MBAISERAEL yange ve na inyaregh sha u suen mcivir u mimi, man lu kwagh ior eren anyom anyom yô. Nahan kpa, sha ayange a Yesu la i gba u Mbayuda vea taan ikpandev kpishi nahan i lu ve zange ga.

Yange i gba u Mbayuda mba ve lu nomso, mba hii anyom 20 yem hemen cii vea kimbin vegher shekel (shin uderakema uhar) sha u suen mcivir u mimi ken tabernakel shi shighe kar yô, ken tempel. Sha ayange a Yesu la, yange i tôô inyaregh ki ior ve te kpandegh la i yam akaa a nan nagh a mi shi i er tom a ki u nengen sha tempel u Herode maa la. Mbayuda mbagenev yange ve pine Peteru sha u vea fa aluer Yesu te kpandegh kura yô. Kpa Yesu kaa ér ka kwaghbo u tan kpandegh ga. Jighilii je yô, yange tese Peteru ape una za zua a gbenger azurfa sha er una ta kpandegh kura yô.—Mat. 17:24-27.

Sha ayange la, ior mba Aôndo taan kpandegh kugen kpaa, i yilan ku ér môm-ken-upue. Inja na yô, yange i gba u vea na môm-ken-upue u iyiav shin inyaregh vev. (Lev. 27:30-32; Num. 18:26-28) Mbahemenev mba kwaghaôndo yange ve kaa ér gba u ior vea taan kpandegh ku ikyayue kpaa, aluer ka “kunguraku man yiye kua kumin” je kpaa. Yesu yange kaa ér ka kwaghbo u nan môm-ken-upue ga, kpa gema puu ieren i mbangerenatindi man Mbafarishi lu wan atindi kpete kpete sha kwagh u môm-ken-upue la, sha ci u lu imanger.—Mat. 23:23.

Shighe la, Mbaroma lu hemen Mbayuda, nahan i gba u Mbayuda vea ta ve ikpandev kpishi. U tesen ikyav yô, yange or a lu a inya yô, i gba u nana taan kpandegh sha inya shon sha inyar gayô iyiav. Yange nana sunda iyiav her a kuma aba anyiin yô, i gba u nana dugh ibya i môm nana ta Mbaroma kpandegh. Shi yange i wa kpandegh kugen ku hanma Oryuda nan taan yô. Lu kpandegh ku Mbafarishi pine Yesu kwagh sha mi je ne. Yesu maa ôr kwagh u tesen er i doo u se nengen kpandegh ku tan yô. A kaa ér: “Na nen Shisar akaa a a lu a Shisar la, kpa akaa a a lu a Aôndo yô, na nen Aôndo.”—Mat. 22:15-22.

Shi yange i ta kpandegh sha ikyav mbi i lu nyôron a mi ken ma tar kua mbi i tee i lu duen yemen a mi ken tar ugen cii. Yange i ngohol kpandegh kun ape utso tilen man ape peren icar kua ape igbenda i vesen i zough yô, kua ajiir a nyôron ken ugeri shin ukasua cii.

Kpandegh ku ior mba ve lu sha ikyev i hemen u Mbaroma taan la, yange ku yuhwa kpishi. Ortimen sha kwagh u yiase ugen ken Roma u i yer un ér Tacitus yô kaa ér, shighe u Tor Tiberiu lu hemen Tartor u Roma sha ayange a Yesu lu shin tar la, “Ior i Shiria man Yudia za zamber ér i pande kpandegh ku i wa ve la, sha ci u ku ngee gande.”

Gbenda u yange i ngohol ikpandev mbin la lu kwagh u na ve mbi yuhwa je la. Yange i lu or u nan hembe nan inyaregh la, i na nan tom u ngohol kpandegh la ye. A naan ve tom ne yô, ve di shi ve tôô mbagenev tom u ngohol kpandegh kpôô kpôô la, man mba i ne ve tom la kua mba i hidi i tee ve tom u ngohol kpandegh kpôô kpôô la cii ve keren mtsera ve. Ikyav tese ér Sakiu kpa lu a ior mba ve ngohol kpandegh sha ci na yô. (Luka 19:1, 2) Lu kwagh u na ve yange ishima i vihi mba tan kpandegh, nahan ve kôr mbangoholkpandegh ihyom je la.