nengen er se doo Yehova ishima kpishi yô.—Orpa. 3:11.

KWAGH U NAGH KU IPAAN KU TESE SE SHA KWAGH U YESU YÔ

10. (a) Ka nyi Yesu yange hemba zungwen sha kwagh u ku na? (b) Ka sha igbenda i nyi nahan Yesu yange tese ér akaa a Satan a ôr sha iyol i Yehova dang dang la cii ka mbaaie? (Shi nenge ngeren u kiriki u a lu a itinekwagh ér “ Mtil sha Mimi u Yesu Tese Ér Akaa a Satan A Ôr sha Iyol i Yehova la Cii Ka Mbaaie” la.)

¹⁰ Yesu soo ér i vihi iti i dedoo i Ter na a lu a mi la ga. (Yoh. 14:31) Yange i wa Yesu kwagh iyol ér a laha Ter na, shi ngu mgbeghan ior ér ve hendan a gomoti. Nahan a zungwe kpishi sha ci u lu u kwagh la una na ior vea kera soo kwagh u Ter na ga. Sha nahan yô, Yesu er msen kaa ér: “Tere, a gbe sha mi yô, ma m kera me shin kôôpu ne ga.” (Mat. 26:39) Er Yesu tile sha mimi hen Yehova zan zan kar kpen yô, a tese wang ér akaa a Satan a ôr sha Ter na dang dang la cii ka mbaaie purututu.

11. Ka akaa a nyi nahan Yesu yange er u tesen ér ior doo un ishima kpishi? (Yohane 13:1)

 ¹¹ Shi nagh ku ipaan kura tese se er kwagh u ior yange gba Yesu ishima kpishi yô, man hemban je yô, mbahenen nav. (Anz. 8:31; ôr Yohane 13:1.) Yesu yange fa je ér akaa agen a lu u una va er shin tar la aa taver kpishi, man hemban je yô u va kpen ku u nyoon tsung la nahan. Yange er akaa ne sha ci u ior doo un ishima shi lu akaa a Ter na tindi un ér a va er yô. Yesu yange tese ér ior doo un ishima sha gbenda u vesen sha u pasen ve kwagh, shi tesen ve, shi wasen ve kpaa. Sha iyange i lu u Yesu una kpe la je kpa, a tôô shighe a ôô mbaapostoli nav angahar, shi tese ve shi taver ve ishima shi sur ve ishima kpaa. (Yoh. 13:12-15) Shighe u i mande Yesu sha kon lu u una kpe, shi lu nyoon un tsung la kpa a ôr kwagh u nan ormbaiv u i mande un ikyua a na la ishimaverenkeghen, a kaa a na ér una va lu a na ken paradiso. Shi yange tese ér un wa ngô na ikyo sha u kaan a Yohane ér a nengen sha a na. (Luka 23:42, 43; Yoh. 19:26, 27) Yesu yange tese ér ior doo un ishima kpishi sha u eren a ve kundu kundu, man sha dooshima shi kpen sha ci ve.

12. Ka akaa a dedoo a nyi nahan Yesu a lu eren sha ci wase zan zan hegene?

¹² Er Yesu yange kpe sha ci wase “kwa môm” nahan kpa, ngu eren akaa kpishi sha ci wase zan zan hegen. (Rom. 6:10) Ka akaa a nyi nahan a lu erenee? Ngu eren tom u nan se akaa a dedoo kpishi, a se fatyô u lun a mi hegen sha ci u nagh ku ipaan kura yô. Nenge ase akaa agen a a lu eren hegen yô. Ngu Tor wase, man zegepristi shi ngu ityough ki tiônnongo kpaa. (1 Kor. 15:25; Ef. 5:23; Heb. 2:17) Ngu nengen sha tom u kohol mba i shigh ve mkurem la, kua zegeikpelaior la, man tom ne ka tom u i gbe u a er u a bee cii ve zegecan una bee ye. a (Mat. 25:32; Mar. 13:27) Shi ngu wasen wanakiriki u jighjigh sha er una za hemen u nan se kwaghyan u ken jijingi u i gbe u se lu a mi ve se za hemen u civir Yehova sha mimi la yô. (Mat. 24:45) Shi hen shighe u Hemen na u Anyom Dubu la, una za hemen u eren tom sha ci wase. Yehova yange na se Wan na lu sha u a va kpe sha ci wase tseegh tsô ga, kpa lu u a er akaa agen kpishi kpaa sha ci wase!

ZA HEMEN U HENEN AKAA A HE

13. U er nan ve u za u hemen u henen sha kwagh u dooshima u Aôndo man Kristu ve tese se laa?

¹³ Aluer u ngu henen sha dooshima u Yehova Aôndo man Kristu Yesu ve tese se la yô, kwagh la una wase u u seer fan er u doo ve ishima yô. Ken inyom ne, u fatyô u ôron ityakeda i ivangeli  môm shin hemban nahan, sha shighe u Umbur Ku u Yesu la. Kpa de nôngon wer u ôr mtom kpishi hen shighe môm ga. Ôron kure kure shi keren atôakyaa agen i gbe u Yehova ma Yesu vea doo se ishima yô. Shi nôngo sha afatyô wou cii ôr mbagenev akaa a u hen la.

14. Aluer se mba tôvon sha kwagh yô, kwagh la una wase se u seer fan kwagh u ipaan man atesen agen nena? (Pasalmi 119:97) (Shi nenge foto kpaa.)

¹⁴ Alaghga u nenge wer akaa a he kera nga a u hen sha kwagh u ijirôron i mimi i Aôndo, man dooshima na kua nagh ku ipaan la ga. Jighilii yô, ka u se za hemen u henen akaa a he sha atineakaa ne gbem sha won. Nahan u er nena? Ôron shi henen akaa a doon tsung, a a lu ken ityakeda yase la. Aluer u kav ma kwagh u u ôr ken Bibilo tsembelee ga yô, seer tôvon sha mi. Nahan ker iyange hen sha akaa a he a u zough a mi sha kwagh u Yehova man Wan na kua kwagh u akaa shon a tese u sha gbenda u u doo ve ishima la. Er kwagh ne ken iyange la cii.—Ôr Pasalmi 119:97.

15. Er nan ve i gbe u se za hemen u keren akaainjaa a he shighe u se lu ôron Bibilo?

¹⁵ Aluer u zua a kwagh u he shin kwagh u doon we hanma shighe u u lu ôron Bibilo, shin u lu tôvon sha kwagh ga kpa, iyol i de kpen we ga. Tôô wer u ngu er or u nan lu keren zanaria nahan. Orkeren zanaria ka nan tôô ahwa, shin ayange imôngo cii ve nan zua a anivur zanaria ye. Nahan kpa, nan gbe uwer u keren ga, sha ci u aluer nan zua a mi kpuaa kpa, ngu nan a inja. Man hanma kwagh u he u se zough a mi ken Bibilo cii hemba ngun a inja a zanaria! (Ps. 119:127; Anz. 8:10) Nahan za hemen u ôron Bibilo, shi keren akaa a he sha er u seer fan a yô.—Ps. 1:2.

16. Se dondo ikyav i Yehova man Yesu nena?

¹⁶ Shighe u u lu ôron Bibilo yô, hen sha igbenda i u fatyô u dondon kwagh u u ôr la ken uma wou yô. Ikyav i tesen yô, shighe u u lu eren kwagh vea mbagenev yô, dondo ikyav i Yehova i ôron ijir sha mimi la nahan de sangen a sange ga. Tese wer Yehova man ior doo u ishima sha u ungwan imo i na shi wasen mbagenev kua ken ashighe a i taver je kpaa, er Yesu nahan. Shi dondo ikyav i Yesu sha u pasen mbagenev kwagh, sha er ve kpa nagh ku ipaan kura ku a wase ve yô.

17. Ka nyi se lu henen ken ngeren u a dondo laa?

¹⁷ Aluer se za hemen u timen sha kwagh u nagh ku ipaan kura yô, Yehova man Wan na vea seer doon se ishima, nahan ve kpa se seer doon ve ishima. (Yoh. 14:21; Yak. 4:8) Sha nahan yô, se eren tom a akaa a Yehova a ne se la sha er se za hemen u timen sha kwagh u nagh ku ipaan kura yô. Ngeren u a dondo ne una lu timen sha gbenda u nagh ku ipaan kura ku a fatyô u wasen se, man kwagh u se er u wuese dooshima u Yehova a tese se la yô.