NGEREN U TIMEN SHA MI 29
ICAM 121 Gba u Se Kôron Iyol Tsaha
Za Hemen u Kuran sha Er U Gba ken Imeen Ga Yô
“Kuran nen shi eren nen msen hanma shighe, sha er ne gba ken imeen ga yô.”—MAT. 26:41.
KWAGH U SE LU HENEN YÔ
Ngeren ne una umbur se akaa a se er ve se palegh u eren isholibo i vesen yô. Shi una umbur se er i hii ve i doo u se palegh u eren akaa a aa na se va hingir u eren isholibo i vesen la kpaa.
1-2. (a) Yesu yange ta mbahenen nav icin ér nyi? (b) Mbahenen mba Yesu yange ve undu un sha ci u nyi? (Shi nenge ufoto kpaa.)
“GBASHIMA yô ngu, kpa iyol gema vôr.” a (Mat. 26:41b) Mkaanem ma Yesu man tese ér a fa er se yen yô, shi a fa er myen la ka a na se er akaa agen shami ga yô. Nahan kpa, yange ôr mkaanem man u tan se icin ér se de henen ser ka hanma shighe se lu a agee a eren kwagh u vough ga. Cii ve Yesu ôr kwagh ne yô, mbahenen nav tôndo zwa a na ér mayange vea undu un ga. (Mat. 26:35) Yange awashima ve la lu u dedoo. Kpa ve kera fa ér aluer i hingir a ve hang yô, a taver ve u eren kwagh u ve tôndo zwa la ga. Ka nahan ve Yesu ta ve icin ér: “Kuran nen shi eren nen msen hanma shighe, sha er ne gba ken imeen ga” ye.—Mat. 26:41a.
2 Kpa kwagh ka a er i vihi yô, mbahenen nav fatyô u kuran ga. Yange ve lu vea Yesu shighe u i kôr un laa, shin yange cier ve iyol ve yevese ve undu unu? Mbahenen mbara yange ve undu Yesu, man lu kwagh u ve kaa ér mayange vea er ga yô.—Mat. 26:56.
Yesu yange kaa a mbahenen nav ér ve kuran sha er vea gba ken imeen ga yô, kpa ve undu un (Nenge ikyumhiange i sha 1-2)
3. (a) Aluer se soo ser se za hemen u civir Yehova sha mimi yô, gba u se palegh u nengen ser se gande gbeev sha ci u nyi? (b) Ka nyi se lu timen sha mi ken ngeren nee?
3 Gba u se umbur ser ka hanma shighe se lu a agee a eren kwagh u vough ga. Ka mimi, se soo ser kwagh môm a yange se u eren ishima i Yehova ga. Nahan kpa, er se yen yô se fatyô u tagher a imeen i eren kwaghbo. (Rom. 5:12; 7:21-23) Nahan ashighe agen se tagher a imeen i eren kwaghbo shighe u se ver ishima ga yô. Aluer se soo ser se za hemen u civir Yehova sha mimi shi eren kwagh a Wan na sha mimi yô, a gba u se dondo kwaghwan u Yesu u a kaa ér se kuran sha er se gba ken imeen ga la. Ngeren ne una wase se u eren kwagh ne. Hiihii yô, se lu timen fan ashighe a i hembe doon u se za hemen u kuran yô. Maa se time sha akaa a se er ve se kura iyol yase sha er se gba ken imeen ga yô. Se been yô, se mase timen fan kwagh u se er ve se za hemen u kuran yô.
FA MBAMYEN OU
4-5. Er nan ve i gbe u se palegh u eren asorabo a kiriki je kpaa?
4 Asorabo agen ka a vihi kpishi er agen ga, kpa aa na ijende i se ye vea Yehova la ia kera taver ga. Shi asorabo la aa na se hingir u za eren asorabo a vesen je kpaa.
5 Se cii se mba tagher a imeen i eren kwaghbo. Shi hanma wase nan ngu a kwagh u a fatyô u meen nan sha mi yô. Alaghga a lu imeen i eren isholibo i vesen gayô eren kwagh u hôngorough shin lun a mhen u taregh. Ikyav i tesen yô, alaghga orgen nan ngu nôngon a imeen i eren idya. Shin alaghga orgen nan ngu nôngon a imeen i eren kwagh u hôngorough, er u ngirigh ilyeegh ki yaven a or shin nengen ufoto mba ijimbagh nahan. Man alaghga orgen di nan ngu nôngon a ihyagh shin ishimanyoon gayô nan ngu fantyô u eren kwagh u vough ga sha ci u nan ngu cian ior, shin ma kwagh ugen. Ka nahan ve Yakobu yange kaa ér, “hanma or ka i kar nan sha isharen i nan i i lu urugh nan shi hônon nan la” ye.—Yak. 1:14.
6. Ka nyi i gbe u se fa sha kwagh wase?
6 U fa kwagh u a fatyô u meen we sha mi fele kpa? Aluer se fa ma myen wase kpa se er kwagh sha mi ga, shin se nenge ser se taver gande u gban ken imeen yô, ka kwaghbo. (1 Yoh. 1:8) Umbur wer Paulu kaa ér mba ve “taver ken jijingi la” je kpa, aluer ve wa ikyo ga yô, vea fatyô u gban ken imeen. (Gal. 6:1) Gba u se lumun ser se yina sha avegher agenegh shi se fa ajiir a se taver ga la kpaa.—2 Kor. 13:5.
7. Ka nyi i gbe u se hemba veren ishima sha mini? Tese ikyav.
7 Se faan akaa a aa na se gba ken imeen fele la yô, ka nyi i gbe u se ere? Nôngo kpoghuloo sha er u hemba imeen yô! Ikyav i tesen yô, sha ashighe a i ngeren Bibilo la, yange i lu sha ihindagar mbaihyomov ve za hii tan ityav sha gar ye. Sha nahan yô, yange i ver mbakuran kpishi sha hundagar sha er a kura gar yô. Se kpa gba u se hemba veren ishima sha akaa a se nenge ser a fatyô u meen se sha mi fele la.—1 Kor. 9:27.
KWAGH U SE ER VE SE PALEGH IMEEN YÔ
8-9. Gumor u i ôr kwagh na ken Anzaakaa ityough 7 la, yange ma palegh u eren isholibo i vesen nena? (Anzaakaa 7:8, 9, 13, 14, 21)
8 Se kura ayol a ase nena? Nenge ase kwagh u se fatyô henen ken gumor ugen u i ôr kwagh na ken Anzaakaa ityough 7 la yô. Yange er idya vea gbagakwase ugen. Ivur 22 kaa ér gumor la yange dondo kwase la “fese.” Kpa er avur a ken ijime la a tese nahan, gumor la yange er akaa kure kure cii ve hingir u za eren isholibo la ye.
9 Ka nyi yange i na ve hingir u za eren isholibo shono? Hiihii yô, gumor la yange kar ‘ikyua ikyua a iniuugh ki gbenda ki gbagakwase la,’ aikighe. Maa a kôr gbenda u hen ya u kwase la. (Ôr Anzaakaa 7:8, 9.) A nenge a kwase la kpa a kar a yem kwagh na ga. Kpa a lumun ér a suse un zwa shi a kegh ato a na er lu ôron un er un ne iniav yô. Alaghga tsô gbagakwase la yange er kwagh ne sha er gumor la a hen ér un ngu kwase u injaa yô. (Ôr Anzaakaa 7:13, 14, 21.) Luun er gumor la yange una er abumeakaa ne ga yô, ma fatyô u palegh imeen nahan man za er isholibo ga.
10. Nyian ne kpa or a fatyô u eren kwagh er gumor u i ôr kwagh na ken Anzaakaa la nahan nena?
10 Kwagh u Solomon ôr ne tese kwagh u una fatyô u eren or u civir Yehova yô. Alaghga nana er isholibo i vesen maa nana nenge ér kwagh shon yange er “fese.” Gayô alaghga nana kaa ér, “Yange m hen mer kwagh a er nahan ga.” Kpa aluer nan hen sha kwagh u yange za hemen la tsembelee yô, nana nenge er yange nan er akaa shami ga ve hingir u nana za er isholibo i vesen yô. Man alaghga akaa a shami ga a yange nan er la lu u yan ijende a ior mba bov shin u eren iemberyolough i bo shin zan hen ajiir a sha Intanet a bo gayô zan hen ajiir a dedoo ga. Alaghga tsô yange nan de u eren msen shi ôron Bibilo shi zan mbamkombo shin duen kwaghpasen. Alaghga yange nan er akaabo kure kure er gumor u i ôr kwagh na ken Anzaakaa la nahan cii ve nan za mase eren isholibo ye.
11. Ka nyi i gbe u se palegh sha er se er isholibo ga?
11 Ka nyi se hen ken kwagh la? Gba u se palegh isholibo tseegh ga, kpa se palegh akaa a aa na se hingir u za eren isholibo la. Solomon yange tesen ikyav sha kwagh u gumor man idyakwase la yô, shi ôr wang er i gbe u se palegh akaa a aa na se hingir u za eren isholibo yô. Yange ôr kwagh u kwase la kaa ér: “De kera kahan zaan sha igbenda na ga.” (Anz. 7:25) Shi yange kaa ér: “Kporom a gbenda wou ca a nan, de kporom hen hunda u ya u nan kpaa ga.” (Anz. 5:3, 8) Ka se kura iyol yase sha u tilen ica a nyityôkwagh i ia na se hingir u za eren isholibo cii. b Kwagh ne tese ér gba u se palegh akaa agen aa a lu a bo ga, aa Orkristu nana fatyô u eren, kpa aluer se er a ve aa na se hingir u za eren isholibo la.—Mat. 5:29, 30.
12. Ka nyi Yobu yange kange ishima u erene, man kwagh la wase un u palegh imeen nena? (Yobu 31:1)
12 Aluer se tsua akaa sha inja yô, kwagh la una wase se u palegh akaa a aa na ve se hingir u za eren isholibo la. Ka kwagh u Yobu yange er je la. Yange “ya ikyur a ashe [na]” ér mayange una kenger kwase ugen sha u tômon ér una er idya a nan ga. (Ôr Yobu 31:1.) Er yange kange ishima wener una kenger kwase ugen ga yô, kwagh la wase un u palegh imeen i eren idya. Se kpa gba u se kange ishima ser se palegh nyityôkwagh i ia na se hingir u za gban ken imeen cii.
13. Er nan ve i gbe u se kura mbamhen aseve? (Shi nenge ufoto kpaa.)
13 Gba u se kura mbamhen asev kpaa. (Eks. 20:17) Mbagenev nenge ér aluer mba henen akaabo ken ishima kpa ve er akaa shon kpôô kpôô ga yô, zayol ngu sha mi ga. Kpa mhen la ka u shami ga. Aluer or ngu henen sha akaabo gbem yô, kwagh la una na nana soo u eren kwagh u nan lu henen sha mi la. Aluer nan zer henen akaabo ken ishima i nan gbem yô, a hemba taver nan u palegh imeen cii. Jighilii yô, alaghga ashighe agen mbamhen mbabov vea va se ken ishima. Kpa aluer ka nahan yô, kwagh u vesen u i gbe u se er yô ka u vendan u eren kwagh u bo la geman eren kwagh u dedoo. Aluer se er nahan yô, se lumun ser mbamhen mbabov ve ya tor ken a vese ga nahan kwagh la una wase se u palegh isholibo i vesen.—Fil. 4:8; Kol. 3:2; Yak. 1:13-15.
Gba u se palegh u eren akaa a alaghga a na se gba ken imeen la (Nenge ikyumhiange i sha 13)
14. Ka nyi igen kpa ia wase se ve se gba ken imeen ga?
14 Ka nyi igen kpa i gbe u se er sha er se kura ayol ase ve se gba ken imeen ga? Gba u se fa ser aluer se mba kuran atindi a Yehova yô, se zua a mtsera hanma shighe cii. Ashighe agen a gba u se nôngo kpoghuloo ve se lu a mhen u vough shi se er kwagh er Yehova a soo la ye. Kpa aluer se er nahan yô, a saan se iyol sha mimi.
15. Aluer se mba a asaren a vough yô, kwagh la una wase se u hemban imeen nena?
15 Gba u asaren a ase a lu a vough. Aluer se ‘kôr kwaghbo ihyom man kwagh u dedoo gema doo se ishima’ yô, kwagh la una na se kange ishima u eren kwagh u vough shi se palegh akaa a aa na se hingir u za eren isholibo la cii. (Amo. 5:15) Shi asaren a vough a wase se u hemban imeen shighe u se va nyôr ken ma mlu ugen kpoo man se tagher a imeen i se hen ser se tagher a mi ga yô.
16. Ka sea eren akaa ken mcivir u Yehova yô, kwagh la a wase se u lun tsevaa shi kuran nena?
16 Se er nan ve se lu a asaren a vough? Se er kwagh ne sha u eren akaa a a na Yehova una seer doon se ishima yô. Ka sea zaan mbamkombo shi sea duen kwaghpasen yô, se taver isharen yase i eren ishima i Yehova la, nahan i hemba saren se u eren kwagh u vough a u eren isholibo. (Mat. 28:19, 20; Heb. 10:24, 25) Ka sea ôron Mkaanem ma Aôndo shi sea henen sha mi yô, se hemba lun a isharen i eren kwagh u dedoo, geman kôron kwaghbo ihyom. (Yos. 1:8; Ps. 1:2, 3; 119:97, 101) Umbur, Yesu yange kaa a mbahenen nav ér: “Eren nen msen hanma shighe, sha er ne gba ken imeen ga yô.” (Mat. 26:41) Ka sea eren msen hen Ter wase u sha la hanma shighe yô, a wase se shi se seer kangen ishima u eren kwagh u a soo yô.—Yak. 4:8.
Ka sea eren akaa ken mcivir u Yehova yô, kwagh la a wase se u palegh imeen (Nenge ikyumhiange i sha 16) c
ZA HEMEN U KURAN
17. Ka myen u nyi Peteru yange nôngo a mi shighe gôgônana?
17 Alaghga se fatyô u hemban mbamyen asev mbagenev vindi vindi. Kpa alaghga se za hemen u nôngon a mbamyen mbagenev her. Nenge ase kwagh u yange er apostoli Peteru yô. Yange lu cian ior nahan nyiman Yesu kwa tar. (Mat. 26:69-75) Shighe kar yô, Peteru pase kwagh u Yesu sha ishigh ki Mkohol u Mbaajiriv vangertiôr nahan lu inja er a hemba mciem nam mara nahan. (Aer. 5:27-29) Kpa anyom nga kar yô, Peteru de u yan kwagh vea Mbakristu mba ve lu Mbayuda ga la, sha ci u lu henen ér Mbakristu mba ve lu Mbayuda la vea lu kenger un dang. (Gal. 2:11, 12) Mciem ma Peteru mara yange ma hide her. Man alaghga yange lu sha ci u lu a hemba mciem nam mara vindi vindi ga.
18. Aluer yange se de aeren agen a bo kpa, ka nyi alaghga ia ere?
18 Se kpa alaghga se hide se er akaa a yange se nôngo se de u eren la, er Peteru nahan. Ikyav i tesen yô, anmgbian ugen kaa ér: “Yange m de u nengen ufoto mba ijimbagh je kuma anyom anyiin nahan, maa m hen mer m de a de u nengen ufoto mba ijimbagh je. Kpa myen ne lu ken mo her, lu keghen ér ian i gba sha er una hide a due yô, maa va lu nahan.” Kpa kwagh er doo yô, anmgbian ne gba uwer u nôngon a myen na ne ga. Yange kav er i gbe kpee u una nôngon a ieren na i ijimbagh ne hanma iyange yô, man alaghga una er kwagh ne zan zan ken ayange a uma na cii. Anmgbian ne yange kange ishima wener una de u nengen ufoto mba ijimbagh, nahan kwase na kua mbatamen mba ken tiônnongo na kpa seer wasen un u den ieren ne.
19. Se er nan ve se hemba ieren i bo i se lu nôngo ser se dugh ken a vese kera laa?
19 Ka nyi se er ve ieren i bo i se lu nôngo ser se dugh i ken a vese la ia na se er kwaghbo ga? Ka u dondon kwagh u Yesu yange wa sha kwagh u imeen la. A kaa ér: “Kuran nen.” Shighe u u lu a tagher a imeen ga la je kpa, nôngo palegh akaa a aa na u za gba ken imeen la. (1 Kor. 10:12) Za hemen u eren akaa a u vanden eren sha u palegh imeen la. Anzaakaa 28:14 kaa ér: “Á saan or u nan cie TER gbem la iyol.”—2 Pet. 3:14.
ALUER SE MBA KURAN YÔ SE ZUA A MTSERA
20-21. (a) Ka averen a nyi se zua a mi aluer se za hemen u kurana? (b) Aluer se nôngo sha afatyô wase u palegh imeen yô, Yehova una wase se nena? (2 Mbakorinte 4:7)
20 Se fatyô u lun a vangertiôr ser ka sea kuran sha er se gba ken imeen ga yô, kwagh la a va se a averen kpishi. Ka sea er isholibo yô, alaghga se zua a msaanyol u a “lun gbem ga la,” kpa ka sea ungwan imo i Yehova yô i saan se iyol gbem. (Heb. 11:25; Ps. 19:8) Sha ci u a gba se ér se eren kwagh er a tese se la. (Gen. 1:27) Aluer se mba ungwan imo i Yehova yô, se lu a imoshima i wang shi se va zua a uma u tsôron kpaa.—1 Tim. 6:12; 2 Tim. 1:3; Yuda 20, 21.
21 Ka mimi, se yina. Kpa kwagh ne ka u tesen ér se fatyô u nôngon a mbamyen asev ga ze. Yehova kegh a kegh iyol u wasen se. (Ôr 2 Mbakorinte 4:7.) Fa wer, ka agee a a gande a orumace la Aôndo a ne se ye. Kpa gba u se er kwagh u se fetyô la cii u hendan a imeen. Aluer se er ci wase yô, se lu a vangertiôr ser Yehova una na se agee a kwagh a gbe se a mi la sha shighe vough. (1 Kor. 10:13) Sha iwasen i Yehova yô, se za hemen u kuran sha er se gba ken imeen ga yô.
ICAM 47 Eren Msen hen Yehova Hanma Sev
a ASEMBER A I TE IWANGER SHA MI YÔ: “Jijingi” u i ter kwagh na ken Mateu 26:41 la ka tahav mbu mbu lu ken a vese mbu ka mbu na ve se er kwagh gbenda u se er kwagh shon la. Ishember i “iyol” la di ngi ôron kwagh u myen wase. Nahan ashighe agen ka se soo u eren kwagh u vough, kpa aluer se wa ikyo ga yô se gba ken imeen maa se hingir u eren kwagh u Bibilo i kaa ér ka u bo la.
b Or u nan er isholibo i vesen yô, nana fatyô u zuan a iwasen ken takeda u Lu Uma Gbem! la, ityough 57 ityôkwagh i sha 1-3 man ken ngeren u a lu a itinekwagh ér “‘Nengen sha Hemen Jighilii’ sha Mlu u ken Hemen La” ken Iyoukura i Novemba 2020, peeji 27-29, ikyumhiange i sha 12-17 la.
c NGEREN U PASEN FOTO: Anmgbian ugen ngu ôron ivur i sha iyange pepe, ngu ôron Bibilo shighe u a ze ahumbe yô, maa a va za mkombo u ken atô u kasua la aikighe.
