Mbalevi mba yange ve lu upristi ga la ve eren ityom igen; mbagen tom ve lu udasenda shin adugwer. Lu orvesen u mbakuran tempel nengen sha mba eren tom ne ye. Oryuda ugen u ngeren akaa u i yer iti na ér Philo yô, pase tom u mbakuran tempel mban eren yô. A kaa ér: “Yange i ver [Mbalevi] mban mbagen ve kuran hunda u tempel ape ior nyôron la, mbagen di ve lu sha ishigh ki icighanjiir la, sha er or u tindi a ne nan ian ga cii nana de gbe karen nyôron ker ga yô, aluer ka sha mlan je kpaa. Mbagen di yange ve ningir hen haregh u tempel la sha u kuran un. Yange ve eren tom ne ve musan, mbagen ve yar atetan, mbagen ve yar tugh.”

Yange kwagh a gba Mkohol u Mbaajiriv yô, a yila udasenda mban ve va wase ve. Lu udasenda mba Mbayuda mban tseegh Mbaroma na ve ian i lun a ikyav mbi tswamev ye.

Ortôvon sha akaa a ken Bibilo ugen u i yer iti na ér Joachim Jeremias yô, kaa ér: “Shighe u i va u kôron Yesu la, mkaanem ma Yesu ôr ér un tesen ken tempel ayange ayange kpa ve kôr un ga la (Mat. 26:55) tese ér aluer ka dasenda mban yange ve va u kôron un yô, alaghga lu ityôkyaa i na ve pine nahan je la.” Or ne shi nenge ér, ior mba yange i vande tindin ve ér ve za kôr Yesu kwagen la kpa lu udasenda mba ken tempel mban. (Yoh. 7:32, 45, 46) Shi yange Mkohol u Mbaajiriv va tindi dasenda mban kua orvesen ve u mbakuran tempel la ér ve za va a mbahenen mba Yesu, shi alaghga tsô lu dasenda mban tule Paulu due a na ken tempel kera ye.—Aer. 4:1-3; 5:17-27; 21:27-30.