1-2. Ka mbamtaver mba nyi Mbashiada kpishi ve tagher a mi?

APOSTOLI PAULU yange taver Timoteu shin Mbakristu cii ishima ér, ve er tom ve u pasen kwagh la vighe vighe. (2 Tim. 4:5) Se cii se tôô kwaghwan u Paulu la beelee ga, se mba eren tom u pasen kwagh kpoghuloo. Kpa mbamtaver ban ga. Anmgbianev asev mbanomso man mbakasev kpishi ka i gba u vea taver ishima ve, vea er tom u pasen kwagh ne ye. (2 Tim. 4:2) Hen ase sha kwagh u anmgbianev asev mba ve lu ken ityar i i yange tom wase shin i cir u kuaa la. Ka ve eren tom u pasen kwagh ne shin er ve fe ér a fatyô u wuhen ve ken purusu nahan kpaa.

² Ior mba Yehova ka ve tagher a mbamzeyol kposo kposo mba vea fatyô u nan ve iyolkpen yô. Ikyav i tesen yô, mbagenev ka ve er tom ahwa kpishi sha er vea zua a kwagh u nengen sha tsombor ve yô. Alaghga a sar ve u seer eren tom u kwaghpasen je, kpa wikeende a va nyôron yô i tume ve iyol. Mbagenev mba kera fetyô u eren akaa kpishi sha ci u Yehova ga sha ci u ve gba icôronuange gayô mba been iyol. Ve mbagen je yô mba kera fetyô u duen hen ya zan mape ga. Mbagen ka ve shi henen ér ve gba Yehova kwagh ga. Anmgbian u kwase ugen u i yer iti na ér Mary * yô kaa ér: “Shighe u i lum er m gba Yehova kwagh ga yô, ka m nôngo kpoghuloo mer me bee a mhen u shami ga ne ken ishima yam kera, man kwagh ne ka a na m nôngo kwagh je i va duem ishima. Nahan ken masejime yô ishima i nam ibo kpishi er m de kwagh la a vihim shighe kua agee a ma m lu pasen kwagh la yô.”

3. Ka nyi se lu timen sha mi ken ngeren nee?

³ Aluer se tagher a mbamzeyol nan nan kpa, Yehova una fatyô u nan se agee sha er se za hemen u civir un er se fetyô la cii yô. Kpa cii man se nenge er Yehova una fatyô u wasen se la yô, de se time se nenge er yange wase Paulu man Timoteu ve er tom ve u pasen kwagh la vighe vighe, shin er ve tagher a mbamtaver kposo kposo nahan kpaa yô.

4. Ka mbamtaver mba nyi Paulu yange tagher a mi?

⁴ Apostoli Paulu yange tagher a mbamtaver kpishi. Yange kwagh a hemba gban un a iwasen i Yehova shighe u mbahyomov nav gbidye un shi wuhe un ken purusu shi nôngo u wuan un la cii. (2 Kor. 11:23-25) Ashighe agen yange iyol i kpe Paulu nahan i gba u una nôngo kwagh kpoghuloo ve una hemba iyolkpen la ye, kpa kunya kôr un u pasen kwagh ne gbar gbar ga. (Rom. 7:18, 19, 24) Shi lu a zayol u kwaghnyoon u lu un er ka “asaa ken iyol,” u sar un tsung u Aôndo ma dugh ken a na kera yô.—2 Kor. 12:7, 8.

5. Er Paulu tagher a mbamzeyol nahan kpa ka nyi yange fatyô u erene?

⁵ Yehova yange na Paulu agee a una za hemen u pasen kwagh shin er tagher a mbamzeyol nahan kpaa yô. Nenge ase akaa a Paulu fatyô u eren ne. Ikyav i tesen yô, shighe u i wuhe un lu hen ya ijiir i môm ken Roma la, a za hemen u pasen ior kpishi loho u dedoo sha gbashima man alaghga je yô kua mbahemenev mba gomoti kpaa. (Aer. 28:17; Fil. 4:21, 22) Shi yange pase Mbakuran Shisar mbagenev kpishi kpaa loho u dedoo shi hanma or nana va u va nengen a na yô, a pase nan kwagh. (Aer. 28:30, 31; Fil. 1:13) Shi hen shighe la môm, Paulu nger uwashika mba ve lu Mbakristu mba mimi a inja zan zan nyian yô. Ikyav i Paulu la yange i taver tiônnongo u ken Roma la ishima, kwagh la na yô anmgbianev hemba tesen “ishimataver cii sha u ôron ior loho u Aôndo a mciem shio.” (Fil. 1:14) Er ashighe agen Paulu yange a er tom u pasen kwagh la er a soo ga nahan kpa, yange a er kwagh u a fetyô la, man kwagh la ‘gema na loho u dedoo lu samber zan a za hemen.’—Fil. 1:12.

6. Takeda u 2 Mbakorinte 12:9, 10 tese ér ka nyi yange i wase Paulu er tom na u pasen kwagh la vighe vighe?

⁶ Paulu yange fa er hanma kwagh u un er ken tom u Yehova cii i lu Aôndo a ne un agee, i lu sha tahav nav ga yô. Yange kaa ér, ‘ka ken or u agee a yen nan la je Aôndo ka a hemba tesen tahav nav ye.’ (Ôr 2 Mbakorinte 12:9, 10.) Yehova yange na Paulu agee sha ikyev i icighan jijingi Na sha er una er tom na u pasen kwagh la vighe vighe shin er i tôv un a ican, shi ashighe agen i kôr un i za wuhe ken purusu shi yange tagher a mbamzeyol mbagenev nahan kpaa.

7. Ka nyi mbamzeyol Timoteu tagher a mi mba yange ma ve na ma taver un u eren ityom na tsembelee?

⁷ Timoteu u lu gumor shi eren tom imôngo vea Paulu la kpa yange suur sha Aôndo ér a na un agee sha er una er tom na u pasen kwagh yô. Paulu yange una yemen ijende na i mishen la yô, Timoteu kpa a za vea na. Paulu shi yange a tindi un sha ajiir agen kposo kposo ér a za sôr atôônanongo shi a taver anmgbianev asema. (1 Kor. 4:17) Alaghga Timoteu nenge ér un kuma sha tom la ga. Ashi nan kpa lu kwagh u na ve Paulu kaa a na ér: “Mayange or a̱ de lahan we sha ci u ú ngu wanye yum ga” je la. (1 Tim. 4:12) Man shighe ne nahan Timoteu kpa lu a asaa ken iyol na. Yange ‘lu gban angev fele fele.’ (1 Tim. 5:23) Nahan kpa Timoteu fa ér, icighan jijingi u Yehova una na un agee, una za hemen u pasen loho u dedoo shi eren anmgbianev nav tom.—2 Tim. 1:7.

8. Yehova ne ior nav agee nyian nena?

⁸ Nyian ne, Yehova ka a na ior nav “agee a a gande a orumace” la, sha er vea za hemen u civir un sha mimi yô. (2 Kor. 4:7) De se time sha akaa anyiin a Yehova a er sha u aa na se agee a aa wase se, se za hemen u civir un sha mimi yô. Akaa shon yô ka, msen man Bibilo man u lun imôngo vea Mbakristu mbagen kua kwaghpasen.

9. Msen una wase se nena?

⁹ Ka sea er msen yô se zua a agee. Paulu taver se ishima ken Mbaefese 6:18 ér, se eren msen hen Aôndo “hanma shighe” cii. Aôndo una ungwa msen wase la sha u wasen se. Anmgbian ugen ken tar u Bolivia u i yer un ér Jonnie yô, yange zua a iwasen la shighe u tagher a mbamzeyol kposo kposo yô. Yange kwaghnyoon va kôr ter na man ngô na kua kwase na cii hen shighe môm. Tom u nengen sha ve la lu Jonnie kwagh u kiriki ga. Maa ngô na va kpe, shi yange shighe kar gôgônan cii ve ter na kua kwase na va zua a guda ye. Jonnie umbur kwagh u za hemen shighe u tagher a mbamtaver mban la nahan a kaa ér, “Yange ishima ia zam iyol kpishi yô m er msen hen Yehova m pase un zayol wam jighilii nahan kwagh la a wasem kpen kpen.” Yehova yange na Jonnie agee a a wase un u wan ishima yô. Ortamen ugen u i yer un ér Ronald, u a lu ken tar u Bolivia yô, yange ungwa ér ngô na ngu a kyansa. Yange uwer kar môm maa ngô na kpe. Ka nyi yange i wase un hen shighe u taver nee? A kaa ér: “Yange m er msen hen Yehova m pase un er i lum ken ishima la. M fa je mer a fam hemba hanma or cii kua mo iyol yam je kpaa.” Alaghga ashighe agen se nenge ser mbamzeyol asev gande se ken inya, gayô se fa kwagh u se er msen sha mi jighilii ga. Kpa Yehova kaa a vese ér, aluer taver se u pasen un er i lu se ken ishima je kpa, se sôn un.—Rom. 8:26, 27.

10. Er i ôr ken Mbaheberu 4:12 nahan, er nan ve u ôron Bibilo shi hiden henen sha mi la i lu hange hange?

¹⁰ Ka sea ôr Bibilo yô se zua a agee. Paulu yange a ôr Ruamabera nahan a zua a agee kua msurshima, man ka kwagh u i doo u se kpa se er je la. (Rom. 15:4) Ka sea ôron Mkaanem ma Aôndo shi sea henen sha mi yô, icighan jijingi u Yehova a wase se, se hemba kaven er Bibilo ia fatyô u wasen se yô. (Ôr Mbaheberu 4:12.) Ronald u se vande ôron kwagh na la kaa ér: “Doom kpishi er ka m nôngo m ôr Bibilo hanma tugh yô. Hanma shighe yô ka m shi henen sha aeren a Yehova man gbenda u a eren kwagh a mbacivir un sha dooshima la. Nahan m hide m zua a agee.”

11. Bibilo yange i wase anmgbian u kwase u lu zungwen ku u nom na yô nena?

¹¹ Ka sea henen sha kwagh u se ôr ken Mkaanem ma Aôndo la yô, se hemba nengen sha mbamzeyol asev mbara sha gbenda u vough. Nenge ase er Bibilo yange i wase kwasecôghol ugen u lu zungwen ku u nom na yô. Ortamen ugen due un a mhen ér a za ôr takeda u Yobu,  nahan una fatyô u zuan a akaa a injaa a aa wase un yô. Yange hiin u ôron takeda u Yobu yô, gba puun Yobu sha mhen na u shami ga la. Ken ishima na yô lu kaan ér: “Yobu! De u hemban veren ishima sha mbamzeyol ou!” Kpa hidi henen sha mi yô mase kaven ér, ieren na la i kaha vea i Yobu ga. Kwagh ne wase un hide sôr mnenge na la shi wa ishima shighe u nom na kpe la.

12. Yehova ka a na se agee sha ikyev i anmgbianev asev mba se civir un imôngo la nena?

¹² Ka sea kohol imôngo vea Mbakristu mbagenev yô se zua a agee. Gbenda ugen u Yehova a ne Mbakristu agee yô, ka sha ikyev i Mbakristu mbagen mba ve civir un imôngo la. Paulu yange nger ér sar un tsung u zuan ishigh a Mbakristu mbagen sha er vea “taver ayol a ve asema” yô. (Rom. 1:11, 12) Mary u se vande ôron kwagh na la kaa ér, ka i doo un u lun imôngo vea anmgbianev kpen kpen. A kaa wener: “Yehova yange mgbegha anmgbianev mba nomso man mba kasev mba ve fa mbamzeyol av cuku tsô kpaa ga yô sha u wasen mo. Yange ve ôr kwagh u una taver mo ishima yô, gayô ve nger kwagh ve tindim a mi, man i lu sha shighe vough. Shi kwagh la wasem m lam a anmgbianev mba kasev mbagen mba ve kpa yange ve tagher a mbamzeyol mba m lu tagher a mi la, shi m hen kwagh ken akaa a yange ve er la. Shi mbatamen yange ve wasem u fan wang ér, m doo anmgbianev mba ken tiônnongo ishima.”

13. Se fatyô u taver ayol a ase asema shighe u se ze mbamkombo mba tiônnongo nena?

¹³ Ijiir i hemban doon i se fatyô u taver ayol a ase asema yô ka ken mbamkombo mba tiônnongo. Shighe u u ze mkombo yô u fatyô u taver mbagen ishima sha u kaan a ve wer, ve doo u ishima shi wuese ve kpishi sha akaa a ve eren la. Ikyav i tesen yô, yange i za mkombo kwagen la, nahan ortamen ugen u i yer un ér Peter yô, lam a anmgbian u kwase ugen u nom na a lu Orshiada ga yô cii ve mkombo hii ye. A kaa a na ér: “Ka sea nenge a we nahan ishima i taver se kpen kpen. Ka u wa mbayev ou mba ateratar mbara iyol tsembelee ne va mkombo, shi hanma yô nan wa iyol u va nan ikyar ken mkombo kpaa.” Yange saan anmgbian u kwase ne iyol je haa mliam ashe, a kaa ér: “Kwagh u u ôr a mo ne taver mo ishima kpen kpen, mkaanem ou mara ka kwagh u hemban doon u m ongo nyian yô.”

14. Tom u pasen kwagh la ka u wase se nena?

¹⁴ Ka sea pasen kwagh yô se zua a agee. Ka sea pasen ior mimi u Bibilo la yô i saan se iyol, aluer ve ungwa shin ve ungwa ga je kpaa. (Anz. 11:25) Anmgbian u kwase ugen u i yer un ér Stacy yô, yange nenge er kwaghpasen ka a na or agee yô. Yange i dugh or u hen tsombor na ken tiônnongo kera, nahan kwagh la vihi un kpishi, a shi pinen iyol na ér, ‘Ka nyi yange ma m er sha er me seer wasen unu?’ Stacy yange kera faantyô u henen sha kwagh ugen môm ga. Lu nyi i wase un u wan ishima a kwagh u vihin nee? Lu kwaghpasen! Yange una due a pasen kwagh yô, a hemba veren ishima sha kwagh u ior mba hen ijiir i pasen kwagh her, mba gba u una wase ve la. Stacy kaa ér: “Hen shighe la, Yehova yange nam orhenen Bibilo u nan lu vesen ken jijingi fele fele yô. Kwagh la yange taver mo ishima kpen kpen. Kwagh u a hembe wasen mo ken uma wam cii yô, ka tom u pasen kwagh la.”

15. Ka nyi u hen ken mkaanem ma Mary laa?

¹⁵ Alaghga mlu u mbagen una na yô, vea nenge ér mba eren tom u pasen kwagh la er ma ve er la ga. Aluer kape ka i lu u la yô, umbur wer aluer ka kwagh u u fetyô je u lu eren la yô, doo Yehova a we. Shi hide hen ase sha kwagh u Mary la. Shighe u mough yem hen ijiir i ior ve lamen zwa ugen yô, yange nenge ér un ngu a iwasen her yum ga. A kaa ér, “Kwagh u yange m fatyô u eren yô i lu di u nan ikyar tiônôô shin ôron ivur Bibilo gayô nan trak ken kwaghpasen, man kwagh ne shighe lihe.” Nahan a nenge ér un kuma sha ior mba ve fe u lamen zwa shon  tsembelee la ga. Nahan cii kpa, Mary hide sôr mnenge na la. A mase kaven er Yehova una fatyô u eren tom a na aluer un fa u lamen zwa la tsembelee ga je kpaa yô. A kaa wener, “Loho u Bibilo la taver ga, shi ua fatyô u geman uuma mba iorov kpaa.”

16. Ka nyi ia wase mba ve kera dugh hen ya ve ze mape ga la vea zua a agee?

¹⁶ Yehova ka a nenge a isharen i se lu a mi i pasen kwagh la, aluer ka u se fatyô u duen hen ya zan mape ga je kpaa, shi a wuese i. Una fatyô u wasen se u pasen mba ve nengen sha a vese gayô mbatwerev loho u dedoo. Aluer se mba tôôn kwagh u se lu eren hegen ne karen sha kwagh u ngise se eren la yô, iyol ia kpe se. Kpa aluer se nenge er Yehova a lu wasen se hegen la yô, kwagh la una na se agee, se za hemen u wan ishima a hanma kwagh u karen jighjigh wase cii saan saan.

17. Orpasenkwagh 11:6 tese ér aluer ior soo u keghen ato ga je kpa, doo u se za hemen u pasen kwagh sha ci u nyi?

¹⁷ Ivor i mimi i se lôôn la, se fa i ia wa amise ia vese ga. (Ôr Orpasenkwagh 11:6.) Ikyav i tesen yô, anmgbian u kwase ugen u a hembe anyom 80, i yer un ér Barbara yô, ka a pasen kwagh sha telefon man sha u ngeren uwashika hanma shighe. Yange nger washika ugen maa wa Iyoukura i Mei 1, 2014 la ker, tindi orgen vea kwase na a mi. Ngeren ugen ken Iyoukura la lu a itinekwagh ér, “Kwagh u Aôndo a Er sha ci Wou La,” man cuku kpa fa er ior mba tindi ve a mi la lu ior mba yange ve civir Yehova kpa ve va de ga. Ior mbara yange ve ôr Iyoukura la kwa kimbir kimbir. Lu or la vough er Yehova ngu lamen a na jighilii nahan. Maa ve uhar cii ve hide ve hii u zan mbamkombo. Shighe kar yô, ior mba ve de u civir Yehova je hemba anyom 27 ne hide shi hingir Mbashiada. Nenge ase er kwagh u injaa u due ken washika u Barbara tindi a mi ne yange una na ishima ia taver un shi una zua a agee sha wono!

18. Ka nyi i gbe u se er ve se zua a agee a a dugh hen Aôndo laa?

¹⁸ Yehova na se akaa kpishi a aa wase se u zuan a agee hen a na yô. Akaa shon yô, ka msen man Bibilo man anmgbianev mba nomso man mba kasev kua tom u pasen kwagh. Ka sea eren tom a akaa ne yô se tese un ser, se na jighjigh ser una wase se shi a kegh a kegh iyol u eren nahan. Yô se za hemen u suur sha Ter wase u sha u i sar un tsung u “[pasen] agee Na hen mba asema a ve a lu jighelaa her a Na” la hanma shighe cii.—2 Kron. 16:9.