1. Ka nyi i gbe u se er keng ve se va war iyange i Yehova?

 BIBILO ka ia ôron kwagh u “iyange i Yehova” yô, i ôron i lu shighe u Yehova una va tim mbahyomov nav, nahan una yima ior nav la. Yehova yange tsaha shin tim akuraior agen sha ayange a tsuaa la. (Yes. 13:1, 6; Esek. 13:5; Sef. 1:8) Sha ayange a ase ne, “iyange i Yehova” ia hii sha ityav mbi a ta sha Zegebabilon, mbia za kuusu sha Armagedon la. Kwagh u se er ve se war “iyange” la yô, a gba u se wa iyol hegen. Yesu yange kaa ér se wa iyol sha ci u “zegecan” la tseegh ga, kpa yange shi kaa ér ‘se wa iyol se keghen a kegh’ shighe la.—Mat. 24:21; Luka 12:40.

2. Kwagh u i ôr ken 1 Mbatesalonika la una fatyô u wasen se sha ci u nyi?

² Ken washika u Mbatesalonika u hiihii, u Aôndo kaa apostoli Paulu nger la, Paulu tese ikyav sha akaa kpishi a wasen Mbakristu u wan iyol keghen a kegh iyange i vesen i Yehova una tim mbahyomov nav la. Paulu yange fa er iyange i Yehova i lu van sha shighe na la ga yô. (2 Tes. 2:1-3) Nahan kpa, Paulu taver anmgbianev nav ishima ér ve wa iyol sha ci u iyange la inja er ka u kpernan je maa ia va nahan. Se kpa se fatyô u dondon kwaghwan na la. De se time sha gbenda u Paulu yange pase (1) er iyange i Yehova la ia va yô, man (2) mba vea war iyange shon yô, kua (3) er se wa iyol i va waren iyange shon yô.

3. Iyange i Yehova ia va er ormbaiv ka nan va tugh nahan sha nyi gbenda? (Shi nenge foto kpaa.)

³ “Er ormbaiv ka nan va tugh nahan.” (1 Tes. 5:2) Ka gbenda u hiihii ken igbenda itiar i Paulu tese ikyav u pasen er iyange i Yehova la ia va je ne. Mbaiv ka ve va iv tugh, hen shighe u ior ve ver ishima ér vea va ga yô. Shi ka ve er kwagh u ve ve la fese je i ngôôr ga. Iyange i Yehova kpa ia va aburabur, hen shighe u ior ve ver ishima ér ia va ga yô. Mbakristu mba mimi je kpa, a kpiligh ve iyol  u nengen er akaa aa er fese je a ngôôr ga yô. A tim aferaior kera, kpa se yô, se war mtim.

4. Iyange i Yehova la ngi er martoghor ka u kôr kwaseuya nahan, sha nyi gbenda?

⁴ “Er martoghor ka u kôr kwaseuya nahan.” (1 Tes. 5:3) Kwaseuya u nan lu keghen mar yô, nan fe shighe u martoghor ua kôr nan jighilii ga. Kpa ka nan fa ér a va ar hen shighe u toghor mar la keng. Man shighe la una vaan yô, martoghor ua kôr nan fese, a nyoon nan kpishi, man a lu kwagh u yangen ga. Se kpa, kape se fe iyange shin hwa i iyange i Yehova la ia hii ga je la. Nahan kpa, se fa dedoo ser iyange la ngi van, shi Aôndo una tim mbaaferev kera fese, vea fatyô u waren ga.

5. Shighe u zegecan la una lu er sev ka mbu av nahan, sha nyi gbenda?

⁵ Er sev ka mbu av nahan. Ken ikyav i sha utar i Paulu tese ne kpa, a ôr kwagh u mbaiv ka ve va iv tugh la. Kpa kwa ne yô, a tôô iyange i Yehova a kar sha shighe u sev ka mbu hii u wanger la. (1 Tes. 5:4) Mbaiv mba ka ve va hen ya u or tugh, ve va vihi hunda shin ve pev iyou ve nyôr ker la, ashighe agen vea wa ityou u eren kwagh u ve ve la je yô sev mbua zurum u aven je kpa vea fa ga. Nahan sev a av ve aburabur, a hingir u nengen a ve. Kape zegecan kpa, una va pon mba ve ze hemen u lun ken ime sha u eren akaa a doon Aôndo ga, mba ve lu er ka mbaiv la je la. Se se lu er ve nahan ga. Se fatyô u wan iyol keghen a kegh sha u vendan hanma ieren i Yehova a vende yô, man sha u keren ser se lu a “hanma ieren i dedoo man i perapera man i mimi.” (Ef. 5:8-12) Paulu shi tese ikyav sha igbenda ihiar, u pasen mba vea war iyange i Yehova ga yô.

6. Ka sha gbenda u nyi nahan ior kpishi ve lu yavene? (1 Mbatesalonika 5:6, 7)

⁶ “Mbayaven.” (Ôr 1 Mbatesalonika 5:6, 7.) Paulu kaa ér mba vea war iyange i Yehova ga la  mba er ior mba ve lu yaven nahan. Ve kav akaa a aa lu zan hemen sha tar hegen ne ga, shi ve fa shighe u se lu ker ne ga. Sha nahan yô, kwagh u vesen ka una er je kpa ve fa ga, shi ve lu a kwagh u eren sha mi ga. Ior kpishi nyian mba er mba yaven nahan. (Rom. 11:8) Ve na jighjigh a akaa a lu eren hegen u tesen ér se mba ken “ayange a masejime” shi zegecan sôôn van la ga. Akaa a vesen ka aa er sha tar yô, kwagh la a kpoghor mbagenev ve wa tesen isharen i ungwan loho u Tartor u se pasen la. Nahan kpa, mbagenev kpishi ka ve hide ve gba mnyam, ve za hemen u lun per ga. Mba ve ne jighjigh ér iyange i mtim ngi van je kpa, ve hen ér iyange shon ngi ikyua ga. (2 Pet. 3:3, 4) Kpa se yô, hanma iyange ka se seer nengen er i gbe hange hange u se lu per yô.

7. Mba iyugh i Aôndo i lu van sha a ve la mba er ior mbahunden msôrom nahan sha nyi gbenda?

⁷ “Mbahunden msôrom.” Paulu kaa ér ior mba Aôndo una va tim ve kera la mba er mbahunden msôrom nahan. Ior ka vea hunden msôrom yô, kwagh gbe ve sha akaa a a lu zan hemen hen ijiir i ve lu la ga, shi ve eren akaa sha ibume. Kape mbaaferev kpa kwagh a gbe ve sha akaa a Aôndo a te icin ér aa va er ve la ga je la. Ve tsua u eren akaa a zan a ve ken mtim. Kpa Mbakristu yô, i wa ve kwagh ér ve lu per shi ve lu tsevaa. (1 Tes. 5:6) Orgen u timen sha akaa a ken Bibilo pase ér or u nan lu tsevaa yô, “ka or u nan we ishima, nan hingir tenge tenge ga yô. Imbaor la ka nan hen kwagh tsembelee sha er nana er kwagh u ibume ga yô.” Gba u se za hemen u wan ishima, hingir tenge tenge ga sha ci u nyi? Gba u se lu nahan sha er se nyôr iyol ken akaa a patii shin a taregh agen ga yô. Er iyange i Yehova i zurum hegen ne, se lu hemban tagher a ameen a nyôron iyol ken akaa ne cii. Nahan kpa, gba u ishima ia nyian se sha gbenda u se er kwagh shighe u se tagher a imba imeen la ga. Jijingi u Aôndo una wase se u wan ishima, hingir tenge tenge ga, shi tsuan akaa a se er yô sha kwaghfan.—Luka 12:11, 12.

8. Ka aeren a nyi nahan i tese ikyav sha mi ken 1 Mbatesalonika 5:8, a aa wase se u lun per shi lun tsevaa? (Shi nenge foto kpaa.)

⁸ ‘Haa nen rigautya shi cir nen idyerutya.’ Paulu kaa ér se mba er ushoja mba ka ve lu tsevaa shi ve wuha iyol i utya la nahan. (Ôr 1 Mbatesalonika 5:8.) Ior ka ve ver ishima ér orshoja nana wuha iyol i utya hanma shighe cii. Se kpa kape i lu je la. Se wa iyol se mba keghen a kegh iyange i Yehova sha u haan jighjigh u nan man dooshima iyol, er ka rigautya nahan, man sha u cirin idyerutya, ka ishimaverenkeghen i va zuan a myom je la. Aeren ne aa wase se kpishi.

9. Jighjigh u nan wase kor se nena?

⁹ Orshoja yange nana hua rigautya yô, riga la i kura ishima i nan sha er kwagh a fatyô u karen benden a i ga yô. Jighjigh u nan man dooshima ka ve kura ishima yase i sha injakwagh la, ka mhen wase je la. Aeren ne aa wase se se za hemen u civir Aôndo shi dondon Yesu. Jighjigh u nan una wase se u lun a vangertiôr ser Yehova una na se injar, er se lu keren un a ishima yase cii yô. (Heb. 11:6) Shi ieren ne ia wase se se za hemen u dondon Orhemen wase Yesu, shighe u se tagher a atsan je kpaa. Aluer se time sha kwagh u mbagenev sha ayange ase ne er yange i lu tôvon ve a ican shin ve nyôr ken ican i inyar, kpa ve za hemen u civir Yehova sha mimi la yô, jighjigh u nan wase una seer taver. Nahan se fatyô u wan ishima a mbamzeyol. Shi aluer se mba dondon ikyav i mba kwagh u Tartor u hembe gban ve ishima la yô, se palegh kwaghbo u a lu ken ieren i soon inyaregh man u lun a akaa kpishi la. b

10. Aluer Aôndo kua ior doo se ishima yô, kwagh la una wase se u wan ishima nena?

 ¹⁰ Dooshima kpa ka ieren i ia wase se se lu per shi se lu tsevaa yô. (Mat. 22:37-39) Aôndo ka una doo se ishima yô, kwagh la a wase se u taver ishima pasen kwagh; ka a lu u se er nahan se nyôr ken nyityô zayol je kpaa. (2 Tim. 1:7, 8) Er mba ve civir Aôndo ga la je kpa ve doo se ishima yô, ka se za hemen u pasen kwagh hen haregh wase kua sha telefon man ken washika je kpaa. Hanma shighe yô, ka se lu a ishimaveren ser, yange sev a hungwa a av mba se pasen ve kwagh la vea gema vea hii u eren kwagh u vough.—Esek. 18:27, 28.

11. Aluer anmgbianev asev mba nomso man mba kasev doo se ishima yô, kwagh la una wase se nena? (1 Mbatesalonika 5:11)

¹¹ Ka mba ve civir Yehova ga la tseegh ve doo se ishima ga. Anmgbianev asev mba nomso kua mba kasev kpa doo se ishima. Ka se tese ser ve doo se ishima sha u ‘taver hanma wase ishima shi wasen hanma wase.’ (Ôr 1 Mbatesalonika 5:11.) Ka se taver ayol a ase asema er ushoja ka ve lu vea ior vev ken utya ikyooso ikyooso nahan. Shighe u ushoja ve lu nôngon ityav yughur yughur yô, orshoja ugen nana fatyô u vihin or u nan iyol aburabur, mayange nana vihi or u nan iyol sha apera ga. Se kpa mayange se ôr kwagh, shin se er kwagh u vihin anmgbianev asev mba nomso man mba kasev sha apera ga, shin aluer ve er se kwagh u vihin kpa se or iyev ga. (1 Tes. 5:13, 15) Shi ka se tese ser anmgbianev mba ve eren tom kpoghuloo sha ci u mbagenev ken tiônnongo la doo se ishima sha u nan ve icivir. (1 Tes. 5:12) Shighe u Paulu nger washika ne la, i ver tiônnongo u Mbatesalonika la lu a kuma inyom ga. Mba yange i ver ve mbatamen la, yange vea lu a fa tom la tsembelee ga, nahan alaghga vea er akaa agen shami ga. Kpa yange ve kuma u a na ve icivir. Shighe u zegecan a va la, a gba u se hemba suur sha mbatamen mba hen tiônnongo wase cii ser ve tese se kwagh u se er yô. Alaghga anmgbianev mba hen afishi a shin tine, gayô mba shin afishi a branci vea kera fatyô u tindin se a loho ga. Sha nahan yô, gba hange hange u se hen u tesen ser mbatamen asev doo se ishima, shi se hen u nan ve icivir hegen. A lu nyi je ia er kpa, se za nen hemen u lun tsevaa, se hemba veren nen ishima sha mbamyen vev  ga, kpa se hemba veren ishima sha mfe u se lu a mi ser Yehova ngu hemen nomsombaiorov mbajighjigh mban sha ikyev i Kristu la.

12. Ishimaverenkeghen yase la ka i kura gbenda u se henen kwagh la nena?

¹² Er idyerutya ka i kura ityough ki orshoja nahan, kape ishimaverenkeghen yase i va zuan a myom la kpa ka i kura gbenda u se henen kwagh la je la. Ka sea lu a ishimaverenkeghen taveraa yô, se nenge er akaa a tar u te ave vanger a mi la a lu agbilinakaa yô. (Fil. 3:8) Ishimaverenkeghen yase la ka i wase se se za hemen u wan ishima shi se hingir tenge tenge ga. Kwagh ne yange er anmgbian ugen u i yer un ér Wallace la vea kwase na Laurinda. Mba eren tom shin Betel ken veghertar u Afrika. Ken iwer itiar tseegh, hanma ve cii yange ormaren u nan kpe. Orgen lu ter u nan kpe ye, ugen di lu ngô u nan kpe ye. Man er angev mbu Korona lu samber yô, ve fatyô u zan ken ya za lun vea ior vev mba hen tsombor ga. Wallace nger ér: “Ishimaverenkeghen i mnder u shin ku la ka i wasem u henen sha kwagh ve; ka m henen er yange ve lu ve ve mase kpen la ga, kpa ka m henen er a va nder ve ken tar u he ken ayange a hiihii la ve vea lu yô. Ishima ka ia hii u vihin mo sha ku ve ne kpa, ishimaverenkeghen i mnder u shin ku la i wasem m de u zungwen.”

13. Ka nyi se er ve a na se icighan jijingi?

¹³ ‘De pirin usu u jijingi ga.’ (1 Tes. 5:19) Paulu kaa ér, icighan jijingi ka a lu ken a vese er ka usu nahan. Jijingi u Aôndo ka una lu ken a vese yô, i gba se ishima kpishi shi i maa se iyol u eren kwagh u vough, shi se zua a agee a eren Yehova tom. (Rom. 12:11) Nahan ka nyi se er ve a na se icighan jijingi? Se fatyô u sônon Aôndo icighan jijingi, shi henen Mkaanem nam ma a ne i nger la, shi lun ken nongo u jijingi na a hemen u la. Aluer se mba eren nahan yô, kwagh la una wase se u lun a “ityamegh ki jijingi.”—Gal. 5:22, 23.

14. Ka nyi i gbe keng u se palegh ve Aôndo una za hemen u nan se jijingi naa? (Shi nenge foto kpaa.)

¹⁴ Shighe u Aôndo a ne jijingi na ken a vese yô, a gba u se wa ikyo sha er se ‘pir usu u jijingi ga’ yô. Ka mba ve ze hemen u henen kwagh shi eren kwagh sha gbenda u wang la tseegh Aôndo a ne ve icighan jijingi na ye. Aluer se  zer henen sha akaa a hôngorough shi eren akaa shon yô, Aôndo una de u nan se icighan jijingi na. (1 Tes. 4:7, 8) Kwagh ugen u se er ve Aôndo una za hemen u nan se icighan jijingi na yô, a gba u se ‘lahan akaaôron a profeti ga.’ (1 Tes. 5:20) Ishember i “akaaôron a profeti” i i ter ken ivur ne la, ngi ôron kwagh u ilyoho i Yehova ka a pase se sha iwasen i jijingi na la. Er ilyoho i sha kwagh u iyange i Yehova, kua ilyoho i wasen se u kaven er i gbe hange hange u se er kwagh torough torough sha shighe wase ne la. De henen wer iyange i Yehova shin Armagedon una va sha shighe u se lu uma ne ga ze. Kpa se tese ser se ver ishima ser ica a gba ga tsô iyange la ia va. Inja na yô, iyange la i lu se sha ishima, nahan se za hemen u lun a aeren a wang kua ‘aeren a tesen ser se mba mbacivir Aôndo’ hanma iyange i sev mbu av cii.—2 Pet. 3:11, 12.

15. Se er nan ve abaver a mimi ga, man mbaaie mba Satan vea azôv a na vea tsume a vese ga? (1 Mbatesalonika 5:21)

¹⁵ Ica a kera gba ga tsô mbahendan a Aôndo vea yôô ér: “Bem gba, zayol kera ngu ga!” (1 Tes. 5:3) Azôv aa samber a mbaaie sha tar cii, aa tsugh ior kpishi. (Mpa. 16:13, 14) Se di ye? Aluer se mba “tôvon” shin karen “akaa cii” yô, azôv aa fatyô u tsughun se ga. (Ôr 1 Mbatesalonika 5:21.) Ishember i ken zwa Grika i i gem ér “tôvon” la yange i ter i hen ivur ne sha u pasen er ka i kar iyôugh ki injaa er azurfa shin zanaria nahan sha u a nenge a lu zanaria shin azurfa u injaa yô. Sha nahan yô, se kpa gba u se karen kwagh u se ongo shin se er ken ityakeda la sha u se nenge aluer ka kwagh u mimi yô. Kwagh ne lu kwagh u vesen u yange gba u Mbakristu mba ken Tesalonika vea er yô. Man se je yô, hemba kan hange hange u se er kwagh shon cii, er zegecan a zurum ne. Se gba nan jighjigh a hanma kwagh u ior ve ôr tsô ga, a gba u se er tom a mhen wase sha u tôôn kwagh u se ôr ken ityakeda, shin u se ungwa ior ve ôr la karen sha kwagh u Bibilo kua nongo u Yehova u ôr yô. Aluer se mba eren nahan yô, mbaaie mba azôv a lu samber a mi la vea tsume a vese ga.—Anz. 14:15; 1 Tim. 4:1.

16. Ka nyi se lu a ishimaverenkeghen ser ia er keng a bunde ga, man kwagh ne mgbegha se u eren nyi?

¹⁶ Se fa ka u nongoior u Yehova ua va war zegecan u a ve la. Kpa se asange asange se gema se fa kwagh u kper una er se ga. (Yak. 4:14) Nahan kpa, aluer se za hemen u civir Yehova sha mimi yô, sea va war zegecan la, shin sea kpe cii man shighe la kpa, se zua a injar i uma u tsôron. Mba i shighe ve mkurem la vea lu sha vea Kristu imôngo. Mba ve lu iyôngo igen la di vea lu ken paradiso shin tar. Yô se cii, ishimaverenkeghen yase i doon kpishi la i lu se sha ishima, shi se wa nen iyol se keghen nen a kegh iyange i Yehova!