Er nan ve or u i yer un ken Bibilo ér “Via la” yange kaa ér aluer un vôso Rutu yô, kwagh la una “vihi” dyako naa? (Rutu 4:1, 6)

Sha ayange a i ngeren Bibilo la, yange or a mar wan ga man nana kpe a undu inya yô, i er nena a inya laa? Yange kwagh u iti i tsombor u nan cii a bee shinii? Tindi u Mose la yange ta iwanger sha mbampin mban.

Yange or u nan mar wan ga nana kpe a undu inya, shin or a nyôr ken ican man nana tee inya i nan yô, i er a inya shon nena? Yange i lu u anmgbian u nan u nomso u ikyua ikyua shin ma orgen hen tsombor u nan nana fatyô u paan inya la, shin nana hide a yam i. Nahan inya shon i za hemen u lun inya i tsombor u nan la.—Lev. 25:23-28; Num. 27:8-11.

Kwagh ne yange a na iti i tsombor u or u nan kpe la i mire ga sha ci u nyi? Sha ci u anmgbian u nan yange nan vôso kwase u nan kpe nan undu la, er yange i er sha kwagh u Rutu nahan. Or yange nan vôso kwase u anmgbian u nan a kpe a undu la sha er kwase la nana mar wan vea nan, kpa a gema a yilan wan shon a suur sha iti i or u a kpe kera la, shi una ya dyako u inya i or shon nan kpe nan undu la yô. Tindi u Yehova wa u tesen se dooshima ne yange a na yô, kwase u nom u nan a kpe la kpa i nenge sha a nan tsembelee.—Dut. 25:5-7; Mat. 22:23-28.

Nenge ase ikyav sha kwagh u Naomi. Yange vôso orgen, iti na ér Elimeleki. Kpa or ne va saa ku, kua ônov mba nomso uhar mba mar vea Naomi la cii. Maa or kera shi hen tsombor ve la u nana nenge sha Naomi ga. (Rutu 1:1-5) Naomi va hidi yemen ken Yuda vea Rutu, kwase u wan na kpe undu la yô, a kaa a Rutu ér a za kaa Boashi a lu orpaan u inya i tsombor ve la. Boashi lu anmgbian u Elimeleki u ikyua ikyua je. (Rutu 2:1, 19, 20; 3:1-4) Kpa Boashi nenge ér orgen hen tsombor ve, u Bibilo i yer ér “Via la,” hemba ngun anmgbian u ikyua ikyua. Nahan lu u saa or la una tsua u paan inya la shin una venda, ve orgen nana paa i ye.—Rutu 3:9, 12, 13.

Sha hiihii la, “Via la” soo u wasen. (Rutu 4:1-4) Yange fa er i gbe u una vihi inyaregh u yamen inya la yô. Kpa gema nenge yô, Naomi bee iyol kar u una mar wan u nana va ya dyako u inya i Elimeleki la. Una maren ga yô, inya shon kpa ia hingir dyako u un Via la. Nahan a hingir inja er Via la tôô inyaregh nagh yam inya shon ér i va hingir i na nahan.

Kpa Via la nengen ér a gba u saa una vôso Rutu ve una paa inya shon yô, kera soo u paan i ga. A kaa ér: “Me fatyô u paan [i] sha ci wam iyol yam ga, gayô, me va vihi dyako wam.” (Rutu 4:5, 6) Kpa ka nyi jighilii yange i na ve kera soo ga?

Yange lu u Via la shin orgen nana vôso Rutu una mar wan vea nan yô, wan la una ya dyako u inya i Elimeleki kpe undu la. Nahan kwagh ne una “vihi dyako” u Via la nena? Bibilo pase ga, kpa alaghga Via la lu nengen ér kwagh ne una fatyô u vihin dyako na sha igbenda ne nahan.

• Hiihii yô, a lu inja er inyaregh ki un Via la un tôô un yam inya i Elimeleki la ki saa nahan, sha ci u ken masejime yô, a lu inya na ga, kpa a lu inya i wan u Rutu.

• Sha uhar yô, a lu un Via la una koson Naomi kua Rutu shi una nengen sha a ve ye.

• Sha utar yô, aluer Rutu mar ônov mbagenev vea un Via la yô, ve kpa a gba u una kar ve dyako na a ônov nav mbagenev cii.

• Sha unyiin yô, aluer Via shon la lu a ônov mbagenev ga yô, wan u Rutu una mar la nana ya dyako u inya i Elimeleki kua i un Via la cii. Nahan a lu wan u a lu yilan nan suur sha Elimeleki, a lu sha iti i un Via la ga la, nana ya dyako u inya na kpôô kpôô la ye. Sha nahan yô, Via shon la soo u wasen Naomi ér dyako na a vihi ga. Yange soo ér una de Boashi, orpaan u dondo ken a na la, a er kwagh shon sha ci na. Boashi er nahan sha ci u soo ér una “ver orkpen la tse sha dyako na.”—Rutu 4:10.

Ikyav tese ér yange kwagh hemban gban Via la sha kwagh u iti na kua dyako na. Yange soo iyol na tseegh. Kpa iti na i yange soo u kuran i la cii, hingir u saan. Ian i icivirigh i yange ma lu sha mi la kpa kar un, hingir i Boashi. I ter iti i Boashi ken ati a uter mba tsombor u Mesiya, ka Yesu Kristu je la, yange va due ker la. Er Via la tange iyol, venda u wasen or u kwagh tser nan yô, kwagh er un u vihin kpishi!—Mat. 1:5; Luka 3:23, 32.