Mbashiada mbagen ka ve er tom a iwavaren i ainge ne u lamen a icombor ve kua anmgbianev mbagen mba ve civir Yehova imôngo yô. Nahan kpa, Orkristu u nan vie ken jijingi yô, ka nan umbur mkaanem ma ma kaa ér: “Orfankwagh ka nan nenge a kwaghbo, nan yer, kpa mbalanenkwagh yô, ka ve kar ve za ya ican” la.—Anz. 27:12.

Yehova soo ér kwagh a de eren se ga. Sha nahan yô, ka se palegh u lun imôngo a mba ve soon u van a mpav, man mba i dugh ve ken tiônnongo, gayô mba ve dondon atesen a mimi ga la. (Rom. 16:17; 1 Kor. 5:11; 2 Yoh. 10, 11) Alaghga anmgbianev mbagen shin mba ve kohol a anmgbianev ken tiônnongo yô, vea lu kuran atindi a Bibilo ga. (2 Tim. 2:20, 21) Doo u se lu a kwagh ne ken ishima shighe u se lu yan ijende a ior yô. Nahan kpa, aluer ior mba se soo u yan ijende a ve la ka ior mba se lamen di a ve sha u tindin ve a ilyoho sha kômputa gayô hanseeti shin tableeti tseegh yô, alaghga a lu se ican u yan ijende a ior sha kwaghfan.

Ka i hemba taver u kôron azende sha kwaghfan, hemban cii je yô, shighe u ior mba se zough sha ma gbenda u se tindin a ilyoho ne ve lu kpishi yô. Mbakristu mbagen nyôr iniongo i tindin ior a ilyoho ne, i ior ve lu ker kpishi yô, nahan kwagh ne gema va a mbamzeyol. Doo u anmgbian u nomso shin u kwase nana wa ikyo shighe u nongo u lu u tindin a ilyoho, man ior ve lu ker uderi shin udubu imôngo la nena? Jighilii yô, a taver u fan hanma or u nan lu ken nongo la vindi vindi kua mlu u nan u ken jijingi. Pasalmi 26:4 kaa ér: “M tem a ugbilinmbaiorov imôngo ga; lun yam a mbaayomov imôngo kpaa ga.” Kwagh ne tese ér hemba doon u a lu ior mba se fe ve tseegh se tindin ve a ilyoho ga zee?

Aluer ka nongo u u lu a ior ker kpuaa kpa, doo u Orkristu nana wa ikyo sha shighe u nan vihin her la, kua akaa a ve lamen sha mi la kpaa. Doo u se fa ser hanma loho u i tindi a mi cii saa se ôr kwagh sha mi ga, gba u se wa ikyo sha kwagh u i ôr ken loho shon la kua shighe u kwagh shon una tôô se la kpaa. Paulu yange ta Timoteu icin sha kwagh u ior mba “ve eren angereke shi ve [wan] ave sha akaa a ior kpaa” la. (1 Tim. 5:13) Nyian ne kpa, se fatyô u eren kwagh nahan sha gbaa u tindin ior a ilyoho la.

Orshiada u nan vie ken jijingi yô, mayange nana soo u bughun zwa ôron akaamyer a ior mbagenev shin keghen ato a ambaakaa la ga. (Ps. 15:3; Anz. 20:19) Ka nan palegh u zeren kimbir akaa a vihin a a er la shin ôron a seer bar, ka a lu akaa a a er i lu a fa mimi u a ga kpaa. (Ef. 4:25) Ka se zua a akaawan a injaa a ken Bibilo kua abaver a akaa a a er man i fe mimi u a wang yô sha ijiir yase i sha Intanet i jw.org la, kua sha uporogeram mba i eren hanma uwer sha Ityôgh ki Televishen ki Mbashiada mba Yehova la.

Mbashiada mbagen ka ve er tom a ilyoho ne u teen akaa shi yamen akaa kua u yôôn kasua gayô yôôn ityom i ve lu a mi i tôôn ior yô. Akaa la cii ka kpenga u eren, a gba a zua vea mcivir u Yehova ga. Mbakristu mba ve soo ér vea palegh ieren i “soon inyaregh” cii, mba gem anmgbianev vev ér ve hingir ve gbenda u keren inyaregh ga.—Heb. 13:5.

Nahan kpa, u tindin ior a ilyoho sha igbenda ne, sônon inyaregh sha ci u anmgbianev mba i gbe u a wase ve shin keren inyaregh ki wasen mba ma kwagh u vihin tsung a er nahan akaa ve a saa ishe la di ye? Se cii anmgbianev asev doo se ishima shi ka se wa ve ikyo kpen kpen, nahan ashighe kpishi ka se soo ser se na mba i gbe u a wase ve la iwasen shi se taver ve ishima. (Yak. 2:15, 16) Nahan kpa, aluer se mba nôngon ser se wase ve sha imba gbenda ne, sha u tindin ior a ilyoho wuee yô, a lu branci shin tiônnongo ican kpishi u wasen ve sha gbenda u hemban doon cii la. (1 Tim. 5:3, 4, 9, 10, 16) Shi or wase môm kpa nana soo ér nana na mbagenev ve nenge ér i wa nan tom u nengen sha iyôngo i Aôndo ga.

Ka se soo u eren kwagh u una va Aôndo a icivir yô. (1 Kor. 10:31) Nahan zum u u tsough u eren tom a ma gbenda u tindin ior a ilyoho shin eren tom a iwavaren i ainge ne sha igbenda igen yô, hen sha akaabo a aa fatyô u duen ker la, nahan wa ikyo.