NGEREN U TIMEN SHA MI 1
ICAM 2 Yehova Ka Iti You
Na Yehova Icivir
IVUR YASE I SHA INYOM I INYOM I 2025: ‘Na nen Yehova icivir i i kom sha iti Na yô.’—PS. 96:8.
KWAGH U SE LU HENEN YÔ
Ken ngeren ne, se lu timen fan er se na Yehova icivir i a kom u se na un la yô.
1. Ka nyi ior kpishi ve hembe veren ishima sha mi nyiana?
U NENGE er ior kpishi nyian ve hembe wan ayol a ve ikyo a mbagenev kpa? Ikyav i tesen yô, ior ka ve kaan ihyagh shi ve taan ave vanger a akaa a ve eren la sha ajiir a lamen a ior a sha Intanet la. Nahan kpa, ka ior kpuaa tseegh ve ne Yehova icivir nyian ye. Ken ngeren ne, se lu timen fan inja i u nan Yehova icivir la, man kwagh u una mgbegha se u eren nahan yô. Shi se nenge er se fatyô u nan Yehova icivir i i kom sha a na la, man gbenda u ica a gba ga tsô un iyol na una na iti na icivir la kpaa.
U NAN YEHOVA ICIVIR LA INJA NA ÉR NYI?
2. Yehova yange tese icivir na hen Uwo u Senai nena? (Shi nenge foto u sha igbende kpaa.)
2 Icivir ka nyi? Bibilo ka ia ter ishember i icivir la yô, i ôron i lu kwagh u u er a or ve a doo nan yô. Yehova yange duen a Mbaiserael ken Igipiti ayange nga kar kpuaa yô, a tese ve icivir na. Hen ase sha kwagh u yange er ne: Mbaiserael umiliôn imôngo kohol hen kpe u Uwo u Senai sha u vea ungwa kwagh u Aôndo ve soo u ôron ve yô. Tsô ibyeenegh ki iligh va cir sha uwo la. Ica gbe ga yô, mnyim samber sha uwo la cii. Maa tar gba tenger sha utaha, shi aôndo lu nyiar duran. Tsô korough gba imo taver taver. (Eks. 19:16-18; 24:17; Ps. 68:8) Shighe u Yehova er akaa ne la, yange a kpiligh Mbaiserael iyol tsung u nengen er a lu a tahav kpishi yô!
Yehova yange tese Mbaiserael icivir na sha gbenda u kpilighyol hen Uwo u Senai (Nenge ikyumhiange i sha 2)
3. U nan Yehova icivir la inja na ér nyi?
3 Kpa uumace di ye? Se kpa se fatyô u eren kwagh u van Yehova a iciviri? Een, se fatyô. Gbenda môm u se eren kwagh ne yô, ka u ôron mbagenev akaa a kpilighyol a Yehova a er la, kua kwagh u aeren a na a doon tsung la. Kwagh ugen u se eren u van Yehova a icivir yô, ka u wuese un sha akaa a a wase se ve se fetyô u eren la. (Yes. 26:12) Tor Davidi lu or u yange ver ikyav i dedoo i nan Yehova icivir yô. Yange er msen ugen sha ishigh ki Mbaiserael cii, kaa a Aôndo ér: “We TER, U kuma ivesen man agee man iengem man mhembe man icivir, akaa a Sha man a shin tar cii ka a Ou.” Davidi eren msen been yô, “ior cii wuese TER.”—1 Kron. 29:11, 20.
4. Yesu yange naan Yehova icivir nena?
4 Shighe u Yesu lu shin tar la, yange na Ter na icivir sha u ôron ior ér ka un a na un tahav mbu eren uivande ye. (Mar. 5:18-20) Shi Yesu na Yehova icivir sha gbenda u yange pasen ior kwagh u Ter na shi eren kwagh a ve la. Shighe ugen la, Yesu lu tesen ior ken shinagoge, nahan kwase ugen kpa lu her, u azôv nzughul a na je kuma anyom 18 yô. Azôv er kwase la gôvor je faantyô u nalegh sha ga. Kwagh ne za kwase la iyol kpishi! Yange mhôônom kôr Yesu a kwase la, nahan a kporom henpe lu la, a lam a na kundu kundu, a kaa ér: “Kwase, i bee u angev ou.” Tsô a penda kwase la ave iyol, maa her je a nalegh sha, “a gba wuese Aôndo.” Nahan doo kwase la kpishi er Yehova a sôr un, un hingir gbang gbang yô! (Luka 13:10-13) Kwase la yange lu a ityôkyaa i nan Yehova icivir, man kape se kpa i lu je la.
SE MBA NE YEHOVA ICIVIR SHA CI U NYI?
5. Ka atôakyaa a nyi se lu a mi a nan Yehova iciviri?
5 Se mba ne Yehova icivir sha ci u a kuma u nan un icivir. Se mba a atôakyaa kpishi a nan Yehova icivir. A hemba agee cii; tahav nav mbu a ikighir ga. (Ps. 96:4-7) Akaa a a gbe la tese wang er kwaghfan na a gande ave yô. A na se uma kua akaa a aa wase se ve se za hemen u lun uma la kpaa. (Mpa. 4:11) Shi Yehova eren kwagh a ior sha mimi. (Mpa. 15:4) Hanma kwagh u Yehova a hii cii ka a er a kure, shi kur uityendezwa nav. (Yos. 23:14) Sha nahan yô, profeti Yeremia ôr kwagh u Yehova ér: “Mbafankwagh mba akuraior cii, kua icivir i utor vev cii, ma or môm ngu er We nahan ga.” (Yer. 10:6, 7) Nahan Ter wase u sha la kuma u se na un icivir. Se mba ne Yehova Aôndo wase icivir sha ci u a kuma u se na un icivir tseegh tsô ga, a doo se ishima kpaa, sha ci u aeren a dedoo a a lu a mi la.
6. Er nan ve Yehova a doo se ishima?
6 Se mba ne Yehova icivir sha ci u a doo se ishima kpishi. Nenge ase aeren a Yehova a a ne ve a doo se ishima yô. Mhôônom ma ker un a vese. (Ps. 103:13; Yes. 49:15) Kwagh u vihin ka una er se yô, Yehova kpa i vihi un. (Sek. 2:8) Ka a wase se u fan un shi yan ijende a na. (Ps. 25:14; Aer. 17:27) Hiden a iyol ijime, nahan “ka A shir ashe shin sha u Una nenge Sha man [tar]. Ka A dugh icanor shin vuulevu kera, A mough a nan sha.” (Ps. 113:6, 7) Akaa ne na yô, ka se soo ser se na Aôndo wase u hemban la icivir.—Ps. 86:12.
7. Ka ian i icivirigh i nyi se lu a mini?
7 Se mba ne Yehova icivir sha ci u se soo ser mbagenev ve fa un. Ior kpishi fa mimi sha kwagh u Yehova ga. Sha ci u nyi? Sha ci u Satan pir ve ashe a ishima sha u samber a mbaaie mba bov sha iyol i Yehova. (2 Kor. 4:4) Satan tsugh ior ér Yehova ka Aôndo u oron iyev, shi kwagh gbe un sha kwagh wase ga, shi ka un a ne ve ior ve lu yan ican sha tar ye. Kpa se fa mimi sha kwagh u Aôndo wase! Se mba a ian i ôron mbagenev imba Aôndo u Yehova a lu yô, shi wasen ve sha er vea na un icivir yô. (Yes. 43:10) Pasalmi 96 hemba ôron kwagh u nan Yehova icivir. Nahan se lu timen sha pasalmi ne, fan igbenda i se fatyô u nan Yehova icivir i i kom sha a na la yô.
SE NA YEHOVA ICIVIR I I KOM SHA A NA LA NENA?
8. Ka sha gbenda u nyi nahan se fatyô u nan Yehova iciviri? (Pasalmi 96:1-3)
8 Ôr Pasalmi 96:1-3. Se fatyô u nan Yehova icivir sha akaa a se ôron sha kwagh na yô. Avur ne kaa a vese ér se “wa TER icam,” se “wuese iti Na,” se “pase kwagh u myom Na,” shi se “pase akuraior iengem Na.” Se fatyô u nan Ter wase u sha la icivir sha igbenda ne cii. Mbacivir Yehova mba sha ayange a tsuaa la kpa yange i gba ve ishima u ôron mbagenev kwagh u aeren a dedoo a Yehova a lu a mi la, kua akaa a doon tsung a a er a ve la kpaa. (Dan. 3:16-18; Aer. 4:29) Se se er kwagh ne nena?
9-10. Ka nyi u hen ken kwagh u yange er Angelena laa? (Shi nenge foto kpaa.)
9 Nenge ase kwagh u yange er anmgbian u kwase ugen u a lu ken tar u Amerika yô, iti na ér Angelena. a Yange taver ishima pase ior kwagh u Yehova sha ijiirtom na. Yange ior mba ve eren tom vea na hen kômpeni môm yô zua, nahan i kaa ér un kua mbatomov mbahev mbagen cii ve pase ayol a ve. Angelena yange lu a ufoto mba wa ken ishima ér una tese mbatomov mbara er i saan un iyol u civir Yehova yô. Kpa cii ve Angelena a mough sha a lam yô, orgen due pase iyol na er yange mbamaren nav yese un ken kwaghaôndo u Mbashiada mba Yehova yô. Or la yange hii u ôron akaa sha Mbashiada mba Yehova dang dang shi puun atesen a ve. Angelena kaa ér: “Yange ishima hii u tan mo kwe. Kpa m pine iyol yam mer: ‘Me de mer or a gbaa wan Yehova aie iyol tsôô, shin me ta ikyaa a naa?’”
10 Or la yange lamen been yô, Angelena er msen tiônôô shin ishima. Maa mough lam a or la kundu kundu, a kaa ér: “Mo kpa kwagh wam nôngo u lun er u wou nahan. Yange i yesem ken kwaghaôndo u Mbashiada mba Yehova. Kpa mo yô m ngu civir Yehova zan zan hegen.” Er ishima za Angelena iyol sha kwagh shon nahan kpa, a kundu ishima a tese mbatomov mbara ufoto mba un tôô vea azende a na a a civir Yehova a na imôngo yô. Shi a pase ve atesen a Bibilo a un ne jighjigh a mi la sha icivir. (1 Pet. 3:15) Nahan lu nyi i due kere? Angelena been kwaghôron na yô, or la gema gbenda u yange nengen Mbashiada mba Yehova la, je yô a ter akaa a dedoo a yange er un shighe u un zaan mbamkombo vea Mbashiada mba Yehova zum u un lu iyev la. Angelena kaa ér: “Gba u a ta ikyaa a Yehova. Ka kwagh u icivirigh kpishi u pasen ior mimi sha kwagh u Yehova.” Se kpa se mba a ian i icivirigh i wuese Yehova shi nan un icivir shighe u mbagen ve lu lahan un je kpaa.
Se fatyô u nan Yehova icivir sha iliam yase, man sha akaa a ase a injaa (Nenge ikyumhiange i sha 9-10) b
11. Mbacivir Aôndo sha mimi ndera dondon kwagh u i nger ken Pasalmi 96:8 la nena?
11 Ôr Pasalmi 96:8. Se fatyô u nan Yehova icivir a akaa a ase a injaa. Ka gbenda ugen u mbacivir Yehova ve ne un icivir je la. (Anz. 3:9) Ikyav i tesen yô, Mbaiserael yange ve er iyua sha er a maa tempel shi a za hemen u nengen sha mi yô. (2 Utor 12:4, 5; 1 Kron. 29:3-9) Mbahenen mba Yesu kpa yange ve er iyua “sha akaa a ve lu a mi la” sha u suen Yesu man mbaapostoli nav. (Luka 8:1-3) Mbakristu mba sha ayange a mbaapostoli la kpa yange ve na akaa sha er vea wase anmgbianev vev mba nomso man mba kasev mba kwagh tser ve la yô. (Aer. 11:27-29) Se kpa se fatyô u civir Yehova nyian sha u eren iyua a akaa a se lu a mi la.
12. Uiyua mba se eren la mba ve Yehova a icivir nena? (Shi nenge foto kpaa.)
12 Nenge ase kwagh môm u a tese er uiyua mba se eren la ka ve va Yehova a icivir yô. Yange icegh za ken tar u Zimbabwe ken inyom i 2020 la kar iaven. Nahan lu u kwagh ne una fatyô u wuan ior umiliôn imôngo, kua anmgbian wase u kwase ugen je kpaa, iti na ér Prisca, sha ci u ijen gba. Er uma taver hen shighe la kpishi nahan kpa, Prisca za hemen u pasen kwagh hanma iyange i Tomatar man Tomataan kua hen shighe u kahan iyiav je kpaa. Yange una yar ken ityev ga, kpa una duen kwaghpasen yô, mba ve dondo ya a na la ve lahan un ve kaan ér, “U kpe ijen.” Kpa Prisca a ôr a ve vangertiôr ér, “Yehova kenden mbacivir un mayange ga.” Ica gba ga maa nongo wase tindi a kwaghyan kua akaa agen, nahan Prisca kpa zua a mi. Ka uiyua mba hanmô wase nan eren la ve ne ve yange nongo wase fatyô u wasen Prisca ye. Er kwagh la doo mba ve dondo ya a Prisca la kpishi yô, ve kaa a na ér, “Aôndo kenden we mayange ga, nahan se soo u seer fan kwagh na.” Maa iorov utaankaruhar ken mba ve dondo ya a na la hii u zan mbamkombo asev.
Se fatyô u nan Yehova icivir a akaa a injaa a se lu a mi la (Nenge ikyumhiange i sha 12) c
13. Ieren yase ia va Yehova a icivir nena? (Pasalmi 96:9)
13 Ôr Pasalmi 96:9. Se fatyô u nan Yehova icivir sha ieren yase. Yange gba u upristi mba ve eren tom ken tempel u Yehova la vea luun wang sha iyol. (Eks. 40:30-32) Se kpa gba u se luun wang sha iyol. Kpa u hemban cii yô, gba u se luun wang sha ieren yase. (Ps. 24:3, 4; 1 Pet. 1:15, 16) Bibilo kaa ér se ér ‘or u tse la kera,’ se gema se haa “or u he iyol.” Kwagh ne tese ér gba u se nôngo sha afatyô wase se cii se palegh mbamhen mba bov kua aeren a bo a a vihi Yehova ishima la. Kpa se gema se henen shi se eren kwagh sha gbenda u u tese ér se mba dondon Yehova kua aeren a na a doon tsung la. (Kol. 3:9, 10) Sha iwasen i Yehova yô, ior mba ve eren akaa a hôngorough shi ve we tswam je kpa, vea fatyô u geman inja shi haan or u he iyol.
14. Ka nyi u hen ken kwagh u Jack laa? (Shi nenge foto kpaa.)
14 Nenge ase ikyav sha kwagh u orgen, iti na ér Jack, yange wa tswam kpishi je yô i yilan un ér Ijôv. Yange i kure Jack ijir ér a wua un sha ci u er aferakaa kpishi. Kpa cii ve i wua Jack yô, anmgbian ugen yange va hen purusu la, nahan kaa ér una hen Bibilo a Jack, maa Jack lumun ér i hen Bibilo a na. Er Jack er akaabo a vihin kpishi nahan kpa, va gema inja, nahan i er un batisema. Yange Jack gema hingir or u injaa kpishi, je yô mbakuran gaadi mbara lu vaan sha iyange i i lu wuan un la. Orshoja ugen u eren tom hen purusu la yô, kaa ér: “Jack yange hemba lun bo-or ken mba i wuhe ve ken purusu heen yô, kpa hegen yô, ngu or u hemban doon inja cii.” Yange i wua Jack kasua kar môm, anmgbianev mbara mba hidi mba ze u za eren mkombo u ve eren hanma kasua la ken purusu yô, ve nenge a orgen u un kpa i wuhe un her u va mkombo la sha kwa hiihii yô. Yange va mkombo ne sha ci u nyi? Yange nenge Jack gema inja nahan kwagh la doo un, nahan un kpa soo u fan kwagh u una er ve una fatyô u civir Yehova yô. Kwagh ne tese wang ér aeren a ase aa fatyô u van Ter wase u sha la a icivir!—1 Pet. 2:12.
Se fatyô u nan Yehova icivir sha ieren yase (Nenge ikyumhiange i sha 14) d
GBENDA U ICA A GBA GA TSÔ YEHOVA UNA NA ITI NA ICIVIR LA
15. Ica a gba ga tsô Yehova una na iti na icivir vindi vindi nena? (Pasalmi 96:10-13)
15 Ôr Pasalmi 96:10-13. Pasalmi 96 ôr kwagh u Yehova ér ngu Orjir man Tor u perapera. Ica a gba ga tsô Yehova una na iti na icivir nena? Una er kwagh ne sha ijirôron na. Ica a gba ga tsô Yehova una tim Zegebabilon kera, sha ci u a er akaa a vihin je cieryol, shi a er mbaaie sha kwagh u Aôndo je gande. (Mpa. 17:5, 16; 19:1, 2) Alaghga mbagenev mba vea nenge mtim u Zegebabilon la vea va kohol se ken mcivir u mimi. Yehova maa una mase timin Satan kua mba ve kohol un ve lu hendan a Na shi vihin un iti la cii ken ityav mbi Armagedon la. Kpa una gema a yima mba a doo ve ishima shi ve ungwan imo na, shi ka i doo ve u nan un icivir la. (Mar. 8:38; 2 Tes. 1:6-10) Yehova una tsegha iti na vindi vindi hen shighe u Hemen u Kristu u Anyom Dubu ua bee ve a ta hanma or ikyaren i masetyô la. (Mpa. 20:7-10) Hen shighe la, “tar ua mgbough a mfe u iengem i TER, er mngerem ma ngee [shin] zegemnger nahan.”—Hab. 2:14.
16. Ka nyi u soo wer u za hemen u erene? (Shi nenge foto kpaa.)
16 Nenge ase er a va lu kwagh u doon tsung shighe u hanma or nana va na Yehova icivir i i kom sha a na la yô! Hegen je kpa, se fatyô u nôngon kpoghuloo pasen mbagenev kwagh u Aôndo wase shi eren kwagh u una va un a icivir yô. Er Mbahemenev mba Shin Itine ve soo ér se nenge er kwagh ne a lu kwagh u vesen yô, ve tsua Pasalmi 96:8 ér a lu ivur yase i sha inyom i inyom i 2025 ne. Ivur la kaa ér:‘Na nen Yehova icivir i i kom sha iti Na yô.’
Ica a gba ga tsô hanma or u nan lu uma cii nana na Yehova icivir i i kom sha a na la! (Nenge ikyumhiange i sha 16)
ICAM 12 Yehova, Aôndo u Hemban
a I yila mbagenev ken ngeren ne sha ati a ve kpôô kpôô ga.
