Mbampin Mba Mbaôron Takerada Ne Ve Pin La
Orgen u lu a korough ku inki ku orngeren la, man iorov ataratar mba ve lu a ikyav mbi uitya, mba i er kwagh ve ken mpase u sha mnenge u Esekiel la, tile sha ityough ki nyi?
Ve tile sha ityough ki akumauitya a sha, a yange tim Yerusalem shi aa va tim botar u Satan ne sha Armagedon la. Mkav wase u i hidi i ser ne ka u vough sha ci u nyi?
Yehova yange tese Esekiel mpase u sha mnenge u akaa a a er ken Yerusalem cii ve a mase timin un yô. Yange tese un mpase ne cii man inyom i 607, shighe u Yesu lu a va shin tar ga la. Ken mpase la, Esekiel nenge akaabo kpishi lu eren ken gar la. A nenge a iorov ataratar mba ve lu a ikyav mbi uitya yô. Shi yange nenge orgen ken ior mbara “cir akondo a pupuu iyol” shi lu a “korough ku inki ku orngeren.” (Esek. 8:6-12; 9:2, 3) Yange i kaa a or ne ér: “Za kar ken atô u gar, . . . ver ikyav sha atsul a ior mba ve lu a asema a shirin man ve vaa sha ci u akaa a ndôhôrshima a i eren ken [gar] la cii.” Tsô i kaa a ior mba ve lu a ikyav mbi uitya la ér ve wua mba ve lu a ikyav sha atsul a ve ga la cii kera. (Esek. 9:4-7) Mpase u sha mnenge ne tese se nyi, man ka an nan lu or u a lu a korough ku inki ku orngeren laa?
Yange i ôr kwaghôron u profeti ne ken inyom i 612, cii man shighe u Yesu la, shi kwaghôron u profeti ne hii kuren shighe u akumauitya a Babilon va ta ityav sha Yerusalem la. Lu u anyom ataan a a karen yô, a tim Yerusalem. Er yange i na Mbababilon mba ve fa Aôndo ga la ian i timin Yerusalem nahan kpa, lu Yehova de ve ér er nahan ye. (Yer. 25:9, 15-18) Yange de ve ér ve tim Yerusalem sha ci u soo u tsahan ior nav mba ve venda mimi la. Nahan kpa, lu u vea wua ior côugh côugh ga. Lu u vea tim mbaperapera vea mbaaferev imôngo ga. Yehova yange due a gbenda u doon tsung u yiman Mbayuda mba ve venda u eren akaa a ndôhôrshima a i lu eren ken gar shon la.
Esekiel yange lu uwegh sha tom u veren ior ikyav sha atsul a ve shin timin gar u Yerusalem ga. Kpa lu mbatyomov hemen sha u van a mtim ne ye. Nahan kwaghôron u profeti ne wase se u tan ashe nengen kwagh u yange za hemen sha la. Yehova yange na mbatyomov nav tom u nengen ér i tim aferaior ken Yerusalem kera, shi i pav mbaperapera i ver kposo sha u waren ve. *
Ayange a karen ken ijime la, se tese er mpase u sha mnenge ne a kur sha ayange a ase ne la ser, or u a lu a korough ku inki ku orngeren la, tile sha ityough ki asande a mba i shigh ve mkurem, mba ve shi shin tar la. Yange se hen ser mba ka a pase ve loho u dedoo ve ve ungwa la cii, mba veren ve ikyav sha atsul a ve hegen. Nahan kpa, ken anyom a a sember karen ne, se seer zuan a iwanger sha kwagh ne, nahan gba u se hide se sôr mkav wase ne. Kwagh u i er ken Mateu 25:31-33 la tese ér, ka Yesu una er tom u ôron ior ijir la ye. Una ôr ior ijir i masetyô sha shighe u zegecan la, una pav mba ve lu er iyôngo, mba vea war la, una ver ve kposo a mba ve lu er ivo, mba a tim ve kera la.
Nahan, ka nyi se hen ken mpase u sha mnenge u Esekiel laa? Ka akaa ataan a se hen ker je ne:
-
Hii shighe u akaa er zan zan i va kar timin Yerusalem kera la, Esekiel man Yeremia yange ve er tom u orkuran, vough er Yesaia yange vande eren nahan. Nyian ne, Yehova ngu eren tom a annongo u kpuaa u mbacivir un mba i shigh ve mkurem la sha u koson ior nav shi tan mbagenev icin cii ve zegecan la una va ye. Jighilii yô, Mbakristu mba ve lu ya la cii, mba eren tom u tan ior icin ne.—Mat. 24:45-47.
-
Er Esekiel yange lu uwegh sha tom u veren ior ikyav sha atsul ga nahan, kape ior mba Aôndo Mpa. 14:6.
kpa ve lu veren ior ikyav sha atsul nyian ga je la. Mba pasen ior kwagh shi tan ve icin sha kwagh u una va er ken hemen la tseegh tsô. Ka mbatyomov ve lu wasen u eren tom u pasen kwagh u i lu eren sha tar cii ne ye.— -
Sha ayange a Esekiel la, i ver or môm ikyav sha icul kpôô kpôô ga. Nyian kpa kape i lu vough je la. Kpa gema ka nyi i gbe u ior vea er ve a ver ve ikyav i myom i sha injakwagh laa? Gba u vea ungwa loho u i lu pasen ne, shi vea lu a aeren a Orkristu shi vea tsegha ayol a ve sha ci u Yehova shi vea sue anmgbianev mba Kristu sha mimi. (Mat. 25:35-40) Mba vea er akaa ne la cii, vea zua a ikyav i myom sha shighe u zegecan u a lu van la.
-
Sha ayange ase ne kpa, or u lu a korough ku inki ku orngeren la, tile sha ityough ki Yesu Kristu u a lu veren mba vea va war ikyav sha atsul la. Mba ve lu zegeikpelaior la vea va ngohol ikyav ve zum u a ôr ve ijir, a kaa ér mba iyôngo, sha shighe u zegecan la. Kwagh ne una bugh ve gbenda u zuan a uma u tsôron shin tar ne.—Mat. 25:34, 46. *
-
Sha ayange ase ne kpa, iorov ataratar mba ve lu a ikyav mbi uitya la tile sha ityough ki akumauitya a sha, aa Yeus a lu orhenmen la. Ica a gba ga tsô, vea tim akuraior man ifer cii kera.—Esek. 9:2, 6, 7; Mpa. 19:11-21.
Aluer se kav akaainjaa a se hen ne yô, se lu a vangertiôr ser Yehova una tim mbaperapera vea mbaaferev imôngo ga. (2 Pet. 2:9; 3:9) Shi kwagh ne umbur se er i gbe hange hange u se er tom u pasen kwagh la nyian yô. Gba u hanma or nana ungwa icintan la cii ve mkur una kuma ye!—Mat. 24:14.
^ par. 6 Yange i war ior er Baruki (akawe u Yeremia) man Ebedimeleki u lu Oretiopia la, kua Mbarekabi nahan, shin er i ver ikyav sha atsul a ve ga nahan kpaa. (Yer. 35:1-19; 39:15-18; 45:1-5) Lu ikyav i myom i sha injakwagh i ver ve ye.