NGEREN U TIMEN SHA MI 25
ICAM 7 Yehova Ka Agee Ase
Umbur Wer Yehova “Ka Aôndo u Uma”
“TER ngu uma!”—PS. 18:46.
KWAGH U SE LU HENEN YÔ
Ngeren ne una wase se u fan er ka sea umbur er Aôndo u se civir la a lu Aôndo u uma ve kwagh la a wase se kpishi yô.
1. Ka nyi i wase ior mba Yehova ve ze hemen u civir un shin er ve lu tagher a mbamzeyol nahan kpaa?
BIBILO kaa ér se mba ken “ashighe a bo aa . . .uma una taver” yô. (2 Tim. 3:1) Dugh mbamzeyol mba hanma or shin tar nan lu tagher a mi la kera yô, shi ior mba Yehova mba tagher a ahendan man tôvacan. Ka nyi ka i wase se, se za hemen u civir Yehova her shin er se lu tagher a mbamzeyol nahan kpaa? Ityôkyaa i vesen yô, ka sha ci u se fa ser Yehova “ka Aôndo u uma.”—Yer. 10:10; 2 Tim. 1:12.
2. Ka sha nyi gbenda nahan Yehova a lu Aôndo u uma?
2 Yehova nengen atsan a ase, shi wasen se sha a kpaa. (2 Kron. 16:9; Ps. 23:4) Nahan aluer se mba umbur er a lu Aôndo u uma yô, kwagh la una wase se u wan ishima a nyityô ican i se tagher a mi cii. De se nenge er kwagh ne yange wase Tor Davidi yô.
3. Inja i kwagh u Davidi kaa ér “TER ngu uma” la ér nyi?
3 Davidi yange fa Yehova shi suur sha a Na. Davidi yange sôn Yehova ér a wase un shighe u Tor Saulu kua mbaihyomov nav mbagenev lu keren un a ku la. (Ps. 18:6) Yange Aôndo ungwan msen u Davidi shi yem un yô, Davidi kaa ér: “TER ngu uma”! (Ps. 18:46) Davidi yange ôr mkaanem man u tesen ér Aôndo ngu tseegh tsô ga. Takeda ugen u pasen akaa kaa ér Davidi yange ôr mkaanem mara u tesen ér Yehova “ka Aôndo u mimi u a wasen mbacivir un hanma shighe yô.” Sha mimi yô, akaa a yange er Davidi la wase un u fan ér Aôndo na ngu uma, man kwagh ne yange wase un za hemen u civir Yehova shi wuese un kpaa.—Ps. 18:28, 29, 49.
4. Ka sea nenge ser Yehova ka Aôndo u uma nahan, kwagh la a wase se nena?
4 Aluer se fa wang ser Yehova ka Aôndo u uma yô, kwagh la una wase se u civir un sha gbashima. Kwagh la una na se agee a wan ishima a atsan shi una mgbegha se, nahan se za hemen u eren un tom kpoghuloo. Shi se kange ishima ser se za hemen u lun kôôsôô a Yehova.
AÔNDO U UMA UNA TAVER WE
5. Ka nyi ia fatyô u taver se ishima shighe u se tagher a atsana? (Mbafilipi 4:13)
5 Aluer se umbur ser Yehova ngu uma shi a kegh a kegh iyol u wasen se yô, kwagh la una wase se u wan ishima a hanma imeen cii, a lu i cuku shin i vesen kpaa. Yehova una fatyô u wasen se sha hanma imeen i se tagher a mi cii sha ci u ma imeen i taver hemban un ngi ga. Un ka Aôndo u Hemban Agee, nahan una fatyô u nan se agee a wan ishima. (Ôr Mbafilipi 4:13.) Kwagh ne ka a taver se ishima shighe u se tagher a atsan yô. Man ka sea nenge Yehova una wase se ken atsan a kiriki a se tagher a mi la yô, kwagh a la wase se u lun a vangertiôr ser una wase se shighe u se tagher a atsan a vesen yô.
6. Ka akaa a nyi yange er Davidi shighe u lu iyev la ve seer lun a vangertiôr ér Yehova a wase un?
6 Nenge ase akaa ahar a yange er Davidi ve seer lun a vangertiôr ér Yehova a wase un yô. Biya man begha yange ve kôr iyôngo i ter na shighe u lu yev, kuran iyôngo i ter na la. Hen ashighe a ahar ne cii, Davidi taver ishima, ta num sha Biya man begha ne, nahan yima iyôngo i ter na. Nahan kpa, mayange Davidi nenge ér un er kwagh ne sha tahav nav ga. Yange fa er lu Yehova na un tahav ve un er kwagh ne yô. (1 Sam. 17:34-37) Davidi yange hungur akaa a er un la ga. Er Davidi lu henen sha akaa ne yô, kwagh la wase un u fan ér Aôndo u uma una taver un ken hemen.
7. Ka nyi Davidi yange hemba veren ishima sha mini, man kwagh la wase un u nôngon num a Goliati sha ci u nyi?
7 Shighe kar yô, Davidi shi za hen afo a mbautyaav a Mbaiserael, hen shighe ne kpa lu wanye her. Yange ze yô, za mase kaven ér shoja i Mbaiserael lu cian ikyôror u Mbafiliti u i yilan un ér Goliati la. Or ne yange due lu “bamen akumautya a Iserael.” (1 Sam. 17:10, 11) Yange cier ushoja mbara iyol sha ci u ve hemba veren ishima sha mluashe u Goliati kua akaa a lu ôron a ve la kpaa. (1 Sam. 17:24, 25) Nahan kpa, Davidi yô yange ver ishima sha kwagh ugen kposo. Yange nenge kwagh u Goliati lu eren la ér ka u bamen ushoja Mbaiserael tseegh ga, kpa nenge ér Goliati ngu “bamen akumautya a Aôndo u uma.” (1 Sam. 17:26) Davidi yange hemba veren ishima sha kwagh u Yehova. Yange na jighjigh ér Aôndo u yange wase un shighe u un lu orkuranilev la una wase un hen shighe ne kpaa. Er yange Davidi fa wang ér Aôndo una wase un yô, a nôngo kwagh a Goliati, shi hemba Goliati ityav mbira!—1 Sam. 17:45-51.
8. Se er nan ve se seer lun a vangertiôr ser Yehova una wase se shighe u se lu tagher a mbamzeyol? (Shi nenge foto kpaa.)
8 Se kpa aluer se umbur er Aôndo u uma a kegh a kegh iyol u wasen se yô, kwagh la una wase se u wan ishima a atsan. (Ps. 118:6) Se fatyô u seer taver jighjigh u se lu a mi ser Yehova una wase se la sha u timen sha akaa a a vande eren la. Ôr mtom ma Bibilo ma ma pase er Yehova yange yima mbacivir un la. (Yes. 37:17, 33-37) Shi ôr ngeren shin nenge uvidio mba sha ijiir yase i sha Intanet i jw.org, mba ve tese er Yehova a lu wasen anmgbianev asev mba nomso man mba kasev sha ayange ne la. Heela tseegh ga, umbur ashighe a Yehova a wase u la kpaa. Aluer u umbur ma kwagh u vesen u Yehova yange er a we inja er u yiman we sha ikyev i biya man begha nahan ga kpa, ishima i de ze u iyol ga. Sha ci u nyi? Kwagh u vesen yô, Yehova er akaa a doon kpishi sha ci wou! A lôhô u ér we u va ya ijende a na. (Yoh. 6:44) Hegen je kpa, ka er a wase u ve u lu ken mimi her ye. Nahan sôn Yehova a wase u sha er u umbur ashighe a yange ungwa mbamsen ou shi na u akaa a yange kwagh gba u a mi la, shi wase u shighe u u nyôr ken mlu u taver yô. Aluer u ngu henen sha akaa a yange er u la yô, kwagh la una taver jighjigh u u ne wer Yehova una za hemen u wasen we la.
Kwagh u ka se er shighe u se tagher a atsan la ka a na i saan Yehova iyol shin ishima i vihi un (Nenge ikyumhiange i sha 8-9)
9. Doo u se nenge mbamtaver asev nena? (Anzaakaa 27:11)
9 Aluer se mba nengen Yehova ser ngu kpôô kpôô yô, kwagh la una wase se u nengen mbamzeyol asev sha gbenda u vough. Nena yô? Shighe u se tagher a zayol yô, gba u se hemba veren ishima sha kwagh u a lu hange hange ne. Satan senge ér aluer se tagher a mbamzeyol yô se de u civir Yehova. Nahan kwagh u ka sea tagher a zayol ve se er la ka a bende a Yehova. (Yobu 1:10, 11; ôr Anzaakaa 27:11.) Ka sea tagher a mbamzeyol kpa sea za hemen u civir Yehova sha mimi yô, se tesen ser Yehova doo se ishima, Diabolo gema ka oraie. Alaghga gomoti ngu hendan a ior mba Yehova hen ape u lu la, gayô u ngu yan ican sha kwagh u inyar, shin ior mba vendan loho u dedoo u u lu pasen ve la, shin u ngu yan ican sha igbenda igen. Aluer kwagh ngu nahan yô, umbur wer mlu u u nyôr ker la bugh u gbenda u eren kwagh u una na a saan Yehova iyol yô. Shi umbur wer, una de er imeen i hemba u ga. (1 Kor. 10:13) Una na u agee a wan ishima.
AÔNDO U UMA UNA NA U INJAR
10. Aôndo u uma una er nyi sha ci u mbacivir unu?
10 Yehova ne mba ve civir un la injar. (Heb. 11:6) Ngu nan se bem man mkom hegen shi una va na se uma u tsôron ken hemen kpaa. Se fatyô u suur sha Yehova vangertiôr sha ci u ngu a isharen kua tahav mbu nan se injar. Vangertiôr la ka a wase se u civir un sha afatyô wase cii, vough er mbacivir un mba sha ayange a tsuaa la kpa er nahan. Ka kwagh u Timoteu kpa yange er je la.—Heb. 6:10-12.
11. Ka nyi yange i na ve Timoteu er tom ken tiônnongo kpoghuloo? (1 Timoteu 4:10)
11 Ôr 1 Timoteu 4:10. Timoteu yange na jighjigh taveraa ér Aôndo una na un injar. Ka nahan ve yange er tom kpoghuloo sha ci u Yehova man mbagenev ye. Sha nyi gbenda? Apostoli Paulu yange taver un ishima ér a nôngo a hingir u fan ityesen shi lamen ken tiônnongo tsembelee. Shi apostoli Paulu yange kaa a Timoteu ér a ver anmgbianev ikyav i dedoo, vea lu mbayev shin mbaganden kpaa. Shi yange i na un ityom i taver ér a er. Tom ugen ken ityom i i na un yô, lu u wan mba gba u a wa ve kwagh la kwagh, kpa lu u una er kwagh ne sha dooshima. (1 Tim. 4:11-16; 2 Tim. 4:1-5) Ashighe agen ior yange ve nenge a ityom i Timoteu lu eren la ga, shin ve wuese un sha kwagh u lu eren la kpaa ga. Kpa Timoteu lu a vangertiôr ér Yehova una na un injar.—Rom. 2:6, 7.
12. Mbatamen mba eren tom kpoghuloo ken tiônnongo sha ci u nyi? (Shi nenge foto kpaa.)
12 Nyian kpa, gba u mbatamen vea fa ér Yehova nenge akaa a dedoo a ve lu eren la shi a gba un kwagh kpaa. Dugh tom u sôron anmgbianev man u tesen man u kwaghpasen u mbatamen ve eren la sha yô, shi mbatamen mbagen kpishi mba wasen tom u maan ayou a nongo u Yehova shi wasen anmgbianev mba kwagh a tser ve yô. Mbatamen mbagen mba eren tom u Nengen Anmgbianev Angev sha Iyouci shin mba eren tom ken Kômatii u Wasen sha Kwagh u Iyouci la. Mbatamen mban fa er tiônnongo ne a lu u Yehova, a lu kwagh u orumace ga yô. Nahan ka ve er ityom ve ne a ishima i môm, sha ci u ve na jighjigh ér Yehova una na ve injar sha tom ve.—Kol. 3:23, 24.
Aôndo u uma una na u injar sha tom u u lu eren ken tiônnongo kpoghuloo la (Nenge ikyumhiange i sha 12-13)
13. Yehova nengen akaa a se eren sha ci na la nena?
13 Ka hanma or cii nana lu ortamen ga. Kpa se cii se mba a kwagh u se fatyô u nan Yehova yô. Ka sea eren hanma kwagh u se fetyô cii sha u civir un yô, i doo un kpishi. Ka sea er iyua kpuaa tseegh u suen tom u se eren sha tar cii la kpa i doo un a vese. Ka a cier se iyol u nan mlumun ken mkombo kpa sea kende uwegh sea na mlumun shi sea deen mbagenev a kwaghbo nahan i doo un a vese kpishi. Aluer u nenge wer u ngu eren Yehova tom er i sar u la ga kpa, fa wer kwagh u u fetyô u eren la gba un kwagh. Ieren you la i doo un shi una na u injar kpaa.—Luka 21:1-4.
ZA HEMEN U LUN KÔÔSÔÔ A AÔNDO U UMA
14. Ka sea lu kôôsôô a Yehova yô, kwagh la a wase se u civir un sha mimi nena? (Shi nenge foto kpaa.)
14 Aluer se nenge ser Yehova ngu kpôô kpôô yô, a hemba lun se ican ga u civir un sha mimi. Man lu kwagh u Yosev er je la. Yange venda u eren idya sha ci u fa ér Aôndo ngu kpôô kpôô, nahan soo u eren kwagh u vihin un ga. (Gen. 39:9) Cii ve se ya ijende a Yehova kôôsôô yô, a gba u se tôôn shighe se eren msen hen a na shi se henen Mkaanem nam. Aluer se er nahan yô, ijende i se ye vea na la ia hemba taver. Se kpa ka sea ya ijende a Yehova kôôsôô er Yosev er nahan yô, se nôngo ser se er kwagh u doon Un hanma shighe cii.—Yak. 4:8.
Aluer u kporom hen Aôndo u uma yô, una wase u u tilen sha mimi (Nenge ikyumhiange i sha 14-15)
15. Ka nyi se fatyô u henen ken kwagh u yange er Mbaiserael shighe u ve lu ken taaikyôngo laa? (Mbaheberu 3:12)
15 Mba ka ve hungur ér Yehova ka Aôndo u uma la, vea fatyô u eren akaa a vihin un. Nenge kwagh u yange er Mbaiserael shighe u ve lu ken taaikyôngo yô. Yange ve fa er Yehova a lu yô, kpa ve hii u tan akperan ér una nenge sha mbamgbe vev ga. Je ve pine ér: “TER ngu a vese shin ngu ga?” (Eks. 17:2, 7) Kwagh ne na yô, ve hemba Aôndo ato. Nahan se dondo ieren ve i hemban ato la ga, kpa ieren ve la i gema i lu se icintan.—Ôr Mbaheberu 3:12.
16. Ka nyi alaghga ia na a taver se u tilen sha mimi?
16 Tar ne ka u na yô i taver se u lun kôôsôô a Yehova. Ior kpishi venda ér Aôndo ngu ga. Ashighe kpishi ka i lu inja er kpe ior mba ve vende u dondon atindi a Aôndo la iyol nahan. Ka sea nengen nahan yô, kwagh la a kar jighjigh wase. Shin er se ne jighjigh ser Aôndo ngu nahan kpa, kwagh la una na se hii u tan akperan ser una wase se ga. Or u a nger Pasalmi 73 la kpa, yange lu un nahan hen shighe ugen la. Yange nenge er kpe ior mba ve venda atindi Aôndo la iyol yô. Ica i gbe ga yô hii u tan akperan aluer ka a inja u civir Aôndo yô.—Ps. 73:11-13.
17. Ka nyi ia wase se ve se za hemen u lun kôôsôô a Yehova?
17 Ka nyi yange i wase orpasalmi ne ve gema mnenge naa? Yange hen sha kwagh u una fatyô u eren mba ve de u suur sha Yehova yô. (Ps. 73:18, 19, 27) Shi yange hen sha mbamtsera mba una fatyô u zuan a mi sha u civir Aôndo la kpaa. (Ps. 73:24) Se kpa se fatyô u henen sha igbenda i Yehova a ver se la. Hen er sea lu civir Yehova ga ve uma wase ma a lu yô. Aluer se umbur er i hii ve i doo u se civir Yehova yô, kwagh la una wase se se za hemen u civir un sha mimi er orpasalmi nahan, a kaa ér: “Kpa mo yô, doom u mgbôghom a Aôndo.”—Ps. 73:28.
18. Gba u se cia akaa a aa va er ken hemen la ga sha ci u nyi?
18 Se fatyô u wan ishima a nyityô mtaver u se tagher a mi ken ayange a masejime ne cii sha ci u se mba ‘eren Aôndo u uma man u mimi la tom.’ (1 Tes. 1:9) Aôndo wase ngu kpôô kpôô, shi wasen mba ve civir un yô. Yange lu a ior nav sha ayange a tsuaa la, nyian ne kpa ngu a vese. Ica a gba ga tsô se tagher ishigh a zegecan u hemban cii. Kpa se lu tswen ga. (Yes. 41:10) Nahan se cii “se fatyô u lun a vangertiôr taveraa, kaan ser: ‘Yehova ka orwasen mo; me cia ga.’”—Heb. 13:5, 6.
ICAM 3 Ne Se Vangertiôr man Agee man Ishimaveren
