Yehova soo ér i saan nom man kwase iyol, shi ve lu kôôsôô a ayol a ve sha er ivese ve ia lu gbem yô. (Mat. 19:4-6) Aluer u soo u eren kwase shin nom yô, u er nan ve u zua a or injaa u u vôso? Er i lu Yehova a gbe se yô, a fa kwagh u se er ve a saan se iyol ken ivese yô. Nahan aluer se dondo akaawan a na yô, a saan se iyol sha mimi. Nenge ase akaawan ne agen.

Hiihii yô, doo u se ayol a ase se fa kwagh ne sha kwagh wase: “Ishima i wa atseregh je hemba hanma kwagh cii, i vihi je gande.” (Yer. 17:9) Shighe u nomsoor man kwase ve hii u sôôr ayol yô, ka ve hingir u soon ayol a ve kpishi. Kwagh ka una luun nahan yô, i taver ve u tsuan akaa sha kwaghfan. Ior ka vea tsua u vôson ayol sha ci u isharen i ve lu a mi la tseegh yô, ashighe kpishi ivese ve la i za i doo ga. (Anz. 28:26) Ka nahan ve i doo u mba ve lu sôôr ayol a ve la vea palegh u lamen alam a sôngo sôngo, shin eren iceghzwa a or u ve lu sôôr la cii ve vea va fa ayol a ve tsembelee ye.

Anzaakaa 22:3 kaa ér: “Orfankwagh ka nan nenge a kwaghbo, nan yer, kpa mbalanenkwagh yô, ka ve kar, ve za ya ican.” Ka nyi i bo or a fatyô u tagher a mi hen ajiir a sha Intanet a ior ve keren ishiôr her laa? Kwagh er vihi yô, ior mbagen zua a ior mba ve fe ve ga sha Intanet maa ve hii ishiôr je, kpa ve va mase kaven ér or u yange ve lu sôôr la nan bume ve. Heela tseegh ga, mbaaferev mbagen bugh ajiir sha Intanet a tsughun ior yan ve inyaregh. Ashighe agen mbaaferev mban ka ve kaa ér ve mba Mbashiada.

Shi nenge ase kwaghbo ugen kpaa u a lu ken kwagh ne yô. Ajiir a sôôr ior sha Intanet ne agen ka i er tom a uporogeram mba Kômputa sha er a fa iorov uhar mba i senge ér ve kuma vough u vea vôso ayol a ve yô. Nahan kpa, kwaghmôm ngu u a tese ér imbakwagh la ka i wase mimi ga. Aluer se suur sha porogeram u Kômputa u i lu uumace ve er la ser a wase se u tsuan kwagh u vesen, er or u se vôso nahan yô, a tese kwaghfan ga cii. Shighe môm kpa, uporogeram mba kômputa vea wase se er akaawan a Bibilo nahan ga.—Anz. 1:7; 3:5-7.

Kwaghwan u a lu ken Anzaakaa 14:15 la kaa ér: “Orlanenkwagh ka nan gba nan jighjigh sha hanma kwaghôron tsô, kpa orfankwagh yô, ka nan ver ishima sha zende u nan.” Cii man u kure ikyaa wer, or la nana lu nom shin kwase u injaa yô, a gba u u fa nan tsembelee. Kpa aluer ne mba lamen sha Intanet tseegh yô, a taver we u  fan nan. Shi aluer u nengen a ufoto mba nan, shi ka ne tindin a ilyoho hanma shighe je kpa, u fatyô u kaan wer mimi je u fa or la vindi vindi? Mbagenev mba yange ve hen ér ve zua a or u nan doo ve ishima sha mimi u vea vôso yô, va mase nengen a kwagh u kpiligh ve iyol shighe u ve va zua ishigh a or shon la.

Orpasalmi yange kaa ér: “M tem a ugbilinmbaiorov imôngo ga; lun yam a mbaayomov imôngo kpaa ga.” (Ps. 26:4) Mbagenev nenge ér gba u or a er aie sha kwagh u ufoto mba nan shin sha akaa a nan nger sha kwagh u nan, hen ajiir a sôôr ior sha Intanet la, ka nahan ve nana ngôôr zuan a shiôr ga ye. Alaghga vea yer aeren a ve a bo la, gayô aa due ken igbar ken ilyoho i ve lu tindin ior a mi la ga. Doo u se hen sha mbampin mba ve dondo ne. Er alaghga mbagenev vea kaa ér ve mba Mbashiada mba Yehova nahan kpa, mimi je ve er batisema? Ve via ken jijingi je kpa? Mba kôôsôô a Yehova je kpa? Mba ne ve icivir ken tiônnongo ve je kpa, shin mba veren ikyav i dedoo ga, shin mba “uijende mba bov”? (1 Kor. 15:33; 2 Tim. 2:20, 21) Man mba sha ian i Ruamabera a tese ér vea fatyô u eren nom shin kwase kpa? Doo u u fa akaa ne. Nahan kpa, a gba u u lam vea Mbashiada mbagen mba ve fe or la tsembelee yô, gayô a taver we u fan. (Anz. 15:22) Jighilii je yô, or u civir Yehova sha mimi môm nana hen u za lun ken “mzough u kpeegh” vea or u civir Yehova ga ze.—2 Kor. 6:14; 1 Kor. 7:39.

Er akaabo a ban sha ajiir a sôôr kasev shin keren noov sha Intanet la ga yô, hemba doon u keren kwase shin nomsoor u u fatyô u fan nan tsembelee sha er u vôso yô, sha igbenda igen. Kpa ka han nahan u za ve u zua a nom shin kwase u injaa u u fatyô u vôsono? Shighe u i yange ior u kumban imôngo ga yô, Mbashiada mba Yehova ka ve fatyô u zuan a or u vea vôso yô, zum u ve ze mbamkombo mba tiônnongo man mbamkohol mba kiriki man mba vesen, shin ve kombo sha ajiir agen yô.

Shighe u i lu u a fatyô u kumban imôngo ga, er shighe u angev mbu korona mbun nahan yô, ka se nyôr mbamkombo mba tiônnongo sha Intanet, nahan se fatyô u zuan vea Mbashiada mbagen mba ve lu kwav mba se seer fan ve yô. U fatyô u ungwan er ka ve na akaaôron kua mbamlumun ken mbamkombo sha u pasen jighjigh ve yô. (1 Tim. 6:11, 12) Shi u fatyô u lamen a nan shighe u i due mkombo man i ver ne sha gbenda u ne uhar ne fatyô u lamen yô. Shi shighe u Mbashiada ve kombo imôngo sha Intanet u eren kwagh u nan ve msaanyol nahan yô, u fatyô u nengen er or u u soo u sôôr nan la nan eren kwagh a ior mbagenev la. Kwagh la una wase u u fan injaor i nan lu jim jim yô. (1 Pet. 3:4) Er shighe a lu karen shi ne lu seer fan ayol a en la, u fatyô fan aluer akaa a ne we ishima u eren la zua shi u kuma vea or shon vough u ne fatyô eren ivaa yô.

Ior mba ve lu kwav ka vea keren or u vea vôso man a lu sha igbenda i i zough sha akaawan a Bibilo yô, ashe a hemba veren ér a va saan ve iyol ken ivese ve, maa i zua sha kwagh u anzaakaa a ôr ne ér: “Or u nan er kwase [shin nom] yô, ka kwagh u doon je nan zough a mi ye, doo TER a nan.”—Anz. 18:22