Yange i marem ken inyom i 1954 la, hen geri u St. Paul ken kpentar u Minnesota, tar u Amerika. Tsombor wase lu a kwagh ave kpishi ga. Se zaan Adua u Fada. I mar se utaan, mo m ngu u sha uhar. Yange m za makeranta u Adua u Fada bugh yô, shi m lu wanye u wasen fada shighe u i ze adua yô. Nahan cii kpa, m fa kwagh u Bibilo kpishi ga. Er m na jighjigh mer Aôndo ngu u a gbe akaa cii nahan kpa, m nenge mer adua u fada ka kwaghaôndo u mimi u una wasem u civir un ga.

Inyom i hiihii i m lu ken makeranta u henen atindi u i yer ér William Mitchell College of Law la, Mbashiada mba Yehova va hen ya wam. Yange m lu kiren akondo nahan ve kaa ér vea za tsô vea hide. Mba za hidi yô, m pine ve mbampin uhar, mer: “Er nan ve mbaaferev ve hembe zan ikyura a ior mba dedoo?” man “Ka nyi or a er ve a saan nan iyolo?” Yange ve nam takeda u The Truth That Leads to Eternal Life (Mimi u Una Na U Uma u Tsôron La) kua Bibilo i New World Translation of the Holy Scriptures i í lu igbende shough shough la. Shi m lumun mer i va henen Bibilo a mo. Kwagh la wasem m seer fan  akaa agen kpishi. M fe mer ka Tartor u Aôndo tseegh u lu gomoti u una va hemen uumace mba sha tar cii yô, saan mo iyol. M mase kaven wang er kwagh u hemen a hembe uumace vindi vindi yô; sha ci u hemen ve la va ior a mnyoon kua ican man ieren i mimi ga, kua akaa a vihin agen kpishi.

Yange m tsegha iyol yam sha ci u Yehova ken inyom i 1982 la, shighe kar kpuaa maa m er batisema sha Mkohol u Vesen u “Kingdom Truth” (Mimi u Tartor) u yange i er hen ijiir igen i i yilan ér Civic Center, hen geri u St Paul la. Mba ker ken kasua u dondon la yô, shi m hide m za hen ijiir shon m za nger ikyaren i i yer ér bar la, sha er me zua a savtiketi u hingir loya yô. Mba ker ken uwer u Oktoba, ikyaren la ngi dugh yô, m pase. Nahan m hingir loya.

Yange m zua a anmgbian ugen u eren tom shin Betel ken Brooklyn yô, hen mkohol u vesen u “Kingdom Truth” (Mimi u Tartor) la, i yilan un ér Mike Richardson. A kaa a mo ér i bugh afishi a nengen sha kwagh u atindigh shin afishi a shin itine. Nahan m umbur mkaanem ma Oretiopia u eren tom ken ya u tor, ma i nger ken Aerenakaa 8:36 la, maa m pine iyol yam mer, ‘Ka nyi i yangem u pinen ian i za eren tom ken Afishi a nengen sha Kwagh u Atindigh nee?’ Maa m nger apelekeshen u za eren tom shin Betel.

Yange m hingir Orshiada u Yehova yô, doo mbamaren av ga. Terem pinem ér aluer mo m ngu eren tom shin Betel nahan, me zua a kwagh ken tom wam u loya la kpa? M kaa a na mer tom u me lu eren la, a lu tom u kimbin mo ga. Shi m kaa a na mer a lu nan mo udola 75 sha uwer. Lu kwagh u i naan mba eren tom shin Betel u nengen sha iyol ve je la.

Er m vande zuan a tom ken koti ugen yô, gba u me undu tom shon fese me yem Betel ga. Kwagh la na yô, m va mase yemen za hiin tom shin Betel u ken Brooklyn, New York la, ken inyom i 1984. Yange i verem shin Afishi a Nengen sha Kwagh u Atindigh. Mfe u yange m zua a mi shighe u m lu eren tom ken koti la wasem kpishi sha kwagh u me va tagher a mi yô.

Yange i yam ijiir i Stanley Theater i ken geri u Jersey City, kpentar u New Jersey la ken uwer u Novemba, inyom i 1983. Yange anmgbianev nger apelekeshen hen gomoti ér a na ve ian vea hide a sôr usu u latriki u i wa hen ijiir ne la kua upaapi shin ugôngor mba mngerev. Yange anmgbianev mba ze hen mbatomov mba gomoti yô, ve pase ve ér ve soo ér vea sôr ijiir i Stanley Theater la, i lu ijiir i Mbashiada mba Yehova nyôron Mbamkohol mba Vesen her. Kwagh ne maa gema va a zayol. Atindi a a hen geri la tese ér gba u ayou a civir Aôndo aa luun sha ajiir a ior ve lu uya tseegh. Kpa Stanley Theater ne di gema lu hen ijiir i kasua. Anmgbianev maa yem apii, kpa i venda apii ve la.

Ken kasua wam u hiihii shin Betel la, nongo u Yehova maa yem a ikyaa ne ken koti u gomoti u vesen u lu hen haregh la yô. Er m vande eren tom ken koti hen geri u St. Paul, kpentar u Minnesota, ken  anyom ahar a karen la yô, m lan kwagh u amba a jirigh la ga. Loya wase ugen kaa ér ior mba vanden eren akaa hen ijiir i Stanley Theater ne, er usenema mba nengen kua uiniongo mba ior mba gberen atsam, kuhwan kwagh nahan. Kpa er nan i gbe sha kwagh u kwaghaôndo ve i vende? Koti la nenge sha ikyaa la maa kure ijir la ér, gomoti u Jersey City ngu peren atindi aa ne ior ian i eren kwaghaôndo ve gbar gbar la. Nahan koti la na zwa ér ve na Mbashiada ian i ve nger apelekeshen ve lu pinen la. Kwagh la wasem m hii u nengen er Yehova a lu veren ior nav er ve lu eren tom a tindi u zan hemen a tom na yô. Yange saan mo iyol kpishi er mo kpa m lu uwegh ken kwagh ne yô.

Anmgbianev maa hii zegetom u sôron ijiir shon. Yange i er tom la bee kuma inyom ga. Sha iyange i Setemba 8, inyom i 1985 la, i er iniongo i mba been makeranta u Gileadi, kelase u sha 79 la hen ijiir i i sôr hingir Iyou i Mkohol i hen Jersey City ne. Yange saan mo iyol er mo kpa m er tom ken mzough vea anmgbianev mba ken gbaatom u atindigh la sha ci u mzehemen u tom u Tartor nahan. Yange tom ne hemba saan mo iyol a tom u m lu eren cii ve m mase van Betel la ica je. Cuku kpa m fa mer Yehova una va er tom a mo u tilen sha ajir agen kpishi sha ci u nongo na ken hemen ga.

Hii ken inyom i 1980 la va keen kpuaa, yange Orshiada nana za iyouci yô, ashighe kpishi mbatwerev kua ayouacii agen soon u dondon kwagh u Orshiada la nan tese ér i er nan twer, kpa awambe a tan yô, nan venda la ga. Kwagh ne yange a va kasev mba lun iyav a ican kpishi, sha ci u mbaajiriv ve nenge ér kwase nan ngu a ian i vendan ér i de te nan awambe ga ze. Yange ve kaa ér aluer i ta kwase la awambe ga yô, alaghga nana kpe a undu wan la nahan anikyundan la una lu a ngô ga.

Sha iyange i Disemba 29 inyom i 1988 la, Anmgbian u kwase Denise Nicoleau mar wan, nahan maa awambe due kar ikyaa inya. Yange awambe bee un ken iyol cica, kera shi kuma pesent 5.0 nahan kpaa ga. Ashe nga nyian yô, ortwer na soo ér a lumun yô, a ta un awambe. Kpa Anmgbian u kwase Denise Nicoleau venda. Kpernan pepe yô, iyouci la za hen koti za ngohol takeda, u tesen ér jôôji na ve ian i tan un awambe, sha ci u ve nenge ér gba hange hange u vea ta un awambe. Jôôji la yange seer tôvon sha ikyaa ne shin ôr Anmgbian u kwase Nicoleau shin nom na kwaghmôm ga, maa orti na iyouci la ian ér ve ta un awambe.

Sha iyange i Tomataan Disemba 30 la, mbatwerev mba hen iyouci la ta Anmgbian u kwase Nicoleau awambe shin er nom na kua mbagen hen tsombor mba ve lu her la venda kwagh ne taveraa nahan kpaa. Sha iyange shon aikighe i va kôr mbagen  hen tsombor ve la, nomso man kasev kua mbatamen mbagen i yem a mi. I kaa ér ashen ve lu yisan gambe u Anmgbian u kwase Nicoleau ér i de te un awambe ga. Sha iyange i Sati, Disemba 31 la, upipambaabaver kua tashan mba redio kua mtôm ma televishen ma hen haregh u New York City man sha ajiir agen lu samber a kwagh ne sha abaver.

Mba ker iyange i Hiitom yô, pepe nahan maa m lam a jôôji u ken koti u vesen ugen; i yilan iti i or shon ér Milton Mollen. M pase un hanma kwagh sha ikyaa la vindi vindi. M ôr un er jôôji la a ne zwa ér i ta anmgbian u kwase la awambe a u tôvon sha ikyaa shon shio yô. Mollen maa kaa ér m za shin afishi na atetan, m za seer ôron un hanma kwagh u mimi sha kwagh ne cii kua atindi a a gba u a dondo sha ikyaa ne yô. Sha iyange shon aikighe, maa m mough vea Philip Brumley, anmgbian u hemen gbaatom wase u atindigh la, se za shin afishi a Mollen. Jôôji ne shi yila loya u iyouci la kpa va shimi. Yange se lam va hingir haang. Zan zan yô, Anmgbian Brumley va nger kwagh sha antakeda nam; lu kaan a mo ér m “gba ikyenge shimi.” Lu kwaghwan u dedoo sha ci u m soo mer saa loya u iyouci la a lumun ér un ngu a ibo.

Se lam zan zan ka kom er ihwa nahan yô, Mollen kaa ér kpernan pepe ijir ne ia lu ijir i hiihii i a hii ôron yô. Se mba ngur duen ken afishi na yô, Jôôji Mollen kaa wener “kper la loya u iyouci la una tagher a kwagh jim jim.” Inja na yô, kpernan la, a taver loya u iyouci la u ôron kwagh sha gbenda u a na iyouci la ishô yô. Yange m nenge je mer ka Yehova a lu nan se vangertiôr ér se fatyô u hemban ijir ne ye. Nahan kpiligh mo iyol u nengen er Yehova lu eren tom a vese u kuren awashima na yô.

Yange se tsa wan iyol sha ijir la tugh kaka. Iyou i jirigh la lu ica ga a Betel u ken Brooklyn la. Nahan mbagen mba se eren tom hen Gbaatom u Atindigh la yem her angahar. Yange ujôôji unyiin mba ve tema ijir ne la mba ongo mkaanem asev cii yô, ve venda ér yange ma i na wada ér i ta anmgbian u kwase la awambe ga. Nahan atejir u tamen la na Anmgbian u kwase Nicoleau ishô, shi kaa ér aluer i na wada sha kwagh u oruange a u vanden keghen ato a nan shio yô, mba nzughul a ian i tindi a ne or i eren kwagh u nan soo la.

Atejir u vesen u ken kpentar u New York kpa lumun ér Anmgbian u kwase Nicoleau ngu a ian i vendan ér i de te un awambe ga. Ijir ne lu môm ken ajir anyiin a sha kwagh u awambe a i ôr ken mbaatejir mba vesen kposo kposo ken ikpentar i ken tar u Amerika, a mo kpa m lu uwegh ker yô. (Nenge ngeren u kiriki u  “ Ajir a Se Hembe ken Koti mba Vesen mba ken Ikpentar Kposo Kposo Yô” la.) Shi yange m tile sha ajir agen vea anmgbianev mba kasev man mba nomso mba shin Betel kposo kposo. Amba er ijir i wan, man ivaa paven man kwagh u inyaagh man ayou a i maa nahan.

Shighe u m hii zuan a kwase wam Dawn la, lu yesen mbayev utar tswen sha ci u yange pav ivaa. Lu nôngon a uma shi eren pania. Uma yange wa taver un shi m nenge a gbashima na, er kange ishima u civir Yehova yô. Ken inyom i 1992 la, se za Mkohol u Vesen u “Light Bearers” (Mba Tan Iwanger) la ken geri u New York City, maa m za pine un aluer ka u se seer fan ayol a ase yô. Inyom kar i môm yô se er ivese, kpa m wasen tom shin Betel her. Er akaa a ken jijingi gba kwase wam ishima kpishi shi soo asenge a eren yô, lum iyua i Yehova nam yô. Dawn eren a mo dedoo sha ayange a se lu uma imôngo ne cii.—Anz. 31:12.

Shighe u se er ivese la mbayev mba Dawn vande maren la, ugen lu anyom 11, ugen lu 13, ugen di lu 16. Yange m soo mer me lu ter u dedoo, nahan hanma ngeren u m zough a mi ken ityakeda yase u sha kwagh u lun terkyoson cii m ôr, shi m nôngo u dondon kwagh shon. Yange mbamtaver ban ga, nahan kpa ken masejime yô, va saan mo iyol kpishi er mbayev mbara nenge ér m ngu ijende ve i mimi kua ter u a soo ve tsung yô. Yange se na mbayev asev mban ian gbar gbar ser ve vaan a azende a ve hen ya shi sea lu vea agumaior ne hen ya gong gong nahan, i doo se kpishi.

Ken inyom i 2013 la, se yem ken kpentar u Wisconsin sha er se za nenge sha mbamaren asev yô. Kpa kwagh u kpiligh mo iyol yô, gba u me za hemen u wasen tom shin Betel her. Yange i kaa ér mo m za hemen u wasen gbaatom u atindigh u nongo wase la her sha ashighe a ashighe.

Ken uwer u Setemba inyom i 2018 la, i lum er kwagh ngum shin ikyer nahan, maa m hii u kôngul ikyer fele fele. Yange ortwer wase karem akaa, kpa fatyô u fan kwagh u lu zayol la jighilii ga. Shighe kar yô, ortwer ugen kaa a mo ér m za nenge a ortwer u sôron iangev mbi sha igbila. Ken uwer u Janawari inyom i 2019 la, ortwer u sôron iangev mbi sha igbila kaa ér un zuam a angev mbu gen ken iangev mbi ka mbi bende a mhirinim man igbila kua kuhe u ken ijime la. Mbun ne lu mbu i yer ér progressive supranuclear palsy (PSP) la.

Ayange nga karen atar yô, m lu eren anumbe man m gba m sombo hen ijuan i uwe agh ku yanegh. Ken uma wam cii lu anumbe am a m eren je la, shi m fa u eren a tsema tsema. Nahan m mase kaven mer hii u nyôron mo iyol. Yange kpiligh mo iyol er angev mbun lu yemen gagher gagher la, je yô, m kera lu fantyô u zenden shin lamen shin menan kwagh ga.

Saan mo iyol kpishi er yange m er tom a mfe wam u loya la u wasen nôngo u Yehova nahan. Doom kpishi er yange m zua a ian i civirigh i ngeren kwagh sha atineakaa kpishi ken umagazin mba uloya kua ujôôji man mbatwerev kpishi ve ôron yô. Shi m na akaaôron kpishi sha ajiir kposo kposo sha tar a pasen wanger wanger er ior mba Yehova ve lu a ian i tsuan twer u ve soo ér i er ve la cii, shi vendan ér i de te ve awambe ga yô. Nahan je kpa, u saven mkaanem ma ken Luka 17:10 mara yô, me kaa mer: ‘M ngu kpan, m kuma u a sughum ga. M er kwagh u i gbe u me er la di tsô.’