1. Er nan ve Yesu yange sôn Yehova ér a kura mbahenen nava?

HEN tugh mbu Yesu mase lun uma shin tar la, lu henen sha mbamzeyol mba mbahenen nav vea tagher a mi yô. Er mbahenen mba Yesu doo un ishima yô, yange sôn Ter na ér a “kura ve, sha ci u iferor.” (Yoh. 17:14, 15) Yesu yange fa er una hide a yem sha ve Satan Diabolo una za hemen u nôngon ityav a ior mba ve soo u civir Yehova yô. Sha nahan yô, gba u a kura ior mba Yehova.

2. Se er nan ve se lu a vangertiôr ser, Yehova una ungwa mbamsen aseva?

² Yehova yange ungwa msen u Yesu la sha ci u Wan Na doo Un ishima. Aluer se mba nôngon sha afatyô wase u eren ishima i Yehova yô, un kpa una soo se shi una ungwa mbamsen asev nahan una wase se shi una kura se kpaa. Yehova ka Ter u lun a dooshima, nahan una za hemen u nengen sha mbayev nav. Aluer a er nahan ga yô, kwagh la una va a ilyahan sha iti na shin una vihi un iti.

3. Kwagh gba se a mkor u Yehova la nyian sha ci u nyi?

³ Kwagh gba se a mkor u Yehova la hegen hemba ave a tse. I zenda Satan sha, nahan ‘ishima vihi un tsung.’ (Mpa. 12:12) A tsugh ior mbagenev ve hen ér, aluer mba tôvon se a ican yô, mba eren “Aôndo icighantom.” (Yoh. 16:2) Ior mbagenev mba ve ne Aôndo jighjigh ga yô, ka ve tôvon se a ican sha ci u se mba kposo a ior i tar ne. A lu nyi je i ne ve ior ve tôvon se a ican kpa, mayange se cia ga. Sha ci u nyi? Sha ci u Mkaanem ma Aôndo kaa ér: “Ter ka u jighjigh, una na ne agee shi una kura ne sha ikyev i Iferor.” (2 Tes. 3:3) Yehova kuran se nena? Se time sha igbenda ihiar i a eren kwagh ne yô.

4. Sha kwagh u Mbaefese 6:13-17 a er yô, ka nyi Yehova a ne sha u kuran se?

⁴ Yehova na se akaa a wuhan iyol i utya a aa kura se ken num u Satan a lu nôngon a vese ne yô. (Ôr Mbaefese 6:13-17.) Akaa a wuhan iyol i utya a Aôndo a ne se la a taver iyol shi ka a er tom tsembelee. Kpa saa se luun a akaa ne iyol hanma shighe ve aa kura se ye. Akaa a wuhan iyol i utya la, hanma yô tile sha ityough ki nyi? De se time sha mi môm môm.

5. Kwange u i lu mimi la ka nyi, man gba u se tsule u sha ci u nyi?

⁵ Kwange u i lu mimi la, ka mimi u ken Bibilo i i lu Mkaanem ma Aôndo la. Gba u se tsule kwange la sha ci u nyi? Ka sha ci u, Satan ka “ter u mbaerenaie.” (Yoh. 8:44) A ndera eren aie ka kwagh u nyian a mi ga, shi ngu “tsughun tar jimin cii.” (Mpa. 12:9) Kpa mimi u a lu ken Bibilo la kor se sha mbaaie nav mbara. Ka se tsule kwange u sha injakwagh ne nena? Ka se er kwagh ne sha u henen mimi sha kwagh u Yehova shi civir un “ken jijingi man sha mimi kpaa.” Shi ka se er kwagh ne sha u eren akaa cii sha mimi.—Yoh. 4:24; Ef. 4:25; Heb. 13:18.

6. Rigautya u i lu perapera la ka nyi, man er nan i gbe hange hange u se hua unu?

⁶ Rigautya u i lu perapera la ka atindi a Yehova a perapera je la. Er nan i gbe u se hua rigautya laa? Er rigautya ka a kura ishima i orshoja nahan, kape rigautya u i lu perapera la kpa ka a kura se sha er se palegh akaabo a i eren shin tar ne la je la. (Anz. 4:23) Yehova soo ér se civir un a ishima yase cii shi se soo un a ishima i môm. (Mat. 22:36, 37) Sha nahan yô, Satan ka a nôngon ér se de civir Yehova a ishima yase i môm ga. Ka a soo ér ishima i lu se ta ta ta, se soo akaa a taregh kpaa man ka i lu akaa a a doo Yehova ishima ga yô. (Yak. 4:4; 1 Yoh. 2:15, 16) Kpa ka una faan ityô sha gbenda la ga yô, a hide a gba nôngon ér una tôv se a ican nahan se per atindi a Yehova.

7. Ka se hua rigautya u i lu perapera la nena?

⁷ Ka se hua rigautya u i lu perapera la sha u kuran atindi a Yehova a we, a tese akaa a a lu a vough man a a lu a vough ga la ken uma wase. (Ps. 97:10) Alaghga mbagen vea nenge ér, atindi a Yehova ka a yange or u eren kwagh sha ishima i nan. Nahan kpa aluer se de u dondon akaawan a Bibilo ken uma wase yô, se lu er ka orshoja u nan za er rigautya u nan ken utya sha ci u nan nenge ér a yuhwa yum yô. Kwagh la a tese kwaghfan ga cii! Mba Yehova a doo ve ishima yô, atindi a na “yuhwa [ve] ga,” kpa gema ka kwagh u kuran uuma vev.—1 Yoh. 5:3.

8. Inja i u wan akôv shin angahar sha u kohol iyol i pasen loho u dedoo la ér nyi?

⁸ Paulu shi yange taver se ishima ér se wa akôv shin angahar sha u kohol iyol i pasen loho u dedoo u bem. Inja na yô, gba u hanma shighe cii se waan agoyol se keghen a kegh u pasen loho u dedoo u Tartor. Ka sea pasen mbagenev loho u Bibilo la yô, jighjigh wase a seer taver. Ka sea nenge er ior mba Yehova sha tar cii ka ve keren aan a pasen loho u dedoo hanma ijiir i ve lu la nahan, ishima i taver se kpen kpen. Ikyav i tesen yô, ka ve pase kwagh ken imakeranta kua sha ajiir a ve a tom kua sha uya uya man sha ajiir a ior ve eren ikpenga yô kua shighe u ve ze u yamen akaa ken kasua nahan cii. Shi ka vea za anmgbianev vev inya mba ve lu Mbashiada mba Yehova ga shin vea lamen a ior mba ve fe ve yô, ve pase ve kwagh. Kpa aluer se nyôr mciem je se de u pasen kwagh yô, se lu er orshoja u nan za tsough akôv ken utya nahan; kwagh a ngôôr eren nan shin nguhar ga cii. Man kwagh la una na yô, a taver nan u moughon gagher nôngon kwagh a mbahyomov mba nan shighe u i va te num sha a nan yô. Shi nana kera fatyô u dondon wada u kurutya u nan ga.

9. Er nan ve i gbe u se tôô perutya u vesen u i lu jighjigh u nan laa?

 ⁹ Perutya u vesen u i lu jighjigh u nan la, ka jighjigh u se ne Yehova la. Se na jighjigh ser, una va kure uityendezwa nav cii. Jighjigh la una wase se u “pirin avaan a usu a orbo la.” Er nan ve i gbe u se tôô perutya u vesen nee? Ka sha ci u jighjigh la ka a kura se sha er mbavendan mimi vea tsume a vese sha atesen a ve ga, shi zum u ior ve lu nahan se tar sha ci u akaa a se ne jighjigh a mi la kpa, iyol ia kpe se ga yô. Aluer se mba a jighjigh ga yô, zum u ior ve lu meen se ér se per atindi a Yehova kpa se lu a tahav mbu vendan ga. Nahan kpa, hanma kwa u se vende u eren kwagh u Yehova a soo ga hen ijiirtom shin ken makeranta yô, tese ér se tôô perutya wase. (1 Pet. 3:15) Shi hanma kwa u se vende tom u i gbe u ma i kimbin se inyaregh kpishi, kpa ma u gem ma u yange se u eren akaa ken mcivir u Yehova sha ishima yase yô, se tôô perutya wase la. (Heb. 13:5, 6) Shi hanma kwa u i lu hendan a vese kpa se ze hemen u civir Yehova yô tese ér, perutya wase la ngu kuran se.—1 Tes. 2:2.

10. Ka nyi i lu idyerutya i i lu myom laa, man gba u se cir i sha ci u nyi?

¹⁰ Idyerutya i i lu myom la ka ishimaverenkeghen i Yehova a ne se la. Ka ishimaverenkeghen  i se lu a mi ser una va na hanma or u nan eren ishima na cii injar, shi sea kpe je kpa una nder se shin ku la. (1 Tes. 5:8; 1 Tim. 4:10; Titu 1:1, 2) Er idyerutya ka i kura orshoja ityough nahan, kape ishimaverenkeghen i i lu myom la ka i kura mbamhen asev je la. Sha nyi gbenda? Ishimaverenkeghen la ka i na se ver ishima sha uityendezwa mba Aôndo shi i wase se sha er ishima ia yina se sha uzayol asev ga yô. Ka se cir idyerutya ne nena? Ka se er kwagh ne sha u nôngon ser mbamhen asev man mbamnenge asev cii ve zua vea mba Aôndo. U tesen ikyav yô, se mba veren ishima sha inyaregh ki ica a gba ga tsô ki a kar kera ne ga, kpa ka se ver ishima yase sha Aôndo.—Ps. 26:2; 104:34; 1 Tim. 6:17.

11. Ka nyi i lu sanker u jijingi laa, man er nan i gbe u se eren tom a mi?

¹¹ Sanker u jijingi la ka Bibilo i i lu Mkaanem ma Aôndo la. Sanker la ngu a tahav mbu ponon hanma aie cii ken igbar, shi saghen ior ken ikyangenev mbi atesen a aiegh kua aeren a bo. (2 Kor. 10:4, 5; 2 Tim. 3:16, 17; Heb. 4:12) Ka se hen u eren tom a sanker la tsembelee sha u henen kwagh sha tseeneke wase man sha u dondon ityesen i nongo u Yehova u ne se la. (2 Tim. 2:15) Dugh akaa a wuhan iyol i utya la sha yô, Yehova shi kor se sha gbenda u vesen ugen kpaa. Gbenda shon ka nyi?

12. Ka nyi igen kpa kwagh a gbe se a mi, man ka sha ci u nyi?

¹² Orshoja u nan fe ityav yô, ka nan fa ér nana fatyô u nôngon kwagh a ikyumutya i vesen nan tswen shi hemban ga. Ka i gba u ushoja mbagenev vea wase nan. Se kpa se fatyô u hendan a Satan kua mbadondon un se tseegh ga. Gba u anmgbianev asev mba nomso man mba kasev vea wase se. Yehova na se “mzough u anmgbianev” sha tar cii mba ve wasen se yô.—1 Pet. 2:17.

13. Mbaheberu 10:24, 25 tese ér, ka sea za mbamkombo yô ka mbamtsera mba nyi ka se zua a mi?

¹³ Gbenda môm u se zough a iwasen yô ka sha u zan mbamkombo. (Ôr Mbaheberu 10:24, 25.) Se cii iyol ka i kpe se ashighe agen. Zum u kwagh a lu nahan yô, mbamkombo asev vea fatyô u taver se ishima. Mbamlumun mba anmgbianev asev mba nomso man mba kasev ka ve na ken mbamkombo la ka ve taver se ishima kpen kpen. Akaaôron a ken Bibilo a ka i na, kua akav a ka i tese la ka a wase se, se seer kangen ishima u civir Yehova. Shi ka sea lamen vea anmgbianev asev shighe u i ze mkombo kua shighe u i dugh la yô, ishima i taver se. (1 Tes. 5:14) Shi mbamkombo asev ka ve bugh se aan a wasen mbagenev nahan i saan se iyol. (Aer. 20:35; Rom. 1:11, 12) Mbamkombo asev shi ka ve wase se sha igbenda igen kpaa. Ka ve wase se u seer fan igbenda i pasen kwagh shi se seer fan ityesen. Ikyav i tesen yô, ka se hen u pasen kwagh a Akaa a Se Eren Tom a Mi u Tesen Ior Mimi la tsembelee. Nahan yô, waan iyol sha mbamkombo tsembelee. Shi zum u u ze yô, kegh ato zulee. Shi zum u i dugh mkombo kera yô, er tom a akaa a u hen la. Aluer u er akaa ne yô, u hingir “orshoja u dedoo u Kristu Yesu.”—2 Tim. 2:3.

14. Ka hana kpa se fatyô u zuan a iwasene?

¹⁴ Shi mbatyomov mba ageev umiliôn umiliôn kpa mba suen se. Hen ase sha kwagh u ortyom môm tseegh una fatyô u eren la! (Yes. 37:36) Shi hen ase sha kwagh u ikyumutya i mbatyomov mba ageev ia fatyô u eren la. Orumace shin ijôv i môm i môm ia fatyô u nôngon kwagh a ikyumutya i Yehova la hemban ga. Yehova hemba agee cii, nahan aluer ngu a vese yô se hemba mbahyomov asev aluer ve ngee nan nan je kpaa. (Mbaj. 6:16) Sha mimi yô, mkaanem mara ka aie ga. Nahan zum u or u ne eren tom shin ne ze makeranta imôngo gayô or u hen tsombor wou u nan lu Orshiada ga, nan ôr  shin nan er kwagh u nan we iyolkpen yô, hen sha kwagh u ior mba u lu a mi mba wasen we ne. Umbur wer, u ngu nôngon ityav mbin tswen ga. Yehova ngu hemen we.

15. Sha kwagh u Yesaia 54:15, 17 a er yô, er nan i lu u a fatyô u cirin ior mba Aôndo zwa ga?

¹⁵ Tar u Satan a lu hemen u ne ngu a atôakyaa kpishi a kôron se ihyom. Se mba eren pati ga shi se mba nôngon ityav ga. Se mba pasen ior iti i Aôndo shi se mba pasen ser, ka Tartor na tseegh ua va a bem ye. Shi se mba kuran atindi a na a perapera la kpaa. Shi ka se tese ior wang er orhemen u tar ne la a lu iferor u wan aie man or u wuan or yô. (Yoh. 8:44) Shi se mba yôôn ser, ica a gba ga tsô a tim tar u Satan ne. Nahan kpa mayange Satan kua mba ve dondon un la cii vea fatyô u cirin se zwa ér se de u pasen kwagh ga. Nahan kpa, se za hemen u wuese Yehova sha hanma gbenda u se fetyô cii. Er Satan a lu a tahav kpishi nahan kpa, a fatyô u yangen loho u dedoo u Tartor ne u aren a ior sha tar cii ga. Se mba eren tom ne sha ci u Yehova ngu kuran se.—Ôr Yesaia 54:15, 17.

16. Yehova una va yima ior nav sha shighe u zegecan la nena?

¹⁶ Ka nyi i lu keghen se ken hemene? Shighe u zegecan la, Yehova una yima se sha igbenda i kpilighyol ihiar. Hiihii yô, una yima mbacivir un sha mimi shighe u una mgbegha utor mba tar ne ér ve tim Zegebabilon u a lu tartor u kwaghaôndo u aiegh la. (Mpa. 17:16-18; 18:2, 4) Shi una yima ior nav shighe u una lu masen timin tar u Satan ne cii sha shighe u Armagedon la.—Mpa. 7:9, 10; 16:14, 16.

17. Aluer se mba kôôsôô a Yehova yô, ka mtsera u nyi se zua a mi?

¹⁷ Aluer se mba kôôsôô a Yehova yô, Satan una fatyô u eren se kwagh u vihin u una hungwa a vese gbem sha won ga. Ka un i lu u a va tim un kera gbem sha won ye. (Rom. 16:20) Sha nahan yô, hua akaa a wuhan iyol i utya la cii shi mayange de eren ga! De nôngon ityav mbira we tswen ga. Suen anmgbianev ou mba nomso man mba kasev. Shi de Yehova a hemen we. Aluer u er nahan yô, u fatyô u lun a vangertiôr wer, Ter u u sha u u doo un ishima la una taver we shi una kura u kpaa.—Yes. 41:10.