1-2. Ka averen a nyi or ka nana er batisema ve nan zua a mi?

 KA SEA er batisema sea hingir u lun ken tsombor u Yehova yô, i saan se iyol kpishi. Ian i se lu a mi i yan ijende vea Yehova kôôsôô la ka i icivirigh kpen kpen. Sha nahan yô, se lumun a mkaanem ma orpasalmi Davidi yange nger ér: ‘I saan or u Yehova a tsough nan la iyol, ér, nana̱ kporom er nana tema ken ityembe i iyou Na la.’—Ps. 65:4.

² Ka unô nahan Yehova a lumun ér ve lu azende a na? Er se vande henen ken ngeren u a kar la nahan, ka mba ve tese ér ve soo u yan ijende a Yehova kôôsôô la tseegh ka a kporom ikyua hen a ve ye. (Yak. 4:8) Shighe u u tsegha iyol you hen Yehova shi u er batisema la, ka u hingir u yan ijende a na kôôsôô. Nahan lu a vangertiôr wer u eren batisema kera yô, Yehova una ‘haa u iveren, je ia neer á haa inya.’—Mal. 3:10; Yer. 17:7, 8.

3. Ka tom u vesen u nyi Mbakristu mba ve tsegh ayol a ve shi ve er batisema ve lu a mi? (Orpasenkwagh 5:4, 5)

³ Ka wea eren batisema kera yô, u tese wer u hii u civir Yehova. Ka wea eren nahan yô, i gba u u nôngo sha afatyô wou cii u kure iceghzwa you la, aluer u tagher a ameen shin atsan a karen jighjigh wou je kpaa. (Ôr Orpasenkwagh 5:4, 5.) Er u lu orhenen u Yesu yô, gba u u dondon ikyav na kua atindi a na la vough vough er u fetyô la cii. (Mat. 28:19, 20; 1 Pet. 2:21) Ngeren ne una wase u u eren kwagh ne.

 WEA TAGHER A AMEEN SHIN ATSAN KPA ZA HEMEN U “DONDON” YESU HER

4. Ka sha nyi gbenda nahan mbahenen mba Yesu ka ve tôô “kon”? (Luka 9:23)

⁴ De henen wer u er batisema kera yô, mbamzeyol vea de u tan sha a we ga. Jighilii yô, Yesu yange ôr wang ér a gba u mbahenen nav vea tôô “kon.” Man lu u vea er nahan “ayange ayange.” (Ôr Luka 9:23.) Nahan Yesu lu kaan ér mbadondon un vea yaan ican hanma shighe ciili? Mayange ga. Yange lu pasen di tsô ér vea zua a averen tseegh ga, kpa vea tagher a mbamtaver. Man alaghga mbamtaver mban mbagen vea vihi kpishi.—2 Tim. 3:12.

5. Ka averen a nyi nahan Yesu a kaa ér mba ve de akaa a kar ve sha ci na la vea zua a mi?

⁵ Alaghga mba hen tsombor wou hendan a we sha ci u u tsua wer u civir Yehova yum. Shin alaghga u tsua wer u ker u lun a inyaregh shin akaa agen ga, sha er u ver kwagh u Tartor hiihii ken uma wou yô. (Mat. 6:33) Aluer ka nahan yô, u fatyô u lun a vangertiôr wer Yehova fa hanma kwagh u u er sha ci na yô. (Heb. 6:10) Man alaghga tsô u nenge a mimi u mkaanem ma Yesu ôr la, yange kaa ér: “Hanma or u nan undu ya shin anmgbianev mba nomso shin mba kasev, shin ngô shin ter shin ônov shin ishule sha ci u iti yam man loho u dedoo yô, nana zua a akaa ne hegen a hemba nahan kwa 100: uya man anmgbianev mba nomso man mba kasev man ungô man ônov man ishule, shi a tôv nan a ican, shi ken tar u he la nana zua a uma u tsôron.” (Marku 10:29, 30) Sha mimi yô, averen a u zua a mi la, a hemba nyityôkwagh i u de wer i kar u cii.—Ps. 37:4.

6. Gba u u za hemen u nôngon a “isharen i iyolough” shighe u u er batisema kera la sha ci u nyi?

⁶ Shighe u u er batisema kera kpa, a gba u u za hemen u nôngon a “isharen i iyolough” la her. (1 Yoh. 2:16) A gba u u za hemen u nôngon a asaren a iyolough her sha ci u u ngu orsholibo. Alaghga ashighe agen a lu u er yange lu apostoli Paulu ken ishima ve nger ér: “Ken ishima yam yô, kwagh u atindi a Aôndo gbam ishima sha mimi, kpa m gema m kav tindi ugen ken iyol yam, ngu nôngon num a tindi u a lu ken mhen wam la, yemen a mo sha u m za hingir kpan u tindi u isholibo, u a lu ken iyol yam la.” (Rom. 7:22, 23) Alaghga iyol ia kpe u er i lu u u nôngon a asaren a bo hanma shighe yô. Nahan kpa, aluer u ngu henen sha iceghzwa i yange u er a Yehova shighe u u tsegha iyol you sha ci na la yô, kwagh la una wase u u nôngon a ameen. Jighilii yô, iyoltseghan you la ia wase u shighe u u tagher a ameen yô. Sha nyi gbenda?

7. Aluer u tsegha iyol you sha ci u Yehova yô, kwagh la una wase u u za hemen u civir un sha mimi nena?

⁷ Ka wea tsegha iyol you sha ci u Yehova yô, u nyiman iyol you. Inja na yô, gba u u venda u eren akaa a a lu sha ishima i Yehova ga la cii. (Mat. 16:24) Nahan shighe u u tagher a imeen shin u lu nôngon a ma mtaver yô, a gba u ishima ia nyian we kpishi sha kwagh u u er ga. Sha ci u u vande tsuan kwagh u u er yô, nahan u za hemen u tilen sha mimi. U kanger ishima wer u er kwagh u doon Yehova. Nahan u er kwagh er Yobu nahan. Shin er Yobu yange ya atsan a vihin kpishi nahan kpa, yange kaa ér: “Me gbihi mimi wam ga.”—Yobu 27:5

8. Aluer u ngu henen sha msen u yange u er shighe u u lu tseghan iyol you sha ci u Yehova la yô, kwagh la una wase u u hendan a ameen nena?

⁸ Aluer u ngu henen sha msen u u er hen Yehova shighe u u lu tseghan iyol you la yô, kwagh la una na u agee a hendan a ameen. Ikyav i tesen yô, u hia a nom u or shin kwase u or ga! Sha ci u u vande tôndon zwa a Yehova wer mayange u er imbakwagh la ga.  Aluer u de wer asaren a bo a ya tor ken a we hegen ga yô, a va kera lu u u nôngo a a ken hemen ga. Sha ci u u “nyagh” “gbenda u ior mba bov.”—Anz. 4:14, 15.

9. Aluer u ngu henen sha msen u yange u er shighe u u lu tseghan iyol you sha ci u Yehova la yô, kwagh la una wase u u veren mcivir u Yehova hiihii ken uma wou nena?

⁹ Aluer u zua a tom u ua yange u u zan mbamkombo mba Mbakristu hanma shighe di ye? U lan kwagh u i gbe u u er ga. Cii ve i na u imba tom la yô, yange u vande fan kwagh u i gbe u u er shighe u u tagher a imbakwagh la yô. Sha nahan yô, u ngohol tom la tsô u masen keren gbenda u zan mbamkombo ga. Aluer se mba henen sha ikyav i Yesu la yô, kwagh la una wase se. Yange kange ishima ér una er ishima i Ter na. Nahan se kpa, se palegh u eren nyityôkwagh i ia vihi Aôndo wase u se tsegha iyol yase sha ci na la, er Yesu nahan.—Mat. 4:10; Yoh. 8:29.

10. Yehova una wase u sha er u za hemen u “dondon” Yesu shighe u u er batisema kera la nena?

¹⁰ Kwagh u u er shighe u u tagher a imeen shin mbamzeyol la, ka a tese ér u soo wer u za hemen u “dondon” Yesu. Lu a vangertiôr wer aluer u za hemen u dondon Yesu yô, Yehova una wase u. Bibilo kaa ér: “Aôndo ka u jighjigh, una de ér i mee ne sha gbenda u hemban ne ga, kpa ken imeen la, una shi a bugh ne gbenda u waren, sha er ne fatyô u wan ishima a i yô.”—1 Kor. 10:13.

KWAGH U U ER VE U ZA HEMEN U DONDON YESU YÔ

11. Ka kwagh u hemban doon u nyi u er ve u za hemen u dondon Yesu? (Shi nenge foto kpaa.)

¹¹ Yesu yange civir Yehova a ishima na cii shi za hemen u lun kôôsôô a Yehova sha u eren msen. (Luka 6:12) Nahan kwagh môm u hemban doon u u er ve u za hemen u dondon Yesu shighe u u er batisema kera yô,  ka u eren akaa a aa na u lu kôôsôô a Yehova yô. Bibilo kaa ér: “Sea za ikyura nan nan kpa, se za nen hemen u zenden sha inja sha inja sha gbenda ne.” (Fil. 3:16) Ashighe agen alaghga u ungwa kwagh u anmgbianev mba nomso man mba kasev mba ve tsua ér vea seer eren Yehova tom yô. Alaghga ve mbagenev ve za Makeranta u Mbapasen Ivangeli i Tartor, shin ve yem hen ape kwagh a hembe gban sha mbapasenkwagh yô. We kpa, u fatyô u tsuan wer u er akaa a ve er la, aluer mlu wou na u ian yô. Ior mba Yehova ka ve ker igbenda i vea seer eren un tom yô. (Aer. 16:9) Kpa aluer ka u u fatyô u eren kwagh nahan hegen ga di ye? De nengen wer mba ve fetyô u eren akaa ne la, ve hemba gban kwagh a we ga. Kwagh u vesen yô, ka u we zan hemen u wan ishima her. (Mat. 10:22) Umbur wer ka wea eren hanma kwagh u u fetyô la cii ken mcivir u Yehova yô, i saan un iyol. Ka kwagh u vesen u u er ve u za hemen u dondon Yesu shighe u u er batisema kera kpaa je la.—Ps. 26:1.

12-13. Aluer u kera ngu a gbashima er yange u hii u civir Yehova ve u lu a mi la ga yô, ka nyi u fatyô u erene? (1 Mbakorinte 9:16, 17) ( Shi nenge ngeren u kiriki u a lu a itinekwagh ér “ Za Hemen u Gban Ayem Her” la.)

¹² Aluer u nenge wer u kera ngu eren msen hen Yehova a ishima you cii ga, shin kwaghpasen kera maan we iyol ga di ye? Shin u nenge wer Bibilo i ôron kera maan we iyol er ngise la ga di ye? Aluer imbakwagh la er u shighe u u er batisema kera kpa, de nengen wer jijingi u Yehova kera ngu a we ga ze. Er se lu uumace mba yinan yô, ashighe agen asaren ase aa fatyô u geman. Aluer gbashima wou hii u ndôhôr yô, hen sha ikyav i apostoli Paulu la. Yange a nôngo ér una dondo ikyav i Yesu, kpa fa ér ashighe agen a taver un u lun a gbashima u eren kwagh u yange vanden eren la.  (Ôr 1 Mbakorinte 9:16, 17.) A kaa ér: “Aluer m ngu eren ka sha ishima yam ga je kpa, gba u me eren her, sha ci u ka tom u i wem sha ikyev yô.” Inja na yô, Paulu yange kange ishima ér una er tom na u pasen kwagh la una kure aluer ashighe agen ka un ken ishima dang je kpaa.

¹³ We kpa, de deen wer u er kwagh er i lu u ken ishima la tseegh ga. Kange ishima wer u er kwagh u vough aluer ka u ape eren nahan ga je kpaa. Ka wea za hemen u eren kwagh u vough yô, kwagh la a bende a mlu wou u ken ishima la sha gbenda u dedoo. Nahan aluer u er batisema kera kpa, u za hemen u henen kwagh sha tseeneke wou shi u ngu eren msen shi zan mbamkombo shi pasen kwagh yô, kwagh la una wase u u za hemen u dondon Yesu. Anmgbianev ou mba nomso man mba kasev ka vea nenge er u we ishima u lu civir Yehova nahan kwagh la a taver ve ishima kpen kpen.—1 Tes. 5:11.

KAREN NEN SHI EREN NEN KWAGH U TESEN IOR MBA NE LU LA

14. Ka nyi i gbe u u keren u fan hanma shighe, man ka sha ci u nyi? (2 Mbakorinte 13:5)

¹⁴ Shighe u u er batisema kera kpa, gba hange hange u u za hemen u karen iyol you. (Ôr 2 Mbakorinte 13:5.) Doo u u tôôn shighe u nengen aluer u ngu eren msen hanma iyange shi ôron Bibilo shi gbidyen kwar sha mi shi zan mbamkombo shi duen kwaghpasen hanma shighe yô. Ker igbenda i u eren akaa ne ve a hemba maan we iyol shi u hemba zuan a iwasen ker yô. Ikyav i tesen yô, pine iyol you wer: ‘Me fatyô u pasen mbagenev akaa a vesen a Bibilo i tese la kpa? Akaa nga a me er ve kwaghpasen una seer doon mo yôô? Ka akaa a nyi jighilii m teren ken mbamsen ava, man ka ve tese ér m suur sha Yehova a ishima yam cii kpa? M ze mbamkombo mba Mbakristu hanma shighe kpa? Me er nan ve me hemba keghen ato ken mbamkombo shi me waan zwa kere?’

15-16. U hen nyi ken anmgbian ugen sha kwagh u hendan a imeene?

¹⁵ Shi gba hange hange u u fa mbamyen ou. Anmgbian ugen iti na ér Robert, a ôr kwagh u a tese er i hii ve i doo u se fa mbamyen asev yô. A kaa ér: “Shighe u m zurum anyom 20 la, m lu eren tom ugen. Iyange igen la se mba kurun yô, kwase ugen u se eren tom imôngo yô, lôhôm hen ya na. Yange kaa a mo ér ka u se za lu hen ya se tseegh, ‘or môm nana lu u zan se iyol ga.’ Sha hiihii la m venda di bele tsô, kpa shighe karen yô, m venda a na wang shi m pase un ityôkyaa i i ne ve m vende u zan hen ya na yô.” Robert yange hendan a imeen ne, man  ka kwagh u dedoo yange er ye. Kpa er va hide hen sha kwagh u za hemen la yô, a nenge ér, yange ma un er kwagh kposo. A kaa ér: “Yange m venda kwagh u kwase ne lôhôm hen ya na la fele er Yosev yange venda a kwase u Potifar la nahan ga. (Gen. 39:7-9) Jighilii je yô, yange kpiligh mo iyol er hii ve taver mo u vendan yô. Kwagh la yange wasem u fan mer gba u me seer taver ijende i m ye vea Yehova la.”

¹⁶ U fatyô u eren kwagh er Robert kpa er nahan. Aluer u kôrcio u hemban imeen je kpa pine iyol wer, ‘Yange tôôm shighe nena u kaan mer ei?’ Aluer u nenge wer akaa nga a i gbe u u seer eren kpa, iyol i de kpen we ga. I saan we iyol er u fe myen wou la yô. Sôn Yehova a wase u, shi er akaa a aa na u seer lun a isharen i kuran atindi a Yehova yô.—Ps. 139:23, 24.

17. Kwagh u Robert yange er la va Yehova a icivir nena?

¹⁷ Kwagh ugen kpa ngu u se fatyô u henen ken kwagh u Robert er la. A za hemen a kaa ér: “Er m venda u zan hen ya u kwase u se eren tom imôngo la yô, a kaa a mo ér ‘M kar u kpa, u gba ga!’ Maa m pine un inja i kwagh u a ôr la. Kwase shon maa kaa a mo ér ijende na igen i ngise lu Orshiada yô, kaa a na ér ian ka ia due yô Mbashiada mba ve lu agumaior la, ve yer ve er akaabo ken myer. Nahan kwase ne kaa a ijende na la ér, una karem a nenge aluer kwagh u ijende na ne i ôr la a lu mimi yô. Maa m mase kaven er m ne iti i Yehova i zough a icivir yô, nahan saan mo iyol kpen kpen.”

18. U kange ishima wer u er nyi shighe u u er batisema kera laa? (Shi nenge ngeren u kiriki u a lu a itinekwagh ér “ Ngeren mba Vea Doo U u Ôron Yô” la.)

¹⁸ Zum u u tsegh iyol you sha ci u Yehova shi u er batisema yô, ka u tese wer u soo u tseghan iti na aluer ka nyi je ia er kpaa. Man u fatyô u lun a vangertiôr wer Yehova fa ameen kua atsan a u lu tagher a mi la cii. Una ver u doo doo er u lu nôngon wer u tile sha mimi la. Fa wer una wase u sha ikyev i icighan jijingi na, sha er u fatyô u wan ishima a atsan shi hemban ameen yô. (Luka 11:11-13) Sha iwasen i Yehova yô, u fatyô u dondon Yesu shighe u u er batisema kera kpaa.