NGEREN U TIMEN SHA MI 3
ICAM 35 “Fa Akaa a A Hembe Lun a Inja” La
Tsua u Eren Akaa a Doon Yehova
“Mcie u cian TER ka mhii u kwaghfan je la, mfe u fan u A lu Icighan la kpaa ka mkav je.”—ANZ. 9:10.
KWAGH U SE LU HENEN YÔ
Ngeren ne una wase se u nengen er se er kwagh a mfe wase man mkav wase u tsuan akaa sha kwaghfan yô.
1. Ka mtaver u nyi se cii ka se tagher a mini?
HANMA iyange yô, ka i gba u se tsua akaa a se er yô. Akaa agen ka i lu akaa a a taver u eren ga yô. Er kwagh u se ya pepe, shin shighe u nyôron yaven nahan. Kpa akaa agen yô, ka i lu zange u tsuan ga. Akaa a se tsough la aa fatyô u benden a mkpeyol wase man msaanyol wase kua ior asev shin mcivir wase. Shighe u se lu tsuan akaa a se er yô, doo u se tsua kwagh u una wase se iyol yase kua tsombor wase yô. U hemban cii je yô, doo u se nenge ser hanma kwagh u se lu tsuan u eren cii yô, i lu kwagh u doon Yehova.—Rom. 12:1, 2.
2. Ka akaa a nyi nahan u er ve aa wase u u tsuan akaa sha kwaghfana?
2 Aluer u er akaa a atar ne yô, u fatyô u tsuan akaa sha kwaghfan. Akaa shon yô ka, (1) tôv sha kwagh u u soo u tsuan la vighe vighe, (2) hen er Yehova una nenge kwagh shon la, man (3) nenge kwagh u a hembe lun a inja la. Ngeren ne, una time sha igbenda i itiar ne shi una wase se u nengen er se fatyô u tsaase mkav wase u ken ishima la yô.—Anz. 2:11.
TÔV SHA KWAGH U U LU TSUAN LA VIGHE VIGHE
3. Tese ikyav er i hii ve i gbe u u tôv sha kwagh vighe vighe cii ve u tsua u eren yô.
3 Aluer u soo u tsuan kwagh u injaa yô, a gba u u hii tôvon sha kwagh shon vighe vighe. Gba hange hange u u er nahan sha ci u nyi? Tôô ase wer vihi orgen iyol tsung, nahan nan za u za nengen a ortwer. Nahan ortwer la una pine oruange la kwagh u a ze un iyol ga tsô maa una gba mi eren un tweree? Mayange ga cii. We kpa aluer u hii tôvon sha hanma kwagh u u soo u eren cii vighe vighe yô, u hemba tsuan akaa a injaa.
4. Kwagh u i ôr ken Anzaakaa 18:13 la tese ér ka nyi i gbe u u er cii ve u tsua kwagh sha kwaghfana? (Shi nenge foto kpaa.)
4 U fatyô u tôvon sha kwagh vighe vighe sha u pinen mbampin. Tôô ase wer i lôhô u iniongo. U za iniongo shono? Aluer u vande fan or u nan lôhô u iniongo la ga, shin kwagh u nan we ishima u eren hen iniongo la ga yô. A gba u u pine nan mbampin er mban nahan: “Ka han a lu eren iniongo la man a lu hanma shighe? Ka iorov ume vea lu hen iniongo laa? Ka an nana lu nengen sha iniongo shono? Ka unô nahan vea lu zana? Ka akaa a nyi nahan i we ishima u eren here? A na ior msôrom hen iniongo laa?” Mbampin mban vea wase u u tsuan kwagh u u er la sha kwaghfan.—Ôr Anzaakaa 18:13.
Tôv sha kwagh u u lu tsuan la vighe vighe sha u pinen mbampin (Nenge ikyumhiange i sha 4) a
5. Shighe u u tôv sha kwagh u u soo u eren la vighe vighe u bee yô, ka nyi igen i gbe u u ere?
5 U tôvon sha kwagh u u soo u eren la vighe vighe cii yô, hide hen sha kwagh shon zulee. Ikyav i tesen yô, aluer u fa wer ior mba ve dondon atindi a Yehova ga kpa mba zan iniongo la shin ka u a na ior kwaghman hen iniongo la man or u nengen ér i ma kwagh her akuma akuma nan ngu ga di ye? U nenge wer iniongo la ia va kure sha dang u erene? (1 Pet. 4:3) Shi kwagh ugen yô, aluer shighe u i ver u eren iniongo la zua vea shighe u tiônnongo wou a ze mkombo shin a duen kwagh pasen yô, a gba u u er nena? Aluer u tôv sha gbenda u kwagh u i lôhô u la una bende a akaa ne la vighe vighe yô, a lu u zange u tsuan kwagh u dedoo u i gbe u u er la. Shi kwagh ugen kpa ngu u a gba u u er yô. We yô, u hila fa kwagh u u nenge wer u er yô, kpa pine iyol you wer: Yehova yô nenge kwagh shon nena? —Anz. 2:6.
HEN ER YEHOVA A NENGE KWAGH U U SOO U EREN LA YÔ
6. Yakobu 1:5 kaa ér gba u se eren msen ser Yehova a wase se sha ci u nyi?
6 Sôn Yehova a wase u u kaven mnenge na sha kwagh u u soo u eren la. Yehova kaa a vese ér una na se kwaghfan man mkav u una wase se u fan kwagh u a lu sha ishima na shin u a lu sha ishima na ga yô. Ka a na ior cii kwaghfan la “mgbeghaa a u nahan ve tar shio.”—Ôr Yakobu 1:5.
7. U er nan ve u lu a mnenge u Yehova sha akaa? Tese ikyav.
7 U eren msen hen Yehova wer a tese u kwagh u u er la cii yô, hide ver ishima zulee nenge gbenda u una ungwa msen wou la yô. De se tese ikyav: Aluer u ngu zan zende man u za tsume gbenda yô, a gba u u pine ma or u hen ijiir la gbenda. Nahan nana lu a ôr u kwagh ga tsô maa u kar u gba yemenee? Mayange ga cii. A gba u u kegh ato a nan zulee er nan lu tesen we gbenda la. Nahan Yehova kpa, shighe u u er msen hen a na wer a na u kwaghfan yô, nôngo kav gbenda u a ungwa msen wou la sha u keren fan atindi man akaawan a Bibilo a u dondo ve a wase u yô. Ikyav i tesen yô, shighe u lu tôvon wer u nenge aluer ka u u za imba iniongo i se vande ôron kwagh u i la shin u za ga yô, u fatyô u timen sha kwagh u Bibilo i ôr sha kwagh u uiniongo mba i eren dang her man azende a bo man er i gbe u u hemba veren ishima sha akaa a Tartor a akaa a ou yô.—Mat. 6:33; Rom. 13:13; 1 Kor. 15:33.
8. Aluer gba u a wase u ve u zua a kwaghwan u kwagh a gbe u a mi la nahan, u er nena? (Shi nenge foto kpaa.)
8 Nahan kpa ashighe agen yô, a gba u a wase u ve u zua a kwaghwan u kwagh a gbe u a mi la ye. Anmgbian u nomso shin u kwase u nan civir Yehova ica i gbe yô, nana lu a akaawan kpishi a wasen we. Shi aluer u tôv sha kwagh shon ken ityakeda yase kpa a wase u. Akaawan nga kpishi ken ityakeda yase i henen kwagh a mi. Er Takerada u Tôvon sha Kwagh ú Mbashiada mba Yehova man u Er Se Dondo Kwaghwan u Bibilo ken Uma Wase Yô nahan. Umbur wer, awashima wou yô, ka u tsuan kwagh u una doo Yehova yô.
Hen er Yehova a nenge kwagh u u soo u eren la yô (Nenge ikyumhiange i sha 8) b
9. Se er nan ve se fa ser kwagh u se tsough u eren la doo Yehova? (Mbaefese 5:17)
9 A er nan ve se fa ser kwagh u se tsough u eren la ka kwagh u doon Yehova? Hiihii yô, a gba u se fa Yehova tsembelee. Bibilo kaa ér ‘mfe u fan Aôndo ka mkav.’ (Anz. 9:10) Mba zough a mkav u mimi la sha u fan aeren a Yehova kua awashima na man kwagh u a soo shin a soo ga yô. Pine ase iyol you wer, ‘Ken akaa a m hila fe sha kwagh u Yehova ne, ka nyi nahan me tsua u eren ve a doo unu?’—Ôr Mbaefese 5:17.
10. Akaawan a Bibilo hemba ngan a inja a aeren a ior, shin a ityôô sha ci u nyi?
10 Ashighe agen ka i gba u se er kwagh u van ior asev ahenge, ve se fatyô u eren kwagh u doon Yehova ye. Ikyav i tesen yô, alaghga mbamaren mbagenev mba ve lu a awashima u dedoo yô, vea hanger ér saa wan ve u kwase nana vôso ornyar, shin or u nana fatyô u kemen ve wan sha zege inyar yô, aluer or la nan taver ken jijingi ga je kpaa. Ka mimi, hanma or je kpa nana soo ér wan u nan u kwase a vôso or u nana fatyô u nengen sha a nan yô. Kpa wan ve u kwase la a pine iyol na ér: “Or ne una wasem u yan ijende a Yehova kangenaa je kpa? Yehova nenge kwagh ne nena?” Mlumun u sha mbampin mban ngu ken Mateu 6:33. Hen ijiir la, Yesu wa Mbakristu kwagh ér ve za hemen u “keren Tartor u Aôndo hiihii.” Er se ne mbamaren asev kua ior mba hen ijiir yase icivir nahan kpa, kwagh u vesen yô ka u eren kwagh u una na a saan Yehova iyol yô.
NENGE KWAGH U A HEMBE LUN A INJA LA
11. Ka ieren i nyi i ôr kwagh u i ken Mbafilipi 1:9, 10 i ia wase u u nengen kwagh u a hembe lun a inja ken akaa a u we ishima u eren laa?
11 U timen sha akaawan a Bibilo a sha kwagh u u lu tsuan la yô, a gba u u nenge kwagh u a hembe lun a inja ken akaa a u we ishima u eren la. (Ôr Mbafilipi 1:9, 10.) Ieren you i kaven kwagh u ken ishima la ia wase u u nengen a kwagh u una due ken hanma kwagh u u tsough ken akaa a u we ishima u eren la yô. Ashighe agen yô, a lu zange u tsuan kwagh. Kpa akaa agen yô, a lu zange u tsuan ga. Nahan kpa, aluer u ngu a mkav u ken ishima la yô, una wase u u tsuan akaa sha kwaghfan shighe u i taver u eren nahan je kpaa.
12-13. Mkav una wase u u tsuan tom u u er la sha kwaghfan nena?
12 Tôô ase wer, u ngu keren tom u u eren ve u fatyô u nengen sha tsombor wou yô. Ityom gema ngi ihiar i u fatyô u eren yô. U tôv sha hanma tom vighe vighe u fa kwagh u ityom la kua shighe u u yaren kua shighe u a tôô u u moughon hen ya wou yemen hen hanma ijiirtom yô, kua akaa agen kpaa. Ityom ihiar ne cii ka ityom i Bibilo i yange ga yô. Kpa alaghga u hemba soon tom ugen ken ityom i ihiar la, sha ci u mlu u tom shon, shin sha ci u ka tom u a kimbin we zege inyar yô. Nahan kpa, akaa agen nga a a gba u u time sha mi cii ve u mase tsuan kwagh u u er la ye.
13 Ikyav i tesen yô, ityom i ihiar ne cii shighe u i yaren i la zua sha ashighe a tiônnongo wou a nyôron mkombo laa? Ityom la ia fatyô u yan we shighe u ka i gba u u nenge sha mbamgbe mba tsombor wou mba sha iyol kua mba ken jijingi laa? Aluer u pine iyol you mbampin mban yô, kwagh la una wase u u hemban veren ishima sha “akaa a a hembe lun a inja la.” Ka gbenda u civir Yehova la man mbamgbe mba tsombor wou je la, a u eren tom u van we a inyaregh kpishi la. Maa u mase tsuan kwagh u Yehova una haa iveren sha mi yô.
14. Mkav una wase se u tesen ior dooshima shi palegh u nan ve gbeev mbu nôngon nena?
14 Mkav una mgbegha se u henen er kwagh u se soo u eren la una fatyô u benden a ior la, sha er se palegh u “nan mbagenev gbeev mbu nôngon” yô. (Fil. 1:10) Kwagh ne ka kwagh u hange hange shighe u se lu tsuan akaa a se er, er iyolwuhan man hwe nahan. Ikyav i tesen yô, alaghga se hemba soon ma gbenda u wuhan iyol shin hwe. Kpa aluer mbagenev ken tiônnongo shin mba ken inya soo iyolwuhan la ga di ye? Mkav una wase se se palegh u eren kwagh u una vihi ve yô. Dooshima una mgbegha se se ker u eren kwagh u una lu “mbagenev” a iwasen yô, shi se er kwagh akuma akuma. (1 Kor. 10:23, 24, 32; 1 Tim. 2:9, 10) Maa se tsua u eren kwagh u a tese ér ior doo se ishima, shi se wa mnenge ve ikyo yô.
15. Shighe u u lu tsuan kwagh u vesen u u er yô, ka nyi i gbe u u hii erene?
15 Aluer u ngu tsuan kwagh u vesen u i gbe u u er yô, hen sha kwagh u i gbe u u lu a mi cii ve u fatyô u eren kwagh shon la. Yesu yange tese se ér se gbidye kwar se fa aluer se mba a kwagh kuma u eren kwagh u se we ishima la been yô. (Luka 14:28) Sha nahan yô, hen sha shighe u i gbe u u tôô u eren kwagh shon la, kua inyaregh ki u lu a mi man agee a u vihi u eren kwagh u u lu tsuan la yô. Akaa agen yô u fatyô u lamen vea tsombor wou sha er vea nenge kwagh u i gbe u hanma or hen tsombor nana er u suen kwagh u u lu tsuan la yô. Ka a inja u eren nahan sha ci u nyi? Sha ci u aluer u er nahan yô, kwagh la una wase u u fan akaa a i gbe u u nyôôso la, shin nengen aluer hemba doon u u tsua kwagh ugen yô. Shi aluer u ker iwasen i mba hen tsombor wou shi u ngu keghen ato a kwaghwan ve yô, vea hemba keghen iyol u eren tom a we ken mzough sha er u fatyô u eren kwagh u u tsough la yô.—Anz. 15:22.
TSUA KWAGH U U FATYÔ U EREN YÔ
16. Ka akaa a nyi nahan u er ve aa wase u u tsuan kwagh u u fatyô u erene? (Shi nenge ngeren u kiriki u a lu a itinekwagh ér “ Er u Tsua Akaa sha Kwaghfan Yô” la kpaa.)
16 U eren akaa a se ter ne u been yô, u wa ago iyol a tsuan kwagh u injaa u bee a bee je. Sha ci u u tôv sha kwagh u u soo u eren la vighe vighe, shi u time sha akaawan a aa wase u u eren kwagh u doon Yehova la. Nahan u fatyô u sônon Yehova wer a wase u u er kwagh u u tsough la.
17. Ka kwagh u vesen u nyi una wase u u tsuan akaa a dedoo?
17 Wea vande tsuan akaa a injaa kpishi ken ijime kpa, fa wer kwagh u vesen u una wase u u tsuan kwagh u dedoo yô, ka u suur sha kwaghfan wou shin mfe wou ga, kpa ka u suur sha kwaghfan u Yehova a ne la. Ka un tseegh una wase u u zuan a mfe u mimi man mkav ye. Ka akaa a or ka nan lu a mi ve, nan eren kwagh sha kwaghfan je la. (Anz. 2:1-5) Yehova una wase u u tsua u eren akaa a a doo un yô.—Ps. 23:2, 3.
ICAM 28 Ya Ijende a Yehova
