1. Ka nyi Yehova a soo ér i er nyiana?

 NYIAN ne, Aôndo soo ér i pase loho u dedoo hanma ijiir sha tar cii. (Mar. 13:10; 1 Tim. 2:3, 4) Tom ne ka u Yehova, shi ka a inja kpishi er a tsua Wan na u ishima ishima la ér a hemen tom shon yô. Se fatyô u lun a jighjigh u nan ser, er Yesu a lu hemen se yô, a er tom u pasen kwagh ne a kure vough er Yehova a soo la cii mkurtar una mase van ye.—Mat. 24:14.

2. Ka nyi se lu timen sha mi ken ngeren nee?

² Ken ngeren ne, se time se nenge er Yesu a lu eren tom a “wanakiriki u jighjigh man u fan kwagh” sha u wan ior kwagh ken Mkaanem ma Aôndo, shi kohol mbadondon Yesu sha ci u eren tom u pasen kwagh u i lu eren hegen sha gbenda u hemban cii la yô. (Mat. 24:45) Shi se nenge gbenda u hanma wase nana fatyô u suen Yesu kua wanakiriki u jighjigh yô.

3. Ka tahav mbu nyi yange i na Yesu?

³ Yesu ngu hemen tom u pasen kwagh la. Se fa nahan sha ci u nyi? Yesu yange er mkombo vea mbahenen nav mba jighjigh mbagenev sha uwo ugen ken Galilia cii, mase kôndon yemen sha ye. A kaa a ve ér: “I nam tahav sha akaa a sha man a shin tar cii.” Nenge ase kwagh ugen u shi ôr ne, ér: “Sha nahan yô, za nen za gema nen ior mba ken akuraior cii ve hingir mbahenen.” (Mat. 28:18, 19) Inja na yô, i na Yesu tahav ér a tese er a er tom u pasen kwagh la yô, shi i na un tahav sha akaa agen kpaa.

4. Er nan se fe ser Yesu ngu nengen sha tom u pasen kwagh la zan zan hegene?

 ⁴ Yesu kaa ér a er tom u pasen kwagh shi geman ior hingir mbahenen la ken “akuraior cii,” shi una luun vea mbadondon un “ayange ayange, zan zan shighe u mkur u tar ne.” (Mat. 28:20) Mkaanem mara tese wang ér lu u Yesu una za hemen u nengen sha tom u pasen kwagh la zan zan sha ayange a ase ne.

5. Se mba wasen u kuren kwaghôron u profeti u ken Pasalmi 110:3 la nena?

⁵ Yange ishima nyian Yesu ér mbatomov vea va yina ken ayange a masejime ga. Yange fa dedoo ér kwaghôron u profeti u orpasalmi ôr ne una kure sha mi, ér: “Ior Ou vea na nagh sha ayol a ve sha asema a dedoo je sha iyange i ikyumutya You.” (Ps. 110:3) Aluer u ngu eren tom u pasen loho u dedoo la yô, u ngu suen Yesu kua wanakiriki u jighjigh, shi u ngu wasen u kuren kwaghôron u profeti la. Mba eren tom ne kpoghuloo je, kpa mbamtaver ban ga.

6. Ka mtaver u nyi mbapasenkwagh u Tartor ve lu tagher a mi nyiana?

⁶ Mtaver ugen u mbapasen kwagh u Tartor ve lu tagher a mi yô, ka mba hendan a ve. Mbaundun mcivir u mimi man mbatesen kwaghaôndo man mbapatii ôr ior akaa a mimi ga kpishi sha kwagh u tom wase. Aluer anmgbianev asev mba sha tsombor, man ior mbagen mba se fe, kua mba se eren tom ijiir i môm a ve la ungwa mbaaie mbara yô, alaghga vea gba zan se iyol ér se de u civir Yehova shi se de u pasen kwagh. Ken ityar igen yô, mbaihyomov asev ka ve ta anmgbianev asev mba nomso man mba kasev mciem iyol, shin ve ta num sha a ve gayô ve wuhe ve ken purusu ér ve de u pasen kwagh. Kpa ka i kpiligh se iyol ga, sha ci u Yesu tsenga ôron ér: “Akuraior cii aa kôr ne ihyom sha ci u iti yam.” (Mat. 24:9) Ihyom i i kôr se la ka ikyav i tesen ér Yehova lumun se. (Mat. 5:11, 12) Ka Diabolo a ne ve i kôr se ihyom nahan ye. Kpa a yina u gban kwagh a Yesu ica je! Er Yesu a lu suen tom u pasen loho u dedoo ne yô, loho shon ngu aren a ior sha tar cii. De se nenge ikyav.

7. Ka ikyav i nyi u nenge a mi i tesen ér kwaghôron u profeti u ken Mpase 14:6, 7 la ngu kuren sha mi?

⁷ Mtaver ugen u ka se tagher a mi shighe u se lu pasen kwagh yô, ior kpishi mba lamen zwa u se lamen la ga. Ken mpase u Yesu tese apostoli Yohane la, a tsenga ôron ér mtaver la una yange u pasen loho u dedoo ga. (Ôr Mpase 14:6, 7.) Sha ci u nyi? Se mba eren akaa a aa wase ior kpishi u ungwan loho u Tartor yô. Nyian ne, ior mba ôron ityakeda i pasen Bibilo sha ijiir yase i sha Intanet i jw.org la sha ci u ityakeda ngi her ken ijô kposo kposo hemba 1,000! Mbahemenev mba Shin Itine lumun ér i gema takeda wase u vesen u se eren tom a mi u geman ior hingir mbahenen la ken ijô i hemban 700! I kura akaaôron a wasen ior u dondon kwaghwan u Bibilo ken uvidio sha ci u mbaakondoato, shi i gber ityakeda i mbaapirashe kpishi. Se mba nengen er akaaôron a profeti a lu kuren sha mi yô. Ior mba ken “akuraior a hanma zwa cii” mba henen “zwa u wang.” (Sek. 8:23; Sef. 3:9) Akaa ne cii nga eren sha hemen u Yesu Kristu, u a lu nengen sha tom ne tsembelee la.

8. Ka nyi i due ken tom wase u pasen u se hila er laa?

⁸ Nyian ne, iorov mba hemban miliôn 8 ken ityar 240, mba ken nongo u Yehova. Shi hanma inyom yô, ka i er mbahev udubu imôngo batisema ken nongo ne! Nahan kpa, ka ingyegh vev kira ki lu kwagh u vesen ga, kpa ka aeren a Mbakristu shin “or u he,” u mbahenen mba hev mban ve gem ve hingir la, a lu kwagh u vesen ye. (Kol. 3:8-10) Ve kpishi ve de u eren idya man tswam, shi ve de ieren i  soon kwagh u ma nongoior ga la, shi ve de u tan ihyagh a tar a ve kpaa. Kwaghôron u profeti u i nger ken Yesaia 2:4 la ngu kuren sha mi, sha ci u ve mba ‘kera henen ityav mbi nôngon ga.’ Ka se nôngo kpoghuloo se haa or u he iyol, nahan kwagh ne a sar ior ve hingir u van ken nongo u Aôndo. Shi kwagh ne ka a tese ér se mba dondon Orhemen wase Kristu Yesu. (Yoh. 13:35; 1 Pet. 2:12) Man kwagh ne gbe eren tsô ga. Ka Yesu a lu nan se iwasen i se soo ne ye.

9. Ka nyi Yesu yange tsenga ôron ken Mateu 24:45-47 ér ia er ken ayange a masejime?

⁹ Ôr Mateu 24:45-47. Yesu yange tsenga ôron ér ken ayange a masejime yô, una tsua “wanakiriki u jighjigh man u fan kwagh,” u una waan ior kwagh ken Mkaanem ma Aôndo yô. Nahan a gba u wanakiriki la nana er tom kpoghuloo sha ayange a ase ne. Man ikyav tese ér kape i lu vough je la. Orhemen wase ngu nan nongoior u Aôndo kua mba i sar ve u fan mimi u Bibilo la ‘kwaghyan u ken jijingi sha shighe vough,’ sha ikyev i iorov kpuaa ken mba i shighe ve mkuren la. Nomsombaiorov mban mba nengen ayol a ve ér ve ya tor sha kwagh u jighjigh u nan u mbagenev ga. (2 Kor. 1:24) Kpa ve fa er Yesu Kristu a lu “orhemen man orwan akuraior kwagh” yô.—Yes. 55:4.

10. Ka takeda u han ken ityakeda i i tese ken foto la yange u wase u u hii u civir Yehova?

¹⁰ Hii ken inyom i 1919 la je, wanakiriki u jighjigh gber ityakeda sha atineakaa kposo kposo, i ka i wase mba hev mba ve ve ken mimi la u henen mimi u Mkaanem ma Aôndo yô. Ken inyom i 1921 la, wanakiriki ne gber takeda u i yilan u ér The Harp of God la, sha u wasen mba i sar ve la u henen akaa a vesen a Bibilo i tese la. Shighe karen yô, shi i gber ityakeda igen i seer. Ka takeda u han yange u  wase u u va hingir u fan Teru u sha la shi yan ijende a naa? Lu “Let God Be True,” shin The Truth That Leads to Eternal Life, shin Ú Fatyô u Lun Uma Gbem sha won ken Paradiso Shin Tar, shin Mfe u Una Va a Uma u Tsôron La, shin Bibilo Tese Ér Nyi Jimi?, shin Bibilo Tese Se Nyi? Shin ka takeda wase u he u U Fatyô u Lun Uma Gbem sha Won shi a Saan We Iyol! laa? I gber ityakeda ne cii ér i wase se u geman ior hingir mbahenen. Man hanma takeda yô, i er tom a mi i er yange i wa ishima u eren ve i gber u la.

11. Gba u se cii se seer fan Bibilo man kwagh u Yehova sha ci u nyi?

¹¹ Ka mbahev tseegh i gbe u vea seer fan Bibilo kua kwagh u Yehova ga, kpa ka se cii. Apostoli Paulu nger ér: “Kwaghyan u taver ngu sha ci u mbaganden.” Aluer se mba dondon kwagh u se henen ken Bibilo la yô, se fatyô u “fan mkposo u kwagh u dedoo a kwagh u bo.” (Heb. 5:14) Ior kpishi mba eren idya hegen kpoghuloo, nahan ka i taver ve kpishi u kuran atindi a Yehova. Yesu ka a nenge ér se hen kwagh u una wase se se za hemen u lun a jighjigh u nan taveraa yô. Man kwagh u ka se hen la ka a due ken Bibilo i i lu Mkaanem ma Aôndo la. Wanakiriki u jighjigh ka a nger akaa a i gbe u se hen la cica cii shi a samber a mi, er Yesu a tese un la.

12. Se mba nengen iti i Aôndo er Yesu kpa nengen i la nena?

¹² Se mba ne iti i Aôndo i Yehova la icivir i i gbe u a na i la, er Yesu kpa er nahan. (Yoh. 17:6, 26) Ikyav i tesen yô, ken inyom i 1931 la, se tôô iti i ken Bibilo ser Mbashiada mba Yehova. Nahan kwagh ne tese er iti i Aôndo i lu se kwagh u vesen, shi se soo ser i fa se sha iti i Ter wase u sha la yô. (Yes. 43:10-12) Nahan hii ken uwer u Oktoba ken inyom la je, i gema ngeren iti i Aôndo sha igbende i Iyoukura, vegher u ken ishi la. Heela tseegh ga, i hide a iti i Aôndo i Yehova la i wa sha ajiir a i gbe u ia lu ken Mkaanem nam la cii, ken Icighan  Bibilo i Tar u He la. Kwagh ne kaha kposo a ucôôci mba Mbakristu mba ve dugh iti i Yehova ken Ubibilo vev kera la cii!

13. Ka nyi i tese u ér mimi je Yesu ngu eren tom a “wanakiriki u jighjigh man u fan kwagh” nyiana? (Yohane 6:68)

¹³ Yesu kohol nongoior u injaa sha tar cii sha ikyev i “wanakiriki u jighjigh man u fan kwagh.” Nongoior la ngu samber a mcivir u mimi. U nenge kwagh u nongo shon nena? Alaghga u nenge u er apostoli Peteru nahan, yange kaa a Yesu ér: “Ka hen an je shi se zaa? Ka we u lu a akaaôron a nan or uma u tsôron ye.” (Yoh. 6:68) Yange sea hii u kohol imôngo a nongo u Yehova ga yô, ka han ma se lu nyiana? Ka sha ikyev i nongo ne Yesu ka a na se zua a hanma kwagh u i gbe u se lu a mi ve se za hemen u civir Aôndo sha mimi la ye. Shi ka a tese se u eren tom wase u pasen kwagh la tsembelee. Heela tseegh ga, ka a wase se u haan “or u he” iyol, sha er a doo Yehova a vese yô.—Ef. 4:24.

14. U ngu ken nongo u Yehova nahan, kwagh la yange wase u shighe u angev mbu Korona va la nena?

¹⁴ Yesu ka a waan se kwagh sha ashighe a se tagher a mbamzeyol yô. Se fatyô u nengen a iwasen i kwaghwan na zum u angev mbu Korona va la. Shin er ior kpishi sha tar lu fan kwagh u vea er ga nahan kpa, Yesu na i tese se kwagh u se er ve angev mbura mbua tsar se ga yô. Yange i taver se ishima ér hanma shighe u se due hen ya yô, se cir kwagh u yisan zwa man ahenga, shi se de benden iyol a ior ga. I umbur mbatamen ér ve za hemen u lamen a hanma or ken tiônnongo, shi ve fa akaa a i gbe u anmgbianev mba ken tiônnongo vea lu a mi ve kwagh a er ve ga, vea lu gbong gbong shi vea lu vea Yehova kôôsôô yô. (Yes. 32:1, 2) Shi ken ibaver i Mbahemenev  mba Shin Itine la kpa ka i wa se kwagh shi i taver se ishima.

15. Shighe u angev mbu Korona va la, i tese ér i nyôron mbamkombo shi i eren tom u pasen kwagh la nena, man ka nyi i due kere?

¹⁵ Sha shighe u angev mbu Korona la, shi i tese se er se nyôron mbamkombo mba tiônnongo shi se eren tom wase u pasen kwagh la yô. Nahan fese je maa se hii u zan mbamkombo mba Mbakristu, man mbamkohol mba ningir, kua mbamkohol mba vesen cii sha Zoom. Shi se hii u pasen ior kwagh sha u ngeren ve washika man sha telefon. Yehova yange sue tom wase la kpishi. Mbapasenkwagh seer iyenge sha ubranci mbagenev imôngo. Jighilii yô, ior kpishi zua a akaa a taver ve ishima hen shighe la.—Nenge ngeren u kiriki u a lu a itinekwagh ér “ Yehova Ngu Suen Tom Wase u Pasen Kwagh La.”

16. Ka nyi se fatyô u nan jighjigh ser ia ere?

¹⁶ Alaghga shighe la mbagenev lu nengen ér nongo ne palegh angev mbura ngee yum. Kpa i zer gbem tsô, ikyav va tese wang er yange i lu tesen se akaa la sha kwaghfan yô. (Mat. 11:19) Shi aluer se hen sha gbenda u Yesu a lu hemen ior nav sha dooshima la yô, se fatyô u lun a jighjigh u nan ser, nyityôkwagh ia va tser se ken hemen kpa, Yehova vea Wan na vea lu vea vese.—Ôr Mbaheberu 13:5, 6.

17. Yesu ngu hemen we nahan, ka u nena?

¹⁷ Saan se iyol kpishi er Yesu a lu hemen se ken tom wase la yô! Se mba ken nongo u ior mba ken akuraior man ijô kposo kposo ve lu ker, shi aeren a ityôô a ve a lu kwaghmôm ga, kpa ve lu gungur môm yô. Se mba yan kwaghyan u ken jijingi tsembelee, shi i tese se igbenda i se fatyô u eren tom wase u pasen kwagh la cii. Shi hanma wase yô, i tese nan er nana haa or u he iyol yô, shi se mba henen u doon ayol a ase. Nahan se fatyô u kaan ihyagh er Yesu a lu Orhemen wase yô!