Er alaghga Mbakristu vea er akaa akuma akuma sha ci u kuran iyol ve nahan kpa, gba u vea dondo akaawan a Bibilo u eren nahan. Akaawan a Bibilo ne yange Orkristu u eren tom a ikyav mbi tswamev er, annamkyegh shin kerakuna gayô ma gbuuka ugen nahan, sha u kuran iyol i nan a mi shighe u uumace mbagenev ve soo u bulan nan yô. Nenge ase atôakyaa ne:

Yehova nenge uma ér ka icighankwagh, hemban cii je yô uma u or. Orpasalmi Davidi yange fa je ér, Yehova ngu “imbor i uma.” (Ps. 36:9) Sha nahan yô, aluer Orkristu tsua u eren akaa akuma akuma sha ci u kuran iyol i nan shin akaa a nan yô, gba u nana er kwagh u nan fetyô la cii sha er nana palegh u wuan or, shi nana zua a ibo i awambe ga yô.—Dut. 22:8; Ps. 51:14.

Er se fatyô u wuan or a hanma ityumugh cii, nahan zuan a ibo i awambe nahan kpa, ka i hemba lun ican ga u wuan or sha gbuuka, a lu aburabur shin a lu sha apera kpaa. * Kwagh ugen yô, aluer iferor u alaghga ishima i vande vihin nan kera la nan nenge ér we kpa u ngu a gbuuka yô, afaerenga tsô kwagh a hemba vihin cii shi adooga nana wua u je kpaa.

Shighe u Yesu kaa a mbadondon un hen tugh nav mbu masetyô shin tar ne ér ve tôô usanker vev la, yange ver ishima ér ve kura iyol ve a mi ga. (Luka 22:36, 38) Kpa Yesu yange kaa ér ve va a sanker sha er una tese ve kwagh u hange hange sha gbaa u palegh tswam shighe u ikpelaior i lun a akaa a tswam ia va tagher ishigh a ve je  kpaa yô. (Luka 22:52) Peteru yange bughun wanakiriki u zegepristi togh sha sanker been kera yô, Yesu kaa a Peteru ér: “Wa sanker wou ken vaa.” Maa Yesu ôr ve mimi u hange hange ugen, u a lu kwaghwan u Mbakristu ve lu dondon zan zan nyian ne la, ér: “Mba ve tee sanker cii á wua di ve sha sanker” je.—Mat. 26:51, 52.

Ior mba Aôndo ‘gema usanker vev var induhar a mi, man awange a ve kpaa hingir ahô a sôron ikyon a min’ er Mika 4:3 a kaa nahan. Ieren i i fe Mbakristu a mi ne zua sha kwagh u jijingi mgbegha apostoli Paulu nger ne, ér: “De oron iyev i ifer sha ifer ga. . . . Aluer a fatyô yô, lu nen bem a ior cii ape kwagh wen a lu sha mi la.” (Rom. 12:17, 18) Er Paulu tagher a mbamtaver kpishi kua “ku hen mbanumungbenda” nahan kpa, za hemen u eren sha mkaanem nam mara, shi mayange je nenge ér kwagh u kuran iyol na la hemba un akaawan a Ruamabera ga. (2 Kor. 11:26) Kpa yange gema suur sha Aôndo man kwaghfan u a lu ken Mkaanem ma Aôndo la, inja na yô, ka kwaghfan u a ‘hembe ikyav mbi uitya inja’ je la.—Orpa. 9:18.

Mbakristu nenge ér uma hemba ngun kwagh u injaa a uyôughyôughmbaakaav ica je. Bibilo kaa ér: “Ka sha u ngeen a akaa kpishi la man or nana lu a uma ga.” (Luka 12:15) Sha nahan yô, aluer se lam a ormbaiv kundu kundu, kpa nan lumun u hiden ijime ga yô, Mbakristu mba ve lu a kwaghfan la ka ve dondo kwaghwan u a lu ken mkaanem ma Yesu man, ér: “De hendan nen a or u ifer ga.” (Mat. 5:39, 40; Luka 6:29) * Nahan kpa, kwagh u hemban doon cii u or a er yô, ka u eren kwagh u una urugh mbaaferev a va a mi hen nan ga yô. Ikyav i tesen yô, aluer se palegh “ihyagh i uma ne,” shi mbawanndor a vese nenge ér se mba Mbashiada mba Yehova mba se soo kwagh u bem yô, alaghga mbaaferev vea kera na ishima sha kwagh wase ga.—1 Yoh. 2:16; Anz. 18:10.

Mbakristu ka ve wa imoshima i mbagenev ikyo. (Rom. 14:21) Aluer i va fa ér orgen ken tiônnongo nan ngu a gbuuka sha ci u kuran iyol i nan a mi sha u uumace mbagenev ve de bulan nan yô, alaghga kwagh la una kpiligh Mbakristu mbagenev iyol a saa her shin vea nôngo gbev je kpaa. Dooshima ka a mgbegha se se hemba wan kwagh u mbagenev ikyo a u wase, aluer ka u se palegh kwagh u se nenge ser tindi yange ga la je kpaa.—1 Kor. 10:32, 33; 13:4, 5.

Mbakristu ka ve nôngo ve ver ikyav i dedoo. (2 Kor. 4:2; 1 Pet. 5:2, 3) Aluer i wa Orkristu u nan lu a gbuuka sha ci u kuran iyol i nan a mi sha u uumace mbagenev ve de bulan nan ga la kwagh ken Ruamabera, kpa nan za hemen u lun a gbuuka her yô, a fatyô u nengen nan ér nan ngu veren ikyav i dedoo ga. Sha nahan yô, nana kuma u eren ityom ken tiônnongo ga. Kape Orkristu u nan ze hemen u eren tom u uke u i gbe u nana luun a gbuuka la kpa, nan kom u eren tom ken tiônnongo ga je la. Hemba doon u Orkristu la nana ker tom ugen nana er! *

Kwagh u Orkristu nana er sha u kuran iyol i nan shin tsombor u nan shin akaa a nan lu a mi la, hemba kan kwagh u nan, vough er kwagh u tsuan tom u uke u nana er la kpa, i lu nahan. Kpa shighe u nan lu tsuan akaa ne yô, gba u nana dondo akaawan a Bibilo. Aôndo wase u a lu a kwaghfan la na se akaawan ne sha ci u se doo un ishima. Ka nahan ve Mbakristu mba ve vie ken jijingi la ka ve palegh u lun a gbuuka sha ci u kuran ayol a ve sha u uumace mbagenev ve de bulan ve ga ye. Ve fa je ér, ka mba ve suur sha Aôndo sha u dondon akaawan a na a ken Bibilo la tseegh, ka ve zua a mkor u mimi man u tsôron la ye.—Ps. 97:10; Anz. 1:33; 2:6, 7.