1-2. Ka nyi i gbe u or a er ve nana er batisema?

 IOR mba hemban miliôn môm nahan er batisema hingir Mbashiada mba Yehova ken anyom ataan a a kar ne. Man ior mba ve er batisema mban kpishi yange i tese ve mimi ne hii “yev je,” er i tese Timoteu orhenen u sha ayange a mbaapostoli la nahan. (2 Tim. 3:14, 15) Mbagenev ken a ve hen kwagh u Yehova ken ganden, mbagenev yô ka ken iyolbeen. Yange i er kwase ugen u hen Bibilo vea Mbashiada mba Yehova yô batisema sha anyom 97!

² Aluer ka or nan lu henen Bibilo a we, shin ka mbamaren ou mba ve lu Mbashiada mba Yehova la ve lu tesen we kwagh u Yehova kpa, u ngu henen sha kwagh u va eren batisema je he? Aluer ka nahan yô, awashima wou la ka u dedoo! Cii ve u er batisema yô, a gba u u tsegha iyol you sha ci u Yehova. Ngeren ne una pase kwagh u iyoltseghan i lu yô. Shi una wase u u fan ityôkyaa i i ne ve i gbe u u de wer kwagh môm a timbir we u eren kwagh ne ga yô.

KA NYI I LU IYOLTSEGHANA?

3. Ôr akav ahar ken Bibilo a a pase kwagh u ior mba yange ve tsegha ayol a ve sha ci u Yehova yô.

³ Ka a ôron kwagh u iyoltseghan ken Bibilo yô, i ôron kwagh u or u Yehova a tsough nan shin a pav nan a ver kposo sha u nana er ma icighan tom yô. Mbaiserael lu ikyurior i i tsegha i sha ci u Yehova yô. Kpa mbagenev ken a ve yange ve tsegha ayol a ve sha ci u Yehova ér vea er un icighan tom. Ikyav i tesen yô, Aron yange a zer “icighanikyav”  ka kpande u zenaria je la, shi a kange tsar sha ityou. Kpande u zenaria la yange u lu ikyav i tesen ér i tsua un ér a er Yehova icighan tom, ka u lun pristi u vesen u Mbaiserael je la. (Lev. 8:9) Mbanasari kpa yange ve tsegha ayol a ve u eren Yehova icighan tom. I zua a ishember i “Ornasari” la ken ishember igen i ken zwa Heberu, i i yer ér nazirʹ la. Man inja i ishember ne ér “Or u I Ver Nan Kposo” shin “Or u I Tsegha Nan” yô. Yange i gba u Mbanasari vea kuran atindi agen a ken Atindi a Mose wa sha ci ve jighilii yô.—Num. 6:2-8.

4. (a) Ka sha igbenda i nyi nahan, mba ve tsegha ayol a ve sha ci u Yehova la ve ne ayol a ve u eren icighan tomo? (b) Inja i u “nyiman” iyol you la ér nyi? (Shi nenge foto kpaa.)

⁴ Ka wea tsegha iyol you sha ci u Yehova yô, i tese ér u tsua wer u hingir orhenen u Yesu Kristu shi u ver kwagh u Yehova hiihii ken uma wou. Kwagh ne wa nyi man nyi kere? Yesu yange kaa ér: “Aluer or soo u dondon mo yô, nana̱ nyiman iyol i nan.” (Mat. 16:24) Ishember i ken zwa Grika i i gem ér “nana̱ nyiman iyol i nan” la, a fatyô u geman i kpaa ér, “gba u nana de u eren ishima i nan.” Er u tsegha iyol you sha ci u Yehova yô, gba u u palegh u eren nyityôkwagh i i lu sha ishima i Yehova ga cii. (2 Kor. 5:14, 15) Inja na yô, gba u u palegh “aeren a iyolough” er idya nahan. (Gal. 5:19-21; 1 Kor. 6:18) Aluer u ngu dondon atindi ne yô, uma a taver wee? Ei. Aluer Yehova doo u ishima shi u fa wang wer atindi a a we la ka sha ci u iwasen you yô, a taver we ga. (Ps. 119:97; Yes. 48:17, 18) Anmgbian ugen iti na ér Nicholas, a kaa ér: “U fatyô u nengen atindi a Yehova wer nga er ka igyar i purusu i ka i yange or u eren kwagh u nan soo la, shin nengen a wer nga er ka kper u ka a yange begha u tan num sha or nahan.”

5. (a) U tsegha iyol you sha ci u Yehova nena? (b) Ka mkposo u nyi a lu hen atô u iyoltseghan man batisema? (Shi nenge foto kpaa.)

 ⁵ U tsegha iyol you sha ci u Yehova nena? Ka u tôndo zwa a Yehova ken msen wer ka un tseegh u civir ye, shi u ver kwagh na hiihii ken uma wou. Aluer u er nahan yô, u ngu eren iceghzwa a Yehova wer una za hemen u doon we ishima “a ishima you cii man a uma wou cii man a mhen wou cii man a agee a ou cii.” (Mar. 12:30) Ka u tsegha iyol you ken iuv, nahan ka i lu we vea Yehova tseegh ne fa ye. Kpa batisema yô, ka u er un ken igbar; nahan u tese mbagenev er u tsegha iyol you sha ci u Yehova yô. Iyoltseghan you la, ka iceghzwa i vesen. Nahan awashima wou yô, i lu u kuren iceghzwa la, man ka kwagh u Yehova kpa a ver ishima ér we u er je la.—Orpa. 5:4, 5.

ER NAN VE I GBE U U TSEGHA IYOL YOU SHA CI U YEHOVA

6. Ka nyi ka i mgbegha or u tseghan iyol i nan sha ci u Yehova?

⁶ Ityôkyaa i vesen i se tseghan iyol yase sha ci u Yehova yô, ka sha ci u a doo se ishima. Dooshima la har sha mlu u ken ishima yase tseegh ga. Kpa a har sha “mfe u vough” kua sha “mkav u sha akaa a ken jijingi.” Akaa a se fe sha kwagh u Yehova la na yô, a seer doon se ishima. (Kol. 1:9) Shi er se va fe kwagh u Bibilo i tese la yô, se na jighjigh ser (1) Yehova ngu kpôô kpôô, shi (2) ka un a ne i nger Bibilo ye, shi (3) ngu eren tom a nongo na u kuren awashima na.

7. Ka nyi i gbe u se er cii ve se mase tseghan iyol yase hen Aôndo?

⁷ Mba ve tsegha ayol a ve sha ci u Yehova la, ka ve nôngo u fan atesen a vesen a a lu  ken Mkaanem ma Aôndo la shi ve dondon atindi a na kpaa. Ka ve nôngo sha afatyô ve cii ve tesen mbagenev akaa a ve hen la. (Mat. 28:19, 20) Yehova ka a seer doon ve ishima, shi i lu Yehova tseegh a sar ve u civir ye. Kape kwagh wou a lu laa? Aluer Yehova doo u ishima a ishima you cii yô, u tsegha iyol you shi u er batisema di tsô wer u soo wer u er kwagh u azende a ou a lu eren ga. Shin u er nahan sha u i doo or u nan henen Bibilo a we la, shin mbamaren ou ga.

8. Aluer u ngu a iwuese sha akaa a Yehova a er sha ci wou la yô, kwagh la una wase u u tseghan iyol you sha ci u Yehova nena? (Pasalmi 116:12-14)

⁸ Ka wea hen sha akaa a dedoo a Yehova a er u la yô, kwagh la a doo u kpishi, nahan kwagh shon a mgbegha u u tseghan iyol you sha ci na. (Ôr Pasalmi 116:12-14.) Bibilo kaa ér “hanma iyua i dedoo man i vough cii” ka Yehova a ne ye. (Yak. 1:17) Iyua i i hembe ken uiyua mban cii yô, ka nagh ku Wan na, Yesu. Hen ase sha kwagh ne! Nagh ku ipaan kura na yô, u ngu a ian i yan ijende a Yehova kôôsôô. Shi a na u ishimaverenkeghen i va lun uma gbem sha wou. (1 Yoh. 4:9, 10, 19) Sha nahan yô, iyoltseghan ka gbenda u vesen u tesen wer u wuese dooshima u hemban cii u Yehova a tese u la. Shi u wuese akaa agen kpishi a a ne u la kpaa. (Dut. 16:17; 2 Kor. 5:15) I ter akaa ne agen ken takeda u Lu Uma Gbem! la ityough 46, ityôkwagh i sha 4 la. Kua ken vidio igen ken ityough ki shon i lun miniti utar, i i lu a itinekwagh ér Er Ne Na Aôndo Iyua Yen Yô la.

U KUMA U U TSEGHA IYOL YOU SHI U ER BATISEMA VEE?

9. Er nan ve i gbe u a kighir or ér nana tsegha iyol i nan sha ci u Yehova ga?

⁹ Alaghga u nenge wer ka a kuma u u tseghan iyol shi eren batisema ga. Adooga u nenge wer gba u u sôr akaa ken uma wou, sha er u dondon atindi a Yehova yô, shin u tamber shighe a kar, sha er jighjigh wou una seer taver yô. (Kol. 2:6, 7) Mba henen Bibilo mba vesen ken jijingi kwagh môm ga. Shi ka agumaior cii a tseghan ayol a ve shi a eren batisema sha anyom kwagh môm ga. Nahan nôngo u nengen a akaa a i gbe u u seer eren la shi er kwagh u u fetyô la, de tôôn iyol you karen sha mbagenev ga.—Gal. 6:4, 5.

10. Aluer u nenge wer u ngu a kuma u u tsegha iyol you sha ci u Yehova shi u er batisema ga yô, ka nyi i gbe u u ere? (Shi nenge ngeren u kiriki u a lu a itinekwagh ér, “ Mbayev mba I Lu Yesen Ve ken Mimi Yô” la.)

¹⁰ Aluer u nenge wer u ngu a kuma u u tsegha iyol you sha ci u Yehova ga je kpa, za hemen u lun a awashima u tseghan iyol you sha ci na la her. Sôn Yehova a wase u sha er u er akaa a i gbe hange hange u nyôôso ken uma wou la yô. (Fil. 2:13; 3:16) U fatyô u lun a vangertiôr wer una ungwa msen wou shi una er kwagh sha mi kpaa.—1 Yoh. 5:14.

ER I HII VE KA I TAVER MBAGENEV U TSEGHAN IYOL VE SHI EREN BATISEMA YÔ

11. Yehova una wase u u civir un sha mimi nena?

¹¹ Mbagenev mba ve kuma u tseghan iyol ve shi eren batisema kpa, ka i taver ve u eren kwagh ne. Ka ve henen ér, ‘Aluer m va er isholibo i vesen nahan i dughum ken tiônnongo kera ye?’ Aluer ka kwagh u u lu cian la yô, fa wer Yehova una na u hanma kwagh u kwagh a gbe u a mi u ‘zenden sha gbenda u doon un, sha er u eren hanma kwagh u a soo’ cii yô. (Kol. 1:10) Shi una na u agee a eren kwagh u vough kpaa. A vande wasen ior mbagenev kpishi u eren kwagh u vough. (1 Kor. 10:13) Ka ityôkyaa i môm i i ne ve i lu ior kpuaa tseegh ka i dugh ve ken tiônnongo kera je la. Yehova ka a wase ior nav sha er vea za hemen u tilen sha mimi yô.

12. Se er nan ve se palegh u eren isholibo i vesene?

 ¹² Hanma orumace u nan yen yô, nan ngu a isharen i eren kwagh u bo. (Yak. 1:14) Nahan kpa, ka we iyol you i gbe u u tsua kwagh u u er shighe u u tagher a imeen ye. Jighilii yô ka we tswen u fatyô u tsuan kwagh u u er a uma wou ye. Mbagenev ka ve kaa ér se fatyô u kôôm gbenda u se henen kwagh shin se eren kwagh la ga. Kpa kwagh la ka mimi ga. U fatyô u kôôm asaren a ou a bo la. Nahan shighe u u tagher a imeen je kpa, u fatyô u tsuan wer u er kwagh u bo ga. Akaa nga a aa fatyô u wasen we u palegh isholibo yô. Ikyav i tesen yô, eren msen hen Yehova hanma iyange, shi henen Mkaanem ma Aôndo sha tseeneke wou, shi zaan mbamkombo mba Mbakristu. Pasen mbagenev akaa a u ne jighjigh a mi la. Aluer u ngu eren akaa ne hanma shighe yô, kwagh ne una wase u u za hemen u civir Yehova sha mimi. Shi umbur hanma shighe wer, Yehova una wase u u kuren awashima wou u eren ishima na la.—Gal. 5:16.

13. Ka ikyav i dedoo i nyi Yosev a ver se?

¹³ Aluer u ngu henen sha akaa a u er shighe u u tagher a imeen yô, a hemba lun we zange u tilen sha mimi. Bibilo ôr se kwagh u ior kpishi mba yange ve tile sha mimi shin er ve lu uumace mba yinan nahan kpaa. Ikyav i tesen yô, kwase u Potifar yange nôngo acin imôngo ér Yosev a yav a na. Kpa Yosev yange vande fan kwagh u una er yô. Bibilo kaa a vese ér, Yosev “venda,” maa kaa ér: “A er nan man me er kwaghbo u vesen ne, me er Aôndo isholibo nahana?” (Gen. 39:8-10) Ikyav tese wang ér Yosev yange fa kwagh u una er cii ve kwase la hii u meen un ye. Er Yosev vande fan kwagh u una er yô, kera taver un u eren kwagh u vough shighe u i mee un la ga.

14. Se hen u palegh imeen nena?

¹⁴ U er nan ve u er kwagh u vough shighe u u tagher a imeen er Yosev nahana? Wa iyol hegen sha kwagh u u er shighe u u va tagher a imeen yô. Hen u vendan akaa a Yehova a ker a ihyom la ave ave, shi de henen sha a tsô kpaa ga. (Ps. 97:10; 119:165) Aluer u er nahan yô, u er kwagh u bo shighe u u tagher a imeen ga. Sha ci u u vande fan kwagh u i gbe u u er yô.

15. Or ka nan tese ér nan ngu ‘keren Yehova sha mimi’ nena? (Mbaheberu 11:6)

¹⁵ Alaghga u nenge wer hegen yô u fa mimi, shi u soo u civir Yehova a ishima you cii, kpa  ka u er u ngu a wa iyol i kuma u u tsegha iyol you sha ci u Yehova shi u er batisema ga nahan. U fatyô u eren kwagh u Tor Davidi kpa er la. Sôn Yehova wer: “Tôv kwagh wam, Aôndo, fa ishima yam, karem, fa mbamhen av, nenge, shin ma gbenda u ifer a lu ken a mo yô? Hemen mo sha gbenda u tsôron.” (Ps. 139:23, 24) Yehova veren mba “ve keren un sha mimi la” doo doo. Nahan er u lu nôngon wer u tsegha iyol you sha ci na shi u er batisema yô, kwagh la tese ér u ngu keren un sha mimi.—Ôr Mbaheberu 11:6.

ZA HEMEN U KPOROM IKYUA HEN YEHOVA

16-17. Yehova ka a urugh mbayev mba mbamaren vev ve lu Mbashiada mba Yehova la nena? (Yohane 6:44)

¹⁶ Yesu yange kaa ér ka Yehova ka a urugh mbahenen nav a va a mi hen a na ye. (Ôr Yohane 6:44.) Nahan nenge ase er kwagh ne a doo tsung man er a zough sha kwagh wou yô. Hanma or yô Yehova ka a nenge a kwagh u dedoo ken a nan, ka nahan ve ka a urugh nan a va a mi hen na ye. Ka a nenge nan ér nan ngu kwagh na jim shin nan ngu kwagh na u injaa. (Dut. 7:6) We kpa, kape a nengen we je la.

¹⁷ Alaghga u ngu wanye u mbamaren ou ve lu Mbashiada mba Yehova yô. Nahan alaghga u nenge wer ka Yehova a urugh we ga, kpa ka er mbamaren ou ve lu Mbashiada mba Yehova ve we kpa u lu civir un ye. Nahan kpa, Bibilo kaa ér: “Kporom nen hen Aôndo, nahan un kpa una kporom hen a ven.” (Yak. 4:8; 1 Kron. 28:9) Ka wea hii u kporom ikyua hen Yehova yô, un kpa a kporom hen a we. Yehova nengen we di ér u ngu ken nongo na tsô ga. Ka a urugh hanma or kua mba i mar ve ken mimi ne kpaa. Imbaor la ka nana hii u kporom hen Yehova yô, un kpa a kporom hen a nan er Yakobu 4:8 a ôr nahan.—Nenge 2 Mbatesalonika 2:13.

18. Ka nyi se lu henen ken ngeren u dondon nee? (Pasalmi 40:8)

¹⁸ Ka wea tsegha iyol you hen Yehova shi wea er batisema yô, kwagh la a tese ér u ngu dondon ikyav i Yesu. Yange na iyol na ér una er hanma kwagh u Ter na a kaa ér a er cii. (Ôr Pasalmi 40:8; Heb. 10:7) Ken ngeren u dondon ne, se lu timen sha kwagh u una wase u ve u za hemen u civir Yehova sha mimi shighe u u er batisema kera yô.