1-2. Ka nyi ka i za hemen shighe u i lu eren ior batisema, man ka nyi se lu timen sha mi ken ngeren nee?

 I LU nahan u nenge i er ior batisema vee? Ka u ungwa mba i lu eren ve batisema la ve na mlumun a ishima i gbar gbar sha mbampin mba uhar mba ka i pine ve cii i mase eren ve batisema la. Shi u nenge i saan ior mba hen icombor ve kua azende a ve iyol kpishi. Ka vea due shin mnger yô, u ungwa ior ve kure ave, shi u nenge or u i mir nan la nan seen mur mur. Hanma kasua yô, ior udubu imôngo ka ve tsegha ayol a ve sha ci u Yehova Aôndo shi ve er batisema, ve hingir Mbashiada nav.

² We di ye? Aluer ka saren we u eren batisema yô, u ngu or u injaa kpishi ken tar u ifer ne, sha ci u u ngu “keren Aôndo.” (Ps. 14:1, 2) Wea lu gumor shin organden kpa, ngeren ne ngu sha ci wou. Kpa se mba i vande eren se batisema kera la kpa se soo ser ma se civir Yehova gbem sha won. Sha nahan yô, de se time nen sha atôakyaa agen atar a se soo u civir Yehova yô.

3. Mimi kua perapera doo mbacivir Yehova ishima sha ci u nyi? (Pasalmi 19:8; 119:128, 163)

³ Yehova yange kaa a ior nav ér ‘mimi a doo ve ishima.’ (Sek. 8:19) Yesu kpa taver mbadondon un ishima ér ve eren kwagh u perapera. (Mat. 5:6) Kwagh ne tese ér gba u or a lu a isharen taveraa u eren kwagh u vough man u dedoo man u wang sha ishigh ki Aôndo. Mimi kua perapera doo u ishima kpa? Se na jighjigh ser ve doo u. Aie man hanma kwagh u bo man u ifer cii vihi u ishima. (Ôr Pasalmi 19:8; 119:128, 163.) Aie ka ieren i Satan, u a lu tor u tar ne la. (Yoh. 8:44; 12:31) Awashima u Satan ugen yô, ka u vihin icighanti u Yehova Aôndo. Yange hii u samber a mbaaie sha kwagh u Aôndo wase shighe u hendan  kwagh a na ken sule u Eden la je. Yange nôngo ér ior ve nenge ér Yehova we iyol na tseegh ikyo shi ka Orhemen u mimi ga, u a nyumen uumace akaa a dedoo yô. (Gen. 3:1, 4, 5) Mbaaie mba Satan a we Yehova iyol ne na yô, uumace za hemen u henen akaabo sha Yehova. Uumace ka vea tsua ér ‘mimi a doo ve ishima’ ga yô, Satan a tuur ve, ve er hanma inja i kwagh u hôngorough man u ifer cii.—Rom. 1:25-31.

4. Yehova tese ér un ngu “Aôndo u mimi” nena? (Shi nenge foto kpaa.)

⁴ Yehova ka “Aôndo u mimi,” man tesen mba a doo ve ishima la mimi shon a iyol tangen shio. (Ps. 31:5) Mimi u a tesen ve la ka a na yô, mbaaie mba Satan mbara ve kera tsume a ve ga. Yehova shi ka a tese mbacivir un kwagh u vea er ve vea lu ior mba mimi man mbaperapera yô. Kwagh ne ka a wase ve ve hemba lun a icivir kua bem u ken atô ishima la. (Anz. 13:5, 6) U hen Bibilo nahan, Yehova er kwagh ne a we kpa? U hen u fa er igbenda i Yehova a eren kwagh la i hembe doon sha ci u wou iyol you kua uumace jimin cii yô. (Yes. 48:17) Nahan u soo wer u eren perapera u Aôndo a lumun a mi la. (Mat. 6:33) Shi u soo wer u pase mimi ior ve fa, shi u tese wer hanma kwagh u Satan a ôr sha iyol i Yehova Aôndo wase cii ka aie. Kpa u er kwagh ne nena?

5. U tese wer mimi kua perapera doo u ishima nena?

⁵ U fatyô u tsuan wer u eren kwagh ken uma wou sha gbenda u tesen wer u ngu kaan wer: “M venda mbaaie mba Satan; ka mimi a doom ye. M soo mer Yehova a hemen mo, shi m soo u eren kwagh u a kaa ér ka u vough la.” U er kwagh ne nena? Er msen hen Yehova, tsegha iyol you sha ci na, maa tese iyoltseghan you la ken igbar sha u eren batisema. Mimi ka una doo or ishima shi a sar nan u eren kwagh u vough yô, kwagh la a mgbegha nan u eren batisema.

6. Ka atôakyaa a nyi nahan u zough a mi ken Pasalmi 45:4 a Yesu una doo u ishima?

⁶ Er nan ve Yesu Kristu a doo u ishima? Nenge a atôakyaa a injaa ken Pasalmi 45:4 (Ôr.) Ieren i mimi man iyolhiden a mi ijime (ishima i legh legh) kua perapera doo Yesu ishima. Nahan aluer u soo ieren i mimi kua perapera yô, Yesu Kristu kpa una doo u ishima. Hen er Yesu yange a ôr kwagh u mimi man u vough a mciem shio la. (Yoh. 18:37)  Nahan kpa, Yesu tese se u hiden a iyol ijime nena?

7. Ka nyi i doo u sha kwagh u ieren i Yesu i hiden a iyol ijime laa?

⁷ Yesu tese ér un ngu or u hiden a iyol ijime sha gbenda u a eren kwagh la. Ikyav i tesen yô, yange or a wuese un kpa, mayange a ngohol icivir la ga, a gema a kaa ér i wuese Ter na. (Mar. 10:17, 18; Yoh. 5:19) U nenge ieren i Yesu i hiden a iyol ijime la nahan, ka u ken ishima nena? Kwagh ne na yô, kwagh u Yesu doo u ishima shi u ngu dondon un, shin ka nahan ga? Er nan ve Yesu a hidi a iyol ijime? Yesu hide a iyol ijime sha ci u Ter na u a hiden a iyol ijime la doo un ishima shi dondon ikyav Na. (Ps. 18:35; Heb. 1:3) Er Yesu a kaven Yehova vough vough yô, kwagh na doo u ishima ga he?

8. Yesu ngu Tor wase nahan, doo se sha ci u nyi?

⁸ Se soo ser Yesu a lu Tor wase, sha ci u un ka Orhemen u a hembe fan kwagh yô. Shi ka Yehova iyol na a tsaase Wan na, shi a tsough un ér a hemen se ye. (Yes. 50:4, 5) Hen ase sha dooshima u tangen iyol ga u Yesu a tese se la. (Yoh. 13:1) Er Yesu a lu Tor wou yô, gba u u naan un civir. Yesu yange kaa ér mba un yer ve shi un doo ve ishima la ka ve tese dooshima la sha u kuran atindi a na. (Yoh. 14:15; 15:14, 15) Ka kwagh u icivirigh kpishi u lun ijende i Wan u Yehova!

9. Batisema u Yesu er la zua sha u mbadondon un la nena?

⁹ Yesu wa tindi ugen ér mbadondon un ve er batisema. (Mat. 28:19, 20) Shi yange ver se ikyav sha kwagh ne. Batisema u Yesu er la kaha kposo a u mbadondon un la sha igbenda igen. (Nenge ngeren u kiriki u a lu a itinekwagh ér, “ Batisema u Yesu la Kaha Kposo a Batisema u Mbadondon Un” la.) Kpa batisema na la zua sha u mbadondon un la sha igbenda igen. Yesu yange er batisema u tesen ér un na uma na sha u eren ishima i Ter na. (Heb. 10:7) Mbadondon Kristu kpa ka ve er batisema u tesen ken igbar ér ve tsegha ayol a ve sha ci u Yehova Aôndo. Kwagh ne ka a tese ér ve har uma ve cii sha u eren ishima i Aôndo, kera ka u eren ishima ve ga. Sha nahan yô, mba dondon ikyav i Orvesen ve la.

10. Ka sha atôakyaa a nyi nahan Yesu a doo u ishima, man doo u kwagh la una mgbegha u u eren nyi?

¹⁰ U na jighjigh wer Yesu ka Wan u Yehova u môm môm, shi saan we iyol er Aôndo a tsough un ér a lu Tor wase yô. U fa er Yesu a lu or u hiden a iyol ijime kpishi, shi a bee Ter na vindi vindi yô. Shi u fa er yange na ior mba ijen kôr ve la kwaghyan, taver mba iyol kpe ve la asema, shi bee ior angev je kpaa yô. (Mat. 14:14-21) Heela tseegh ga, u ngu nengen er a lu hemen tiônnongo na nyian yô. (Mat. 23:10) Shi u fa je wer, er a lu Tor u Tartor u Aôndo yô, una va er akaa a doon kpishi sha ci wase ken hemen. Nahan u tese wer Yesu doo u ishima nena? U tese sha u dondon ikyav i a ver se la. (Yoh. 14:21) Kwagh môm ken akaa a i gbe u u hii eren u tesen wer Yesu doo u ishima yô, ka u tseghan iyol you sha ci u Yehova shi eren batisema.

11. Ityôkyaa i hemban cii i se eren batisema yô, ka nyi?

¹¹ Ityôkyaa i hemban cii i ka se er batisema yô, ka nyi? Yesu pase tindi u hemban cii ken atindi a Aôndo, a kaa ér: “Yehova Aôndo wou a̱ doo u ishima kpee je, a ishima you cii man a uma wou cii man a mhen wou cii man a agee a ou cii.” (Mar. 12:30) Aôndo doo u ishima er Yesu a ôr nahan kpa?

12. Yehova doo u ishima sha ci u nyi? (Shi nenge foto kpaa.)

¹² Atôakyaa nga kpishi a Yehova a doo se ishima yô. Ikyav i tesen yô, u fa er a lu “imbor i uma,” man er i lu un a ne se “hanma nagh ku  dedoo man hanma iwua i vough kpaa” yô. (Ps. 36:9; Yak. 1:17) Hanma kwagh u dedoo u u lu a mi cii due ka hen Aôndo wase u se doo un ishima shi a ne kwagh mgbeghaa la.

13. Er nan ve nagh ku ipaan ku lu iyua i injaa kpishi?

¹³ Nagh ku ipaan kura ka iyua i injaa i Yehova a ne se yô. Se ôr nahan sha ci u nyi? Nenge ase er Yehova a ye ijende vea Wan na kangenaa yô. Yesu kaa ér un doo Ter na ishima, shi a kaa ér Ter na doo un ishima. (Yoh. 10:17; 14:31) Ijende ve lu taver seer a seer shighe u ve lu imôngo anyom ubiliôn imôngo cii Yesu mase van shin tar la. (Anz. 8:22, 23, 30) Nahan hen ase er yange a nyoon Aôndo kpishi u den ér Wan na a va ya ican shi a kpe yô. Uumace doo Yehova ishima kpishi, kua we kpaa, je yô yange kegh iyol u nan nagh sha Wan na u ishima ishima la sha er we kua ior cii ne fatyô u lun uma gbem sha won yô. (Yoh. 3:16; Gal. 2:20) Ka ityôkyaa i hemban cii i Aôndo a doo se ishima je la.

14. Ka kwagh u hemban doon u nyi u fatyô u eren ken uma wou we?

¹⁴ Yehova seer doon we ishima sha ci u u seer henen kwagh na. Sha nahan yô, u soo je wer u seer kporom hen a na hegen, shi u za hemen u eren nahan zan zan gbem sha won. Shi u fatyô u eren nahan kpaa. Ngu taver we ishima ér we u na i saan un iyol. (Anz. 23:15, 16) U fatyô u eren kwagh ne sha zwa tseegh ga,  kpa kua sha ieren you kpaa. Ka ieren you ia tese ér Yehova doo u ishima sha mimi ye. (1 Yoh. 5:3) Aluer u tsua u eren ishima i Yehova ken uma wou yô, ka kwagh u hemban doon sha won cii je u tsough ye.

15. U tese wer Yehova doo u ishima nena?

¹⁵ U tese wer Yehova doo u ishima nena? Hiihii yô, er msen a ishima you i môm, tsegha iyol you sha ci u Aôndo u a lu u mimi tswen la. (Ps. 40:8) Maa tese iyol i u tsegha ken myer la ken igbar sha u eren batisema. Er se vande ôron ken ngeren ne nahan, batisema u u er la ka kwagh u vesen u van we a msaanyol. Ka wea eren batisema yô, u hii uma u he, u kera lu uma sha ci wou iyol you ga, kpa i lu sha ci u Yehova. (Rom. 14:8; 1 Pet. 4:1, 2) Alaghga u nenge wer kwagh ne ka kwagh u kiriki ga, man kape i lu vough je la. Kpa ken uma wou cii, ka kwagh u una na a hemba saan we iyol je la. Sha nena yô?

16. Ka nyi Yehova una er a mba ve tsough u civir un ken uma ve laa? (1 Yohane 2:25)

¹⁶ Yehova ne kwagh wuee; orgen môm u nan ne kwagh er un nahan nan ngu sha won ga. Hanma kwagh u u ne un cii yô, ka a hide a na u kwagh i hemba u we u ne un la ica je. (Mar. 10:29, 30) Una na a saan we iyol kpishi, ken tar u ifer ne je kpaa. Kpa ka cii la ga; ngura ka mhii di tsô. Gba u uma wou u he u a hii sha batisema u u er la una kure ga. U fatyô u civir Teru u u doo un ishima la zan zan gbem sha won. Teru una lu doon we ishima seer a seer, shi we kpa u za hemen u doon un ishima, nahan u lu uma gbem sha won, er un nahan.—Ôr 1 Yohane 2:25.

17. Ka nyi Yehova a lu a mi ga i we u fatyô u nan unu?

¹⁷ Aluer u tsegha iyol you sha ci u Aôndo shi u er batisema yô, u zua a ian i icivirigh i nan Teru kwagh u injaa kpishi. A na u hanma kwagh u doon cii, kua hanma kwagh u a er u van we a msaanyol cii. We di u fatyô u nan Or u a gbe sha man tar la kwagh u un a lu a mi ga yô, man kwagh shon yô, ka u civir un a ishima you cii. (Yobu 1:8; 41:11; Anz. 27:11) Ka kwagh u i hembe doon u u er ken uma wou je la. Yehova doo u ishima je ka u henen a hen ga, man ka ityôkyaa i i hembe doon u u er batisema kpaa je la.

18. Ka mbampin mba han u fatyô u pinen iyol you we?

¹⁸ Aluer i pine u ér, U soo u eren batisema? nahan, u kaa wer nyi? Ka we tswen u fatyô u nan mlumun sha mpin la ye. Kpa aluer u pine iyol you wer, ‘Ka nyi i lu yangen mo u eren batisema?’ yô, kwagh la una wase u. (Aer. 8:36) Umbur atôakyaa atar a se tim sha mi la. Hiihii yô, mimi man perapera doo u ishima. Nahan pine ase iyol you wer, ‘M soo u va lun uma shighe u hanma or nana ôron kwagh u mimi shi nana eren kwagh u vough laa?’ Sha uhar yô, Yesu Kristu doo u ishima. Pine ase iyol you wer, ‘M soo mer Wan u Aôndo a lu Tor wam shi me dondo ikyav na laa?’ Sha utar man u hemban cii yô, Yehova doo u ishima. Pine ase iyol you wer, ‘M soo mer me na i saan Yehova iyol sha u civir un mer ngu Aôndo wam kpa?’ Aluer mlumun wou sha mbampin mban cii ka een yô, er nan u er batisema ga? Ka nyi i lu yangen we?—Aer. 16:33.

19. Er nan ve i doo u u timbir u eren batisema ga? Tese ikyav. (Yohane 4:34)

¹⁹ Aluer u ngu timbir u eren batisema yô, time sha injakwagh igen i Yesu ôr yô. (Ôr Yohane 4:34.) Fa wer Yesu tôô u eren ishima i Ter na la kar sha kwaghyan. Sha ci u nyi? Kwaghyan ngu a inja sha ci wase. Yesu fa er hanma kwagh u Yehova a kaa ér se er cii a lu a inja sha ci wase yô. Yehova soon ér se er ma kwagh u kwaghbo una due ker ga. Yehova soo ér we u er batisemaa? Een. (Aer. 2:38) Nahan yô, na jighjigh wer aluer u ungwa imo na, u er batisema yô, kwagh la una wase u. Aluer u zua a kwaghyan u hemban doon u i gbe je u lu a ya ga nahan, u timbir u yana? U timbir ga, nahan tsô er nan ve u lu timbir u eren batisema?

20. Ka nyi se lu timen sha mi ken ngeren u a dondo laa?

²⁰ Ka nyi i lu yangen mbageneve? Alaghga ior kpishi vea kaa ér, “M ngu a wa iyol ga.” Jighilii yô, fa wer aluer u tsegha iyol you sha ci u Yehova shi u er batisema yô, u tsua ka kwagh u vesen u hemban cii. Sha nahan yô, gba u u hen sha kwagh u eren batisema la zulee, shi u nôngo kwagh kpoghuloo, shi shighe a kar cii ve, u kuma u eren we batisema ye. Kpa aluer mimi je sar u u eren batisema yô, ka nyi u fatyô u eren hegen sha er u kuma? Se time sha mlumun u sha mpin ne ken ngeren u a dondo la.