IOR kpishi fa er Bibilo i kaa ér yange i mande Yesu sha kon, hen atô u mbaiv uhar mba i mande ve ikyua ikyua a na yô. (Mat. 27:35-38) Nahan kpa, ior mbagenev na jighjigh ér kwagh u Bibilo i kaa ér yange i va hungwa a ikyom Yesu shin inya, i kange i ken ikyondo i za wa ken uwar la ka mimi ga.—Mar. 15:42-46.

Ior mbagenev ken mba ve nyiman akaa a ityakeda i Ivangeli i ôr la na jighjigh ér yange a mande or sha kon yô, mayange i lumun ér i ii nan sha inja, er ken uwar nahan ga. Kpa ve na jighjigh ér yange i er a ikyom i ambaaior la sha gbenda ugen kposo. Ortôônabaver ugen, Ariel Sabar, pase er i hii ve mbagenev ve ne jighjigh nahan yô, ken magazin u i yilan ér Smithsonian la, a nger ér: “Lu mbaaferev mba ganden ave tseegh i manden ve sha kon sha u tsahan ve ye. Nahan mbafan takeda mbagen kaa ér aluer or hen ér Mbaroma yange ve na ian ér i ii ambaaior la sha icivir nahan yô, mhen la ka u shami ga.” Mbaroma yange ve soo ér vea na mbaaferev mba i gbe u a wua ve la kunya sha gbenda u hemban vihin cii, nahan ve undu ikyom i imbaor la sha kon u i mande nan sha mi la ér annyamev shin annyonov ve va ya. Vea va yaan kera yô, i mase tôôn kwagh u a shi la za tan kera, hen ape i kenden ikyom ve la.

Nahan kpa, mbadughun akaa shin inya pase kwagh ugen kposo sha kwagh u akuhe a Mbayuda mba yange i wua ve yô. Ken inyom i 1968 la, i za zua a akuhe a orgen u yange i wua un sha ayange a mbaapostoli la yô. Yange i zua a akuhe na hen ijiir i i iin ior mba hen tsombor ugen, mba ve lu Mbayuda yô, ikyua a Yerusalem. Akuhe la lu ken an-akwati. Kuhe u shin ityô-nguhar kpa lu ken ikyuhe la. I mande u kusa kar kôr ken kpande. Kusa shon lihe kuma inci unyiin man tiôn (4.5 in.). Sabar kaa ér, “Ityô-nguhar i or u i yilan un ér Yehochanan ne, lu ikyav i tesen er kwagh u i nger ken ityakeda i Ivangeli ér yange i ii Yesu ken uwar la lu nahan vough yô.” Nahan “kuhe u shin ityô-nguhar u Yehochanan la ka ikyav i tesen er sha shighe u Yesu la, Mbaroma lumun ér Mbayuda ve ii or u i mande nan sha kon yô.”

Alaghga kwagh u kuhe u shin ityô-nguhar i Yehochanan ne u tese la una na yô, ior vea lu a mbamnenge kposo kposo sha gbenda u yange i penda Yesu sha kon ve i mande la. Kpa se fa wang ser, yange i iin mbaaferev mbagenev mba yange i mande ve sha kon yô, lu ve cii i taan ikyom ve kera ga. Ikyav tese wang ér, kwagh u Bibilo i kaa ér yange i wa ikyom i Yesu ken uwar sha icivir la lu nahan vough. Ikyav la sue kwagh u Bibilo i kaa ér yange i kange ikyom i Yesu ken ikyondo i za wa ken uwar la.

U hemban cii yô, Yehova yange tsengaôron ér a ii Yesu ken uwar u zegeor. Man se fa, kwagh u Aôndo a kaa ér ngu eren yô, ma or a fatyô u yangen ga, kwagh la una er keng a bunde ga.—Yes. 53:9; 55:11.