1-2. Mkaanem ma Yehova ma ken Yesaia 65:16, 17 la, ma taver se ishima ér se de gbe uwer ga nena?

MKOHOL u vesen u inyom i 2017 la yange lu a itinekwagh i sagher iyol ér, “De Gbe Uwer Ga!” Mkohol ne yange tese se er se fatyô u wan ishima a mbamzeyol asev yô. Anyom kar hegen ka anyiin je ne, nahan kpa se mba wan ishima ken botar ne her.

² Ka mbamzeyol mba nyi u lu tagher a mi hegene? Ka ku u or u hen tsombor wou shin ma ijende you i ishima ishima? Shin u gba icôronuange? Shin uma ngu taver we sha ci u iyolbeene? Ma kwagh u vihin er u a bende a we shin ka ipila, gayô mba tôvon we a icana? Shin angev mbu korona gayô angev mbugen na yô u ngu yan icana? Se mba veren ashe keghen shighe u mbamzeyol mban cii vea kera lu ga, se hungur a ve shi mayange se tsa se umbur kwagh ve ga la!—Ôr Yesaia 65:16, 17.

3. Ka nyi i gbe u se er hegene, man ka sha ci u nyi?

³ Uma taver kpishi ken tar ne, man alaghga a gba u se va wa ishima a mbamtaver mba hemban vihin cii ken hemen. (Mat. 24:21) Nahan gba u se seer henen u wan ishima. Sha ci u nyi? Sha ci u Yesu kaa ér: “Ka sha ishimawan yen la ne war uma wen ye.” (Luka 21:19) Aluer se mba henen sha kwagh u ior mbagen mba ve lu wan ishima a mbamzeyol mba se kpa se lu tagher a mi la yô, kwagh la una wase se u wan ishima.

4. Se fatyô u kaan ser Yehova ver se ikyav i hemban cii sha kwagh u ishimawan nena?

⁴ Ka an nan hembe veren ikyav i dedoo sha kwagh u ishimawana? Ka Yehova Aôndo. Mlumun la kpiligh we iyolo? Alaghga a kpiligh we iyol. Kpa aluer u hen sha mi yô, a kera kpiligh we iyol ga. Tar ne cii ngu sha ikyev i Diabolo, nahan u iv a mbamzeyol.  Yehova ngu a tahav mbu been a mbamzeyol mbara hegen, nahan kpa ngu keghen iyange i una va er kwagh ne ken hemen yô. (Rom. 9:22) Hegen ne, Aôndo wase ngu wan ishima keghen shighe u una va tim tar ne la. De se time sha akaa ataankaranyiin a Yehova a lu wan ishima a mi yô.

5. I laha iti Aôndo nena, man kwagh ne ka na i lu u ken ishima nena?

⁵ Ilyahan i i ve a mi sha iti na la. Iti i Yehova doo un ishima shi a soo ér hanma or nana naan i icivir. (Yes. 42:8) Nahan kpa ken anyom 6,000 a a kar ne cii mba lahan iti i Yehova. (Ps. 74:10, 18, 23) Kwagh ne yange hii ken sule u Eden shighe u Diabolo (inja na yô “Ormsende”) wa Aôndo aie iyol ér ngu yangen Adam man Ifa u eren kwagh u nan ve msaanyol la. (Gen. 3:1-5) Hii shighe la je, ior za hemen u wan Yehova aie iyol ér ngu yangen uumace u zuan a akaa a dedoo a kwagh a gbe ve a mi la. Ishima yange i za Yesu iyol er i lu lahan iti i Ter na yô. Sha nahan yô, tese mbahenen nav u eren msen ér: “Ter wase u Sha, i̱ tsegha iti You.”—Mat. 6:9.

6. Er nan ve Yehova a de ér shighe a kar gôgônan cii ve una tese ér ka un, un lu a ian i hemen sha man tar ciili?

⁶ Mba hendan a hementor na. Ka Yehova tswen a lu a tahav mbu hemen sha man tar cii ye, man gbenda u a hemen la hemba doon cii. (Mpa. 4:11) Kpa Diabolo nôngo ér, una tsugh mbatyomov man uumace ve hen ér Aôndo ngu a ian shin a kuma u hemen ga. Gba u shighe a kar cii ve Yehova una tese ér un ngu a ian i hemen, shi ka hemen na u hembe doon ye. Aôndo de uumace ér ve hemen ayol a ve shighe gôgônan sha u ve nenge, er aluer mba ungwan imo i Orgban ve ga ve, vea fatyô u hemen ayol a ve a zayol shio ga yô, man a er kwagh ne ka sha inja je. (Yer. 10:23) Ishimawan i Aôndo ne na yô, a va sôr zayol ne kwa môm. Una tese ken igbar er i lu Tartor na tseegh ua va a bem man mkpeyol u mimi sha tar yô.

7. Ka unô ve hembe Yehova ato, man ka nyi una va er a ve?

⁷ Ihyembeato i ônov nav mbagenev. Yehova yange gba mbatyomov kua uumace cii ve lu vough a mshi shio. Nahan kpa, Satan (inja na yô “Orhendankwagh”) u lu ortyom la hendan a Yehova shi tsugh Adam man Ifa kpaa ér ve hemba Yehova ato. Mbatyomov kua uumace mbagen kpa dondo ve ken ihyembeato ne. (Yuda 6) Shighe kar yô, ikyurior i Iserael i i lu nongoior u Aôndo tsua ve la kpa gema ijime a na, ve gema ve lu civir mbaaôndo mbaaiev. (Yes. 63:8, 10) Yehova nenge er i er kwagh a na sha mimi ga yô. Nahan cii kpa a wa ishima, shi ngu wan ishima keghen shighe u a va kuma vough u una tim mbahembanato cii kera la. Hen shighe la a saan Yehova iyol kua mba ve lu civir un sha mimi la cii, sha ci u a kera gba u vea wa ishima a mbamzeyol mba ken botar ne ga!

8-9. Ka mbaaie mba nyi i we Yehova iyolo, man ka nyi se fatyô u erene?

⁸ Mbaaie mba Diabolo. Satan yange wa Yobu kua mbacivir Yehova cii aie iyol ér, mba civir Aôndo ka sha ci u mtsera ve. (Yobu 1:8-11; 2:3-5) Zan zan nyian kpa, Diabolo ngu senden uumace ityough vea Aôndo her. (Mpa. 12:10) Se fatyô u tesen ser Satan ka oraie, sha u wan ishima a mbamzeyol shi zan hemen u civir Yehova sha mimi sha ci u a doo se ishima. Yehova yange na Yobu injar, shi se kpa aluer se wa ishima yô una va na se injar.—Yak. 5:11.

⁹ Satan ka a tuur mbahemenev mba kwaghaôndo u aiegh ve kaa ér, Yehova ka iferor shi ka un a ne uumace ve lu yan ican ye. Mbayev ka vea kpe yô, mbagenev ve kaa ér ka  Aôndo a yem a ve sha ye, sha ci u kwagh gba un a mbatyomov. Nenge imba ilyahan ne sha wono! Nahan kpa se fa ser, Yehova ka Ter u se doo un ishima yô. Shighe u se gbe ma bouange, shin or wase nan saa ku yô, se mba ne Aôndo ibo ga. Kpa se na jighjigh ser iyange igen yô, una bee a angev shi una nder ior shin ku. Se fatyô u ôron hanma or u nan kegh ato a vese cii ser Yehova ka Aôndo u se doo un ishima yô. Ka sea er nahan yô, Yehova a gema a kar imo a or u a lu lahan un la.—Anz. 27:11.

10. Ka nyi Pasalmi 22:23, 24 a ôr se sha kwagh u Yehova?

¹⁰ Ican i mbacivir un mba ve doo un ishima ve lu yan la. Yehova ka Aôndo u zungwen mhôônom. Ka sea yaan ican sha ci u tôvacan shin angev gayô mbamyen asev nahan i vihi un kpen kpen. (Ôr Pasalmi 22:23, 24.) Yehova soo u been a ican i yan shi una bee a i kpaa, sha ci u a fa er ka sea yaan ican ve i lu se yô. (Nenge Ekesodu 3:7, 8; Yesaia 63:9.) Shighe ngu van u “una ese [se] mliam cii sha ashe kera, ku ua kera lu ga, ijungwen kpa ia kera lu ga, mliam kpa ma a kera lu ga, shi mnyoon kpa una kera lu ga” yô.—Mpa. 21:4.

11. Ka i lu Yehova ken ishima nena sha kwagh u mbacivir un sha mimi mba ve kpe laa?

¹¹ Azende a na a a kpe la. Ka i lu Yehova ken ishima sha kwagh u nomso man kasev mba civir un sha mimi mba ve kpe la nena? Ka i sar un tsung u hiden nengen a ve! (Yobu 14:15) Nenge imba er a sar Yehova u hiden nengen a ijende na Aberaham sha wono! (Yak. 2:23) Gayô nenge imba er a sar Yehova u shi lamen a Mose u yange lamen a na “ishigh a ishigh” la sha wono! (Eks. 33:11) Shi ngu keghen shighe u Davidi kua mbawanatsam mbagenev vea va wa atsam a ve a doon a wuese un la! (Ps. 104:33) Er azende a Yehova ne a kpe nahan kpa, a hungur a ve ga. (Yes. 49:15) A  umbur mbamlu vev vindi vindi. Se fatyô u kaan ser “sha mnenge na yô, mba uma her.” (Luka 20:38, ftn.) Iyange igen una nder ve vea hide a lu uma, shi una ungwa mbamsen vev mba vea er a ishima i môm la, shi una lumun mcivir ve kpaa. Aluer or wou nan saa ku yô, mkaanem man maa fatyô u surun we ishima.

12. Ka nyi ka i na ishima i hemba vihin Yehova ken ayange a masejime nee?

¹² U nengen er mbaaferev ve lu kighir uumace yô. Hii shighe u i hemba Yehova ato ken Eden la je, Yehova fa er akaa aa vihi cii ve aa va mase doon yô. Ifer kua ipila i i dumbur sha tar nyian ne vihi Yehova kpen kpen. Mhôônom ka ma kôr un a mba ve lu a or ga, shin ve lu a mpe iyol ga, amba er ancôgholov man kasev mba côgholov nahan. (Sek. 7:9, 10) Yehova ka una nenge a nzughul a mbacivir un shi a wuhen ve ken purusu nahan i hemba vihin un cii. Fa wer hanma wase u nan lu wan ishima er un nahan cii, nan doo un ishima.

13. Ka akaa a hôngorough a nyi Aôndo a nenge uumace ve lu erene, man ka nyi una va ere?

¹³ Er uumace ve hôngor a ayol a ve yô. Yehova yange gba orumace sha ibyeen na. Nahan kpa, Satan ka a soo ér una mee ve ve er akaa a hôngorough. Er Aôndo “nenge isholibo i or kehe sha won” sha ayange a Noa la yô, “TER vaa afanyô er un er or sha won yô, vihi un ken ishima.” (Gen. 6:5, 6, 11) U nenge wer tar ne hemba doon hegene? Mayange ga cii! Ka i doo Diabolo u nengen er ior ve lu eren idya sha igbenda kposo kposo yô. Kwagh ne wa ieren i nomso man kasev mba ve vese ayol a ve ga yaven a ayol a ve, man ieren i nomsoor yaven a nomsoor shin kwase yaven a kwase la cii ker! (Ef. 4:18, 19) Ior mba ve civir Yehova sha mimi ka vea er isholibo i vihin tsung nahan i doo Satan je i zua ga. Yehova una wa ishima zan zan a kuman un yô, una tese ken igbar er un kôr ijimba i eren ihyom yô. Una tim ior mba eren ijimba mba ve vende u geman ishima la cii.

14. Ka nyi uumace ve lu eren a tar ne kua annyameve?

¹⁴ Er i lu vihin tar u a gbe ne yô. Orumace ngu “eren” orumace ugen “ican” shi ngu veren ishima sha tar ne kua annyamev er Yehova yange wa un sha ikyev ér a nengen sha ve la ga. (Orpa. 8:9; Gen. 1:28) Mbasainsi mbagen kaa ér kwagh u uumace ve lu eren ne una tim annyamev kua imendenev atô kposo kposo er miliôn môm nahan ken anyom kpuaa a a ve ken hemen ne. Ka nahan ve ishima ka i za ior iyol sha kwagh u mlu u ikyasen yase ne ye. Kpa kwagh er doo yô, Yehova tôndo zwa u “timin mba ve lu vihin tar la” shi una gema tar cii ua hingir paradiso.—Mpa. 11:18; Yes. 35:1.

15-16. Ka nyi ia wase se u wan ishima er Yehova nahana? Tese ikyav.

¹⁵ Hen ase sha akaa a vihin tsung a Ter wase u sha a lu wan ishima a mi anyom udubu imôngo ne. (Nenge ngeren u “ Akaa a Yehova a Lu Wan Ishima a Mi La.”) Yehova una fatyô u timin botar ne hanma shighe u a soo cii. Nahan kpa ishimawan na la wase se kpishi je! Hen ase sha kwagh ne. Tôô wer mbatwerev kaa a orgen vea kwase na ér wan u vea mar la una due a bouange, nahan una ya ican kpishi shi una kpe iyev iyev. Nahan kpa, mba maren wan la yô saan mbamaren mban iyol shin er i lu u vea ya ican a na nahan kpaa. Er wan ve ne a doo ve ishima yô, vea wa ishima a nyityô mtaver i vea tagher a mi er ve lu nengen sha a na la cii.

¹⁶ Kape ônov mba Adam man Ifa cica cii kpa ka i mar ve a myen je la. Nahan kpa ve doo Yehova ishima shi nengen sha a ve. (1 Yoh. 4:19) Er mbamaren mba ken ikyav yase la ve lu a  kwagh u eren sha zayol u wan ve la ga nahan kpa, Yehova yô una fatyô u been a ican i mbayev nav ve lu yan la. A ver shighe u una bee a ican i uumace ve lu yan la cii kera yô. (Mat. 24:36) Dooshima u Yehova ne a mgbegha se, se kpa se za hemen u wan ishima er se fetyô la cii.

17. Kwagh u Yesu u i ôr ken Mbaheberu 12:2, 3 la taver se ishima u wan ishima nena?

¹⁷ Yehova ver se ikyav i hemban doon cii sha kwagh u ishimawan. Yesu kpa yange wa ishima vough er Ter na nahan. Shighe u Yesu lu shin tar la, i lam sha a na dang, shi i laha un shi i mande un sha kon sha ci wase, kpa Yesu wa ishima. (Ôr Mbaheberu 12:2, 3.) Ishimawan i Yehova la yange i wase Yesu u wan ishima je ka u henen a hen ga. Se kpa ia fatyô u wasen se.

18. Sha kwagh u 2 Peteru 3:9 a ôr yô, ka nyi i dugh ken ishimawan i Yehova laa?

¹⁸ Ôr 2 Peteru 3:9. Yehova fa shighe u a hembe doon u una tim botar ne yô. Er Yehova a lu wan ishima yô, kwagh la wase i kohol zegeikpelaior ngi va civir un shi wuese un. Hegen ne, mbacivir un mban kuma umiliôn imôngo. Ve cii doo ve kpishi er Yehova a we ishima zan zan i mar ve, ve hen u soon un shi ve tsegha ayol a ve sha ci na yô. Ior umiliôn imôngo mba vea wa ishima zan zan mkur la, vea lu kwagh u tesen wang je ér Yehova yange wa ishima nahan lu sha inja je!

19. Ka nyi i gbe u se kange ishima u erene, man ka injar i nyi se va zua a mini?

¹⁹ Ikyav i Yehova la tese se ér doo u se waan ishima saan saan. Er Satan a er akaa a vihin shi a ne ior ve lu yan ican nahan kpa, Yehova ngu “Aôndo u sar sar” her. (1 Tim. 1:11) Se kpa se fatyô u wan ishima saan saan, keghen shighe u Yehova una va tsegha iti na, shi una tese ér ka un tswen un kom u hemen, shi una bee a ifer man mbamzeyol mba se lu tagher a mi hegen ne cii la. Yô, se za nen hemen u wan ishima shi umbur ser Ter wase u sha la kpa ngu wan ishima. Aluer se er nahan yô, mkaanem man maa kure sha a vese vough, maa kaa er: “Saan or u nan nyer ken ican kpa nan taver ishima her la iyol, sha ci u aluer nan gba ga yô, nana va zua a injar i uma, i Yehova a tende zwa u nan mba ve ze hemen u tesen ér Un doo ve ishima la.”—Yak. 1:12.