Kwagh u i ôr ken Pasalmi 12:7 ér “We, Ú koson ve” la ngu ôron kwagh u mba i lu “kighir” ve mba i ter kwagh ve ken (ivur i sha 5) la shin ngu ôron ka kwagh u “akaaôron a TER” a i ôr ken (ivur i sha 6) laa?

Kwagh u i vande ôron cii ve i ôr kwagh ne la tese ér ka ior i lu ôron kwagh ve ye.

I ôr ken Pasalmi 12:1-4 ér “mbamimi ve bee ken ônov mba iorov kera.” Nahan kpa, nenge kwagh u Pasalmi 12:5-7 ôr yô.

Ivur i sha 5 la ôr kwagh u Aôndo una er a mba i lu “kighir” ve la yô. I kaa ér una yima ve.

Ivur i sha 6 la di seer ôron ér “akaaôron a TER yô, ka a wang je,” “er azurfa u i ser un” nahan. Kwagh ne tese gbenda u se nengen mkaanem ma Aôndo yô.—Ps. 18:30; 119:140.

Nenge kwagh u Pasalmi 12:7 a ôr ne, i kaa ér: “We, Ú koson ve, TERE; Ú kuran se sha kov ne gbem.” Nahan “ve” la ngu ôron kwagh u nyi?

Ken Ubibilo mbagenev yô, i gema mkaanem ma ken Pasalmi 12:7 la ér: “U kura ve.” Sha nahan yô, alaghga mbagenev vea hen ér, er i ter “akaaôron a TER” ken ivur i sha 6 la yô, mba kaan ér Yehova ‘kuran’ akaaôron a na. Se fa er Aôndo yange kura Bibilo shin er mbaahendanev nôngo ér vea bee a Bibilo kera shi ior ve de u ôron i nahan kpaa.—Yes. 40:8; 1 Pet. 1:25.

Nahan kpa, Yehova shi kuran ior mba i ôr kwagh ve ken ivur i sha 5 la kpaa. Yehova yange yima ior shi una za hemen u yiman mba i lu “kighir” ve la kua “mbaatsanev” mba i lu kighir ve la kpaa.—Yobu 36:15; Ps. 6:4; 31:1, 2; 54:7; 145:20.

Nahan, “ve” u i ôr kwagh na ken ivur i sha 7 la ngu ôron kwagh u nyi?

Aluer se ver ishima sha kwagh u ityough ki pasalmi kin cii ki lu ôron yô, se kav er “ve” la a lu ôron kwagh u ior yô.

Ken mhii u Pasalmi 12:1 la, Davidi ôr kwagh u mbacivir Yehova mbajighjigh mba aferaior yange tsugh ve yô. Ivur i sha 3 la za hemen u kaan ér, Yehova una mough num a mba ôron akaa a dang. Sha nahan yô, orpasalmi ne lu kaan ér se fatyô u nan jighjigh ser Aôndo una yima ior nav sha ci u akaaôron a na ka a wang.

Nahan mba Yehova una kura ve mba i ôr kwagh ve ken ivur i sha 7 la, ka ior, inja na yô, ka ior mba mbaaferev ve nzughul a ve je la.

Kpa er nan i gema ivur ne ken Ubibilo mbagenev ér: “U kura ve”? I gema nahan sha ci u gbenda u yange ôr kwagh ne ken Ruamabera u ken zwa Heberu u i hii ngeren la. Kpa ken Ruamabera u ken zwa Grika u i yer ér Septuajinta la, yange i ter ishember i “Una kura se” la ken ivur ne kwa har. Sha nahan yô, ivur ne ngi ôron ka kwagh u mbajighjigh mba kighir ve la. Ivur i sha 7 la mase kaan ér una kura mbajighjigh “sha kov ne gbem.” Una kura ve sha ikyev i mbaaferev mba ve kenden a akaa a dang ken ior la. (Ps. 12:7, 8) Ken Ruamabera u ken zwa Heberu u i gem ken zwa Shiria la, ivur i sha 7 la kaa ér: “We TER, u kura mbaperapera, u kura ve sha ikyev i kov u mbaaferev ne gbem sha won. Hanma gbenda u ve ze cii, mbaaferev mba er akusen a man ônov mba iorov awambe nahan.” Gbenda u i gema ivur ne ken zwa ne la seer tesen ér Pasalmi 12:7 ngu ôron ka kwagh u akaaôron a Aôndo ga.

Sha nahan yô, ivur ne ngi wasen mbajighjigh u fan ér Aôndo una nôngo kwagh sha ci ve.