1. Ka nyi i gbe hange hange u hanma orumace nana tsua u erene?

 GBA hange hange u ior vea tsua kwagh u ve soo u eren la nyian. Vea tsua u tan ikyaa a Yehova Aôndo, u a lu Orhemen u tar cii laa? Shin vea ta ikyaa a orihyom na, iferor Satan Diabolo? Gba keng u hanma or nana tsua kwagh môm ken akaa a ahar ne. Man kwagh u nana tsua la una na nana zua a uma u tsôron, shin nana zua a uma u tsôron ga. (Mat. 25:31-33, 46) Sha shighe u “zegecan” la, aluer i ver or ikyav i waren ga yô, a ver nan ikyav i mtim.—Mpa. 7:14; 14:9-11; Esek. 9:4, 6.

2. (a) Mbaheberu 10:35-39 taver se ishima ér se er nyi? (b) Takeda u Mpase ua wase se nena?

² Ôr Mbaheberu 10:35-39. Aluer u tsua u suen hemen u Yehova yô, u tsua kwagh u injaa. Nahan u soo je wer u wase mbagenev kpa ve tsua kwagh u vough. U fatyô u wasen ve sha u ôron ve akaa a i nger ken takeda u Mpase la. Takeda u doon ne pase akaa a aa va er mba ve vende Yehova la yô. Kpa ka cii la ga, shi u ôr akaadoon a mba ve ze hemen u suen hemen u Yehova sha mimi la vea va zua a mi yô. Doo u se time sha akaa a mimi ne. Aluer se er nahan yô, kwagh la una wase se se za hemen u taver ishima civir Yehova. Shi se er tom a mfe u se zua a mi la u wasen mbagenev sha er ve kpa vea tsua u civir Yehova, shi civir un a uwer gban shio yô.

3. Ka nyi se lu timen sha mi ken ngeren nee?

³ Ken ngeren ne, se lu timen sha mbampin mba utar mban: Ka nyi ia va er mba ve lu suen hemen u Aôndo laa? Kpa ka nyi ia va gema a er mba ve tsua u suen inyamkyume i nyian dindee, i i ôr kwagh u i ken takeda u Mpase laa?

4. Ka kweior u han apostoli Yohane yange nenge a ve sha, ve lu vea Yesu imôngo?

⁴ Apostoli Yohane yange nenge a ikweior ihiar ken mpase u sha mnenge. Ikweior ne cii lu suen hemen u Aôndo, shi i na ve averen a uma u tsoron. Kweior u hiihii la lu iorov 144,000. (Mpa. 7:4) I tsua ve shin tar ér ve za lu ator a hemen gomoti shin Tartor sha, vea Yesu imôngo. Vea hemen tar vea Yesu imôngo. (Mpa. 5:9, 10; 14:3, 4) Ken mpase u sha mnenge la, Yohane nenge a ve sha, ve tile vea Yesu imôngo sha Uwo u Shion.—Mpa. 14:1.

5. Ka nyi ica ia gba ga tsô ia er mba ken kweior u 144,000 mba ve mase shin uma her shin tar laa?

⁵ Hii sha shighe u apostoli Yohane la zan zan hegen, i hila tsua ior udubu imôngo mba vea lu ken kwe u mba 144,000 la yô. (Luka 12:32; Rom. 8:17) Nahan kpa, i ôr a Yohane ér ken ayange a masejime yô, mba 144,000 mban vea shi asande shin tar. A va veren “mba ve mase shin” la “ikyav” i tesen ér Yehova lumun ve yô, maa zegecan una hii. (Mpa. 7:2, 3; 12:17) Shighe u zegecan una lu zan hemen la, a va kura asande a ve mba ve mase shin la hen anshighe ugen, a yem a ve sha, vea za kohol mbagenev mba yange ve civir Yehova sha mimi zan zan ve kar kpen la, nahan iyenge ve i 144,000 la maa ia iv. Ve cii vea hingir ator vea Yesu imôngo sha Tartor u Aôndo.—Mat. 24:31; Mpa. 5:9, 10.

6-7. (a) Ka hanma kweior ugen shi Yohane yange nenge a mini, man ka nyi se fe sha kwagh ve? (b) Asande a a shi uma ken mba 144,000 la, kua mba ve lu ken “zegeikpelaior” la cii, gba u akaa a i ôr ken Mpase ityough 7 la aa doo ve sha ci u nyi?

⁶ Yohane nengen a ikyumior i sha, shin mba 144,000 mbara yô, shi hide nenge a “zegeikpelaior” igen. Zegeikpelaior ne yô, i ver a ver iyenge i vea lu ga. (Mpa. 7:9, 10) Ka nyi se fe sha kwagh ve? I pase Yohane ér: “Mban ka mba ve due ken zegecan kera yô, ve ôô akondo a ve sha awambe a Waniyôngo la, a hingir pupuu.” (Mpa. 7:14) Mba ve lu ken “zegeikpelaior” ne la vea va waren zegecan la yô, vea za hemen u lun uma sha tar, shi vea zua a akaa a doon je a kpiligh iyol.—Ps. 37:9-11, 27-29; Anz. 2:21, 22; Mpa. 7:16, 17.

⁷ A tsua se ér se yem sha, shin sea lu a ishimaverenkeghen i va lun uma shin tar gbem sha won kpa, se cii se nenge er se lu ken foto u akaa a i ôr ken Mpase ityough 7 la yô. Shin se kaa ser, se cii se na jighjigh ser akaa a i ôr ken ityough kira cii aa kure sha a vese. Sha shighe la, mbacivir Aôndo mba ken kwe u mba yemen sha mbara man mba ken kwe u mba lun uma shin tar gbem sha won la cii, a saan ve iyol kpishi. A saan se iyol kpishi er se tsua u suen hemen u Yehova yô. Ka nyi igen kpa takeda u Mpase u ôr se sha kwagh u zegecana?—Mat. 24:21.

8. Zegecan una hii nena, man ior kpishi vea gema a er nena?

⁸ I ôr ken ngeren u se hen maa se gbe sha ngun la ér, ica ia gba ga tsô ugomoti mba tar ne vea ta num sha Zege-gbagakwase, u a lu tartor u kwaghaôndo u aiegh sha tar cii la. (Mpa. 17:16, 17) A lu mhii u zegecan je la. Nahan ior kpishi vea hii u civir Yehova shighe u kwagh ne una er laa? Ei. Mpase ityough 6 tese ér sha shighe la uma una taver je a gande, nahan ior mba ve lu civir Yehova ga la cii, vea ker ér mbapatii man mbakasuav mba tar ne mba i yila ve ér iwo la, ve kura ve. Vea lu suen Tartor u Aôndo ga, nahan Yehova una nenge ve je ér mba hendan kwagh a na.—Luka 11:23; Mpa. 6:15-17.

9. Mbacivir Yehova vea due kposo sha shighe u zegecan la nena, man kwagh la una na nyi ia ere?

⁹ Sha kpôô yô, mbacivir Yehova sha mimi cii vea due kposo zum u uma una taver kpishi sha shighe u zegecan la. Shighe la kpa, a lu ve  tseegh vea lu civir Yehova Aôndo sha tar, shi vea venda u suen “inyamkyume” la ye. (Mpa. 13:14-17) Vea zaan hemen u civir Yehova sha mimi her yô, mbahendan a Yehova mbara vea vihi ishima a ve. Kwagh ne una na yô, akuraior aa zua ave, aa ta num sha nongoior u Aôndo sha tar cii. Bibilo yila num u vea mough er ityough ki ve ker vough ga, vea ta sha nongoior u Aôndo ne ken kwaghôron u profeti ér, num u Gogi u Magogi.—Esek. 38:14-16.

10. Mpase 19:19-21 tese ér ka nyi Yehova una er zum u a ta num sha mbacivir un laa?

¹⁰ A ta num sha mbacivir Yehova nahan, Yehova una er nena? A kaa a vese ér: “Iyugh Yam ia kôndom ken ahenga.” (Esek. 38:18, 21-23) Mpase ityough 19 maa ôr kwagh u Yehova una er hen shighe la yô. Yehova una tindi Wan na una va nôngo ityav sha ci u nongoior Na, shi una hemba mbaihyomov vev ityav. “Akumautya a sha,” ka mbatyomov mba jighjigh je la, vea mba 144,000 mbara cii, vea kohol Yesu, vea nongo ityav sha ci wase. (Mpa. 17:14; 19:11-15) Ityav mbi shon mbia kure nena? A tim ior, kua iniongo i i hendan kwagh a Yehova la cii sha won kera purututu!—Ôr Mpase 19:19-21.

11. Ka kwagh u vesen u hemban cii u nyi takeda u Mpase u kaa ér una va ere?

¹¹ Hen ase er a lu mbajighjigh mba sha tar mba vea war la ken ishima shighe u a tim mbaihyomov mba Aôndo sha won kera elegh elegh la yô! Sha shighe la, mba vea lu sha tar cii vea ember kpishi! Shin er a lu geren amo sha ember zum u a tim Zegebabilon kera la nahan kpa, kwagh ugen kpa ngu u una na a saan mba shin tar iyol kpishi yô. (Mpa. 19:1-3) Man ka kwagh u vesen u hemban cii u takeda u Mpase u kaa ér una er yô, ka “ivese i Waniyôngo.”—Mpa. 19:6-9.

12. Mpase 21:1, 2 tese ér ivese i Waniyôngo la ka hanma shighe?

¹² Ivese i Waniyôngo la ka hanma shighe? Mba 144,000 mbara cii vea yemen sha yô, fese je maa ityav mbi Armagedon mbia pev. Nahan kpa, ka shighe la Waniyôngo una er ivese ga. (Ôr Mpase 21:1, 2.) Ka shighe u a nôngo ityav mbi Armagedon, a tim mbaihyomov mba Aôndo sha won cii a bee kera la, Waniyôngo una mase eren ivese na ye.—Ps. 45:3, 4, 13-17.

13. Ivese i Waniyôngo la ia zua ana vea naa, man ka nyi ia er sha ivese ve laa?

¹³ Ivese i Waniyôngo la ia zua ana vea naa, man ka nyi ia er sha ivese ve laa? Er ivese ka i zua nomsoor vea kwase ve hingir u lun imôngo nahan, kape ivese i sha injakwagh ne kpa ia zua Waniyôngo, ka Tor Yesu Kristu je la, vea “kwase he” na, mba 144,000 mbara, vea lu imôngo je la. Inja na yô, a bum hanma ve tor, vea lu ator a gomoti u he u una hemen tar anyom 1,000 la.—Mpa. 20:6.

14-15. Mpase ityough 21 kaa ér mba 144,000 mbara mba er nyi nahana? (Nenge foto u sha igbende.)

¹⁴ Mpase ityough 21 shi kaa ér mba 144,000 mbara mba er gar u engem kpishi u i yer ér “Yerusalem u He” la nahan. (Mpa. 21:2, 9) I wa ityô i girgar na sha hwe, sha awen a injaa atô kposo kposo, hii shin inya yem sha lu awen a injaa kposo kposo 12. I nger ati “a 12 a mbaapostoli mba 12 mba Waniyôngo mbara” sha mi. Inja na yô, hanma iwen i nger iti i apostoli môm ken Mbapuekaruhar mbara sha mi. Yohane nenge kwagh ne doo un kpishi sha ci u nyi? Yange doo un sha ci u nenge i nger iti na kpaa sha iwen igen ken awen la. Lu kwagh u icivirigh kpishi!—Mpa. 21:10-14; Ef. 2:20.

¹⁵ Mluashe u gar u sha injakwagh ne ngu kposo a hanma geri sha won cii. Gar ne ngu a gbenda u vesen ker môm, i er u sha zanaria. Shi ngu a ihindagar 12, i er i sha tagbede. I wa ityô  i girgar na sha awen a injaa, shi i maa girgar shon kpa sha awen a injaa. I er kwagh ne cii sha hwe. Iniembe i gar ne kua igbanger na man ityaven na cii lu kwaghmôm. (Mpa. 21:15-21) Kpa apostoli Yohane gema nenge a kwagh ugen ken gar ne ga. Nenge ase kwagh ugen Yohane shi ôr ne, ér: “M nenge a tempel ker ga, sha ci u ka Yehova Aôndo, U Hemban Agee Cii a lu tempel na ye, shi Waniyôngo kpa ka tempel na. Shi ityôkyaa lu i iyange shin uwer vea ta iwanger ken gar la ga, sha ci u iengem i Aôndo mondo iwanger ker, shi imenger i gar shon lu Waniyôngo.” (Mpa. 21:22, 23) Ve mba ve lu Yerusalem u He ne vea lu vea Yehova imôngo. (Heb. 7:27; Mpa. 22:3, 4) Sha nahan yô, ka Yehova man Yesu ve lu tempel ken gar la ye.

16. Sha shighe u Hemen u Aôndo u Anyom Dubu la, ka nyi ia er uumacee?

¹⁶ Mba i shighe ve mkurem mbara ka vea hen sha kwagh u gar ne yô, i saan ve iyol kpen kpen. Mba ve lu a ishimaverenkeghen i va lun uma gbem sha won shin tar la kpa, gba u kwagh u gar ne una doo ve. Sha ci u, sha shighe u Hemen u Tartor u Aôndo u Anyom Dubu la, Yerusalem u He ne una va a akaadoon kpishi je a gande u ôron. Yohane nenge akaadoon ne lu kuan ken gar la senen er ka “ifi u mngerem ma nan uma” nahan. “Ikyon i nan uma” gema lu sha akpe a ifi la keen man keen “sha ci u been akuraior angev.” (Mpa. 22:1, 2) Ior mba vea lu uma sha shighe la cii, vea lu sha ian i akaa a injaa ne aa wase ve yô. Nahan uumace mba ungwan imo i Aôndo cii vea gema kure kure, zan zan myen cuku una kera lu ken a ve ga. Heela tseegh ga, angev mbua kera lu ga, mnyoon kpa una kera lu ga, shi mliam kpa ma a kera lu ga.—Mpa. 21:3-5.

17. Mpase 20:11-13 tese ér ka unô Hemen u Anyom Dubu la ua va a akaadoon kpishi sha ci ve?

¹⁷ Ka unô Hemen u Anyom Dubu la ua va a akaa a doon kpishi ne sha ci ve? Hiihii yô, ka zegeikpelaior i ia va war ityav mbi Armagedon la, kua ônov mba alaghga a va mar ken tar u he la cii. Kpa Mpase ityough 20 shi kaa ér a nder mbakpenev shin ku. (Ôr Mpase 20:11-13.) “Mbaperapera” mba yange ve civir Yehova sha mimi zan zan ve kar kpen la cii vea hide a lu uma shin tar u se lu sha u ne, ve kua mbagenev mba yange ve lu “mbaperapera ga” kpaa, ka mba yange gbenda due u vea hen kwagh u Yehova ga zan zan ve kar kpen je la. (Aer. 24:15; Yoh. 5:28, 29) Kwagh ne tese ér ka u mbakpenev cii a va nder ve shin ku vea hide a  lu uma sha tar sha shighe u Hemen u Anyom Dubu laa? Ei. Mba yange gbenda due u vea civir Yehova kpa ve venda u civir un zan zan ve kar kpen la cii, a nder ve shin ku ga. Ve vihi ian i yange ma ve civir un la shi ve tese ér ve kuma u va lun uma ken Paradiso sha tar ga.—Mat. 25:46; 2 Tes. 1:9; Mpa. 17:8; 20:15.

18. Shighe u anyom 1,000 la a za bee la, uumace vea lu nena?

¹⁸ Shighe u anyom 1,000 la a bee nahan, a gema ior mba vea lu uma sha tar cii, or a kera lu a ma mshi shin myen ga, vough er Aôndo yange gba orumace sha hiihii la nahan. Or môm sha tar nana kera tagher a mbamzeyol mba isholibo i se due a mi ken Adam la i ve se a mi ne ga. (Rom. 5:12) Ifyan i yange i wa sha ci u isholibo i Adam la cii ia kar kera vindi vindi. Inja na yô, shighe u anyom 1,000 a za bee la, ior mba sha tar cii vea “hide a lu uma,” sha ci u orumace môm nana kera lu a isholibo i i ve a ku la iyol ga.—Mpa. 20:5.

19. Gba u a va mee uumace sha kwa u masetyô keng sha ci u nyi?

¹⁹ Se umbur er Yesu yange er kwagh u doon Yehova tseegh ken uma na cii, kua shighe u Satan lu meen un la je kpaa yô. Shighe u uumace cii vea va kera lu a myem môm môm ga la, vea lumun u dondon ikyav i Yesu zum u a na Satan ian ér a mee ve la kpa? Shighe u a va dugh Satan shin ihyungwa i i ze kweng ken mbee u anyom 1,000 la, hanma or nana lu sha ian i nana fatyô u tesen ér nan ta ikyaa Yehova sha mimi. (Mpa. 20:7) Nahan, shighe u a lu meen uumace sha kwa u masetyô la, mba vea tese ér mba civir Yehova sha mimi la cii, vea zua a uma u tsôron, shi a pase ve vea kera lu uikyangen mayange ga. (Rom. 8:21) Kpa mba vea hendan kwagh la cii yô, a tim ve sha won kera elegh elegh, vea Satan Diabolo kua azôv a na imôngo.—Mpa. 20:8-10.

20. Akaaôron a profeti a doon a ken takeda u Mpase la na yô, ka u nena?

²⁰ Akaa a vesen a takeda u Mpase u ôr, a se time sha mi kpase ne na yô, ka u nena? U nenge a iyol you ken foto u akaaôron a profeti a doon kpishi ne nahan, saan we iyol gaa? Kwagh ne na u soo wer u lôhô mbagenev ve va kohol se ken mcivir u mimi u Aôndo wase ne gaa? (Mpa. 22:17) Er akaadoon kpishi a aa ve er ken hemen ne a kpoghor asema a ase yô, saan se iyol kpen kpen, shi se mba ôron er apostoli Yohane kpa ôr nahan, ser: “Amen! Va, Ter Yesu.”—Mpa. 22:20.