Bibilo pase ityôkyaa la ga. Kpa i ôr akaa agen vighe vighe a aa fatyô u lun atôakyaa a alaghga ve kera tsua u hiden yemen ken Nasareti hen shighe la ga yô.

Yange ortyom kaa a Maria ér una wa iyav shi una mar wan u nomso. Shighe u ortyom ne ôr loho ne la, Maria kua Yosev cii ve lu ken Galilia, hen gar u Nasareti, ape ya u Yosev lu la. (Luka 1:26-31; 2:4) Yange mba za moughon ken Igipiti mba hidi yô, maa ve kar ve yem ken Nasareti. Nahan Yesu vese hen ijiir la hingir Ornasareti. (Mat. 2:19-23) Ka nahan ve ka a ter iti i Yesu man Yosev man Maria ve, kwagh u Nasareti a va se ken ishima ye.

Maria yange lu a anmgbian na u kwase ugen ken tar u Yuda la, i yilan un ér Elisabetu. Elisabetu lu kwase u pristi Sekaria, shi va mar wan i yilan un ér Yohane u Eren Batisema. (Luka 1:5, 9, 13, 36) Maria yange za hen Elisabetu ken Yuda za lu vea na iwer itiar, maa cin hide ken Nasareti. (Luka 1:39, 40, 56) Kwagh ne na yô, Maria fa ajiir agen ken tar u Yuda la.

Shighe karen yô, Yosev mough hen Nasareti yem ken Betelehem, sha ci u Mbaroma wa tindi ér hanma or cii yô, ‘i nger nan iti’ hen “gar u nan.” Betelehem shi lu ijiir i i tsenga ôron ér a mar Mesiya her yô. (Luka 2:3, 4; 1 Sam. 17:15; 20:6; Mika 5:2) Nahan Maria za maren Yesu hen Betelehem yô, Yosev ver ishima ér Maria a zende a hide a yem hen ijiir icaa ne a wan u sember maren la ga. Nahan ve lu hen Betelehem her. Mough Betelehem yem Yerusalem gba ica kuma er ukilomita utaankarunyiin nahan. Vea lu hen ijiir ne yô, a hemba lun ve zange u tôôn wanikyundan ne zan a na ken tempel za nan nagh er tindi tese la.—Lev. 12:2, 6-8; Luka 2:22-24.

Cii man shighe ne yô, ortyom vande ôron a Maria ér a na wan na ne ‘ikyônough ki torough ki Davidi,’ shi una “tema Tor.” Adooga tsô Yosev man Maria nenge ér ka a inja kpishi er i mar Yesu hen gar u Davidi yô. (Luka 1:32, 33; 2:11, 17) Adooga ve hen ér doo u vea tamber hen ijiir la, nahan vea nenge kwagh ugen u Aôndo a soo ér ve er yô.

Se fa shighe u yange ve tsa hen ijiir ne cii man mbaahiriv va sôr ve la ga. Nahan kpa, hen shighe ne tsombor ne lu tsan ken iyou, shi wan ve kpa kera lu wanikyundan ga. (Mat. 2:11) Ikyav tese ér yange ve kera hide ve yem ken Nasareti ga, kpa ve lu hen Betelehem. Ve tsa her gbem je.

Herode yange na zwa ér “i za wua mbayev mba nomso mba ken Betelehem . . . hii sha mba lun anyom ahar hide ijime.” (Mat. 2:16) Ortyom ugen va ôron Yosev man Maria kwagh sha kwagh u tindi u i wa ne yô, ve yevese a Yesu ve yem a na ken Igipiti, ve za lu ker zan zan Herode kar kpen. Shighe karen yô, Yosev mough a tsombor na ve hide ve yem ken Nasareti. Er nan ve yange ve kera hide ve yem ken Betelehem ga? Lu sha ci u hen shighe la, wan u Herode, Arekilau, tema tor ken Yudia, man lu tor u wan ifer kpishi. Hen shighe ne kpa, ortyom shi va ta Yosev icin sha kwaghbo u lu ningir hen ijiir la yô. Nasareti lu ijiir i Yosev una fatyô u yesen Yesu her a zayol shio, sha er una hingir or u civir Aôndo yô.—Mat. 2:19-22; 13:55; Luka 2:39, 52.

Ikyav tese ér Yosev yange vande kpen cii Yesu va kpe, maa gbenda bugh u mbagenev kpa vea fatyô yemen sha ye. Sha nahan yô, a va nder Yosev una lu uma gbem sha won shin tar. Ior kpishi vea fatyô u nengen a na, nahan una seer pasen ve akaa agen a yange na ve un vea Maria ve hide ve lu ken Betelehem shighe u i mar Yesu kera la yô.