Yange i marem ken inyom i 1983. Shighe u m lu wanye kpuaa la, m lu gbang gbang kwagh môm zam iyol ga. Kpa m va nyer anyom pue yô, iyol cii hii u nyoon mo kpoghuloo. Anyom nga kar er ahar nahan yô, iyange igen la m nder pepe maa m kera gba fantyô u zenden ga. M nôngo nan nan kpa angahar am lu moughon ga sha ci u tahav lu ga. Hii iyange la zan zan nyian m ngu a mough m zende ga. Kwaghnyoon wam ne shi na m kera vese m seer ga. Zan zan nyian kpa, m ngu di er ka an-wanye nahan.

Yange kwaghnyoon ne kôrom m lu hen inya nahan lu kwagh u me fatyô u moughon zan mape ga, hanma shighe m lu hen ya. Iwer ngi kar kpuaa yô, iyange igen la Mbashiada mba Yehova uhar va hen ya wam. Kera yô, yange ior a vaan hen ya wam yô m yevese m za yer kpa iyange la yô, m de kasev mban lam a mo. Mba ngur lamen a mo sha kwagh u paradiso yô, m umbur kwagh u yange m vande ungwan shighe u m lu er anyom ataan nahan la yô. Shighe la ormishen ugen u ken tar u Suriname a va hen anijiir wase ne kwa môm ken uwer a va hen Bibilo vea terem i yilan ormishen shon ér Jethro. Jethro yange a er a mo kundu kundu kpen kpen. Yange m soo kwagh na kpishi. Shi ashighe agen mbamaren av mba vesen ve tôôm se yem mkombo u Mbashiada mba Yehova imôngo. Yange i nyôr mbamkombo mban hen anijiir wase la. Nahan shighe u Florence u lu môm ken kasev mba ve pasem kwagh sha iyange i hiihii la pinem ér me soo u henen kwagh u Bibilo seeree yô, m kaa mer een.

Florence yange hide va vea nom na Justus man ve va hii u henen Bibilo a mo. Yange mba fe ér m fa takeda u ôron ga yô, ve wasem m hen takeda u ôron. Shighe kar yô m gema ôron takeda iyol yam. Iyange igen la yô ve va kaa a mo ér i tindi ve ér ve za pase kwagh ken tar u Suriname. Kwagh er vihi yô, or môm lu ken Orealla u nana za hemen u henen Bibilo a mo ga. Kpa kwagh u doon di yô, Yehova hungur a mo ga.

Yange ica i gba ga je maa pania ugen u i yilan iti na ér Floyd yô va ken Orealla nahan dugh gbe pasen kwagh sha uya uya yô a va zua a mo. Kaan a mo ér una hen Bibilo a mo yô maa m se. Maa a pinem ér: “Er nan ve u lu sene? Maa m kaa a na mer m vande henen antakeda u Kanyi Aôndo a Soo her Avese? la been, shi yange m hii u henen takeda u Mfe u Una Va a Uma u Tsôron La. * Shi m ôr un ityôkyaa i yange i na ve kwaghhenen la kera za hemen ga yô. Floyd maa mase henen takeda u Mfe la a mo been. Kpa ken masejime yô, un kpa shi i va  tindi un ér a za pase kwagh hen ijiir igen. Man shi or kera lu u tesen mo Bibilo ga.

Kpa ken inyom i 2004 la i tindi ikpur pania uhar ken Orealla, i yilan ugen la ér Granville ugen la ér Joshua. Yange ve due ve lu pasen kwagh sha uya uya man shi ve va zua a mo. Mba pinim ér me soo u henen Bibilo, yô m se. Yange m kaa a ve mer ve hide ve hii u henen takeda u Mfe la vea mo ken ityô na. Yange m soo mer me fa aluer akaa a vea tesem la a a lu kwagh môm a mba yange ve vanden henen Bibilo vea mo la tesem la yô. Granville kaa a mo ér mba nyôron mbamkombo hen anijiir wase la. Er m kera due hen ya ga je zurum anyom pue nahan kpa, m soo u zan. Nahan Granville va tuur mo shin ikyekye i mbaawanev yem a mo ken Iyou i Tartor.

Shighe kar yô, Granville taver mo ishima ér m nyôr Makeranta u Henen Tom u Hemen u Aôndo. Yange kaa a mo ér: “U gba iwan kpa u lamen. Yange sev a hungwa a av u na kwaghôron u ken igbar. Kwagh a er nahan keng je.” Kwagh u ôr a mo ne yange taver mo ishima shi nam vangertiôr kpaa.

Yange m hii u duen kwaghpasen vea Granville. Nahan kpa igbenda i hen anijiir wase la i lu côu côu shi i lu agber agber nahan i doo u tuur ikyekye i mbaawanev sha mi ga. Nahan m kaa a Granville mer a tôôn mo shin wiibalo. Kwagh la yange wase kpishi. Ken uwer u Aipor inyom i 2005 la, i erem batisema. Yange ica i gba ga je anmgbianev mbara tesem u nengen sha ityakeda i tiônnongo shi tsaase mo u nengen sha akaa a samber a iliam ken Iyou i Tartor.

Kpa kwagh er vihi yô, ken inyom i 2007 la, terem nyôr tso man za due gba, injin u tso la vihi un iyol maa kpe. Kwagh ne yange vihi tsombor wase kpishi. Granville yange er msen vea vese shi ôr se avur a Bibilo a surun se ishima. Anyom nga kar ahar yô, shi kwagh u vihin ugen va er se; yange tso ur a Granville tugh man kpe.

Tiônnongo wase u lu zungwen tsung u ngee a ior ga ne kera lu a ortamen ga, mase shin di a orshiren tiônnongo môm. Ku u Granville ne yange u nyoon mo tsung sha ci u lu ijende yam i ishima ishima. Yange wasem u yan ijende a Yehova kôôsôô shi a wasem sha mbamgbe av mbagen kpaa. Yange kpen kera yô, mkombo u dondo la gba u me ôr akumahiange shighe u a lu Henen Iyoukura ken tiônnongo yô. Yange m ôr di akumahiange a hiihii a ahar la tseegh maa m hii u vaan. Yange m vaa zan zan gande m hungwa sha tsembe kera.

Yange anmgbianev mbagen mba moughon ken tiônnongo ugen mba gbe va wasen se hen Orealla yô, hii u lun mo guda. Shi branci tindi ikpur pania hen ijiir yase ne, i yilan un ér Kojo. Kwagh er u saan mo iyol yô, ngôm man anmgbian wam u kiriki ve hii u henen Bibilo, maa ve va er batisema. Ken uwer u Maaci inyom i 2015 la, i tsuam ér m hingir orshiren tiônnongo. Shighe kar yô m na kwaghôron wam u ken igbar u hiihii. Yange saan mo iyol shi m vaa kpishi sha iyange shon sha ci u m umbur kwagh u Granville yange ôr a mo ken anyom a karen ken ijime ér: “Yange sev a hungwa a av, u na kwaghôron u ken igbar. Kwagh a er nahan keng je” la.

M nenge uporogeram mba sha Ityôgh yasegh ki Televishen ki Mbashiada mba Yehova la nahan m nenge kwagh u Mbashiada mbagen, nomso man kasev mba ve kpa ve lu ken imba mlu wam ne yô. Er ve lu dedoo ga nahan kpa, ka ve fatyô u eren akaa kpishi shi saan ve iyol kpaa. Mo kpa ka m fatyô u eren akaa agen. Yange sarem tsung u civir Yehova sha afatyô wam cii, nahan kwagh la mgbegham u tôôn pania u keke. Ken uwer u Setemba inyom i 2019 la, i va ôrom ibaver i doon tsung i i kpiligh mo iyol yô! Ken uwer shon la, i pasem ér i tsuam ér m hingir ortamen ken tiônnongo wase la. Tiônnongo wase ne ngu a mbapasenkwagh er 40 nahan.

M wuese anmgbianev mba nomso man mba kasev mba yange ve hen kwagh a mo shi ve wasem u civir Yehova ne. Kwagh u hemban cii yô, m ngu a iwuese kpishi er Yehova a kendem ga yô.