▪ Yesu yange tesen ior ér ve lu ken bem. Kpa hen shighe ugen la, kaa a mbaapostoli nav ér: “De henen nen ner m va ka sha u me va na bem a lu shin tar ga; m va ka u nan bem ga, kpa ka sanker. Gadia m va ka sha u nan mpav hen atô u or a ter u nan, man wan u kwase kpaa a ngô u nan, kua kwase a ngô u nom u nan.” (Mat. 10:34, 35) Inja i kwagh u Yesu ôr ne ér nyi?

Yesu yange soo ér ior ve pav a icombor ve ga, kpa fa er ityesen na la ia va a mpav hen icombor igen yô. Nahan gba u mba yange sar ve u hingir mbahenen mba Kristu shi eren batisema la vea fa kwagh u, aluer ve er nahan ve, vea tagher a mi la wang. Ashighe agen yô, or u ve vôso nan la, gayô mbagenev hen tsombor ve yange ve hendan a ve, nahan kwagh la a na uma a taver ve kpishi.

Bibilo wa Mbakristu kwagh ér ve ‘lu ken bem a ior cii.’ (Rom. 12:18) Kpa ityesen i Yesu ia fatyô u hingir er ka “sanker” nahan hen icombor igen. Kwagh ka a er nahan shighe u or ngohol ityesen i Yesu ve, mbagenev hen tsombor u nan ve lu hendan a nan yô. Ka a lu nahan yô, anmgbianev mba orhenen Bibilo, mba ve lu hen ya môm vea nan la ve hingir “mbaihyomov” mba nan.—Mat. 10:36.

Ashighe agen yô, mbahenen mba Kristu mba ve lu hen ya môm vea ior vev mba ve eren kwaghaôndo ugen la ka ve tagher a ameen a ka i gba u saa vea taver ishima ve Yehova kua Yesu vea za hemen u doon ve ishima yô. Ikyav i tesen yô, shighe ugen anmgbianev vev mba ve lu Mbashiada ga la vea kaa a ve ér ve kohol ve vea ember ma iniongo i ukwaghaôndo mbagenev imôngo. Shighe u ve tagher a imba imeen la yô, ka an i gbe u vea er ishima i nana? Yesu kaa ér: “Or u ter u nan shin ngô u nan a hembe doon nan ishima a mo yô, nan kuma u lun orhenen wam ga.” (Mat. 10:37) Kpa u ngu wer Yesu lu ôron ér gba u mbahenen nav vea kera soo mbamaren vev kpishi ga ve, una nenge ve ér ve kuma u lun mbahenen nav ga. Jighilii yô, lu tesen ve er i gbe u vea tsua u eren akaa a a hembe lun a inja la ken uma ve yô. Shighe u ior asev mba hen tsombor ve lu hendan a vese ér se de civir Yehova ga yô, se za nen hemen u tesen ve dooshima, kpa se umbur ser gba u Aôndo wase una hemba doon se ishima.

Sha kpôô yô, ka i vihi se kpishi er ior asev mba hen tsombor ve lu hendan a vese yô. Kpa mbahenen mba Yesu ka ve umbur mkaanem nam man, ér: “Or u nan lumun u tôôn kon u nan dondon sha a mo ga cii, nan kuma u lun orhenen wam ga.” (Mat. 10:38) Inja na yô, Mbakristu ka ve nenge ahendan a mba hen icombor ve la ér ka ican igen i mbahenen mba Kristu ka ve lumun u yan yô. Nahan kpa, ka ve lu a ishimaverenkeghen ér ieren ve i dedoo la ia na yô, ior vev mba hen tsombor vea va de u hendan a ve, shi vea lumun u henen Bibilo.—1 Pet. 3:1, 2.