Ú ôr mbamgber mba Iyoukura mba i sember duen a mi la vighe vighe kpa? Yô, nenge ase wea fatyô u nan mbamlumun sha mbampin mban yô:

Ka akaa a hange hange a nyi mbamaren vea fatyô u eren sha u vea tsaase mbayev vev mba ve lu hian a hia la ve civir Yehova?

Gba hange hange u mbamaren vea soo mbayev vev mba ve lu hian a hia la shi vea ver ve ikyav i hiden a iyol ijime. Shi gba hange hange u mbamaren vea lu a kwaghfan shi vea kav mlu u mbayev vev la.—w15 11/15, peeji 9-11.

Ka akaa a nyi i gbe u se gbidye kwar sha mi cii ve se mase ôron kwagha?

Aluer se soo u eren tom a nombor wase sha inja yô, gba u se umbur akaa ne. Akaa shon yô, ka: (1) shighe u lamen (Orpa. 3:7), (2) kwagh u u ôr yô (Anz. 12:18), man (3) er u ôr kwagh yô (Anz. 25:15) —w15 12/15, peeji 19-22.

Ka igbenda igen i mimi ga i nyi i gbe u Mbakristu vea paleghaa?

Mbakristu mba mimi ka ve palegh aie man u eren angereke sha mbagenev. Mba ôron akaa a a vihi mbagenev iti ga, shi ka ve palegh anyighe shin iv. —wp16.02, peeji 10.

Doo u se eren kwagh a or u nan ye bredi shi nan me wain sha shighe u umbur ku u Yesu la nena?

Mbakristu mba kenden a mba ve ye bredi shi ve me wain sha shighe u umbur ku u Yesu la sha ga. Or u i shigh nan mkurem sha mimi la kpa, nan keren ér i kende a nan sha ga, shi nan pasen mbagenev ér i shighe nan mkurem ér nana yem sha kpaa ga. (Mat. 23:8-12)​—w16.01, pp. 23-24.

Se fatyô u henen nyi sha gbenda u Aberaham yange hingir ijende i Aôndo laa?

Aberaham yange hen kwagh u Aôndo, man alaghga zua a mfe ne hen Shem. Shi Aberaham yange zua a mfe sha gbenda u Aôndo lu eren kwagh a na man tsombor na la. Se kpa se fatyô u eren nahan.​—w16.02, pp. 9-10.

Satan yange tôô Yesu yem a na ken tempel kpôô kpôô sha u za meen unu?

Se fa jighilii ga. Alaghga kwagh u i er ken Mateu 4:5 man Luka 4:9 la tese ér, yange Satan tôô Yesu za a na ken tempel la ken mpase u sha mnenge gayô yange Yesu tile sha ma ijiir igen i hemban taven ken kpoyou u tempel la.​—w16.03, pp. 31-32 .

Ka sha nyi igbenda nahan kwaghpasen wase una fatyô u lun er avure nahana?

Avure nga a gba kure kure shi nga a kundu iyol shi ka kwagh u hange hange ken uma. Avure ka iveren i Yehova. (Dut. 33:13) Kape tom u pasen kwagh u ior mba Aôndo ve eren imôngo la kpa u lu vough je la.​—w16.04, p. 4.