Akaaôron a profeti agen ken caate ne ôr kwagh u akaa a yange lu eren hen shighe môm yô. Akaaôron ne tese sha igbenda kpishi ér se mba ken “shighe u mkur.”—Dan. 12:4.

• Avur a Bibilo Mpa. 11:7; 12:13, 17; 13:1-8, 12

  Kwaghôron u profeti “Inyamkyume” la tema tor sha uumace hegen hemba anyom 3,000. Í vihi ityough ki sha utaankaruhar la iyol kehelee sha shighe u mkur. Ivav la va bee shi “ior mba sha tar cii” hide dondo inyamkyume la. Satan tuur i u za “nôngon ityav a ônov mba kwase shon mba ve mase shin la.”

  Er yange kure yô Mngerem ma Deemee yange ma karen kera yô, ugomoti mba hendan a Yehova hii u hemen uumace. Anyom karen er 3,000 nahan yô, Gomoti u Britain u lu môm ken ugomoti mban la kera taver ga. Kwagh ne er shighe u i lu nôngon Ityav mbi Tar cii Mbi Hiihii la. Kpa gomoti ne va hide taver zum u hii u eren kwagh vea tar u Amerika la. Satan ngu hemban eren tom a ugomoti mba sha tar ken shighe u mkur ne u tôvon ior mba Aôndo a ican cii.

• Avur a Bibilo Dan. 11:25-45

  Kwaghôron u profeti Tor u ken imbusutariyan man u ken imbusutarimese la vea lu nôngon ayol a ve kpoghuloo shighe u mkur.

  Er yange kure yô Tar u Jamani lu nôngon num a Tar u Amerika vea Ingila mba ve lu a tahav sha tar cii la. Ken inyom i 1945 la, ityar i yange i yilan ér Soviet Union la kua ityar i i suen un la hingir tor u ken imbusutarimese. Ken inyom i 1991 la, Soviet Union pav, hanma tar yem kwagh u u, shighe karen yô, Russia man ityar igen i i suen un la hingir tor u ken imbusutarimese.

• Avur a Bibilo Yes. 61:1; Mal. 3:1; Luka 4:18

  Kwaghôron u profeti Yehova tindi “ortyom” na ér a ‘sôr gbenda ken hemen’ cii a ver Tartor u Mesiya ye. “Ortyom” la hii u ‘surun mba asema a vihi ve la asema,’ shin pasen mbaasemaamimi mban loho u dedoo.

  Er yange kure yô Hii ken inyom i 1870 la, C. T. Russell kua ahuraior a na hen Bibilo kpoghuloo sha er vea pase mimi u ker yô. Hii ken inyom i 1881 la, ve hii u ôron var var ér gba u mbacivir Aôndo vea pasen kwagh. Yange ve gber ungeren er “Wanted 1,000 Preachers” (Kwagh Gba Sha Mbapasenkwagh 1,000) man “Anointed to Preach” (I Tsegha Ve u Pasen Kwagh) nahan.

• Avur a Bibilo Mat. 13:24-30, 36-43

  Kwaghôron u profeti Orihyom ugen ta ishamtoho ken sule u alakema, kpa i de akaa ahar ne cii vese imôngo zan zan shighe u sunda; maa i pav toho a alakema.

  Er yange kure yô Hii ken inyom i 1870 la je, Mbakristu mba mimi hii u duen kposo a mbaaiev. Shighe u mkur va kom yô, i kohol Mbakristu mba mimi, i pav ve kposo a Mbakristu mbaaiev.

• Avur a Bibilo Dan. 2:31-33, 41-43

  Kwaghôron u profeti I er eev mbu gen sha akaa kposo kposo, kpa akevangahar a mbu yô ka iyôgh man inyatyuu.

  Er yange kure yô Inyatyuu la ka ishamior i i lu ken tar u Amerika man Britain, i ka i hendan kwagh a gomoti la. Ior mban na yô, ugomoti mban fatyô u eren tahav kpishi ga.

• Avur a Bibilo Mat. 13:30; 24:14, 45; 28:19, 20

  Kwaghôron u profeti I kohol “alakema la” i ombo ken ‘iyou i koson iyiav.’ I ver “wanakiriki u jighjigh man u fan kwagh” ér a nengen sha “mbashirentom mba hen ya.” I hii u pasen “loho u dedoo u Tartor” samber sha “tar” cii.

  Er yange kure yô Ken inyom i 1919 la, i ver wanakiriki u jighjigh ér a nengen sha ior mba Aôndo. Hii shighe la je, Mbahenen Bibilo seer eren tom u pasen kwagh. Nyian Mbashiada mba Yehova mba pasen kwagh ken ityar i hemban 200, shi ka ve gber ityakerada ken ijô i hemban 1,000.

• Avur a Bibilo Dan. 12:11; Mpa. 13:11, 14, 15

  Kwaghôron u profeti Inyamkyume i lun a akor ahar kaa a ior sha tar ér ve er “eev mbu inyamkyume,” shi i na “eev mbu inyamkyume la iôôn.”

  Er yange kure yô Ka tar u Ingila vea Amerika yange ve hii kwagh u Mzough u Ityar Sha Won Cii la ye. Ityar igen kpa va hii u suen mzough ne. Shighe kar yô, tor u ken imbusutarimese la kpa nyôr mzough ne ken inyom i 1926 la, va due ken inyom i 1933. Ior na jighjigh ér, Mzough u Ityar Cii la una er kwagh u i lu Tartor u Aôndo tseegh ua kôrcio u eren yô; ve hen ér una va a bem sha tar. Mzough u Ityar Sha Won Cii la kpa yange ior hen ér una er kwagh ne.

• Avur a Bibilo Dan. 8:23, 24

  Kwaghôron u profeti Tor u vihin ishigh sha ‘tim kwagh kera je cier iyol.’

  Er yange kure yô Tar u Ingila man u Amerika wua ior kpishi shi vihi akaa ngee. Ikyav i tesen yô, shighe u Ityav mbi Tar Cii Mbi sha Uhar la, tar u Amerika za ta ubom mba cier iyol uhar ken tar ugen u u lu ihyom a ve man Ingila cii yô. Ubom mban yange ve tim ior kpishi shi ve vihi akaa falegh gba.

• Avur a Bibilo Dan. 11:31; Mpa. 17:3, 7-11

  Kwaghôron u profeti Inyamkyume i “nyian dindee” la due shin ihungwa i i ze kweng la, shi ngi tor u sha anigheni. Takerada u Daniel yila tor ne ér “kwaghndôhôrshima u nan mtim.”

  Er yange kure yô Shighe u i lu nôngon Ityav mbi Tar Cii Mbi sha Uhar la, Mzough u Ityar Sha Won Cii la yange kpe. Ityav mbira mbi been yô, ‘i gema i ver’ Mzough u Ityar Cii. Mbamzough mba uhar mban cii i na ve icivir i i gbe u ma i ne Tartor u Aôndo yô. Mzough u Ityar Cii la una va ta num sha kwaghaôndo.

• Avur a Bibilo 1 Tes. 5:3; Mpa. 17:16

  Kwaghôron u profeti Ugomoti cii yôô ér “bem gba, zayol kera ngu ga,” shi “akor pue” la kua “inyamkyume la” ta num sha “gbagakwase la” tim un kera. Ka been yô, i tim ugomoti cii.

  Er una kure yô Ugomoti vea va kaa ér ve va a bem sha tar, nahan zayol kera ngu ga. Maa ugomoti mba ve lu ken Mzough u Ityar Cii la vea tim kwaghaôndo u aiegh cii. Kwagh ne maa una lu mhii u zegecan. Ican la ia bee zum u Yesu una mase timin tar u Satan gburu gburu sha shighe u Armagedon la.

• Avur a Bibilo Esek. 38:11, 14-17; Mat. 24:31

  Kwaghôron u profeti Gogi va nyôr ken tar u ior mba Aôndo. Maa mbatyomov kohol ‘ior mba i tsough’ ve la.

  Er una kure yô Tor u ken imbusutarimese kua ugomoti mbagen vea ta num sha ior mba Aôndo. Kwagh ne a hiin kera yô, a kohol asande a mba i shigh ve mkurem a a mase shin la, a yem a ve sha.

• Avur a Bibilo Esek. 38:18-23; Dan. 2:34, 35, 44, 45; Mpa. 6:2; 16:14, 16; 17:14; 19:20

  Kwaghôron u profeti “Un u tema” sha “nyinya u pupuu” la, due ngu ‘hemban ityav gburu gburu’ sha u timin Gogi man ikyumutya na. I ker “inyamkyume la” i “za gba ken ber u usu” la, shi iwen bugh va hembe eev mbu zegenan mbura kpaa.

  Er una kure yô Yesu u a lu tor u Tartor u Aôndo la una yima ior mba Aôndo. Yesu vea iorov 144,000 mba vea lu hemen a na imôngo la kua ikyumutya i mbatyomov vea tim ugomoti mba ve te num sha ior mba Aôndo la cii. Kape a tim tar u Satan kera la.