NGEREN U TIMEN SHA MI 21
ICAM 107 Aôndo Ver Se Ikyav i Tesen Dooshima
U Er Nan Ve U Zua a Or u Injaa u U Vôso?
“Ka an nana fatyô u zuan a kwase u injaa? Gadia nan hemba asa a mimi inja.”—ANZ. 31:10.
KWAGH U SE LU HENEN YÔ
Ngeren ne time sha akaawan a Bibilo a aa wase or u tsuan nom shin kwase u injaa yô, shi a pase er mba ken tiônnongo vea fatyô u wasen anmgbianev mba ve lu kwav la u tsuan or u injaa u vea vôso yô.
1-2. (a) Ka akaa a nyi nahan i gbe u Mbakristu mba ve lu kwav la vea fa cii ve vea hii ishiôr? (b) Ka nyi i lu “ishiôr”? (Nenge “Ishember i i Te Iwanger Sha Mi Yô.”)
U SOO u eren kwase shin nomo? Er ivaa i lu kwagh u hange hange u nan or msaanyol ga nahan kpa, Mbakristu kpishi mba ve lu kwav yô, ka vea lu agumaior shin vea lu mbabeenyol kpa, ve soo u eren nom shin kwase. Nahan kpa, cii ve nomsoor vea kwase ve hii u sôôr ayol a ve yô, gba u vea ya ijende vea Yehova kôôsôô, shi vea fa ayol a ve tsembelee, shi vea fa aluer ka u vea fatyô u nengen sha mbamgbe vev mba sha iyol yô. a (1 Kor. 7:36) Aluer u er nahan yô, u nyôr ken ivese kpa a hemba saan we iyol.
2 Nahan kpa, ka zange u zuan a or u injaa u u vôso ga. (Anz. 31:10) Shi aluer u zua a or u u soo wer u seer fan nan kpa, alaghga a lu zange u hiin ishiôr la ga. b Ken ngeren ne, se lu timen sha kwagh u una wase Mbakristu mba ve lu kwav la u zuan a or u injaa u vea sôôr, vea vôso yô. Shi se nenge kwagh u mbagenev ken tiônnongo vea er sha u wasen anmgbianev mba ve soo u vôson ayol a ve la yô.
ER U ZUA A OR U INJAA U U VÔSÔ YÔ
3. Ka akaa a nyi nahan i gbe u Orkristu nana hen sha mi shighe u nan lu tsuan or u nana vôso?
3 Aluer u soo u eren nom shin kwase yô, doo u u hii fan aeren a u soo wer or la nana lu a mi la cii ve u hii ishiôr ye. c Aluer u er nahan ga yô, alaghga u fatyô u fan or u ma u vôso nan ve ma i wase u la ga, shin u hii u sôôr or u aeren a nan a zough aa a ou ga yô. Jighilii yô gba u or u u soo u vôson la nana lu Orkristu u nan er batisema yô. (1 Kor. 7:39) Kpa ka hanma or u nan er batisema u vôso nan ve a saan we iyol ga. Nahan pine iyol you wer: ‘Ka akaa a nyi m soo u eren ken uma wama? Ka aeren a nyi m nenge mer or u m soo mer me vôso la nana lu a mi hange hangee? Me fatyô u zuan a imbaor i m keren la je kpa?’
4. Ka akaa a nyi nahan mbagenev ve er msen sha mi sha kwagh u zuan a or u vea vôso laa?
4 Aluer u soo u vôson nom shin kwase yô, u er msen sha mi je ka u henen a hen ga. (Fil. 4:6) Nahan kpa, Yehova tôndo zwa u nan or môm nom shin kwase ga. Kpa er kwagh wou a gbe un ishima yô, una wase u er u lu keren or u u vôso yô. Nahan za hemen u pasen Yehova er i lu u ken ishima la man akaa aa a sar u la. (Ps. 62:8) Sôn Yehova a na u kwaghfan man ishimawan. (Yak. 1:5) Anmgbian ugen ken tar u Amerika iti na ér John, d a ôr akaa a ka un er msen sha mi yô, a kaa ér: “Ka m ôr Yehova aeren a i sarem u or u m soo u vôson la ma nan lu a mi yô. Maa m sôn mer Yehova a bughum gbenda u me fatyô u zuan a nan yô. Shi ka m sôn Yehova mer a wasem me lu a aeren aa me lu a mi ve, me lu nom u injaa yô.” Anmgbian u kwase ugen ken tar u Sri Lanka, iti na ér Tanya, a kaa ér: “Er m lu keren or u me vôso nahan kpa, ka m sôn Yehova mer a wasem me tile sha mimi shi me lu a mnenge u vough shi me lu sar sar.” Aluer u zua a or hegen u u vôso ga kpa, Yehova tôndo zwa ér una za hemen u nengen sha mbamgbe ou mba sha iyol kua mba ken ishima la cii.—Ps. 55:22.
5. Ka aan a nyi nahan Mbakristu mba ve lu kwav la ve lu a mi a zuan a or u Yehova a doo nan ishima? (1 Mbakorinte 15:58) (Shi nenge foto kpaa.)
5 Bibilo taver se ishima ér se “luun . . . a akaa a eren kpishi ken tom u Ter.” (Ôr 1 Mbakorinte 15:58.) Aluer u tume ityough u civir Yehova, shi u ngu lun vea anmgbianev mba nomso man mba kasev kposo kposo yô, kwagh la una bugh u ian i zuan a anmgbianev mba ve lu kwav shi ve lu civir Yehova er we nahan yô. Man er u lu nôngon sha afatyô wou cii wer u er ishima i Yehova la, a saan we iyol sha mimi.
Aluer u uve ityou u eren akaa ken mcivir u Yehova shi u ngu lun vea anmgbianev mba nomso man mba kasev kposo kposo yô, u fatyô u zuan a or u nan kpa nan lu keren nom shin kwase yô (Nenge ikyumhiange i sha 5)
6. Aluer Orkristu nan ngu keren or u nana vôso kpa, ka nyi i gbe u nana umburu?
6 Nahan kpa, gba u u wa ikyo sha er u yem keren nom shin kwase je u hungur a akaa a vesen a ken uma ga yô. (Fil. 1:10) Saa or a er kwase shi nom ve a saan nan iyol ga, kpa ka ijende i or ye vea Yehova la ia na a saan nan iyol sha mimi ye. (Mat. 5:3) Shi er u lu kwav ne, u fatyô u seer eren tom u pasen kwagh. (1 Kor. 7:32, 33) Er kwagh a shighe u u lu a mi ne sha inja. Anmgbian u kwase ugen ken tar u Amerika iti na ér Jessica, yange er nom shighe u zurum anyom 40 yô, a kaa ér: “Shighe u m lu kwav la, yange m er tom u pasen kwagh la kpoghuloo man kwagh la na mlu wam kumam shin er yange sarem u vôson nom nahan kpaa.”
TÔÔ SHIGHE FA AKAA A OR U U SOO U VÔSON NAN LA NAN SOO YÔ
7. Doo u u tôô shighe u nenge gbenda u or nan eren kwagh la cii ve u ôr nan er i lu u ken ishima a nan la sha ci u nyi? (Anzaakaa 13:16)
7 Aluer u hen wer or u u zough a nan la nana lu nom shin kwase u injaa di ye? Doo u u pase or la ave ave er i lu u ken ishima laa? Bibilo kaa ér, orfankwagh ka nan hen sha kwagh cii ve nan tsua kwagh u nana er ye. (Ôr Anzaakaa 13:16.) Nahan doo u u ver ishima zulee u nenge gbenda u nan eren kwagh ken uma u nan la cii ve u pase nan er i lu u ken ishima la ye. Anmgbian ugen ken tar u Netherlands iti na ér Aschwin a kaa ér: “Kwagh u or una fatyô u doon we fele, kpa ashighe agen isharen la ia ngôôr been ga. Nahan aluer u tôô shighe u nenge gbenda u or nan eren kwagh yô, u hii u sôôr or shon tsô wer u nenge a nan, nan doo u ga.” Shi aluer u ver ishima u nenge gbenda u or nan eren kwagh la yô, alaghga u mase nengen wer aeren a en zua ga.
8. Anmgbian u nan lu kwav la nana er nan ve nana fa or u nan soo u vôson la tsembelee kua gbenda u nan eren kwagh laa? (Shi nenge foto kpaa.)
8 U tôv sha aeren a or u u nenge a nan, nan doo u la zulee nena? U fatyô u nengen aluer Yehova doo nan ishima shi fan aeren a nan shighe u ne ze mbamkombo mba tiônnongo shin shighe u tiônnongo a due u za man ahumbe yô. Ka unô ve lu azende a nan, man ka akaa a nyi nan lamen sha mi? (Luka 6:45) Akaa a nan we ishima u eren la zua vea a ou kpa? U fatyô u pinen mbatamen mba ken tiônnongo u nan shin anmgbianev mbagenev mba ve fe kwagh u nan tsembelee yô, ve ôr u kwagh u nan. (Anz. 20:18) U fatyô u pinen inja i nan kua aeren a na. (Rutu 2:11) Nahan kpa, er u lu nôngon wer u fa gbenda u nan eren kwagh la, palegh u eren akaa a u na a hagher nan yô. De keren wer u luun vea nan hanma shighe shin u fa hanma kwagh u nan ga.
Cii ve u pine or ishiôr yô, tôô shighe nenge sha gbenda u nan eren kwagh la tsembelee (Nenge ikyumhiange i sha 7-8)
9. Cii ve u hii u sôôr or yô, ka nyi i gbe u u fa?
9 Gba u u tôô shighe u fan or la a kuma shighe nena cii ve u mase pasen nan er i lu u ken ishima a nana? Aluer u kaa a or la wer kwagh u nan doo u fele yô, alaghga nana nenge ér we u hen sha kwagh u u lu ôron la tsembelee ga. (Anz. 29:20) Kpa aluer or la nan kav avindir ér kwagh u nan doo u kpa u gema u tôô shighe gôgônan u ôron nan yô, nana nenge ér u ngu or u ka i taver we u tsuan kwagh u u soo yô. (Orpa. 11:4) Umbur wer, saa u fa we ka u u vôso or keng ve u hii u sôôr nan ga. Kpa vande fan wer u kuma u u vôso nom shin kwase shi or shon nana lu nom shin kwase u injaa.
10. Aluer u nenge wer or soo kwagh wou man we u gema u soo kwagh u nan ga yô, u er nena?
10 Kpa aluer u fa wer or soo kwagh wou nahan u er nena? Aluer ka a kuma u u lun a ishiôr ga yô, tese sha aeren a ou wang wer u soo ga. Aluer u soo nan ga, kpa u gema u ngu tesen sha aeren a ou wer u soo wer ne sôôr ayol a en yô a doo ga cii.—1 Kor. 10:24; Ef. 4:25.
11. Aluer se mba ken ityar i ka i tsôô kwase shin nom sha ci u or yô, ka akaa a nyi i gbe u se umburu?
11 Ken ityar igen yô, mbamaren mba or shin anmgbianev mba nan mba vesen ka ve tsua kwase shin nom sha ci u nan. Ken ityar igen di yô, mba hen tsombor shin azende a or ka a tese nan kwase shin nom maa ve ker gbenda nomsoor la vea kwase la ve zua ve nenge aluer ka u vea hii u sôôr ayol a ve yô. Aluer or kaa ér we u wase nan u keren nom shin kwase yô, nôngo fa akaa a or shon shin kwase shon nan lu keren ken or u nan soo u vôson yô. U zuan a or sha ci ve yô, nôngo kpoghuloo fa aeren a or shon man u hemban cii je yô, nôngo fa aluer nan ya ijende vea Yehova kôôsôô yô. Aluer or ya ijende a Yehova kôôsôô yô, hemba kan kwagh u vesen aa u or lun a inyaregh shin zan makeranta gayô zan iti la. Nahan kpa, umbur wer ka anmgbian u nomso la vea anmgbian u kwase la vea tsua u vôson ayol a ve ye.—Gal. 6:5.
U HII ISHIÔR NENA?
12. Aluer u soo u sôôr or yô, u ôr nan nena?
12 Aluer u soo u sôôr or yô, u ôr nan nena? e U fatyô u keren ijiir i ne fatyô u teman ken igbar lamen gayô lamen vea nan sha hanseeti. Ôr a nan wang wer, nan doo u ishima nahan u soo wer u seer fan nan. (1 Kor. 14:9) Aluer gba sha mi yô, na nan shighe nana hen sha mi. (Anz. 15:28) Aluer nan venda ér nan soo ga yô, de kighir nan wer nana lumun ga.
13. Aluer or kaa ér nan soo u sôôr we nahan, u er nena? (Mbakolose 4:6)
13 Aluer or kaa ér nan soo u sôôr we yô, u er nena? Umbur wer alaghga cier nan iyol u va lamen a we, kpa nan taver ishima nan va, nahan lam a nan kundu kundu man sha icivir. (Ôr Mbakolose 4:6.) Wea soo wer nana na u shighe u hen sha mi yô, ôr nan. Aluer ka u u lumun shin u venda kpa, ôr nan, de we ahô ga. (Anz. 13:12) Aluer u ngu vendan kpa, pase nan wang man sha icivir kpaa. Nenge kwagh u anmgbian u nomso ugen ken tar u Austria, iti na ér Hans, yange er shighe u anmgbian u kwase ugen pine un ishiôr yô. A kaa ér: “Yange m venda wang, kpa m gema m lam a na kundu kundu. Yange m ôr un kwagh u a lu la her je, sha ci u m soo mer a de henen ér me sôôr un ga. Sha ityôkyaa ne yô, hii shighe la je mea eren kwagh vea na yô, m wa ikyo sha er una va hen ér mo m gema ishima ga yô.” Kpa sha vegher ugen yô, aluer u soo u sôôr or la yô, pase nan ishima you kua gbenda u u soo wer ne eren akaa la. Alaghga akaa a u soo wer ne eren ken ishiôr yen la aa fatyô u kahan, hemban je yô, aluer aeren a ityôô a en shin mbamlu enev mbagenev mba kwaghmôm ga yô.
MBAGENEV VEA WASE MBAKRISTU MBA VE LU KWAV LA NENA?
14. Se sue Mbakristu mba ve lu kwav la sha iliam yase nena?
14 Se cii se wase Mbakristu mba ve lu kwav, mba ve soo u eren kwase shin nom la nena? Gbenda môm u se er kwagh ne yô, ka u wan ikyo sha gbenda u se lamen a ve la. (Ef. 4:29) Doo u se pine ayol a ase ser: ‘M eren asenge a ve a aa na vea torough u eren ivaa? Ka mea nenge anmgbian u nomso vea anmgbian u kwase mba ve lu kwav vea lamen maa m kure ikyaa mer mba sôôr ayol a ve?’ (1 Tim. 5:13) Heela tseegh ga, mayange doo u se na Mbakristu mba ve lu kwav la ve hen ér er ve lu kwav yô, kwagh ngu yinan ken ve shin ve gba kwagh ga ze. Hans u se vande ôron kwagh na la kaa ér: “Anmgbianev mbagenev ka ve pinem ér, ‘Er nan u lu a er kwase ga? U kera ngu wanye ga nahan u fa kpa.’ Ambaakaa ne ka a na yô, i lu mba ve lu kwav la inja er ve gba kwagh ga nahan, shi a na yô i hemba saren ve u eren nom shin kwase.” Nahan gba u se keren aan a wuese Mbakristu mba ve lu kwav la!—1 Tes. 5:11.
15. (a) Cii ve se wase or u keren kwase shin nom yô, ka nyi i gbe u se vande henen sha mini? (Mbaroma 15:2) (b) Ka akaa a vesen a nyi u hen ken vidio la? (Shi nenge foto kpaa.)
15 Aluer se nenge ser ma anmgbian u nomso vea anmgbian u kwase vea kuma imôngo di ye? Bibilo kaa ér se waan mnenge u mbagenev ikyo. (Ôr Mbaroma 15:2.) Mbaukwaav kpishi mba soon ér i tese ve or u vea vôso ga, nahan gba u se wa mnenge ve la ikyo. (2 Tes. 3:11) Alaghga mbagenev vea soo ér se wase ve u keren or, kpa aluer ve pine se iwasen ga yô, doo u se wa uwegh sha kwagh ve ga. f (Anz. 3:27) Kpa mbagenev mba soon ér i tese ve ishiôr jighilii ga. Anmgbian u kwase ugen ken tar u Jamani, iti na ér Lydia, a kaa ér: “U fatyô u sôron ian sha er anmgbian u nomso vea anmgbian u kwase la vea zua hen ma iniongo yô. Nahan vea faan ayol a ve yô, vea mase tsuan kwagh u ve soo u eren yô.”
Anmgbianev mba nomso kua mba kasev ka vea zua imôngo yô, ian i due i Mbakristu mba ve lu kwav la vea fatyô u fan ayol a ve yô (Nenge ikyumhiange i sha 15)
16. Ka nyi i gbe u Mbakristu mba ve lu kwav la vea umburu?
16 Sea lu kwav shin sea er ivaa kpa, a fatyô u saan se iyol! (Ps. 128:1) Nahan aluer u soo u eren ivaa man u ngu a zua a or u u vôso ga kpa, za hemen u civir Yehova her sha gbashima. Anmgbian u kwase ugen hen geri u Macao, iti na ér Sin Yi, a kaa ér: “Aluer u hen er u va vôso or ken Paradiso, ne lu imôngo gbem yô, u mase kaven er shighe u u lu kwav hegen ne a yen sha shighe la ica je yô. Nahan er kwagh a shighe u u lu kwav ne sha inja shi i saan we iyol kpaa.” Kpa aluer u zua a or, ne hii u sôôr ayol a en di ye? Ken ngeren u a dondo ne, se lu nengen er ne sôôr ayol a en ve a lu sha inja yô.
ICAM 137 Kasev mba Nan Jighjigh
a Aluer u soo u fan wea kuma u eren nom shin kwase yô, nenge ngeren u ken zwa buter u sha jw.org u a lu a itinekwagh ér “—Dating—Part 1: Am I Ready to Date?” la.
b ISHEMBER I I TE IWANGER SHA MI YÔ: Ishember “ishiôr” i i ôr kwagh u i ken ngeren ne man u a dondo la cii, ngi ôron kwagh u nomsoor man kwase seer fan ayol a ve, sha er vea fa aluer ka u vea va vôso vea hingir nom man kwase yô. Sha ajiir agen yô, ka i yila ishiôr kpaa ér iye, shin mbagenev yô ka ve kaa ér ka or wam je ne. Ishiôr ka i hii shighe u nomsoor nan pine kwase ishiôr gayô kwase nan er nahan la, man ka ve sôôr ayol a ve zan zan ve kar vôson, kpa ashighe agen yô, ka a va gba sha mi ga yô ishiôr i kpe.
c U ngeen kwagh ga yô, ken akumahiange a a dondo ne cii se lu yilan or u nan soo u eren ivaa la ser anmgbian u nomso. Nahan cii kpa, kwagh ne wa anmgbianev mba kasev kpa ker.
d I yila mbagenev ken ngeren ne sha ati a ve kpôô kpôô ga.
e Ken ityar igen yô, ka anmgbian u nomso ka nan pine anmgbian u kwase ishiôr ye. Nahan kpa, aluer anmgbian u kwase pine anmgbian u nomso ishiôr kpa ka kwaghbo ga. (Rutu 3:1-13) Wea soo u seer fan yô, nenge ngeren u ken zwa buter u a lu a itinekwagh ér, “Young People Ask . . . How Can I Tell Him How I Feel?” la ken Awake! u Oktoba 22, 2004 la.
f Nenge vidio i sha jw.org/tiv i i lu a itinekwagh ér Mba Ve Nôngo Kpoghuloo Ér Vea Lu a Jighjigh shi Ve Hembe Yô—Mbakristu mba Lun Kwav.
