Ka nagh ku ipaan ku Yesu yange na sha uma na la tseegh ku a na ve Yehova una de se asorabo ase ye. (Ef. 1:7) Nahan kpa, Bibilo kaa ér: “Aôndo lu vanden wan ishima den asorabo a ior lu eren sha ayange a tsuaa la.” Ka shighe u Yesu lu a na nagh ku ipaan kura ga je la. (Rom. 3:25) Ka sha nyi gbenda nahan Yehova lu den asorabo cii ve i va mase nan nagh ku ipaan kura, shi hen shighe shon môm eren kwagh u a lu u vough laa?

Yehova yange tôndo zwa ér una ver “vor” u ua yima mba ve ne Un kua uityendezwa nav jighjigh yô. Nahan shighe u Yehova er ityendezwa ne la je, lu inja er i na nagh ku ipaan kura kera nahan. (Gen. 3:15; 22:18) Aôndo yange fa dedoo ér shighe a va kuman vough yô, Wan na una na nagh kura hen shighe u Aôndo soo ér a na la. (Gal. 4:4; Heb. 10:7-10) Shighe u Yesu lu shin tar kpa lu a na nagh ku ipaan kura ga la je, Yehova na un ian i den asorabo. Yesu yange fa ér nagh ku lu u una na la, ku a cir asorabo a mba ve na un jighjigh la, ka nahan ve yange a de ve a asorabo ye.—Mat. 9:2-6.