1-2. Wea lu a wa iyol i eren batisema u bee ga kpa, doo u u gba uwer ga sha ci u nyi? (Nenge foto u sha igbende.)

 ALUER sar u u eren batisema yô, ka kwagh u dedoo je u tsough u eren ye. U wa iyol i eren batisema u bee vee? Aluer u na jighjigh wer u wa iyol bee, shi mbatamen lumun yô, de deen wer ian i eren batisema i i lu van ne i kar u ga. Aluer u er batisema yô, a saan we iyol kpishi ken mcivir u Yehova.

² Kpa, i lu nahan or ôr a we ér gba u u seer vesen ken jijingi ve u kuma u a er u batisema vee? We iyol you kpa u nenge nahana? Aluer ka nahan yô, de gbe uwer ga. U fatyô u seer vesen, nahan eren kwagh u hange hange ne, wea lu wanye shin organden kpaa.

3. Oretiopia u eren tom hen ya u tor la yange pine Filibu ér nyi, man ka mpin u nyi a dugh sha kwagh nee? (Aerenakaa 8:36, 38)

³ Ôr Aerenakaa 8:36, 38. Oretiopia u eren tom hen ya u tor la yange pine orivangeli Filibu ér: “Shi ka nyi ia yangem u eren batisema?” Yange sar Oretiopia la u eren batisema, kpa mimi je yange wa iyol i eren kwagh u vesen ne bee?

4. Oretiopia la yange tese ér un soo u zan hemen u henen kwagh nena?

⁴ Oretiopia la “yange za ken Yerusalem za civir Aôndo.” (Aer. 8:27) Sha nahan yô, a shi nan kpa yange ngohol ityesen i kwaghaôndo u Mbayuda la. Yange hen kwagh u Yehova ken mkaanem ma Aôndo ma i nger ken Ruamabera u ken zwa Heberu la. Nahan cii kpa, sar un kpishi u seer fan kwagh u Yehova. Jighilii yô, zum u Filibu zua a ortom u hen ya u tor la sha  gbenda la, Filibu nenge or shon lu eren nyi? Yange lu ôron ihyurenruamabera u profeti Yesaia nger yô. (Aer. 8:28) Lu akaa a mimi a ken Bibilo a zan shimi je lu ôron ye. Or ne yange fa atesen a Bibilo a vesen agen di tsô maa kuma un ga; yange soo ér una za hemen u henen kwagh.

5. Oretiopia la yange er nyi sha kwagh u hen ken Bibilo laa?

⁵ Oretiopia la lu ortom u tagher tagher sha ikyev i Kandesi, torkwase u Mbaetiopia, “nengen sha akaa a [Kandesi] cii.” (Aer. 8:27) Nahan ka keng yange una lu a ityom kpishi. Kpa yange a tôô shighe a civir Yehova. Lu henen mimi u Bibilo tseegh maa kuma un ga; kpa lu eren sha kwagh u lu henen la. Ka nahan ve yange mough ken Etiopia je za gôgô zende u za civir Yehova ken tempel ken Yerusalem ye. Ka keng zende la yange ua tôô un shighe shi una vihi inyaregh kpishi, kpa soo u civir Yehova, nahan lu u nyityô kwagh kpa una er u civir Yehova.

6-7. Yehova yange za hemen u doon Oretiopia la ishima nena?

⁶ Oretiopia la yange hen akaa a mimi a vesen a he hen Filibu. Kwagh môm ken akaa shon yô, i pase un er Yesu a lu Mesiya yô. (Aer. 8:34, 35) Ortom u hen ya u tor ne fe kwagh u Yesu a er sha ci na la yô, saan un iyol kpishi. Nahan a er nena? Yange una soo kpa ma lu ken kwaghaôndo u Mbayuda, u i naan un icivir ker la her. Kpa kwagh u Yehova kua Wan Na doo or ne ishima kpishi. Nahan maa tsua kwagh u vesen ken uma na, ér una er batisema, una hingir ordondon Yesu Kristu. Er Filibu nenge or shon kuma u a er un batisema yô, a er un batisema.

⁷ Aluer u dondo ikyav i Oretiopia la yô, we kpa u kuma u eren we batisema. We kpa u fatyô u ôron vangertiôr wer, “shi ka nyi ia yangem u eren batisema?” De se nenge er u fatyô u eren akaa a Oretiopia la er la yô: Yange za hemen u henen Bibilo, shi lu dondon kwagh u lu henen la, shi Aôndo lu doon un ishima seer a seer.

8. Yohane 17:3 kaa ér gba hange hange u u er nyi?

⁸ Ôr Yohane 17:3. Ka mkaanem ma Yesu man yange ma wase u u tsua u henen Bibilo yee? Se kpishi ka ma. Mkaanem ma shon shi kaa a vese ér se za hemen u henen kwagha? Een. Mayange se de u “keren u fan . . . Aôndo u mimi tswen” la ga. (Orpa. 3:11) Ka u se za hemen u henen kwagh gbem sha won. Er se lu henen kwagh zan hemen la, se lu kporom ikyua a Yehova seer a seer.—Ps. 73:28.

9. Shighe u se hen atesen a Bibilo a vesen la se bee kera yô, ka nyi i gbe u se ere?

⁹ Ka sea hiin u henen kwagh u Yehova yô, se  hen atesen a Bibilo a vesen la tseegh. Apostoli Paulu yange yila atesen a Bibilo a vesen la ken washika u nger hen Mbaheberu la ér “akaa a yange [se] hii henen.” Lu kaan ér “akaa a yange i hii tesen se” la ka a kiriki ga, kpa lu tôôn a karen sha atumba a ka a wase wan nan vese la. (Heb. 5:12; 6:1) Paulu shi taver Mbakristu cii ishima ér ve za hemen u henen kwagh, ve de saan sha atesen a yange ve hii henen la ga, shi ve seer henen akaa a mimi a Mkaanem ma Aôndo ma tese la i za shimi. Sar u u henen atesen a Bibilo a a ze shimi laa? U soo wer u za hemen u vesen, shin u za hemen u henen kwagh u Yehova kua akaa a a we ishima u eren laa?

10. Er nan ve ka i taver mbagenev u henen kwagha?

¹⁰ Nahan kpa, se mbagenev kpishi ka i taver se u henen kwagh. We ka i lu u nena? Shighe u u lu ken makeranta la, yange u hen takeda u ôron kua gbenda u henen kwagh tsembelee kpa? Yange i doo u u henen kwagh shi u nenge wer u fa akaa kpishi kpa? Shin yange u nenge wer u fetyô u henen kwagh ken ityakeda gaa? Aluer kape yange i lu u la yô, ka we tseegh ga. Nahan kpa, Yehova una wase u. Yehova yina sha ma gbenda môm môm ga, shi a hemba fan ityesen a hanma orgen cii.

11. Yehova tese ér un ngu ‘Ortesen u Hemban’ nena?

¹¹ Yehova kaa ér un ngu “Ortesen wou Uhemban.” (Yes. 30:20, 21, NWT) Un ka Ortesen u a we ishima, a eren kwagh a ior kundu kundu shi a kaven mbamlu vev yô. Ka a hemba veren ishima sha kwagh u dedoo u a lu ken mba a tesen ve la. (Ps. 130:3) Shi mayange veren ishima ér se er ma kwagh u a gande agee a ase ga. Umbur wer ka un a er mhirinim ou ye. Mhirinim ka iyua i kpilighyol kpishi. (Ps. 139:14) Sha mar wase je, ka se lu a isharen i henen kwagh. Aôndo u a gbe se la soo ér se hen kwagh gbem sha won, shi kwaghhenen a doo se. Sha nahan yô, doo u mimi u Bibilo una sar se hegen tsung. (1 Pet. 2:2) Tsua akaa a u fatyô u eren yô, ôron Bibilo hanma iyange shi henen i kpaa. (Yos. 1:8) Nahan sha iwasen i Yehova yô, a va doo u u ôron Bibilo shi henen kwagh u Yehova seer a seer.

12. Gba u se ver ishima sha kwagh u uma u Yesu kua tom na u pasen kwagh la ken kwaghhenen wase sha ci u nyi?

¹² Hanma shighe yô, henen sha uma u Yesu kua tom na u pasen kwagh la. Saa se zaan sha angahar a Yesu vough vough ve se fatyô u civir Yehova ye, hemban cii je yô ken ashighe a ican ne. (1 Pet. 2:21) Yesu yange pase mbadondon un wang ér vea tagher a mbamzeyol. (Luka 14:27, 28) Nahan kpa, yange lu a vangertiôr ér mbadondon un mba mimi vea za hemen u civir Aôndo sha mimi er un nahan. (Yoh. 16:33) Hen sha kwagh u uma u Yesu vighe vighe, nahan tsua akaa a u er sha u dondon ikyav na la ayange ayange yô.

13. Ka nyi i gbe u u za hemen u sônon Yehova, man ka sha ci u nyi?

¹³ U fan Mkaanem ma Aôndo la tseegh kuma ga. Ka i gba u u zua a mfe la keng keng sha er u seer fan kwagh u Yehova shi u lu a aeren a na yô. (1 Kor. 8:1-3) Er u lu henen kwagh zan hemen la, sônon Yehova wer a wase u u seer lun a jighjigh u nan. (Luka 17:5) Ngu a kegh ato a imba msen la hanma shighe cii. Aluer u ngu a jighjigh u nan u mimi u a har sha mfe u vough u Aôndo wase la yô, kwagh la una wase u u eren akaa agen kpaa.—Yak. 2:26.

14. Ka nyi apostoli Peteru yange ôr u tesen ér gba hange hange u se eren kwagh u se henen ken Bibilo laa? (Shi nenge foto kpaa.)

¹⁴ Apostoli Peteru yange pase er i gbe hange hange u mbadondon Kristu vea za hemen u eren sha kwagh u ve lu henen ken Mkaanem ma Aôndo yô. Yange ter kwagh u Bibilo i ôr  sha kwagh u Noa yô. Yehova yange kaa a Noa ér un ngu va timin mbaaferev mba sha ayange la sha mngerem ma deemee. Lu u Noa una fa kwagh ne tseegh tsô maa una war mtim la a tsombor na imôngo ga. Fa wer Peteru ôr kwagh ter shighe u Mngerem ma Deemee lu a va ga la, ér “zum u i lu gban tso” la. (1 Pet. 3:20) Sha kpôô yô, Noa vea tsombor na yange ve er kwagh u Aôndo tese ve la, ve gba zege tso. (Heb. 11:7) Peteru maa tôô kwagh u Noa er la kar sha batisema, a nger ér: “Kwagh ne zua sha batisema, u un kpa a lu waren ne hegen” ne. (1 Pet. 3:21) Sha nahan yô, se fatyô u tôôn tom u u lu eren hegen wer u nôngo i er u batisema ne, karen sha tom u gban tso, u Noa er vea tsombor na anyom kpishi la. Ka tom u nyi nahan i gbe u u er ve u kuma u a er u batisema?

15. Ka nyi se er ve a tese ér se gema ishima sha mimi?

¹⁵ Kwagh môm ken akaa a i gbe u se hii eren yô, ka u geman ishima sha asorabo a ase sha mimi. (Aer. 2:37, 38) Aluer se gema ishima sha mimi yô, se de aeren a ase a doon ga la sha mimi. U de u eren akaa a Yehova a soo ga, er idya man taav u man, shin ityuhwanev man iliam i dang nahan vee? (1 Kor. 6:9, 10; 2 Kor. 7:1; Ef. 4:29) Wea lu a de ga yô, nôngon her wer u de. Ker iwasen man kwaghwan hen or u nan henen Bibilo a we la, gayô hen mbatamen mba hen tiônnongo wou. Aluer u ngu gumor shi u ngu vea mbamaren ou hen ya yô, za hemen u pinen ve iwasen sha er u fatyô u den hanma inja i dang i ia fatyô u yangen we u eren batisema yô.

16. Aluer se soo u civir Yehova hanma shighe yô, ka nyi i gbe u se ere?

¹⁶ Shi gba hange hange u se eren akaa a ken jijingi hanma shighe. Akaa shon yô, ka u zan mbamkombo mba tiônnongo shi wan zwa sha akaa a i lamen sha mi la. (Heb. 10:24, 25) Shi u va kuman u eren tom u Mbakristu u pasen kwagh la je maa, nôngo duen kwaghpasen vea tiônnongo hanma shighe cii. Aluer u ngu eren tom ne kpoghuloo yô, ua lu doon we seer a seer. (2 Tim. 4:5) Aluer u ngu gumor shi u ngu hen ya vea mbamaren ou yô, pine iyol you wer: ‘Ka i gba u saa mbamaren av vea umbur mo ve me za mkombo shin me due kwaghpasen yee? Shin ka m er akaa ne a ishima yama?’ Aluer u ngu karen a ishima you eren akaa ne yô, u ngu tesen wer u na Yehova Aôndo  jighjigh shi u wuese un shi a doo u ishima. ‘Aeren a tesen ér u ngu civir Aôndo’ ne ka uiyua mba u lu nan Yehova yô. (2 Pet. 3:11; Heb. 13:15) Uiyua mba ka se na a ishima yase la ka ve doo Aôndo wase kpishi. (Nenge 2 Mbakorinte 9:7.) Ka se er akaa ne sha ci u ka sea na Yehova kwagh u hemban doon yô, i saan se iyol.

17-18. Ka ieren i nyi ia wase u ve u fatyô u taver ishima zan zan eren batisema, man ia wase u nena? (Anzaakaa 3:3-6)

¹⁷ Er u lu nôngon wer u er batisema ne, u lu tagher a mbamtaver. Alaghga ior mbagenev vea naha u tar sha ci u ityesen i he i u hii u dondon ne, adooga vea hendan a we shin vea tôv u a ican je kpaa. (2 Tim. 3:12) Alaghga u ngu nôngon kpoghuloo wer u de u eren ma kwagh u u fe wer ka kwaghbo yô, kpa ashighe agen ka u er kwaghbo shon. Shin alaghga u nenge wer saa shighe a kar naleghaa ve u va kuma u eren kwagh u u tsough la ye, nahan maa ishima ia yina u gayô iyol ia kpe u. Ka nyi ia wase u ve u taver ishima? Saa Yehova una doo u ishima; ka ieren i vesen i ia wase u u taver ishima je la.

¹⁸ Aluer Yehova doo u ishima yô, ka ieren i dedoo je u lu a mi ye, ka kwagh u hemban ken akaa a u lu a mi cii. (Ôr Anzaakaa 3:3-6.) Aluer Aôndo doo u ishima sha mimi yô, shighe u u tagher a mbamzeyol je kpa, u de u civir un ga. Bibilo ka i pase er Yehova a tesen mbacivir un dooshima u geman ga la yô. Inja na yô, mayange Yehova una undu mbacivir un shin vea de u doon un ishima ga. (Ps. 100:5) Aôndo gba u sha inja i mlu na. (Gen. 1:26) Nahan u tese wer u ngu a dooshima na la nena?

19. U er nan ve u hemba tesen iwuese sha akaa a Yehova a er sha ci wou laa? (Mbagalatia 2:20)

¹⁹ Hii sha u sughun Aôndo. (1 Tes. 5:18) Hanma iyange yô, pine iyol you wer, ‘Yehova tesem dooshima nena?’ Maa nôngo sha afatyô wou cii er msen sugh Yehova sha akaa a a er sha ci wou la cii, ter a sha ati ati. Nenge akaa a Yehova a er u tesen se dooshima la wer ka sha ci wou jighilii je a er a ye, er apostoli Paulu kpa va hingir u nengen a nahan. (Ôr Mbagalatia 2:20.) Pine iyol you wer, ‘M soo mer me tese Yehova dooshima sha akaa a a er sha ci wam la kpa?’ Aluer Yehova doo u ishima yô, dooshima la una wase u u za hemen u hendan a ameen shi taver ishima shighe u u tagher a mbamzeyol je kpaa. Shi dooshima la una mgbegha u u za hemen a akaa a u eren sha ci  u Yehova la, u lu tesen Teru dooshima ayange ayange.

20. Ka nyi i gbe keng u u er sha u tseghan iyol you sha ci u Yehova, man kwagh ne ka kwagh u vesen sha ci u nyi?

²⁰ Shighe a karen yô, u tese wer Yehova doo u ishima sha u eren msen tseghan iyol you sha ci na. Umbur wer, ka wea tseghan iyol you sha ci u Yehova yô, u hingir u lun a ishimaverenkeghen i doon kpishi wer: U fatyô u lun kwagh na gbem sha won. Ka wea tsegha iyol you sha ci u Yehova yô, kwagh la a tese ér u tôndo zwa a na wer u civir un sha ashighe a doon man a doon ga kpaa. Er u er ityendezwa ne je u er; a kera gba u u kimbir eren i mayange ga. Jighilii yô, shighe u se lu tseghan iyol yase sha ci u Yehova yô, se mba tsuan kwagh u vesen ken uma wase. Kpa hen ase sha kwagh ne: U fatyô u tsuan akaa imôngo ken uma wou, agen a lu a doon kpishi, kpa mayange u fatyô u tsuan kwagh ugen u hemban doon a u tseghan iyol you sha ci u Yehova ga. (Ps. 50:14) Satan una lu nôngon ér Teru a de doon we ishima ga, veren ishima ér we u va de u civir Aôndo sha mimi. Mayange de deen wer Satan a hemba ga! (Yobu 27:5) Aluer Yehova doo u ishima kpishi yô, dooshima la una wase u u eren kwagh u u tsegha iyol you sha ci u Teru u sha la wer u er la, shi u hemba kporom ikyua a na cii.

21. Se fatyô u kaan ser batisema ka mkur u hanma kwagh ken uma ga, kpa ka mhii u uma u he sha ci u nyi?

²¹ U tseghan iyol you sha ci u Yehova kera yô, lam a mbatamen mba hen tiônnongo wou sha kwagh u vesen ugen u i gbe u u er la, ka batisema je la. Nahan kpa, umbur hanma shighe cii wer, u eren batisema yô maa, u bee hanma kwagh ga, kpa u hii a hii uma u he di tsô. Batisema ka mhii u uma wou u he u civir Yehova a ikighir shio. Sha nahan yô, nôngo Teru a seer doon we ishima hegen. Tsua akaa a u soo u va eren sha ci u Yehova la, sha er una za hemen u doon we ishima seer ayange ayange yô. U er nahan yô, kwagh ne una na u soo u eren batisema. Nahan a saan we iyol sha iyange i batisema wou la kpishi. Kpa a lu mhii u uma wou u he di tsô. Yô, Yehova man Wan na ve za hemen u doon we ishima seer gbem sha won!