IJENDE i dedoo ka kwagh u numben a mi ga, kpa saa se nôngo kwagh tsung ve se ya ikyar a or igbekeke ye. Kpa aluer ikyar i se ye la ngi nôngon u vihin yô, ka nyi ia wase se ve se pav ga? Se fatyô u henen kwagh kpishi ken ior mbagenev mba i er kwagh ve ken Bibilo, mba yange ve lu azende a mimi, kpa shighe kar yô, ikyaryan ve lu nôngon u vihin la.

Davidi u lu orkuranilev shi lu tor kpaa la, lu a azende a dedoo je ka u henen a hen ga. Alaghga u umbur kwagh u Yonatan u un kpa lu ijende na la. (1 Sam. 18:1) Davidi lu a azende agen kpaa, er profeti Natan nahan. Bibilo ôr se shighe u ikyaryan ve la hii ga. Nahan kpa, shighe ugen la, Davidi ôr Natan kwaghmyer, er we kpa ashighe agen u fatyô u ôron ijende you kwaghmyer nahan. Yange sar Davidi u maan iyou i Yehova. Alaghga tsô, kwaghwan u Natan doo tor kpishi sha ci u Natan lu ijende na, shi lu or u lu a jijingi u Yehova yô.—2 Sam. 7:2, 3.

Nahan kpa, kwagh ugen va er u nôngo u vihin ikyaryan ve la yô. Tor Davidi yange er idya a Batesheba, shighe kar yô, wua nom na, Uria kpaa. (2 Sam. 11:2-21) Davidi civir Yehova sha  mimi anyom imôngo, shi ôron ijir sha mimi kpaa. Kpa va er isholibo i vesen ne! Lu nyi i za tor u dedoo ne iyolo? Alaghga nenge ér un er kwaghbo u vesen ga shinii? Yange nenge ér una fatyô u yeren Aôndo a kwaghbo na nee?

Tsô Natan una er nena? Una de ér orgen nana za ôr tor kwaghbo u tor er laa? Mbagenev kpa fa er lu Davidi kaa ér i wua Uria yô. Nahan er nan ve Natan lu keren u za wan ave sha ikyaa i ia fatyô paven un a Davidi u ve ya ijende ica i gba laa? Aluer Natan bugh zwa sha kwagh ne yô, alaghga a wua un je kpaa. Kera je kpa, Davidi vande wuan Uria a ishô na iyol.

Kpa Natan lu orshua u Aôndo. Profeti ne fa je ér, aluer un bugh zwa sha ieren i Davidi la ga yô, ikyaryan na vea Davidi ia vihi shi una lu a imoshima i wang ga. Ijende na Davidi lu zan sha gbenda u Yehova kera lumun un ga yô. Nahan gba u a wase Davidi una hide a ya ikyar vea Yehova fese je. Sha kpôô yô, gba u a lu ijende na i mimi ia wase un ye. Natan lu imba ijende la. Cii man Natan a lam sha ikyaa ne yô, a vande ôron Davidi u ngise kuran ilev la injakwagh i ia fatyô u kôron un ken ishima yô. Been kera yô, a ôr Davidi loho u Aôndo, kpa lu sha gbenda u ua wase Davidi una kav er akaabo a er la a vihi tsung, shi una gema ishima yô.—2 Sam. 12:1-14.

Aluer u ngu a ijende i i er kwaghbo u vesen nahan, u er nena? Alaghga u hen wer aluer u pase nan kwaghbo u nan la yô, kwagh la una vihi ikyar i ne ye la. Shin alaghga u nenge wer aluer u pase mbatamen, mba vea fatyô u wasen nan ken jijingi la, isholibo i nan la yô, u lu eren kwagh a ijende you la sha mimi ga. Nahan u er nena?

Gianni, u se vande ôron kwagh na sha heen la, kaa ér: “Yange m fa je mer kwagh za iyol. Maurizio kera lamen a mo gbar gbar er ngise nahan ga. Maa m za lam a na, shin er taver mo kpishi nahan kpaa. Cii man m za yô, m pine iyol yam mer: ‘Me za yô, me ôr un nyi i a lu afa ga? Alaghga una kegh ato a mo tsô kpaa ga!’ Kpa m umbur hanma kwagh u yange se hen imôngo la yô, m zua a tahav mbu za lamen a na. Maurizio yange wasem kpishi shighe u m lu ken mzeyol yô. Yange m soo mer se pav ijende ga, nahan m soo u wasen un sha ci u kwagh na gbam ishima.”

Maurizio shi kaa ér: “Gianni yange ôrom kwagh u mimi, man lu kwagh u vough je ôr ye. M fa je mer akaabo a a due ken ieren yam la, lu ibo i Gianni shin Yehova ga. Sha nahan yô, m lumun tsaha, nahan shighe kar yô, m hide m taver ken jijingi.”

Davidi yange lu a azende agen a a er kwagh a na sha mimi shighe u va nyôr ken mbamzeyol la. Môm ken ve yô, lu Hushai, u Bibilo i kaa ér lu “ikyar u Davidi” la. (2 Sam. 16:16; 1 Kron. 27:33) Alaghga tsô lu or u eren tom hen ya u tor, u lu ijende a tor kôôsôô, u ashighe agen tor a tindi un a za er tor akaamyer yô.

Shighe u wan u Davidi Abesalom ngohol un ikyônough ki torough la, Mbaiserael kpishi dondo Abesalom, kpa Hushai yô, er nahan ga. Maa Hushai za hen Davidi shighe u Davidi lu yevese la. Ishima yange vihi Davidi ker kpishi sha ci u wan na kua ior mbagenev mba Davidi na ve jighjigh la, va un ahenge. Nahan kpa, Hushai yô, za hemen u eren kwagh a tor sha mimi, sha ci yange lumun u za eren kwagh u una vihi awashima u Abesalom la, man lu ku je lu cihin ye. Hushai er kwagh ne sha ci u lu tom na tseegh tsô ga, kpa er nahan sha u tesen ér un ngu ijende i tor i mimi.—2 Sam. 15:13-17, 32-37; 16:15–17:16.

Ka kwagh u saan se iyol kpishi er nyian se lu a anmgbianev mba nomso man mba kasev mba ve lu ken mzough yô, man mzough ne hemba ngun a inja a nyityô tom u se eren ken tiônnongo cii. Ka ve er kwagh u a zough sha mkaanem man yô, ér: “M ngu ijende you, sha ci u gba u a lu nahan ga, kpa ka sha ci u kwagh wou gbam ishima.”

 Ka kwagh u yange er anmgbian u i yer un ér Federico la je la. Sha iwasen i ijende na i ishima ishima Antonio yô, Federico fatyô u nôngon a zayol u vesen ugen. Federico kaa ér: “Antonio yange musan tiônnongo, moughon ve hen tiônnongo wase yô, ica gba ga je maa se kôr ijende. Se cii se lu diakon, shi i doo se kpishi u eren tom imôngo. Shighe kar kpuaa yô, i na un ortamen. Dugh ijende i se kôr la kera yô, m nengen akaa a ken jijingi ken a na.” Kpa Federico va nôngo gbev. Maa fese je a za ker iwasen hen mbatamen, kpa kera kuma u lun pania shin diakon ga. Nahan Antonio er nena?

Federico kaa ér: “Yange m nenge er kwagh u erem ne vihi Antonio yô. Antonia nôngo sha afatyô na cii wasem, nahan ishima kera vihim ker za gande ga. Yange soo ér mo m hide m taver ken jijingi shi mayange kendem ga. Yange taver mo ishima ér m hide m taver ken jijingi shi m de yen ishima ga. Antonio pase ér: “Yange m seer shighe u m teman imôngo vea Federico la. M soo mer i lu un ken ishima gbar gbar u lamen a mo sha hanma kwagh cii, kua ishima i i vihi un ker la je kpaa.” Shighe kar yô, Federico hide taver ken jijingi, shi i va lumun ér a hide a lu pania man diakon, nahan lu kwagh u saan iyol kpen kpen. Antonio mase kuren nahan ér: “Er hegen se lu ken atôônanongo kposo kposo nahan kpa, se hemba mban kôôsôô cii.”

Aluer ijende you i kôôsôô kende u, shighe u u nenge wer ma ne hembe lun kôôsôô cii yô, u er nena? Ka akaa kpuaa tseegh aa vihi ken ishima a hemba imbakwagh la ye. Aluer kwagh ngu nahan yô, u fatyô u den ijende you kwaghbo kpa? Ikyaryan yen la ia taver her, er ngise lu nahan kpa?

Hen ase sha kwagh u er Yesu shighe u zurum u una kpe la. Yange lu vea mbaapostoli nav mbajighjigh mbara shighe gôgônan, shi ve cii ve lu kôôsôô. Sha nahan yô, Yesu yila ve ér akar a na. (Yoh. 15:15) Nahan kpa, shighe u i kôr un la, lu nyi i za hemene? Mbaapostoli mbara yevese undu un. Peteru yange pase ken igbar ér mayange una undu Orvesen na ga, kpa hen tugh mbu shon môm, Peteru  nyiman ér un fa Yesu ga!—Mat. 26:31-33, 56, 69-75.

Yesu yange fa je ér una tagher a ikyaren na i masetyô la un tswen. Nahan cii kpa, lu a ityôkyaa i ishima ma vihi un ker shi ma va ahenge je kpaa. Kpa shighe u i nder un shin ku, ayange kar kpuaa ve lu lamen vea mbahenen nav la, a tese cuku tsô kpaa ér un va ahenge shin ishima vihi un ker shin un vaa afanyô kpaa ga. Yesu nenge a ityôkyaa i umbur akaabo a mbahenen nav er la ga, kua kwagh u ve er hen tugh mbu i kôr un la kpaa.

Kpa Yesu er nahan ga, a gema a taver Peteru man mbaapostoli mbagenev mbara ishima. Yange tese er un ne ve jighjigh yô, sha u pasen ve er vea er tom u tesen ior, u ú hembe doon a ityom i uumace igen cii yô. Yesu nenge ér mbaapostoli nav mba azende a na her. Dooshima u Yesu tese ve la, lu kwagh u a tsa a hungur ve ga. Nahan lu u vea nôngo sha afatyô ve cii vea er kwagh u una na Orvesen ve una kera va ahenge ga yô. Shi lu kwagh u ve er vough je la, sha ci u yange ve er tom u Yesu na mbadondon un la doo doo ve za kure.—Aer. 1:8; Kol. 1:23.

Anmgbian u kwase Elvira umbur kwagh u yange za hemen shighe u ayôôso gba hen atô na a ijende na i ishima ishima Giuliana la wang. Elvira kaa ér: “Shighe u ijende yam kaa a mo ér mo m er kwagh ishima i vihi un ker la, m nenge a ibo yam. Yange lu a ityôkyaa i vihin ishima a mo. Kpa kwagh u doom kpishi yô, yange hemba veren ishima sha kwagh wam kua kwagh u una due ken ieren yam la. Me za hemen u wuese er yange ver ishima na cii sha kwaghbo u m er un la ga, kpa lu sha kwaghvihin u m lu eren iyol yam la yô. Yange m sugh Yehova er m lu a ijende i i hemba wan mbamgbe av ikyo a mbamgbe mba i yô.”

Nahan ijende i injaa ia er nena, shighe u ikyar i nan ye a orgen la i lu nôngon u vihini? Shighe u i gbe sha mi yô, ijende la ia kegh iyol u lamen sha ikyaa la gbar gbar kua sha gbenda u kundu kundu kpaa. Ijende la ia lu er Natan man Hushai, mba yange ve za hemen u eren kwagh a ijende ve sha mimi sha ashighe a ican la nahan. Shin ijende la ia lu er Yesu, u yange kegh iyol u den azende a na kwaghbo la nahan. We u ngu imba ijende ne kpa?