Saa se lu a jighjigh u nan ve se fatyô u eren ishima i Yehova ye. Kpa Bibilo kaa ér “ka ior cii ve lu a jighjigh u nan ga.” (2 Tes. 3:2) Apostoli Paulu yange lu ôron kwagh u ior mba ve lu tôvon un a ican ér ka “ubombaiorov man mbaaferev” mba gba u a yima un sha ikyev ve yô. Kpa kwagh u a ôr sha kwagh u jighjigh u nan la, hen mbagenev yô ka mimi. Ior mbagenev venda ér Aôndo ngu u a gbe akaa cii ga. (Rom. 1:20) Alaghga mbagenev di vea kaa ér ve na jighjigh ér kwagh ngu shin or ngu u nan hembe tahav cii yô. Kpa ngura ka jighjigh u nan u una wase or u eren ishima i Yehova la ga.

Gba u se na jighjigh ser Yehova ngu kpôô kpôô shi ne mba ve ne un jighjigh taveraa la injar. (Heb. 11:6) Jighjigh u nan ka vegher u ityamegh ki icighan jijingi u Aôndo. Nahan aluer or ngu eren msen hen Yehova yô, Una na nan icighan jijingi na la. (Luka 11:9, 10, 13) Gbenda u vesen u se zuan a icighan jijingi yô, ka sha u ôron Mkaanem ma Aôndo, shi henen sha kwagh u se ôr la shi nôngon dondon un. Aluer se er nahan yô, se na jijingi u Yehova ian ser a wase se u eren akaa ken uma wase a a tese ér se mba a jighjigh u mimi la.