1. Ka akaa a nyi nahan ior kpishi ka ve cia?

 NENGE ase akaa a nyian ishima a mba Mbashiada mba Yehova mbagenev yange ve tagher a mi yô. Anmgbian ugen iti na ér Nestor, un vea kwase na María yange ve soo u za eren tom u pasen kwagh hen ape kwagh hemba gban sha mbapasenkwagh yô. * Nahan kpa, yange gba u vea hen u vihin inyaregh sha gbenda u aluer mba a inyaregh cuku kpa kia kuma ve yô, ve vea fatyô u za eren tom la ye. Kpa ve lu cian ér aluer ve mba a inyaregh cuku tseegh yô, vea za kpa alaghga a saan ve iyol a bee ga. Orgen iti na ér Biniam, yange hingir Orshiada u Yehova ken tar u i cir tom wase yô. Nahan nenge ér, er un lu ken nongoior u Aôndo yô, a fatyô u tôvon un a ican. Maa lu cian. Kpa kwagh u hemba cian cii yô, lu kwagh u aluer mba hen tsombor na va fa kwaghaôndo u a gem zan la ve, vea er la. Kwase ugen mba yer un ér Valérie, yange mbatwerev zua un a angev mbu kyansa i vihin kpishi. Nahan lu keren ortwer u nana wa ityesen i Bibilo i a ne jighjigh a mi la ikyo, nana pav un ipyaven a tan awambe ga la yô. Ka keng yange una lu cian ér alaghga angev mbura mbua wua un, er hanma or je kpa nana cia nahan.

2. Gba u se nôngo kpoghuloo se kera cia akaa a nyian ishima a se tagher a mi la sha ci u nyi?

² I gbe nahan u tagher a mbamzeyol mbara vee? Se mbagenev kpishi akaa la vande eren se. Aluer se hen u den mciem ga yô, kwagh la una na se tsua abumeakaa, a aa fatyô u vihin mlu wase vea Yehova je kpaa yô. Man ka kwagh u Satan a soo vough je la. Shi ka a nôngon ér una ta se mciem iyol se de kera dondon atindi a Yehova ga, kua tindi u a we se ér se pase loho u dedoo la  kpaa. (Mpa. 12:17) Satan wa ifer, shi zungwen mhôônom ga, shi ngu a tahav kpishi. Kpa u fatyô u palegh un. U er kwagh ne nena?

3. Ka nyi ia wase se ve se kera cia akaa a a nyian se ishima la ga?

³ Aluer se na jighjigh ser se doo Yehova ishima shi a ta ikyaa a vese yô, Satan una anger se ga. (Ps. 118:6) Ikyav i tesen yô, or u a nger Pasalmi 118 la yange tagher a akaa a zan un iyol kpishi. Lu a mbahyomov kpishi, man mbagenev lu ior mba tagher tagher je (ivur 9, 10). Ashighe agen yange i nzughul a na kpishi (ivur 13). Shi shighe ugen la Yehova tsaha un je zua ga (ivur 18). Nahan kpa, orpasalmi la taver ishima, wa icam kaa ér: “Me kera cia ga.” Ka nyi yange i na ve nenge ér kwagh u eren un ga yumu? Yange fa dedoo ér, shin er Yehova, Ter na u sha a tsaha un nahan kpa, un doo Yehova ishima kpishi. Orpasalmi ne na jighjigh ér, aluer un tagher a nyityô zayol kpa, Aôndo u un doo un ishima kpishi la kegh iyol u wasen un hanma shighe cii.—Ps. 118:29.

4. Aluer se na jighjigh ser se doo Aôndo ishima yô, ka nyi akaa nahan se kera cia ga?

⁴ Gba u hanma wase nana na jighjigh ér nan doo Yehova ishima. Aluer se na jighjigh nahan yô, kwagh la una wase se se kera cia akaa atar a ior kpishi ve cian ne ga; ka (1) u cian ser se fatyô u kuren ugbayol mba tsombor wase ga, man (2) u cian or, kua (3) u cian ku. Anmgbianev mba nomso man mba kasev mba se ter kwagh ve sha ikyumhiange i hiihii la cii, hanma ve yange nan kera cia zayol u nan tagher a mi la ga sha ci u nan na jighjigh ér nan doo Yehova ishima.

5. Ka mbamlu mba nyi nahan alaghga vea na ishima ia nyian ma orya kpishi? (Nenge foto u sha igbende.)

⁵ Orya u nan lu Orkristu yô, nan eren beer sha tom u nan u kuren u ugbayol mba tsombor la ga. (1 Tim. 5:8) Wea lu orya yô, alaghga tsô sha shighe u angev mbu Korona va la, ashe ver ikyôr a u va kera lu a tom ga. Adooga ishima lu nyian we er u va kanshio u koson tsombor wou shi kimbin ya shin injô i yange u gba u yam ya la nahan. Shi alaghga u ishima lu nyian we ér aluer i de u tom yô, u kera fatyô u zuan a tom ugen ga. Gayô, er Nestor vea María, mba se vande ôron kwagh ve la nahan, alaghga u lu henen wer u va lu a inyaregh cuku tseegh yô, u fatyô u nengen sha iyol you ga. Ior kpishi mba yange ve lu a imba mcie la yô, Satan er ve ve de u civir Yehova.

6. Satan ka a nôngon ér se na jighjigh ser nyi?

⁶ Satan ka a nôngon ér se na jighjigh ser se doo Yehova ishima ga shi una fatyô u wasen se u nengen sha tsombor wase kpaa ga. Kwagh ne una na yô, alaghga se hen ser gba u se er hanma kwagh u se fetyô la cii sha er a de se tom ga yô. Shi alaghga je yô, se hen ser gba u saa se er ma kwagh u una na se kera lu ijende i Aôndo ga yô.

7. Yesu kaa a vese wang ér nyi?

⁷ Yesu u a fe Ter a hembe hanma or cii la kaa a vese wang ér Aôndo wase ngu a “fa akaa a kwagh a gbe [se] a mi la, je [se] lu a sôn un ga.” (Mat. 6:8) Yesu fa er Yehova shi a kegh iyol u nan se akaa a kwagh a gbe se a mi la yô. Er se lu Mbakristu yô, se mba ken tsombor u Aôndo. Nahan se fatyô u nan jighjigh ser, er Yehova a lu Orya shin Orhemen u tsombor ne yô, kwagh u a ôr ken 1 Timoteu 5:8 ér mbayaav cii ve eren la, un kpa una er nahan vough.

8. (a) Ka nyi ia wase se ve se kera cia ser se kanshio u kuren ugbayol mba tsombor wase ga? (Mateu 6:31-33) (b) Se dondo ikyav i tsombor u u lu va nan anmgbian u kwase ugen kwaghyan ken foto la nena?

⁸ Aluer se na jighjigh ser se doo Yehova ishima shi tsombor wase kpa doo un ishima yô, se lu a jighjigh u nan ser se zua a akaa a kwagh a gbe se a mi la keng a bunde ga. (Or Mateu 6:31-33.) Yehova kegh iyol u nan se akaa a kwagh a gbe se a mi yô. Se doo un ishima, shi ne kwagh wuee! Shighe u gba tar la, yange na  se akaa a i gbe u se lu a mi sha er se za hemen u lun uma la tseegh tsô maa bee ga. Er se doo un ishima yô, yange gba akaa kpishi sha tar sha ci wase ér i saan se iyol. (Gen. 2:9) Alaghga ashighe agen ka se zua a inyaregh se kure ugbayol asev tseegh maa ki bee. Shighe u kwagh a lu nahan je kpa, se fatyô u umbur ser ka Yehova a ne ve se zua a kwagh u kwagh a gbe se a mi la ye. (Mat. 6:11) Gba u se umbur hanma shighe ser hanma kwagh u se de ser a kar se sha ci u Yehova yô, kwagh u Aôndo wase u se doo un ishima una na se la una hemba lun a inja a kwagh shon. Shi ken hemen yô, una na se uma u tsôron. Nestro vea María yange ve kav er i lu nahan mimi yô.—Yes. 65:21, 22.

9. Ka nyi u fatyô u henen ken ikyav i Nestor vea kwase na María laa?

⁹ Nestor vea kwase na María yange ve lu a ya u injaa, shi hanma ve lu eren tom u injaa ken tar u Colombia. Ve kaa ér, “Yange se soo ser se pande akaa a se lu a mi kpishi la, sha er se hemba zuan a shighe u eren tom wase u pasen kwagh la yô. Kpa se lu cian sha ci u se nenge ser aluer se mba a inyaregh cuku tseegh yô, a saan se iyol ga.” Ka nyi yange i wase ve kera cia ga? Yange ve hen sha igbenda kpishi i Yehova tese ve ér ve doo un ishima dooshima yô. Mba ne jighjigh ér Yehova una za hemen u nengen sha a ve hanma shighe cii yô, maa ve cii ve de ityom ve i i kimbin ve inyaregh kpishi la. Shi ve tee ya ve, maa ve mough ve yem vegher ugen ken tar ve, hen ijiir i kwagh hemba gban sha mbapasen kwagh u Tartor yô. Ve nenge kwagh u yange ve er la nena? Nestor kaa ér: “Se nenge ser kwagh u i ôr ken Mateu 6:33 la ka mimi. Shighe môm kpa akaa a iyolough ban se ga, shi hemba saan se iyol hegen cii.”

10. Er i hii ve uumace ve cian mbagenev la kpilighyol ga sha ci u nyi?

¹⁰ Hii sha shighe u Adam man Ifa hemba Yehova ato la je, uumace mba eren mbagenev akaabo zan zan nyian. (Orpa. 8:9) Ikyav i tesen yô, ior ka vea lu a tahav sha mbagenev yô, ve eren a ve sha inja ga; shi mbaaferev ka ve tswamen ior; mbayev mba hiin ayongo ken imakeranta ka ve tuhwan mbagenev ken kelase ve shi ve taan ve mciem iyol; shi ior mbagenev ka ve gbidye mba hen tsombor ve je kpaa, ve gber ve avav. Sha nahan yô, kpilighyol er i hii ve uumace ve cian mbagenev la ga! Er Satan a fe kwagh ne yô, ka a nôngon ér se cia or nena?

11-12. Satan ka a nôngon kpoghuloo ér se cia or nena?

¹¹ Satan ka a nôngon kpoghuloo ér se cia ior je se de u pasen kwagh shin eren akaa agen a  Yehova a kaa ér se er la. Satan ka a na mbahemenev mba gomoti ve cir tom wase u pasen kwagh la, shi ve tôv se a ican. (Luka 21:12; Mpa. 2:10) Shi ior kpishi ken tar u Satan ne ka ve ôron mbagenev akaa a tsumen a ve kua mbaaie sha kwagh u Mbashiada mba Yehova. Ior mba ve ne jighjigh a mbaaie mban yô, alaghga vea naha se tar shin vea ta num sha a vese je kpaa. (Mat. 10:36) Ayom a Satan ne kpiligh se iyolo? Mayange ga cii. Sha ci u sha ayange a mbaapostoli la kpa Satan lu eren ayom ne!—Aer. 5:27, 28, 40.

¹² Ka zayol u ugomoti ka ve hendan a vese la tseegh Satan ka nôngon ér se cia ga. Mbagenev yô, ka kwagh u aluer ve hingir Mbashiada mba Yehova ve, mba hen tsombor ve vea er la ka ve cian ye; ka ve cia kwagh la je i hemba hanma gbidiv cii. Amba ne ior vev mba hen tsombor ka ve doo ve ishima kpishi, nahan ve soo ér ve ker u fan Yehova shi Yehova a doo ve ishima. Nahan ka vea ungwa ior vev mbara vea gema vea lamen sha Aôndo u mimi la kua mbacivir un dang nahan, i nyoon ve je i zua ga. Nahan kpa, ashighe agen mba hen tsombor ve mba yange ve hendan a ve sha hiihii la ka ve va ngohol ityesen i mimi. Kpa aluer mba hen tsombor wase kera soo ér kwagh a zua se a ve ga sha ci u ityesen i he i se ne jighjigh a mi la di ye? Se er nena?

13. Aluer mba hen tsombor wase venda se, kpa se na jighjigh ser se doo Aôndo ishima yô, kwagh la una wase se nena? (Pasalmi 27:10)

¹³ Se fatyô u zuan a ishimasurun ken mkaanem ma doon ma i nger ken Pasalmi 27:10 la. (Ôr.) Aluer se mba umbur hanma shighe er se doo Yehova ishima kpishi la yô, se cia ma kwagh u una va er se ken hemen ga, aluer tsombor wase venda se je kpaa. Shi se lu a jighjigh u nan ser Yehova una na se injar sha ishimataver yase la. Yehova una na se hanma kwagh u i gbe u se lu a mi ve se za hemen u lun uma yô, kua kwagh u una wase se se taver ishima shi a saan se iyol, man kwagh u una wase se se za hemen u lun vea na kôôsôô yô! Orgen môm nana fatyô u nengen sha a vese tsembelee er Yehova nahan ga! Ka kwagh u Biniam u se vande teren kwagh na la kpa yange nenge a mi je la.

14. Ka nyi u fatyô u henen ken ikyav i Biniam laa?

¹⁴ Biniam yange hingir Orshiada u Yehova, shin er nenge gomoti lu tôvon Mbashiada mba Yehova a ican ken tar na kpoghuloo nahan kpaa. Nenge ase er yange fa er un doo Yehova ishima ve, kwagh la wase un kera cian or ga yô. A kaa ér, “Yange m hen mer gomoti una tôvom a ican sha gbenda u vihin kpishi nahan ga. Kpa kwagh u m lu hemban cian cii yô, m lu cian mer terem u civir Yehova nga la una fa ér mo m  hingir Orshiada u Yehova yô, a doo un ga, shi me kera lu a icivir hen tsombor wam ga.” Nahan kpa, Biniam na jighjigh ér Yehova nengen sha mba ve doo Un ishima la hanma shighe cii. A kaa ér: “Yange m hen sha igbenda i Yehova a vande wasen ior u taver ishima ken mbamlu kposo kposo yô. Mbagenev lu a inyaregh ga, mbagen di i soo kwagh ve ga, mbagenev lu mba ikpelaior mough ayôôso a ve yô. Yange m fa mer aluer m za hemen u civir Yehova sha mimi yô, una nam iveren. Lu shighe u i kôrom acin imôngo shi i gbidyem coholoo je kpaa la, m mase kaven er aluer se za hemen u civir Yehova sha mimi yô, una wase se kpishi shighe u kwagh a tser la ye.” Biniam yange nenge Yehova ér ngu Ter na kpôô kpôô, shi nenge nongoior u Yehova ér ka tsombor na kpôô kpôô.

15. Er nan ve se cii se cian ku?

¹⁵ Bibilo kaa ér ku ka orihyom. (1 Kor. 15:25, 26) Shighe u se iyol yase shin ma or wase nan gbe angev yô, alaghga ishima ia nyian se er a va hingir ku nahan, hemban je yô shighe u kwaghnyoon shon a va taver kpishi yô. Er nan ve se cian ku? Se mba cian ku sha ci u Yehova gba se a isharen i lun uma gbem sha won. (Orpa. 3:11) Kpa aluer se mba cian ku sha gbenda u vough yô, kwagh la a kura uma wase. Ikyav i tesen yô, se lu yan akaayan a injaa, shi eren anumbe, shi zan iyouci shighe u i gbe hange hange yô, shi se palegh akaa a aa fatyô u van se a ku yô.

16. Er Satan a fe ér se mba cian ku yô, ka a nôngo ér se er nena?

¹⁶ Satan fa er uma a doo se kpishi yô. Nahan kpa, yange kaa ér, ka keng se de hanma kwagh cii, kua ijende i se ye vea Yehova la je kpaa, sha er se lu uma her yô. (Yobu 2:4, 5) Satan yange fa kwagh u ôr la ga! Nahan kpa, er i lu un “a lu a tahav mbu eren akaa a van a ku,” shi a fe ér se soo ku ga yô, ka a nôngon ér se cia ku, nahan mciem mara ma na se de u civir Yehova. (Heb. 2:14, 15) Ashighe agen yô, mbatomov mba Satan ka ve kaa ér vea wua mbacivir Yehova, aluer ve de u civir un ga yô. Ashighe agen Satan ka una nenge kwaghnyoon wase una taver yum yô, a nôngo ér se cia ku, se lumun i gba eren se twer u Bibilo i vende la tsô. Nahan alaghga mbatwerev shin mba hen tsombor wase mba ve civir Yehova ga la vea sendegh ér se lumun i ta se awambe. Gayô, orgen nana tuur se ér se za er ma twer u u hendan a akaawan a Bibilo yô. Se eren nahan yô maa, se per tindi u Aôndo.

17. Mbaroma 8:37-39 tese ér gba u se cia ku ga sha ci u nyi?

¹⁷ Er se soo u kpen ga nahan kpa, se gema se fa dedoo ser aluer se kpe je kpa, se za hemen u doon Yehova ishima her. (Ôr Mbaroma 8:37-39.) Mba ve ye ijende a Yehova la ka vea kpe je kpa, Yehova a za hemen u umbur kwagh ve, er mba uma her nahan. (Luka 20:37, 38) Sar un kpishi u va nderen ve. (Yobu 14:15) Yehova kimbi injar i taver ishe kpishi ér se “zua a uma u tsôron.” (Yoh. 3:16) Se fa er se doo Yehova ishima kpishi shi a wa se ikyo yô. Nahan shighe u se gbe angev shin i lu anger se a ku yô, se suur sha Yehova se a sur se ishima, shi a na se kwaghfan kua agee. Ka kwagh u Valérie vea nom na yange ve er vough je la.—Ps. 41:3.

18. Ka nyi u fatyô u henen ken ikyav i Valérie laa?

¹⁸ Shighe u Valérie lu anyom 35 la, mbatwerev zua un a kyansa i i fe kwagh u i ga yô, man kyansa shon lu vesen seer a seer. Kpa er Yehova doo un ishima yô, nenge ase er dooshima la yange wase un kera cian ku ga yô. A kaa ér: “Yange mba ôron mo ér m ngu a kyansa yô, mo vea nomom cii ishima ta se kwe kpishi. Gba u saa a pavem ve me war ye, man lu ipyaven i kiriki ga. M zende ayouacii kpishi, kpa mbatwerev mba sha ayouacii la cii venda ipyaven i tan  or awambe ga la. Yange ishima hingir mo lenge lenge, kpa m mayange m lumun u peren tindi u Aôndo mer i tam awambe ga! Ken uma wam cii, Yehova tesem ér m doo un ishima kpishi. Mzeyol wam ne gema nam ian i tesen un er a doom ishima yô. Yange mea ungwa a ôr kwagh u doon ga sha angev av je maa, m seer kangen ishima mer me na i saan Yehova iyol, Satan a se hembe ga. Ken masejime yô, i va pavem ipyaven i tan awambe ga la tsembelee. Shin er ka i vihin mo iyol her nahan kpa, Yehova ngu nan mo akaa a kwagh a gbem a mi la hanma shighe cii. Ikyav i tesen yô, mkombo u tiônnongo u yange se mase zan sha iyange i Lahadi cii ve i va zuam a angev mbu kyansa la, yange se time ken ngeren ugen, itinekwagh na ér ‘Er Se Tagher a Atsan Nyian sha Ishima Taver Yô.’ * Ngeren ne yange suur se ishima kpen kpen. Yange se ôr un kwa kimbir kimbir. Ngeren er mban nahan kua akaa a mo vea nomom se eren sha ci u Yehova hanma shighe la wase se se zua a mmem ken ishima, shi ve wase se se mba pasen kwagh her shi zan mbamkombo, shi wan ishima a atsan shi tsuan akaa a injaa kpaa.”

19. Ka nyi ica ia gba ga tsô ia ere?

¹⁹ Yehova wase Mbakristu mba sha tar cii mba kera cian akaa a nan ishimanyian a ve tagher a mi la ga, shi mba hendan a Satan kpoghuloo. (1 Pet. 5:8, 9) We kpa u fatyô. Ica ia gba ga tsô Yehova una na Yesu zwa kua mba vea za tema tor a na imôngo la ér ve “vihi ityom i Diabolo kera.” (1 Yoh. 3:8) Maa mbacivir Aôndo mba vea lu shin tar la cii ‘vea cia ga shi vea gba ica a kwagh u tan mciem iyol kpaa.’ (Yes. 54:14; Mika 4:4) Nahan kpa, cii man shighe la yô, a gba u se za hemen u nôngon kpoghuloo sha er se kera cia akaa a a nan se ishimanyian la ga yô.

20. Ka nyi ia wase se ve se kera cia akaa a a nan se ishimanyian la ga?

²⁰ Gba u se za hemen u seer nan jighjigh ser se doo Yehova ishima shi Yehova kuran mbacivir un. Man kwagh u una wase se u nan jighjigh nahan yô, ka u henen sha kwagh u Yehova shi ôron ior er yange kura mbacivir un sha ayange a tsuaa la. Shi se fatyô u umbur er se kpa Yehova a wasen se u nôngon a akaa a zan se iyol yô. Sha iwasen i Yehova yô, se kera cia akaa a a nan se ishimanyian la ga!—Ps. 34:4.