NGEREN U TIMEN SHA MI 26
“Hide Nen Her a Mo”
“Hide nen her a Mo, Mo kpaa Me hide her a ven”—MAL. 3:7.
ICAM 102 “Wase Mba Ve Taver Ga La”
KWAGH U I TIM SHA MI KEN NGEREN NE YÔ *
1. Zum u or u yange nan va de u civir Yehova nan hidi hen a na yô, ka i lu un nena?
ER YANGE se hen ken ngeren u ken kasua u a kar la nahan, Yehova tôô iyol na kar sha orkuranilev u dedoo u a nengen sha iyôngo na doo doo yô. Shi ngu a ker hanma iyôngo na i i tsum i undu ikyumile cii. Yehova yange kaa a Mbaiserael mba ve undu un la ér: “Hide nen her a mo, mo kpaa me hide her a ven.” Sha nahan yô, se fa tsô ser nyian kpa kape a soo ér i lu je la sha ci u a kaa ér: “M gem kposo ga.” (Mal. 3:6, 7) Yesu yange kaa ér Yehova man mbatyomov ka ve ember tsung zum u or u civir Aôndo u yange nan tsume la nan hidi hen a na yô.—Luka 15:10, 32.
2. Ka nyi se lu timen sha mi ken ngeren nee?
2 De se time sha anzaakaa atar a Yesu ôr a tesen er i doo u a wase mba ve de u civir Yehova mbara yô. Shi se time sha aeren a i doo u se lu a mi ve se wase iyôngo i i tsum la u hiden hen Aôndo yô. Se hen se fa er u wasen mba ve tsum la u hiden hen a na ngu a va a msaanyol yô.
A KER DERAKEMA U SAA LA
3-4. Er nan ve kwase u i er kwagh na ken Luka 15:8-10 la yange kpe iyol ker derakema na u saa laa?
3 Gba u se nôngo kpoghuloo se ker mba ve soo u hiden hen Yehova la. Yesu yange ôr injakwagh igen u tesen er kwase ugen yange ker kwagh u injaa u saa un yô. I nger injakwagh la ken Ivangeli i Luka. Kwagh u saa kwase ne la lu gbenger derakema. Kwagh u vesen u injakwagh ne i tese se yô, ka gbenda u kwase la ker kwagh u saa un ne sha gbashima la.—Ôr Luka 15:8-10.
4 Yesu ôr er yange saan kwase la iyol zum u a zua a derakema na u saa la yô. Sha ayange a Yesu la, yange wankwase u ken Mbayuda nana yemen nom yô, shighe gen ngô u nan a na nan uderakema pue. Alaghga tsô derakema u saa kwase ne la lu môm ken ve. Kwase ti tôô ér a gba hen tembeyoughough. Nahan a tsar imenger na a jinge, kpa a nenge a kwagh ga. Alaghga imenger na la wanger kuma u una nenge a derakema u ndahar ne ga. Nahan kwase la ese iyou na vindi vindi. Kohol inyarev mbi ese iyou na la cii yô, a nenge a derakema na u doon un la er iwanger i imenger ta za kôr sha mi yô. Yange ishima ia gba un shimi kpen kpen je! Tsô a yila akar a na man mbawanndor a na a ôr ve loho u dedoo la.
5. Er nan ve alaghga a lu ican kpishi u zuan a mba ve undu tiônnongo laa?
5 Er se hen ken injakwagh i Yesu la nahan, ka i gba u se nôngo kwagh kpoghuloo ve se ker kwagh u a saa se la ye. Sha nahan yô, gba u se er tom kpoghuloo u keren mba ve undu tiônnongo la. Alaghga ve undu tiônnongo hegen anyom kar. Shin alaghga je yô, ve yem hen haregh u anmgbianev mba her ve fe ve ga yô. Nahan kpa hegen ne, anmgbianev mbagen mba ve de u van mbamkombo shin duen kwaghpasen ne soo u hiden hen Yehova. Ve soo u hiden va civir Yehova vea tsombor Na; ka ior nav mba ve civir un sha mimi je la; nahan kpa a gba u se wase ve.
6. Mba ken tiônnongo cii vea wase u keren mba ve de u civir Yehova la nena?
6 Ka unô vea fatyô u wasen tom u keren mba ve de u van mbamkombo gayô pasen kwagh laa? Se cii ka tom wase. Sea lu mbatamen shin upania shin ior mba hen tsombor shin mbapasenkwagh ken tiônnongo kpa, se fatyô u wasen u keren ve. U ngu a ma ijende shin or u hen tsombor u nan de u pasen kwagh shin van mbamkombo yôô? I lu nahan u due kwaghpasen maa u za zua a or u nan de u zan mbamkombo shi pasen kwagh yôô? Aluer u zua a imbaor la yô, lam a nan shi pine nan aluer nan soo ér i va sôr nan yô; shi pine nan aluer nan soo ér u za na mbatamen namba kua adereshi u nan kpaa yô.
7. Ka nyi u hen ken mkaanem ma ortamen u i yer iti na ér Thomas laa?
7 Ka nyi i gbe u mbatamen vea er sha u wasen mba ve soo u hiden hen Yehova laa? Nenge kwagh u ortamen ugen ken tar u Ishpania u i yer iti na ér Thomas * a er yô. Anmgbian ne wase Mbashiada mba hemban 40 nahan u hiden hen Yehova. Thomas kaa ér: “Ka m hii pinen anmgbianev mba nomso man mbakasev aluer ve fa ape or u nan mem u civir Yehova nan lu yô. Gayô, m pine mbapasenkwagh aluer ve umbur ma or u nan de u van mbamkombo yô. Mbagen ken tiônnongo ka ve kegh a kegh iyol u wasen shi i doo ve kpaa sha ci u ka ve nenge je ér ve kpa mba uwegh ken tom ne. Nahan ka mea za sôron ma anmgbian u nomso shin u kwase u nan mem u civir Yehova yô, m pine nan kwagh u mbayev mba nan kua anmgbianev mba nan mba hen tsombor. Mbagen mba ve de u civir Yehova ne, ngise ve va mbamkombo a mbayev vev shi alaghga je yô, mbayev vev mban lu mbapasenkwagh. Ve kpa gba u a wase ve, ve hide hen Yehova.”
HIDE A MBAYEV MBA YEHOVA MBA VE SAA LA KEN TIÔNNONGO
8. Ter u ken injakwagh i wan u saa i ken Luka 15:17-24 la, yange er a wan na u gema ishima la nena?
8 Ka aeren a nyi nahan i gbe u se lu a mi keng ve se kôrcio u wasen mba ve soo u hiden hen Yehova laa? Ver ishima nenge ase akaa a se fatyô u henen ken injakwagh i Yesu yange ôr sha kwagh u wan u due hen ya yem kwagh na la. (Ôr Luka 15:17-24.) Yesu yange pase er ken masejime yô, wan la za kav ibumegh nagh nahan cin hide hen ya yô. Ter na yange kar ayem za kuve wan na, u tesen un je ér a doo un ishima. Wan la yange nenge a ibo na kpishi, nahan nenge ér un kera kuma u a yila un ér wan kpaa ga. Nahan mhôônom kôr ter u wan ne a na tsung, sha ci u pase ter na er ishima lu un ker la. Ter ne maa er kwagh u tesen wan ne er un ngohol un ér a lu or u eren un tom ga kpa una lu wan na jim jim yô. U tesen er wan na ne a doo un ishima shi un ngohol un yô, a er iniongo shi a haa wan na u gema ishima ne akondo a doon tsung.
9. Ka aeren a nyi nahan i gbe hange hange u se lu a mi cii ve se kôrcio u wasen mba ve mem u civir Yehova la u hiden hen a na? (Nenge ngeren u kiriki u a lu a itinekwagh ér “ Er Se Wase Mba Ve Soo u Hiden hen Yehova Yô”) la.
9 Yehova ngu er ter u ken injakwagh la nahan. Anmgbianev asev mba nomso man mba kasev mba ve mem u civir un kpa ve soo u hiden hen a na la doo un ishima tsung. Nahan doo u se dondo ikyav i Yehova la, se wase ve ve hide. Sha nahan yô, a gba u se waan ishima shi kunya ua kôron se a ve shi se tesen ve ser ve doo se ishima. Er nan ve i gbe u se lu a aeren ne keng keng-ne, man se er kwagh ne nena?
10. Hii nan i gbe u se waan ishima shighe u se lu nôngon ser se wase or nana hide hen Yehova?
10 A gba u se waan ishima sha ci u ka i tôô or shighe u hiden sôron mlu u nan vea Yehova. Mbagenev kpishi mba yange ve va mem u civir Yehova yô, kaa nahan ér yange mbatamen za ve inya kwa kimbir kimbir shi mbagen ken tiônnongo kpa za sôr ve acin imôngo cii je ve ishima tsuwe ve ker u hiden ye. Anmgbian u kwase ugen u ken Ashia, u i yer iti na ér Nancy yô kaa ér: “Ijende yam i kôôsôô i ken tiônnongo yange i wasem kpen kpen. Yange soom vough er ngu anngôm u vesen nahan. Yange a shi umbur mo akaa a ngise se eren ken tiônnongo imôngo a nan se msaanyol la. Shi mea ôron er ishima i lum ker yô, a wa ishima a kegh ato a ungwa hanma kwagh shi a wam kwagh kpaa. Lum ijende i mimi shi a kegh a kegh iyol u wasem mo sha hanma shighe cii.”
11. Er nan ve i gbe u mhôônom ma a kôron se a mba ishima i lu vihin ve laa?
11 Aluer kunya ngu kôron se a or yô, kwagh la kpa una lu nan er ka icigh nahan. Ishima ka ia vihi or yô, kwagh la a nyoon nan tsung er ka ivav nahan. Mbagen yange or hii ve nahan kwagh la na ve mem u icivir Yehova shi zan zan nyian kpa ishima ngi vihin ve sha kwagh shon her. Kwagh la na yô, mba fantyô u lun a isharen i hiden hen Yehova ga. Mbagen di yô, alaghga vea nenge ér yange i er kwagh a ve doo ga. Ambaaior la nahan a gba u or a kegh ato a ve zulee shi nana kav er ishima i lu ve ker la. (Yak. 1:19) Kwase ugen u mem u civir Yehova, kpa a hidi hegen yô, mba yer iti na ér María. A kaa ér: “Yange m soo mer or ma nan shi kegh ato a mo shi ma nan surum ishima shi m soo mer ma i wem kwagh u injaa shi ma i wasem.”
12. Dooshima u Yehova ngu er kor nahan nena?
12 Bibilo pase er ior mba Yehova ve doo un ishima tsung yô. I tôô dooshima la i kar sha kor. Dooshima u Aôndo la ngu er kor nahan nena? Nenge ase ikyav ne: Tôô ase wer u gba shin ihungwa i i ze kpishi yô. Er ihungwa la i ze yum yô, ka kwagh u u fatyô u duen ga. Gba u saa or a kende u kor ve a fatyô u urugh we duen a mi ye. Yehova yange ôr kwagh u Mbaiserael mba ve undu un la ér: “M urugh ve . . . sha ikangenev mbi dooshima.” (Hos. 11:4) Nyian kpa kape i lu Yehova ken ishima a mba ve de u civir un mba ve lu tagher a mbamzeyol kua ishimanyian je la. A soo ér ve fa nahan ér ve doo un ishima shi un soo u urugh ve hiden a mi hen a na. Sha nahan yô, Yehova una fatyô u eren tom a we u tesen ve er ve doo un ishima yô.
13. Kwagh u er Pablo la tese ér aluer se er a mba ve undu Yehova la sha dooshima yô, kwagh la una wase ve u hiden hen a na nena?
13 Gba hange hange u se pase mba ve de u civir Yehova la ve kav er ve doo un ishima shi se kpa ve doo se ishima yô. Pablo u yange i ôr kwagh na ken ngeren u kasua u a kar la, yange de u civir Yehova je hemba anyom 30. A kaa ér: “Iyange igen la pepe nahan, m gbe duen hen ya yô, anmgbian u kwase u beenyol ugen zua a mo. Yange fa kwagh kpishi shi lam a mo kundu kundu. Maa m hii u vaan er m ngu anye nahan. M kaa a na mer kam er ka Yehova je a tindi un ér a va lam a mo nahan. Ka hen shighe la m kure ikyaa mer me hide hen Yehova ye.”
WASEN MBA VE VER LA SHA DOOSHIMA
14. Er i ôr ken injakwagh i ken Luka 15:4, 5 la nahan, orkuranilev la yange zough a iyôngo na yô, a er nena?
14 Zum u se zough a or u nan mem u civir Yehova yô, gba u se za hemen u wasen nan shi taver nan ishima. Alaghga vea tagher a akaa a nyoon ve ken vanger tsung er wan u ken injakwagh i Yesu ôr la nahan. Shi alaghga shighe a kar cii ve a wa lun ve ken ishima kposo ye. Sha nahan yô, ashighe agen vea vôr ken jijingi sha ci u akaa a yange ve tagher a mi ken tar u Satan la. A gba u se wase ve sha er vea seer taver jighjigh u ve ne Yehova la yô. Ken injakwagh i Yesu ôr sha kwagh iyôngo i i saa la, Yesu pase er orkuranilev la kôr iyôngo na penda sha akende, hide a mi hen ikyumuile yô. Orkuranilev la yange vande tôôn shighe shi vihi agee a na ker iyôngo i i saa la. Shi fa ér gba u una wase iyôngo la sha ci u i kera lu a tahav ga. Nahan a kôr i a hide a mi hen ikyumile la.—Ôr Luka 15:4, 5.
15. Se wase mba ve vôr ken jijingi mba ve soo u hiden hen Yehova la nena? (Nenge ngeren u kiriki u a lu a itinekwagh ér “ Ikyagh ki Tomough ki Injaa”) la.
15 A gba u se tôô shighe kua agee a ase se wase mba ve de u civir Yehova la ve hemba akaa a a lu yangen ve u hiden va civir un la. Nahan sha iwasen i jijingi u Yehova kua Mkaanem nam man ityakerada kua uvidio mba se zough a mi sha ikyev i nongo na la yô, se kôrcio u wasen ve u hiden yan ikyar a Yehova kôôsôô. (Rom. 15:1) Se er kwagh ne nena? Anmgbian ugen u a er tom u ortamen ica i gbe yô, kaa ér: “Mba ve mem u icivir Yehova kpishi ka vea va hide yô, i gba u a hide a hen Bibilo a ve.” * Aluer i kaa ér u hen kwagh a or u nan soo u hiden hen Yehova man u ngu sha ian i u fatyô yô, er tom la. Ka ian i civirigh kpen kpen. Ortamen la shi kaa ér, “Gba u orpasenkwagh u nan lu henen kwagh a or u nan soo u hiden hen Yehova la nana ya ijende a nan, sha er or la nana fatyô u nan nan jighjigh shi ôron nan hanma kwagh cii yô.”
A EMBER SHA MAN SHIN TAR CII
16. Er nan se fe ser mbatyomov kpa mba wasen se ken tom nee?
16 Akaa agen aa er yô, tese wang ér mbatyomov kpa ka ve eren tom u keren mba ve mem u civir Yehova man i sar ve tsung u hiden hen a na la vea vese imôngo. (Mpa. 14:6) Ikyav i tesen yô, orgen ken tar u Ecuador mba yer iti na ér Silvio. Yange er msen tsung ér Yehova ma a wase un ma un hide ken tiônnongo. Er lu eren msen zan a mi ave la je, maa imemegh ki sha hunda na gba gbidyen. Lu mbatamen uhar va hen ya na ye. Yange saan ve iyol kpishi sha ci u hen kwa shon je maa ve hii u wasen Silvio sha er una hide hen Yehova yô.
17. Aluer se wase ior mba ve mem u civir Yehova la u hiden hen a na nahan, a lu se nena?
17 Aluer se wase mba ve ver ken jijingi la ve hide hen Yehova yô, a saan se iyol kpishi. Nenge ase kwagh u anmgbian ugen u ngu a nôngo kpoghuloo u wasen mba ve mem u civir Yehova a ôr yô. Iti na ér Salvador shi ngu pania kpaa. A kaa ér: “Ashighe agen ka i saan mo iyol je m fa kwagh u me er ga tsô m gba vaan. Ka i doom kpishi er Yehova a yem iyôngo i i doo un ishima la sha ikyev i tar u Satan ne a hidi a mi ken tiônnongo nahan. Mo kpa ka i lum kwagh u civirigh kpishi u eren tom vea na imôngo.”—Aer. 20:35.
18. Aluer u mem u civir Yehova yô, ka nyi i doo u u fa?
18 Aluer u de u kohol a ior mba Yehova kpa, fa wer u doo un ishima her. A soo ér u hide hen a na. Sha nahan yô, a gba u we kpa u tôô angahar sha er u hide hen a na yô. Yehova ti ngu veren ashe gbenda keghen a kegh u ngohol we za hiden er ter u ken injakwagh i Yesu la nahan. A saan un iyol tsung u ngohol we za hiden hen ya.
ICAM 103 Mbakuran mba I Ne, Ve Lu Uiyua La
^ par. 5 Yehova soo ér mba ve de u pasen kwagh shi van mbamkombo la ve hide hen a na. Akaa nga kpishi a se fatyô u eren sha u taver mba ve undu tiônnongo la ishima u eren kwagh u Yehova a lu kaan a ve ér: “Hide nen her a mo” la. Se lu timen sha kwagh u se fatyô u eren sha u wasen ve u hiden hen Yehova la ken ngeren ne.
^ par. 7 I yila mbagenev ken ngeren ne sha ati a ve kpôô kpôô ga.
^ par. 15 A fatyô u wasen mbagen mba ve mem u civir Yehova la sha u henen mtom ma gen ken takerada u Lu Nen ken Dooshima U Aôndo la a ve, mbagen di i hen mtom ma ken takerada u Kporom hen Yehova la a ve nahan wase ve kpishi. Kômatii u Nengen sha Tomshiren ken Tiônnongo una tsua or u a nenge ér nana hen kwagh a or shon tsembelee la ér nana hen kwagh a nan.
^ par. 68 NGEREN U PASEN FOTO: Anmgbianev kposo kposo utar mba wasen anmgbian u a soo u hiden hen Yehova yô. Ve gba uwer u lamen a na ga, mba tesen un je ér a doo ve ishima, mba keghen ato a na shi nôngon ér vea kav er i lu un la kpaa.
