NGEREN U TIMEN SHA MI 19
ICAM 22 Tartor la Hemen—Yô U Va!
Ka Nyi Se Fe sha Gbenda u Yehova Una Va Ôr Ior Ijir ken Hemen Laa?
“Yehova . . . soo ér or môm nana tim ga.”—2 PET. 3:9.
KWAGH U SE LU HENEN YÔ
Ken ngeren ne, se lu nengen er se fatyô u lun a vangertiôr ser Yehova una va ôron ior ijir ken hemen yô, una ôr sha mimi yô.
1. Se fatyô u kaan ser se mba uma sha shighe u doon kpishi sha ci u nyi?
SE MBA uma sha shighe u doon kpishi! Hanma iyange yô, ka se nenge er akaa a Bibilo i tsenga ôron la, a lu kuren sha mi sha ashe a ase yô. Ikyav i tesen yô, ka se nenge er “tor u ken imbusutarimese” vea “tor u ken imbusutariyan” la ve lu nôngon ker ayol a ve, sha ci u hanma ve nan soo ér nana hemba tahav sha tar cii yô. (Dan. 11:40) Shi se nenge er i lu pasen loho u dedoo u Tartor u Aôndo sha tar cii, shi ior umiliôn imôngo ve lumun u civir Yehova yô. (Yes. 60:22; Mat. 24:14) Shi se mba zuan a kwaghyan u ken jijingi kpishi “sha shighe [vough].”—Mat. 24:45-47.
2. Se fatyô u lun a vangertiôr ser nyi, kpa ka nyi i gbe u se umburu?
2 Yehova ngu wasen se sha er se kav akaa a vesen a ica a gba ga tsô aa er la yô. (Anz. 4:18; Dan. 2:28) Se fatyô u lun a vangertiôr ser sha shighe u zegecan una va hii la nahan, se fa hanma kwagh u i gbe u se fa ve una wase se u wan ishima civir Yehova sha mimi, shi lun ken mzough vea anmgbianev asev hen shighe u taver la yô. Nahan kpa, gba u se umbur ser akaa agen a ica a gba ga tsô aa er ken hemen la yô, se fa ga. Ken ngeren ne, se hii timen sha ityôkyaa i i ne ve se nyôôso akaa agen a yange se ôr sha kwagh u akaa a a va er ken hemen la yô. Maa se nenge akaa agen a se fe sha kwagh u ken hemen la, kua gbenda u Ter wase u sha la una er kwagh sha mi la kpaa.
KWAGH U SE FE GA YÔ
3. Ka nyi yange se ôr sha kwagh u shighe u ior vea va kera zua a ian i civir Yehova ga laa, man yange se ôr nahan sha ci u nyi?
3 Tsuaa la, se kaa ser zegecan una hiin yô, ior vea kera zua a ian i va civir Yehova shi waren Armagedon ga. Yange se ôr nahan sha ci u se hen ser hanma kwagh una va er ken hemen er yange er sha shighe u Mngerem ma Deemee la nahan. Ikyav i tesen yô, yange se hen ser, er Yehova yange wuhe hunda u tso la ve, lu u or môm nana kera fatyô u nyôron ker ga nahan, kape shighe u zegecan una hii la kpa a kera lu u or môm nana fatyô u geman ishima civir Yehova ga je la.—Mat. 24:37-39.
4. Er nan ve se kera kaan ser hanma kwagh u yange er sha shighe u Noa la, una va er ken hemen ga? Ta iwanger.
4 Aluer se nenge ser hanma kwagh u yange er sha shighe u Mngerem ma Deemee la, ngu tesen akaa a a va er ken hemen la nahan, a lu shami? Ei. Se venda sha ci u nyi? Sha ci u Bibilo ôr kwagh nahan ga. a Yesu yange tôô “ayange a Noa” la kar sha shighe u mve na. Nahan kpa, lu kaan ér hanma kwagh u yange er sha shighe u Noa la, una va er sha shighe u mve na la ga, shi lu kaan kpaa ér kwagh u Yehova yange wuhe hunda u tsoo ve ior kera zua a ian i waren ga la, imbakwagh la ia er ga. Kpa kwagh ne maa tese ér se fatyô u henen akaa ken kwagh u Bibilo i ôr sha kwagh u Noa kua Mngerem ma Deemee la ga ze.
5. (a) Ka nyi Noa yange er cii ve Mngerem ma Deemee va? (Mbaheberu 11:7; 1 Peteru 3:20) (b) Tom u pasen kwagh u Noa er la, zua vea tom wase u pasen kwagh nyian sha nyi gbenda?
5 Noa yange ongo icintan i Yehova yô, a tese ér un na Yehova jighjigh sha u eren tso. (Ôr Mbaheberu 11:7; 1 Peteru 3:20.) Nyian ne kpa, gba u mba ve ongo loho u dedoo u Tartor u Aôndo la kpa, vea tese ér ve na jighjigh sha u eren kwagh u ve ongo la. (Aer. 3:17-20) Peteru yange yila Noa ér, “or u pasen kwagh u perapera.” (2 Pet. 2:5) Nahan kpa, er se vande ôron ken ngeren u a kar la nahan, Noa yange una nôngo ér una pase ior mba sha tar cii kwagh, cii ve Mngerem ma Deemee mase van kpa, se fa ga. Nyian ne, se mba nôngon ser se pase kwagh sha tar jimin cii, man se mba eren tom ne sha gbashima je. Nahan kpa, sea nôngo nan nan kpaa, se fatyô u pasen hanma or sha tar loho u dedoo cii ve mkur una va ga. Se ôr nahan sha ci u nyi?
6-7. Se fatyô u kaan ser ka hanma or sha tar se fatyô u pasen nan loho u dedoo ga sha ci u nyi? Ta iwanger.
6 Hen ase sha kwagh u Yesu ôr sha tom wase u pasen kwagh ne. Yange tsenga ôron ér a pase loho u dedoo “a tser tar sha u u lu shiada hen akuraior cii.” (Mat. 24:14) Kwaghôron u profeti la ngu kuren sha mi nyian sha gbenda u kpilighyol kpen kpen. I gema ityakeda i pasen loho u Tartor ken ijô i hemban 1,000. Shi ijiir yase i sha Intanet i jw.org la na yô, ior kpishi sha tar nyian hingir u ungwan loho u Tartor u Aôndo.
7 Nahan kpa, Yesu shi yange kaa a mbahenen nav ér vea lu ‘a zende sha agar ve tser,’ shin vea lu a pase hanma or kwagh ga tsô, una va. (Mat. 10:23; 25:31-33) Mkaanem ma Yesu man ma a kure sha mi sha ayange a ase ne kpaa. Ior kpishi nyian mba sha ajiir a i yange tom wase u pasen kwagh ne yô. Heela tseegh ga, hanma miniti yô, ka i mar mbayev uderi imôngo. Nahan ka se nôngo sha afatyô wase cii sha er loho u dedoo ne u ar a “hanma ikyurior man hanma ipyaven man hanma zwa” yô. (Mpa. 14:6) Kpa jighilii yô, se fatyô u pasen hanma or sha tar loho u dedoo ga tsô mkurtar una va.
8. Alaghga ka nyi se pine sha gbenda u Yehova una va ôr ior ijir ken hemen laa? (Shi nenge ufoto kpaa.)
8 U zuan sha kwagh u se lu lamen sha mi ne yô, alaghga se pine ser: Ior mba adooga vea fatyô u ungwan loho u dedoo ga tsô zegecan una hii la yô, Yehova vea Wan na, u a ne un tahav mbu ôron ijir la, vea er a ve nena? (Yoh. 5:19, 22, 27; Aer. 17:31) Ivur Bibilo i ngeren ne a har sha mi la kaa ér Yehova “soo ér or môm nana tim ga.” Kpa a soo ér “ior cii ve zua a ian i geman ishima.” (2 Pet. 3:9; 1 Tim. 2:4) Er se fe akaa ne sha kwagh u Yehova nahan kpa, doo u se fa ser ngu a pase se gbenda u una ôr mba i lu je ve lu a ungwa kwagh na ga la ijir ga. Kpa jighilii yô, saa una ôr se kwagh u una er la keng keng ga.
Yehova una er a mba alaghga yange ve zua a ian i henen kwagh na ga tsô zegecan hii la nena? (Nenge ikyumhiange i sha 8) c
9. Ka nyi Yehova a pase se ken Mkaanem nam?
9 Yehova pase se akaa agen a una va er la ken Mkaanem nam. Ikyav i tesen yô, Bibilo kaa a vese ér Yehova una va nder “mbaperapera ga,” ka mba yange ve zua a ian i henen kwagh na shi geman anza a ve ga je la. (Aer. 24:15; Luka 23:42, 43) Kpa kwagh ne gema due a mbampin mba vesen mbagenev.
10. Ka mbampin mbagenev mba nyi alaghga se pine?
10 Ior mba vea kpe sha shighe u zegecan la cii a kera nder ve shin ku gaa? Ruamabera ôr se wang ér mba ve hendan a Yehova, mba una tim ve sha ityav mbi Armagedon la cii, a va nder ve shin ku ga. (2 Tes. 1:6-10) Kpa ior mbagenev mba alaghga vea kpe hen shighe u zegecan, sha ci u angev shin iyolbeen shin or wua ve gayô sha ci u ityôkyaa igen la di ye? (Orpa. 9:11; Sek. 14:13) Ior mban mbagenev vea fatyô u lun ken “mbaperapera ga” mba a va nder ve shin ku ken tar u he laa? Jighilii yô, se fa ga.
KWAGH U SE FE YÔ
11. Ka nyi ia lu kwagh u a ôr ior ijir sha mi sha shighe u Armagedon laa?
11 Se fa akaa kpishi sha akaa a aa va er ken hemen la. Ikyav i tesen yô, se fa ser sha shighe u Armagedon la, a ôr ior ijir sha gbenda u ve er kwagh a anmgbianev mba Kristu la. (Mat. 25:40) Mba a kure ve ijir ér mba iyôngo la, a lu mba yange ve sue mba i shighe ve mkurem kua Kristu la. Shi se fa ser, anmgbianev mba Kristu mbagenev vea shi shin tar shighe u zegecan una hii la, man vea lu shin tar her zan zan shighe u a mase shin kpuaa u ityav mbi Armagedon mbia hii la. Nahan er anmgbianev mba Kristu mbagenev vea shi shin tar her yô, adooga ior mba ve lu a ishima i mimi la vea zua a ian i suen ve kua tom u ve eren la. (Mat. 25:31, 32; Mpa. 12:17) Er nan ve kwagh ne a lu kwagh u injaa kpishi yumu?
12-13. Alaghga mbagenev vea va nenge mtim u “Zegebabilon” la nahan vea er nena? (Shi nenge ufoto kpaa.)
12 Shighe u zegecan una hii la je kpa, alaghga ior mbagenev mba vea nenge mtim u “Zegebabilon” la, vea umbur er Mbashiada mba Yehova yange ve ôron ér kwagh una va er sha tar nahan yô. Nahan alaghga mbagenev mba vea nenge akaa ne aa er sha shighe u zegecan la, vea gema ishimaa?—Mpa. 17:5; Esek. 33:33.
13 Aluer kwagh er nahan yô, a lu vough er kwagh u yange za hemen ken Igipiti sha ayange a Mose la nahan. Umbur wer shighe u Mbaiserael lu duen ken Igipiti la, “ikpelaior igen i i lu nungwa nungwa” yô, i kohol ve i due a ve imôngo. Alaghga ior mban mbagenev yange ve hii u nan Aôndo jighjigh shighe u ve nenge Atsan a Pue a Mose kaa ér nga van sha tar u Igipiti la, va sha tar la yô. (Eks. 12:38) Aluer i va tim Zegebabilon, man ior hingir u va kohol se cii ve mkurtar una va, er yange lu sha ayange a Mbaiserael la nahan, se nenge ser i er kwagh a vese shami gaa? Eihe! Se soo ser se lu er Ter wase u sha u a ‘mgbough a mhôônom ma zungwen kua mrumun u sha mhôôn, a we ishima shi a lu a erdoo man mimi wuee’ la. b—Eks. 34:6.
Alaghga ior mbagenev mba vea nenge mtim u “Zegebabilon” la, vea umbur er Mbashiada mba Yehova yange ve ôron ér kwagh una va er sha tar nahan yô (Nenge ikyumhiange i sha 12-13) d
14-15. Ka shighe u yange or nan kpe la shin ijiir i nan lu la ia na ve nana va zua a uma u tsôron yee? Ta iwanger. (Pasalmi 33:4, 5)
14 Alaghga ashighe agen se ungwa anmgbian u nomso shin u kwase nana ôr kwagh u or u hen tsombor u nan u nan civir Yehova ga la ér, “Aluer or wam ne kpe hegen er zegecan a lu a hii ga ne yô a doo, sha ci u a va nder un shin ku.” Aluer nan ôr kwagh nahan yô, tese ér kwagh u or u nan la gba nan ishima. Nahan kpa, Yehova una va nder or shin ku sha ci u yange nan kpe hen ma shighe yum ga. Yehova ka Orjirigh u vough, er ijir sha mimi. (Ôr Pasalmi 33:4, 5.) Nahan se fatyô u lun a vangertiôr ser “Orjirigh u tar cii” la una er kwagh u a lu u vough yô.—Gen. 18:25.
15 Shi aluer se kaa ser ka ijiir i or nan lu la ia na ve nana zua a uma u tsôron shin nana zua a mi ga yô, a lu shami ga cii. Ior umiliôn umiliôn mba ve lu sha ajiir a ve fetyô u ungwan loho u Tartor ne ga la, Yehova una gba kuren ve ijir tsô ér mba “ivo” ga. (Mat. 25:46) Er kwagh u ior mban a gbe se ishima nahan kpa, kwagh ve hemba gban Orjirigh u tar cii la ishima a vese ica je. Se fa er Yehova una va er kwagh ve hen shighe u zegecan la ga. Adooga akaa a ior mban vea nenge aa lu eren hen shighe u zegecan la aa mgbegha ve u nan Yehova jighjigh shighe u una tsegha iti na sha tar cii la.—Esek. 38:16.
Shighe u zegecan una hii la, . . . alaghga mbagenev mba vea nenge akaa ne aa er . . . la vea gema ishimaa?
16. Ka nyi se fe sha kwagh u Yehova? (Shi nenge foto kpaa.)
16 Er se lu mba henen Bibilo yô, se fa ser uma gba Yehova kwagh kpishi. A na Wan na sha ci wase, sha er se cii se fatyô u lun a ishimaverenkeghen i va lun uma gbem sha won yô. (Yoh. 3:16) Shi se cii se nenge er Yehova a tesen ér se doo un ishima yô. (Yes. 49:15) A fa hanma wase sha iti i nan. A fa se tsembelee je yô, sea kpe a kpe je kpa, una nder se sha ci u a fa se vindi vindi kua akaa a yange er se ken uma la kpaa! (Mat. 10:29-31) Sha kpôô yô, se mba a ityôkyaa i dedoo i nan jighjigh ser Ter wase u sha u se doo un ishima la, una ôr hanma or ijir sha mimi. Sha ci u un ka u perapera, zungwen mhôônom shi a hemba kwaghfan.—Yak. 2:13.
Se fatyô u lun a vangertiôr ser Yehova una ôr hanma or ijir sha mimi. Sha ci u un ka u perapera, zungwen mhôônom shi a hemba kwaghfan (Nenge ikyumhiange i sha 16)
17. Ka nyi se lu timen sha mi ken ngeren u a dondo laa?
17 Mkav u he u se zough a mi ne na yô, tom wase u pasen kwagh ne hemba ngun torough torough hegen cii. Se ôr nahan sha ci u nyi? Man ka nyi ka i mgbegha se u pasen loho u dedoo a uwer gban shio? Se lu timen sha mbampin mban vighe vighe ken ngeren u a dondo la.
ICAM 76 Ka i Lu U ken Ishima Nena?
a Wea soo u fan ityôkyaa i i ne ve i nyôôso mkav ne yô, nenge ngeren u a lu a itinekwagh ér, “Kape I Doo U ken Ishima Je La” ken Iyoukura i Maaci 15, 2015, peeji 7-11 la.
b A va timin Zegebabilon kera yô, mbacivir Yehova cii a kar jighjigh ve shighe u Gogi u Magogi una ta num sha ior mba Aôndo la. Hanma or u nana va kohol ior mba Aôndo hen shighe u a tim Zegebabilon kera la yô, nan kpa a kar nan.
c NGEREN U PASEN FOTO: Akaa atar a alaghga aa na ve loho u se pasen ne ua nyôr a mbagenev ga yô: (1) Kwase ugen ngu hen ijiir i kwaghaôndo u hen ijiir shon a ne i taver u pasen un kwagh yô, (2) orgen vea kwase na mba hen ijiir i gomoti u tar ve a ne i cieryol u pasen kwagh her yô, man (3) orgen ngu ken toho ica hiinii, ape or a fatyô u zan her za pasen kwagh ga yô.
d NGEREN U PASEN FOTO: Gumkwase ugen u yange civir Yehova yô, undu mimi kpa a hide a umbur kwagh u yange hen sha kwagh u mtim u “Zegebabilon” yô. Nahan a gema ishima shi a hide a va kohol mbamaren nav mba ve lu Mbakristu la. Aluer or er kwagh nahan yô, se soo ser se dondo ikyav i Ter wase u sha u a zungwen mhôônom shi kunya u ker un a or u nan gem ishima la shi ka i saan un iyol shighe u nan hidi hen a na yô.
