1. Icam i wan ka i wase se u eren nyi?

ORDUGHUNAMO ugen u i fe un wuee yô, yange ôr shighe ugen la ér: “Asember ka a wase u u henen sha kwagh. Ityogholough di ka ki wase u u fan er ishima i lu u ker yô. Kpa icam yô, ka i wase u u henen sha ma kwagh.” Akaa a se fatyô u “henen” sha mi, a a hembe u wuese shi tesen Yehova, Ter wase u sha la dooshima je kpa, nga ga. Sha nahan yô, kera kpiligh se iyol er i hii ve icam i wan i lu kwagh u vesen ken mcivir u mimi ga, sea lu wan icam tswen shin sea lu wan vea tiônnongo u ior mba Aôndo imôngo kpaa.

2, 3. (a) Alaghga mbagenev vea nenge kwagh u wan icam gbungur gbungur vea tiônnongo la nena? (b) Ka mbampin mba nyi se lu timen sha mini?

² Nahan kpa, u nenge kwagh u wan icam gbungur gbungur vea tiônnongo la nena? Ka i lu u kwagh u kunya u eren nahanaa? Sha ajiir agen yô, alaghga a doo nomso u wan icam ken igbar ga. Ieren ne ia fatyô u benden a tiônnongo cii, hemban je yô, aluer mba ve lu hemen ken tiônnongo la, ker atôakyaa a wan icam ga, shin mba eren akaa agen zum u tiônnongo jimin cii a lu wan icam yô.​—⁠Ps. 30:⁠12.

³ Aluer mimi je se nenge icam i wan ser ka vegher u mcivir wase yô, se due ken won shin se bunde vegher u mkombo ne ga je ka u henen a hen ga. Sha nahan yô, gba u hanma wase nana pine iyol i nan ér: ‘M nengen icam i wan ken mbamkombo asev mba civir Aôndo la nena? Me er nan ve me hemba mciem ma alaghga ma a na me fatyô u wan icam sha iember ga laa? Shi me er nan ve me fatyô u wan atsam a ase er i gbe u a wa a la, sha ishima i mômô?’

4, 5. Yange i wa agoyol tsung sha kwagh u icam i wan ken mcivir sha ayange a Mbaiserael mba sha ayange a tsuaa la nena?

⁴ Mbacivir Yehova sha mimi er tom a ityogholough sha u wuese Yehova ica i gba hegen. Doo u se umbur ser, shighe u Mbaiserael mba sha ayange a tsuaa la vea civir Yehova sha mimi yô, icam i wan i lu kwagh u vesen ken mcivir ve. Ikyav i tesen yô, shighe u Tor Davidi lu wan agoyol sha tom u ken tempel la, a kohol Mbalevi iorov 4,000 ér ve kuhwa ityogholov mbi wuese Yehova. Iorov 288 ken ior mbara lu mba i “tese ve atsam a wan wuese TER, ka mba ve fa dedoo je la.”​—⁠1 Kron. 23:5; 25:⁠7.

⁵ Shighe u i lu tseghan tempel la, ityogholough man icam i wan lu kwagh u vesen u i er her yô. Bibilo ôr kwagh la kaa ér: “Tsô zum u mbatôngonikyor man mbawanatsam lu imôngo cii, lu wan icam imo i môm, sha u wuese TER sughun Un yô, zum u ve ger amo a ikyor man ukwen kua ityogholov, ve lu wuese TER [la], . . . iengem i TER iv iyou i Aôndo la.” Kwagh ne yange una seer taver jighjigh u ior je ka u henen a hen ga!​—⁠2 Kron. 5:​13, 14; 7:⁠6.

6. Pase gbenda u yange i wa atsam a doon tsung, i kuhwa ityogholov sha mi shighe u Nehemia lu gomna ken Yerusalem la.

⁶ Shighe u Nehemia hemen Mbaiserael mba ve lu civir Yehova sha mimi sha u hiden maan girgar u Yerusalem la, a kohol Mbalevi imôngo, ve lu wan atsam, kuhwan hanma ityogholough cii. Shighe u i lu tseghan girgar u i hide i maa la, ityogholov mbi doon tsung mbi i kuhwa shighe ne la na yô, seer saan ior iyol hen iniongo ne. Hen shighe ne, i ver “iniongo ihiar i vesen i wan atsam a wuese.” Iniongo ihiar ne due sha ajiir kposo kposo, za kohol imôngo hen girgar u lu ikyua a tempel la, maa ve genger amo i ungwa yem ica. (Neh. 12:​27, 28, 31, 38, 40, 43) Yange a doo Yehova u ungwan er mbacivir un lu wan icam wuese un sha gbashima je ka u henen a hen ga.

7. Yesu yange tese wang er i gbe u Mbakristu vea waan atsam, shighe u ve lu civir Aôndo la nena?

⁷ Sha shighe u i ver tiônnongo u Kristu la kpa, ityogholough za hemen u lun kwagh u vesen ken mcivir u mimi. Yesu yange ye kwaghyan u Ter aikighe vea mbahenen nav been kera, hen tugh mbu hemban lun a inja ken yiase i uumace cii la yô, a kure sha u wan atsam vea ve.​—⁠Ôr Mateu 26:⁠30.

8. Mbakristu mba sha ayange a mbaapostoli la ver se ikyav sha kwagh u wan atsam wuese Aôndo nena?

⁸ Mbakristu mba sha ayange a mbaapostoli la, ver se ikyav sha kwagh u wan icam imôngo wuese Aôndo la. Er ashighe kpishi yange ve kohol imôngo ken uya mba anmgbianev nahan kpa, ajiir a akuma akuma a civir Aôndo ne pande gbashima u ve lu a mi sha kwagh u wan icam wuese Yehova la ga. Icighan jijingi yange mgbegha apostoli Paulu wa anmgbianev nav mba ken Kristu kwagh, kaa ér: “Tesen nen ayol a en kwagh shi waan nen ayol a en kwagh sha kwaghfan cii, shi waan nen upasalmi man atsam man gberen nen amo a ken jijingi, sughun nen Aôndo ken asema a en.” (Kol. 3:16) Mimi yô, atsam a a lu ken takerada wase u atsam la ka ‘amo a ken jijingi, a sughun’ Aôndo. Atsam kpa, ka kwaghyan u ken jijingi u “wanakiriki u jighjigh man u fan kwagh” la a ne se yô.​—⁠Mat. 24:⁠45.

9. (a) Ka nyi ia na ve alaghga mbagenev vea cia u wan icam saan saan ken mbamkombo man mbamkohol aseva? (b) Se wa atsam a wuese Yehova nena, man ka unô i gbe u vea hemen sha u eren kwagh nee? (Nenge foto u a lu sha mhii u ngeren ne la.)

⁹ Kpa aluer ieren i wan icam la ka kwagh u tsombor wou shin ityô you shin ior ve eren hen ijiir you ga di ye? Iwavaren i ainge ne na yô, alaghga a doo u u ungwan atsam a mba ve fe u wan atsam tsema tsema, keren inyaregh la. Kpa ka wea tôô ikyenge you wea kar sha i mba ve we atsam sha u nan ior msaanyol ken tar ne la yô, alaghga kunya u kôr u a ikyenge you, shi  u va ahenge je kpaa. Nahan cii kpa, gba u kwagh ne una yange u u eren tom u u lu a mi u wan atsam wuese Yehova la ga. Kpa wea waan icam yô, kôr takerada u atsam wou la kende sha, shi kende ityough sha, maa wa icam sha gbashima! (Esera 3:11; ôr Pasalmi 147:⁠1.) Ken Ayou a Tartor kpishi nyian, ka a waan icam yô, asember a icam la a duen sha televishen, nahan kwagh ne a wase se u wan icam shon gbungur gbungur. Shi doo se kpishi er atsam kpa a lu môm ken akaa a mbatamen ka ve er shighe u ve ze Makeranta u Tsaase Mbatamen man Udiakon la yô. Kwagh ne tese wang er i gbe u mbatamen vea hemen sha u wan atsam ken tiônnongo yô.

10. Aluer mciem ma yangen se u wan icam gbungur gbungur yô, gba u se umbur nyi?

¹⁰ Kwaghmôm u ka a na ve ior kpishi ve soo u wan icam gbungur gbungur ga yô, ka mciem. Alaghga vea lu cian ér ikyenge ve ia due kposo shin ia doo mbagenev u ungwan ga. Nahan cii kpa, gba u se umbur ser ka sea lamen yô, “se cii se mba nenge gbev sha akaa kpishi.” (Yak. 3:⁠2) Kpa kwagh ne ka a yange se u lamen ga. Sha nahan yô, gba u se de ser ikyenge yase i icam i i doo i kom ga la i yange se u wan icam wuese Yehova ga.

11, 12. Ka mbamhen mbagen mba nyi nahan, i dugh a mi mba vea wase se se seer fan u wan icama?

¹¹ Alaghga se mba cie u wan icam sha ci u se fa er se wa icam ga. Nahan kpa, aluer se dondo mbamhen mba i dugh a mi la yô, vea wase se se hemba fan u wan icam. *

¹² U fatyô u henen u wan icam ikyenge ikyenge man sha utaha sha u ôôn tsembelee. Er usu u latriki ka u na bol a yegh usu nahan, kape iôôn ka i na ikyenge you tahav shighe u u lu lamen shin wan icam je la. Gba u u wa icam a due sha gbungur gbungur er ka wea lamen ve u er nahan, shin i hemba nahan je kpaa. * Mimi yô,  sha kwagh u wan atsam la, ashighe agen Ruamabera ka a taver mba civir Yehova ishima ér ve wa icam sha ‘iember tsung.’​—⁠Ps. 33:​1-3.

13. Pase er se fatyô u seer lun a vangertiôr ken icam i wan yô.

¹³ Shighe u u lu eren mcivir u hen tsombor shin u lu henen kwagh sha tseeneke wou je kpa, nôngo er kwagh ne: Tsua icam i i hembe doon we ken takerada wase u atsam la. Maa ôr asember a icam la sha ikyenge i taver taver, man a vangertiôr. U been yô, yila asember a a lu ken hwange icam la cii ken iôôn i môm, sha ikyenge i taver taver, er u vande eren nahan. Maa wa hwange icam la sha ikyenge i taver taver shon i môm. (Yes. 24:14) Sha nahan yô, ikyenge i icam you ia hemba duen gbungur gbungur, man kwagh ne ka kwagh u dedoo. Kunya u de ker u a ikyenge you shin cian u wan icam ga!

14. (a) Aluer se bugh zwa wase tsembelee hemba er ka sea lamen ve se bugh la yô, kwagh ne una fatyô u wasen se u wan icam nena? (Nenge ngeren u kiriki u a lu a itinekwagh ér “ Kwagh u U Er Ve U Seer Fan u Wan Icam Yô” la.) (b) Ka mbamhen mba nyi i dugh a mi sha kwagh u sôron mbamzeyol mba sha kwagh u ikyenge you, mba u nenge wer vea wase u laa?

¹⁴ Aluer u bugh zwa shighe u u lu wan icam ga yô, ikyenge i icam you ia fatyô u duen gbungur gbungur ga. Nahan mhen ugen u i dugh a mi yô ér, wea waan icam yô, bugh zwa tsembelee i hemba er ka wea lamen ve u bugh la. Aluer u nenge wer ikyenge you kar tsembelee ga, shin alaghga i kar yum nahan, gba u u er nena? U fatyô u zuan a mbamhen mba injaav, mba vea wase u u sôron mbamzeyol mban ken ngeren u kiriki u a lu a itinekwagh ér “Overcoming Specific Problems” (Gbenda u U Sôr Mbamzeyol mba Kpôô Kpôô Yô) la, ken takerada u Benefit From Theocratic Ministry School Education, peeji 184.

15. (a) Ka nyi yange i yôô sha mkombo u sha inyom i 2016 laa? (b) Ka atôakyaa agen a nyi yange na ve i due a takerada u atsam u he?

¹⁵ Shighe u Anmgbian Stephen Lett, u a lu môm ken Mbahemenev mba Shin Itine la yôô sha mkombo u sha inyom i 2016 u Watch Tower Bible and Tract Society of Pennsylvania ér, ica a gba ga tsô, a gema eren tom a takerada u atsam u he, u u lu a itinekwagh ér Wa Yehova Icam sha “Iember,” ken mbamkombo asev la, saan anmgbianev iyol kpishi. Anmgbian  Lett yange pase ér ityôkyaa i môm i i ne ve i hidi i ser atsam a ase ne yô, ka sha ci u a zua sha Bibilo yase i New World Translation of the Holy Scriptures, i i hidi i ser la. Kwagh ne na yô, gba u a sôr shin a dugh asember a atsam a a zough sha Bibilo i New World Translation, i yange i hide i sôr ken inyom i 2013 ga la kera. Heela tseegh ga, yange i dugh atsam a he sha kwagh u tom wase u pasen kwagh la, kua atsam agen a wasen se u tesen iwuese sha naagh ku ipaan la kpaa. Shi er atsam a lu kwagh u vesen ken mcivir wase yô, Mbahemenev mba Shin Itine yange ve soo u eren takerada u atsam u doon tsung, sha u u zua sha igbende i Bibilo i New World Translation, i i hidi i ser la yô.

16, 17. Ka akaa a nyi nahan, yange i sôr ken takerada u atsam u he laa?

¹⁶ I sôr atsam a ken takerada u Wa Yehova Icam sha “Iember” la i ver sha atineakaa kposo kposo sha er a hemba lun se ican ga u eren tom a mi yô. Ikyav i tesen yô, atsam 12 a hiihii la, nga ôron kwagh u Yehova, atsam a 8 a a dondo la di nga ôron kwagh u Yesu man naagh ku ipaan kura. Kape i ser atineakaa ne i ver vough vough je la. Heela tseegh ga, shighe u se soo u tsuan icam sha ci u kwaghôron u ken igbar yô, atineakaa a i nger vough vough la aa wase se u eren kwagh ne.

¹⁷ I hide i sôr asember a atsam agen ér kwagh u i lu ôron la a seer wanger, shi i dugh asember agen a ior ve fe lamen a mi hegen ga la kera, sha er a doo hanma or u wan atsam a ase a ishima i môm yô. Ikyav i tesen yô, asember agen a ior ve kera fe eren tom a mi nyian la ga, i dugh a kera, i gema i wa asember a ior ve hembe eren tom a mi shi a taver u kaven ga la. Heela tseegh ga, icam i i lu a itinekwagh ér “Long-Suffering” (U Yan Ican Gbem) la, i sôr hingir “Exercise Patience” (Waan Nen Ishima), nahan asember a icam la kpa maa i sôr a je. Shi yange i sôr icam i i lu a itinekwagh ér“Guard Your Heart” (Kura Ishima You) la, hingir “We Guard Our Hearts” (Se Kura Nen Asema a Ase) nahan, hemba doon cii. Hemba doon cii sha ci u nyi? Luun er i ser icam la ga yô, mbahev man mba i sar ve u seer fan mimi la, man agumaior kua anmgbianev mba kasev kpishi, vea gberen i ken mbamkombo asev yô, ve hingir u lun sha ian i wan ior kwagh, man doo u a lu nahan ga. Sha nahan yô, yange i sôr itinekwagh i icam ne kua asember a i.

18. Gba u se fa atsam a a lu ken takerada wase u atsam u he la sha ci u nyi? (Nenge ngeren u shin kpe la.)

¹⁸ I nger atsam kpishi a a lu ken takerada u atsam u Wa Yehova Icam sha “Iember” la, er ka msen nahan. Atsam ne aa wase u u pasen Yehova er ishima i lu u ker yô. Atsam ne agen di a a wase u u ‘taver se asema u lun a dooshima man aeren a dedoo.’ (Heb. 10:24) Sha mimi yô, se soo ser se fa asember a atsam a ase ne man ikyenge i a, kua ityogholov mbi i koho sha mi la kpaa. U fatyô u eren kwagh ne sha u ungwan atsam i we sha zwa i koho ityogholough sha mi, a i ver sha ijiir yase i sha Intanet i jw.org la. Aluer u ngu henen atsam ne ken ya yô, u fatyô u fan u wan a vangertiôr kua sha ishima i môm kpaa. *

19. Mba ken tiônnongo cii vea fatyô u civir Yehova jighilii ken icam nena?

¹⁹ Umbur wer icam i wan kpa ka kwagh u vesen ken mcivir wase. Ka gbenda u vesen ugen u tesen Yehova dooshima wase shi wuese un je la. (Ôr Yesaia 12:⁠5.) Aluer u ngu wan icam sha iember yô, mbagenev kpa u taver ve ishima u wan atsam vangertiôr. Sha kpôô yô, mba ken tiônnongo cii, a lu agumaior shin mbabeenyol shin mba ve sember tesen isharen la kpa, vea fatyô u wan atsam, sha ci u atsam kpa ka gbenda u vesen u civir Yehova. Sha nahan yô, de palegh u pasen ishima you ken icam ga. Kpa gema dondo kwagh u icighan jijingi mgbegha orpasalmi nger wang ne, ér: “Wa TER icam.” Sha mimi yô, wa icam sha iember!​—⁠Ps. 96:⁠1.