1. Er i ôr ken Mateu 24:9 nahan, aluer tar kôr se ihyom kpa, gba u a kpiligh se iyol ga sha ci u nyi?

YEHOVA gba se ér se soo mbagenev shi ve kpa ve soo se. Sha nahan yô, ka i vihi se kpishi shighe u or nan ker se ihyom yô, shi i cier se iyol kpaa. Ikyav i tesen yô, anmgbian u kwase ugen ken veghertar u Yuropa, u i yer iti na ér Georgina yô, kaa ér: “Shighe u m lu anyom 14 la, ngôm kôrom ihyom sha ci u m ngu civir Yehova yum. Yange m ure kpishi shi i huan mo, shi i lum er m ngu a inja i dedoo ga nahan.” * Anmgbian ugen u i yer un ér Danylo yô, nger wener: “Shighe u shoja gbidyem, shi ve tuhwam shi ve kaa ér vea bulam sha ci u m ngu Orshiada u Yehova yum la, yange cier mo iyol shi kunya kôrom a iyol yam kpaa.” Ior ka vea kôr se ihyom nahan i vihi se kpen kpen. Kpa ka kpiligh se iyol ga, sha ci u Yesu tsengaôron ér a kôr se ihyom.—Ôr Mateu 24:9.

2-3. Er nan i ker mbadondon Yesu ihyomo?

² Tar kôr mbadondon Yesu ihyom. Sha ci u nyi? Ka sha ci u se mba ior i tar ne ga er Yesu nahan. (Yoh. 15:17-19) Sha nahan yô, shin er se ne ugomoti mba uumace icivir nahan kpa, se mba eren pati ga, shi se mba sughun tuta shin se mba gberen icam i civir tar ga. Ka Yehova tswen se civir ye. Se lumun ser ka Aôndo a kom u hemen uumace ye, shi se mba suen hemen shon kpaa. Kpa Satan man vor na yô, ve lumun ér Aôndo kuma u hemen ga. (Gen. 3:1-5, 15) Se mba pasen kpaa ser, ka Tartor u Aôndo  tseegh ua va bee a mbamzeyol mba uumace ye. Shi ica a gba ga tsô, Tartor shon ua tim mba ve hendan a u la cii. (Dan. 2:44; Mpa. 19:19-21) Mbaasemaleghlegh yô, kwagh ne ka ve loho u dedoo, kpa mbaaferev yô, ka ve loho u bo.—Ps. 37:10, 11.

³ Shi tar kôr se ihyom sha ci u se mba kor atindi a Aôndo. Kwagh u Aôndo a kaa ér ka u vough la, ior i tar ne ka i kaa ér ka u shami ga, u Aôndo a kaa ér ka u bo la di ve kaa ér ka u dedoo. Ikyav i tesen yô, nyian ne ior kpishi nenge ér ka kwaghbo u eren jimba er yange ior mba ken Sodom man Gomora lu eren ve Aôndo tim ve la ga! (Yuda 7) Er se kuran atindi a Bibilo sha ambaakaa ne yô, ior kpishi ka ve naha se tar shi ve kaa ér se wa ver ver yum!—1 Pet. 4:3, 4.

4. Ior ka vea kôr se ihyom yô, ka aeren a nyi ka a wase se?

⁴ Ka nyi ia wase se u wan ishima shighe u ior ve ker se ihyom shi ve lu tuhwan se? Gba u se na jighjigh taveraa ser, Yehova una wase se. Jighjigh wase la una “fatyô u pirin avaan a usu a orbo la” er perutya nahan. (Ef. 6:16) Nahan kpa, gba u se lu a jighjigh u nan tseegh ga. Gba u se lu a dooshima kpaa. Sha ci u nyi? Sha ci u dooshima “nyoon ishima ga.” We ishima a akaa a vihin cii. (1 Kor. 13:4-7, 13) De se nenge ase er Yehova man mba se civir un a ve imôngo la ka vea doo se ishima kua mba ve ker se ihyom la je kpaa ve, kwagh ne a wase se u wan ishima a ihyom i ior ve ker se la yô.

5. Yange Ter u Yesu doo un ishima nahan kwagh la wase un nena?

⁵ Hen tugh mbu kpernan mbahyomov mba Yesu wua un la, a kaa a mbadondon un ér: “M ngu eren kwagh u Ter a kaam la vough . . . er Ter a doom ishima yô.” (Yoh. 14:31) Er Yehova doo Yesu ishima yô, kwagh la wase un u wan ishima a atsan a yange va tagher a mi la. Se kpa er Yehova a doo se ishima yô, kape se fatyô u wan ishima a atsan je la.

6. Sha kwagh u Mbaroma 5:3-5 a er yô, mbacivir Yehova ka ve wa ishima a ihyom i tar u ker ve la nena?

⁶ Aôndo doo mbacivir un ishima, nahan kwagh la ka a wase ve u wan ishima shighe u i lu tôvon ve a ican yô. Shighe u atejir u tamen u Mbayuda kaa a mbaapostoli ér ve de u pasen kwagh la kpa ve kaa ér, gba u vea “ungwa imo i Aôndo u a lu orhemen la, a lu i ior ga,” man lu sha ci u Aôndo doo ve ishima. (Aer. 5:29; 1 Yoh. 5:3) Imba dooshima ne ka i wase anmgbianev asev mba gomoti a lu tôvon ve a ican la u tilen sha mimi. Sha nahan yô, shighe u tar u ker se ihyom kpa iyol ngi kpen se ga, kpa ka i saan se iyol.—Aer. 5:41; ôr Mbaroma 5:3-5.

7. Shighe u mba hen tsombor ve lu hendan a vese yô, doo u se er nena?

⁷ Shighe u mba hen tsombor wase ve lu tôvon se a ican yô, ka i hemba taver se u wan ishima cii. Mbagenev hen tsombor wase ka vea va fa ér se soo u henen kwagh u Yehova yô, ve hen ér i tsume a vese. Alaghga mbagen vea hen ér se hii ihyundugh. (Nenge Marku 3:21.) Alaghga je yô, vea hendan a vese man vea er kwagh ne sha tswam je kpaa. Nahan kpa, ieren ve ne i de kpiligh se iyol ga. Yesu yange kaa ér: “Mba hen ya u or vea gema a lu mbahyomov mba nan.” (Mat. 10:36) Mba hen tsombor wase ka vea er a vese a vihi nan nan kpa, se mba ker ve ihyom ga. Kpa Yehova ka una doon se ishima a seer a seer yô, ior kpa ve seer doon se ishima. (Mat. 22:37-39) Nahan kpa, mayange se de u kuran atindi a Bibilo shi dondon akaawan a i sha u i doo or a vese ga.

8-9. Ka nyi yange i wase anmgbian u kwase ugen taver ishima shighe u i lu hendan a na kpoghuloo laa?

⁸ Georgina u se vande ôron kwagh na la, yange nôngo er kwagh u vough shin er ngô na hendan a na kpoghuloo nahan kpaa. Georgina kaa ér: “Mo vea ngôm yange se hii u henen  Bibilo vea Mbashiada. Kpa iwer ngi kar ateratar yô, m soo mer me hii u zan mbamkombo, maa ngôm hii u hendan a mo. M va mase kaven er ngôm lu keghen ato a mbavendan mimi yô. Nahan una lamen a mo yô, a tôô mbaaie vev mbara a ôron mo. Heela tseegh ga, ngôm yange a tuhwam shi a kôrom ice a urugh shi a sendem ave hen ikyer shi a kura ityakeda yam kpaa a tsenda kera. M nyer anyom 15 yô, m er batisema. Ngôm yange soo ér m de civir Yehova ga, nahan tôôm za ver hen ijiir igen i i veren mbayev mba hemban ato her yô. Yange mbayev mban mbagen ve maan mcimbim ma bom shi ve eren afer. Ka a lu or wou u ma nan soo u shi ma nan wa u ikyo, ve nana gema a tôvon we a ican yô, i hemba taver we u wan ishima cii.”

⁹ Ka nyi yange i wase Georgina u wan ishima? A kaa ér: “Iyange i ngôm hii u hendan a mo la, lu iyange i m ôr Bibilo jimin cii m bee je la. Hen shighe ne m na jighjigh a ishima i môm mer ka mimi je ne, shi m hemba lun kôôsôô a Yehova cii. Yange m shi eren msen hen a na shi a ungwam. Shighe u m lu hen iyaagh ki ngôm za verem her la, anmgbian u kwase ugen a lôhôm hen ya na, se za time ken Bibilo imôngo. Hen shighe la cii mea za ken Iyou i Tartor yô, anmgbianev ve taver mo ishima. Yange hanmô ve tôôm er m ngu wan u nan nahan. Yehova hemba mba ve hendan a vese la cii, aluer mba nyi je kpaa, man m nenge sha ashe am.”

10. Se mba a vangertiôr ser hanma shighe yô, Yehova Aôndo wase una er nyi?

¹⁰ Apostoli Paulu yange nger ér, kwagh môm “una yange Aôndo u tesen se dooshima na sha ikyev i Kristu Yesu Ter wase ga.” (Rom. 8:38, 39) Er alaghga se ya ican shighe a kar, nahan kpa, hanma shighe yô, Yehova una lu a vese u surun se ishima shi taver se. Shi er kwagh u Georgina la a tese nahan, Yehova ka a wase se sha ikyev i anmgbianev mba ken tiônnongo.

11. Dooshima u Yesu ôr kwagh na ken Yohane 15:12, 13 la, lu u una wase mbahenen nav nena? Tese ikyav.

¹¹ Hen tugh mbu kpernan i wua Yesu la, a umbur mbahenen nav ér gba u vea doo ayol a ve. (Ôr Yohane 15:12, 13.) Yange fa er dooshima u tangen iyol ga la una wase ve vea lu ken mzough shi vea wa ishima a ihyom i tar u ker ve la yô. Nenge ase ikyav i tiônnongo u ken gar u Tesalonika la. Yange mba veren a ver tiônnongo la je maa i hii u tôvon anmgbianev mbara a ican. Nahan kpa, anmgbianev mba nomso man mba kasev mbara za hemen u wan ishima, nahan ve ver ikyav i dedoo i jighjigh u nan man dooshima.  (1 Tes. 1:3, 6, 7) Paulu yange taver ve ishima ér ve za hemen u eren a mbagen sha dooshima je “i̱ hemba ave a tse.” (1 Tes. 4:9, 10) Lu u dooshima la una mgbegha ve u taver mba iyol i kpe ve la asema shi wasen mba ve taver ga la. (1 Tes. 5:14) Yange ve dondo kwagh u Paulu ôr la. Shighe kar er inyom jimin nahan yô, Paulu nger ve washika na u sha uhar la, kaa a ve ér: “Dooshima u hanma wen nan lu tesen hanma or hen atô wen la ngu seer a seer.” (2 Tes. 1:3-5) Dooshima ve la yange wase ve u wan ishima a mbamtaver kua ican i i lu tôvon ve la.

12. Anmgbianev mba nomso man kasev yange ve er a mbagen doo doo shighe u i lu nôngon ityav ken tar ugen la nena?

¹² Nenge ase kwagh u yange er Danylo, u se vande ôron kwagh na la vea kwase na yô. Shighe u i lu nôngon ityav hen geri ve la, ve de u zan mbamkombo ga, shi ve pasen kwagh er ve fetyô la shi ve pande kwaghyan ve, ve na anmgbianev mbagen kpaa. Iyange igen yô, ushoja za due hen ya na a ugbuuka. Danylo kaa ér: “Yange ve kaa ér m venda mer m kera ngu Orshiada u Yehova ga. M kaan mer me er kwagh la ga yô, ve gbidyem shi ve lu eren inja er ve soo u tan mo nahan, ve ker igbo i va karem sha ityou. Cii man ve yem yô, ve kaa ér mba hiden van, vea va kôr kwase wam vea yav a na sha agee. Kpa anmgbianev mough a vese fele, za nyôr se igirgirdogo, se yem ken geri ugen. Mayange me hungur a dooshima u anmgbianev mbara tese se la ga. Yange se mba za nyer hen geri la yô, anmgbianev mba her na se kwaghyan shi ve wasem m zua a tom kua ijiir i tsan kpaa! Shighe kar yô, se kpa se fatyô u nan anmgbianev mbagenev mba ve yevese ityav yô, ijiir i tsan.” Kwagh ne tese ér, dooshima u a lu hen atô wase la una wase se u wan ishima a ihyom i ior ve ker se la.

13. Ior ka vea kôr se ihyom kpa, icighan jijingi u Yehova ka a wase se u wan ishima civir un nena?

¹³ Yesu yange kaa a mbadondon un ér, mbahyomov vev ve doo ve ishima. (Mat. 5:44, 45) A lu zange u eren kwagh nee? Mayange ga! Kpa sha iwasen i icighan jijingi u Aôndo yô, se fatyô. Avegher a ityamegh ki jijingi u Aôndo agen yô, ka dooshima man ishimawan man erdoo man ishima i legh legh kua iyolkôrontsaha. (Gal. 5:22, 23) Aeren ne ka a wase se u wan ishima a ihyom i mbagen ve ker se la. Ior kpishi mba yange ve hendan a ior vev mba ve civir Yehova la va de, sha ci u nom shin kwase gayô wan shin orwanndor u ve hendan a nan la nan tese aeren  ne. Mbagen kpishi hingir anmgbianev asev mba nomso man mba kasev. Nahan aluer ka taver we u soon mba ve ker u ihyom sha ci u u ngu civir Yehova yum la yô, sôn Yehova a na u icighan jijingi. (Luka 11:13) Shi lu a vangertiôr wer u ungwan imo i Aôndo la, ka kwagh u hemban doon hanma shighe cii.—Anz. 3:5-7.

14-15. Mbaroma 12:17-21 yange wase Yasmeen u eren kwagh a nom na sha dooshima shighe u lu hendan a na kpoghuloo la nena?

¹⁴ Nenge ase ikyav i anmgbian u kwase u i yer un ér Yasmeen la. Shighe u hingir Kwaseshiada la, nom na hen ér i tsugh un, nahan lu nôngon ér una yange un u civir Aôndo. Yange nom na a tuhwa un shi a wa mba hen tsombor na kua orhemen kwaghaôndo man orakombo ugen kwagh ér ve anger un ér vea bula un. Shi wa un aie iyol ér ngu vihin tsombor ve. Kwagen la, nom na lu za tuhwan anmgbianev ken mkombo! Yasmeen yange a vaa kpishi sha ci u gbenda u yange i lu eren kwagh a na dang la.

¹⁵ Yasmeen yange una za ken Iyou i Tartor yô, anmgbianev ve sur un ishima shi ve taver un ishima kpaa. Yange mbatamen taver un ishima ér a dondo mkaanem ma ken Mbaroma 12:17-21 la. (Ôr.) Yasmeen kaa ér: “Kwagh la yange taver mo kpishi, kpa m sôn Yehova mer a wasem shi m nôngo sha afatyô wam u eren kwagh u Bibilo i kaa la. Sha nahan yô, nomom yange una nzughul a kicin, una er a mi côu côu sha apera kpa, m za ese sha tsembelee. Yange una tuhwam kpa m lam a na kundu kundu. Shi va gba angev kpa, m nenge sha a na tsembelee.”

16-17. Ka nyi u hen ken kwagh u Yasmeen laa?

¹⁶ Yasmeen yange er a nom na doo doo nahan zua a injar. A kaa ér: “Orya wam yange hii u nan mo jighjigh a ishima na cii sha ci u a fa je ér me ôr kwagh u mimi hanma shighe. Kwagh ne na yô, hii u keghen ato a mo zulee shighe u sea lamen sha kwagh u kwaghaôndo yô, shi lumun ér una nôngo bem a lu hen ya. Hegen ne, ka a taver mo ishima ér m za mbamkombo mba tiônnongo. Mlu wam vea nomom hemba doon hegen shi ka se lu bem bem. M ngu veren ishima mer yange nomom una va kohol mo, se civir Yehova imôngo.”

¹⁷ Kwagh u Yasmeen la tese se ér, “Dooshima we ishima a akaa cii, . . . lun a ishimaverenkeghen sha akaa cii, taver ishima sha akaa cii.” (1 Kor. 13:4, 7) Kwagh ne tese wang ér, dooshima ngu a tahav hemba ihyom i kôron. Aluer se mba eren a mbagen kundu kundu sha dooshima yô, alaghga vea de u hendan a vese. Ka sea eren a ior doo doo yô, kwagh la a na i saan Yehova iyol. Aluer mbahendan a vese za hemen u kôron se ihyom je kpa, a saan se iyol her. Sha ci u nyi?

18. Afatyô u saan se iyol shighe u i ker se ihyom sha ci u nyi?

¹⁸ Yesu yange kaa ér: “I saan ne iyol hanma shighe u ior ve ker ne ihyom” yô. (Luka 6:22) Or môm kpa nan soon ér i kôr nan ihyom ga. Ka a tôvon se a ican sha ci u jighjigh wase yô, i doo se ga. Nahan kpa a saan se iyol shighe u i ker se ihyom sha ci u nyi? Nenge ase atôakyaa atar ne. Hiihii yô, ka sea wa ishima yô, i doo Aôndo a vese. (1 Pet. 4:13, 14) Sha uhar yô, jighjigh wase ka a seer lun a inja shi a hemba taver kpaa. (1 Pet. 1:7) Sha utar yô, se va zua a injar i uma u tsôron.—Rom. 2:6, 7.

19. Er nan yange saan mbaapostoli iyol shighe u i gbidye ve laa?

¹⁹ Yange i nder Yesu shin ku ica lu a gba ga maa mbaapostoli zua a msaanyol u ôr kwagh na la. Yange i gbidye ve shi i kaa ér ve de u pasen kwagh, kpa saan ve iyol. Sha ci u nyi? Lu “sha ci u i nenge ve ér ve kuma u a hee ve sha ci u iti [i Yesu] yô.” (Aer. 5:40-42) Orvesen ve yange doo ve ishima hemba mciem ma mbahyomov vev. Yange ve tese dooshima ne ken igbar, ve pase loho u dedoo “ve gba uwer ga.” Nyian kpa, anmgbianev asev kpishi ka vea tagher a mbamtaver kpa, ve za hemen u civir Yehova sha mimi. Ve fa je ér Yehova una hungur a tom ve man dooshima u ve tese sha ci u iti na la ga.—Heb. 6:10.

20. Ka nyi se lu timen sha mi ken ngeren u a dondo nee?

²⁰ Er se lu ken tar ne yô, ior vea za hemen u kôron se ihyom. (Yoh. 15:19) Kpa doo u se yem cian gighir gighir ga. Er se va nenge ken ngeren u dondon la nahan, Yehova “una na ne agee shi una kura ne” mba ne civir un sha mimi la. (2 Tes. 3:3) Sha nahan yô, Yehova man anmgbianev asev mba nomso man mba kasev kua mbahyomov asev je kpaa, ve za hemen u doon se ishima. Aluer se dondo kwaghwan ne yô, se lu ken mzough shi jighjigh wase una taver shi se na Yehova una zua a icivir shi se tese wang ser dooshima ngu a tahav hemba ihyom i kôron.